المساعد الشخصي الرقمي

مشاهدة النسخة كاملة : فكرة جديدة بثواب كبييييييييييييييييييييير



بحر الإسكندرية
28-11-2003, 12:33 AM
أنا في فكرة خطرة في بالي النهاردة و يا ريت تفكروا فيها معايا .
بس الأول أنا ليا طلب منكم , هو انكم تردوا بصراحة , بمعني من غير مجاملة , يعني ( يا سلام دي فكرة جميلة , شد حيلك , و كده يعني ) برضه الواحد مش بيرفض التشجيع بس الصراحة مطلوبة :)

الحمد لله أعضاء المنتدى من معظم الدول العربية و الاسلامية و كمان في بعضهم في دول أجنبية ,
أنا فكرت لو نعمل حاجة في المنتدى الغرض منها التبرعات للمحتاجين و الغلابة , يعني على حسب ما سمعت ان علي أمين و مصطفى أمين كانوا بيعملوا حاجة اسمها ليلة القدر , و اليوم ده كانوا بيلفوا على بيوت الناس اللي محتاجة مساعدة و بيساعدوهم ,
أنا فكرت لو انه ينفع نعمل مثلاً رقم حساب في بنك يكون ليه فروع كتير في دول عربية و أجنبية و يكون موثوق فيه , و رقم الحساب ده يكون بمثابة بيت المال للمحتاجين , و نحدد أفراد قد مسئولية توصيل مبالغ مقدّرة للأسر المحتاجة في أي دولة .
في حاجات تانية عايزة أطرحها بس مش مترتبة دلوقتي .

أنا عايز أسمع رأيكم في الفكرة دي و يا ريت لو الادارة حست من الفكرة دي انها مجدية تعمل اعلان لها عن طريق ارسال رسايل للأعضاء علشان نوصل لأراء و أفكار تساعدنا .

جزاكم الله كل خير و ان شاء الله ربنا يوفقنا في فعل الخير

مودو مشاكل
28-11-2003, 12:49 AM
هي فكرة حلوة
بس مش لما نكفي الاسر المحتاجة في مصر الاول نبقي نبعت للاسر اللي خارج مصر
ولا انت شايف اية ؟؟
بس علي العموم انا شايف ان الفكرة جديدة
بس انا مبحبش ادخل في الامو المالية لانها كلها مشاكل
فخاول تتجنب المشاكل

بنت مصر
28-11-2003, 12:53 AM
يا سلام دي فكرة جميلة , شد حيلك :5:

يا بحر بجد الفكرة جميلة وانسانية جدا
بس انا ماعنديش اي تصور لكيفية تنفيذها
وكمان مش عارفة ايه مدى مشروعيتها

عشان كده حاستنى اشوف رأي باقي الاعضاء من اصحاب الخبرة


شكرا يا بحر على الفكرة النبيلة وجزاك الله كل الخير


بسنت

ماما زوزو
28-11-2003, 12:53 AM
جزاك الله انت خير الجزاء

فكرة رائعة يابحر:17: :17: :17:
مش مجامله والله

فعلا برافووووووووووووو عليك:13::13:
ياريت تتنفذ فعلا.........
كل سنة وانت طيب...........
:127:

بحر الإسكندرية
28-11-2003, 01:02 AM
أخي اسلام
الفكرة مش قائمة على اللي خارج مصر فقط , الفكرة قائمة على اللي خارج مصر و اللي داخل مصر .
و بالنسبة الأمور المالية لو احنا طبقنا الفكرة صح و درسناها كويس ان شاء الله هنوصل لنتيجة كويسة بدون حدوث أي مشاكل في تنفيذها .

أختي بسنت
اخنا ممكن نسأل في موضوع البنك ده و نستفسر عن كيفية تطبيق حاجة تساعدنا في الفكرة دي , و كمان نسأل عن كيفية عمل التبرعات اللي بتعملها مثلاً الشركات و الهيئات الخاصة , و مثال على التبرعات دي موضوع مستشفى سرطان الأطفال .

أخي أو أختي mahe128
جزال الله كل خير :)

te3mah
28-11-2003, 01:59 AM
بسم الله ما شاء الله
فكرة رائعة فعلا يا بحر
بس دي مسئولية كبيرة قوي
والجزء الكبير منها هيقع على ابن البلد لإنه صاحب المنتدى
وبرضه أنا مش فاهمة موضوع البنك ده هيمشي إزاي
عموما الفكرة مقبولة جدا
وكلنا محتاجين لصدقة جارية تشفعلنا بعد الموت
وفي انتظار آراء الجميع :)

محمد البنيان
28-11-2003, 07:17 AM
الاستاذ بحر الاسكندارية

بارك الله فيك على هذا الطرح المفيد

والله فكره جدا ممتازة ،،،،،
وليس تكسير من مجاديفك ،،، ابدا

بس الامر صعب في عملية جمع المال
وهذه امانه ،، وفعل الخير واجب على كل مسلم

بس اراى ان كل شخص في بلده يتبرع بما يجود
لاسر فقيره او توصيل المال الي الجمعيات الخيرية المنتشره في كل بلد
او توصيل المال لاقرب بيت فقير في حارة كل شخص
وهذا ماراى


اما حكاية البنك فهي صعبه جدا وجمع المال اصعب
والتويع كذلك



اما الاقتراح
ان تكون هناك رسالة دورية لجميع الاعضاء في نهاية كل شهر
عبارة عن تذكير بعمل الخير بكل مايجود العضو
وابواب الخير والصدقة ومساعدة الاسر مفتوحه



واكرر شكر لك

من محب لك

بحر الإسكندرية
28-11-2003, 02:46 PM
أختي العزيزة / طعمه
بالنسبة للمسئولية انها تكون على ابن البلد أو جزء كبير منها علشان هو صاحب المنتدى أنا مش موافقك , المسئولية أنا شايف انها تعم على الجميع .
أنا عايز أسمع افتراحك و ان شاء الله ربنا يقدم اللي في الخير :)

أخي العزيز / محمد البنيان
موضوع ان كل واحد يتبرع بنفسه للمحتاج أنا معاك فيها , بس برضه لو كنا كلنا مع بعض في مشوار زي ده هيكون هناك نوع من التشجيع و المثابرة على فعل الخير و كمان علشان نكون كلنا مع بعض يوم القيامة و ربنا يرزقنا الجنة جميعاً بإذنه .

بالنسبة لموضوع البنك عايز نفكر مع بعض فيه علشان نوصل لنتيجة ان شاء الله توصلنا للبدأ في المشروع ده .

و جزاكم الله كل خير :)

ابن البلد
28-11-2003, 07:00 PM
لي عوده

جنان الفردوس
28-11-2003, 11:47 PM
بص يا محمد أنا موافقة على الفكرة دي..
لانها فكرة رائعة جدا ..
بس أنت عارف انا مبفهمش في الحاجات دي...
فأنتوا فكروا براحتكوا ..
وانا هقعد اتفرج عليكم وفي الآخر أنفذ معاكم ان شاء الله..
لان انا لو فكرت معاكم يبقى الدنيا هتتخرب..:5:

بحر الإسكندرية
29-11-2003, 11:32 AM
ابن البلد
احنا في انتظارك عودتك و ردك الكريم :)

جنان الفردوس
أنا مش عايزك تقعدي تتفرجي بس و بعد كده تساعدينا في التنفيذ ان شاء الله , أنا عايزك تفكري معانا كمان , دي فرصة التفكير في تنفيذ موضوع زي ده فيه ثواب :)

جنان الفردوس
29-11-2003, 10:48 PM
خلاص ماشي ولا تزعل نفسك...
افكر معاكم..
أنا بس كنت عايزة أسال عن حاجة..
انتوا ازاي هتجمعوا الفلوس دي..
إذا كان أساسا فكرة البنك اللي انتوا قلتوا عليها دي مش هتنفع..؟؟

بحر الإسكندرية
29-11-2003, 11:04 PM
طب و ايه اللي خلّه حكاية البنك متنفعش ؟؟

جنان الفردوس
29-11-2003, 11:24 PM
انا مش عارفه انتوا اللي قلتوا كده في الصفحة اللي فاتت..
أنا قلت لك يا محمد خرجني من الحكاية دي..
:5:

بحر الإسكندرية
29-11-2003, 11:33 PM
لأ يا ستي , محدش قال ان موضوع البنك مش نافع
لسه الموضوع قيد المناقشة :)

جنان الفردوس
29-11-2003, 11:50 PM
خلاص ماشي..
:)

وادكول مش معقول
30-11-2003, 06:31 AM
بحر اسكندرية ...

انت انسان شعورك نبيل ورقيق ...

بس ممكن اقولك راي بصراحة في الفكرة ....

لو علي المحتاجين كتير .... ولو علي التبرع الجهات كتيرة قوي ...

يعني ممكن لو اتبرعنا لمستشفي 57357 هيكون فايدتها كبيرة قوي ...

بس عن طريق المنتدي انا لا اظن انها فكرة كويسة ...

لان اولا من منا عنده الوقت الكافي لمتابعة الموضوع ده .... غير ان موضوع زي ده مش بالسهولة دي .... لان موضوع زي ده محتاج تصاريح من جهات رقابية كتيرة والا يعتبر جمع تبرعات بدون تصريح ...

وبعدين توصيل المبالغ من دولة لدولة مش بالسهولة دي لان فيه عمولات تحويل ... يعني مثلا علشان اتبرع ولو بخمسة جنيه هادفع قدهم عمولات للبنك زيهم .... يبقي الاولي ان ال 10 جنيه كلها اديها لمحتاج في المكان اللي انا فيه .... لان البنك مش محتاج ..



فهل يا تري وجهة نظري وصلتك ....

بس ده لا يمنع ان فكرتك رائعة وانسانية بالدرجة الاولي ...

ابن البلد
30-11-2003, 07:36 AM
أنا جيت
والله يا محمد هي فكرة حلوة :confused:
ويمكن من سنه كان إسلام وبسنت فكروا في عمل برضك حاجه زي كده بس للفلسطنين
بس تأكد أن الموضوع هيجيب مشاكل كتيره جدا ملهاش اول ولا آخر
واهمها ان الناس مش هتتبرع و ممكن يقولوا نصبين
ويمكن الدوله تقبض علينا بتهمت إقامة جمعيه للم التبرعات بدون إذن من جهه معينه أحنا منعرفهوش

يعني في الآخر خيرا تعمل شرا تلقي
وبعدين طالما هتلموا تبرعات
يبقه ياريت تتبرعوا لي بقه علشان ألحق أجهز يوسف :D

بحر الإسكندرية
01-12-2003, 01:27 AM
طب بلاش لدول أخرى ,
مش ممكن تتنفذ داخل مصر ؟

Eskandarani
01-12-2003, 08:19 PM
أخواتي الكريمات وإخواني اكرام

أولاً السلام عليكم ورحمة الله وبركاته

والله يا بلدياتي الحبيب الفكرة نفسها رائعة ولك ثوابها عند الله عز وجل بإذن الله ولكن الأمر(خصوصاً في الوقت الراهن) صعب ومعقد بدرجة لايمكن لعقلك أوحتى لخيالك تصورها في ظل نظم سياسية وأمنية وإقتصادية وإدارية معينه (!؟) فلا تتوقع انك بهذه البساطة تستطيع التوجه لأي بنك مصري خاصة وعربي عامة طالبا فتح حساب تبرعات بإسم ما !، فلابد من إنشاء جمعية (بعد موافقة أمن الدولة والداخلية ووزارة الشئون الإجتماعية ووزارة العدل وأخيرا بعد إشهار الجمعية بالشهر العقاري وإعتماد أصحاب التوقيع لصرف الأموال) واقسم بالله انك ستندم ان الفكرة خطرت ببالك أساساً فما بالك بتنفيذها!؟ هل تخيلت نفسك في عصرالفارق اوعصر العُمرين رضوان الله تعالى عنهم

هل تعلم انك بفكرتك البسيطة الكريمة تفتح لنفسك ابواب الجنة السماوية وفي نفس الوقت تفتح على نفسك ابواب جهنم الأرضية تحت نظم سياسية وأمنية وإدارية معينة ! هل سمعت عن رجال أعمال سعوديون ومصريون ويمنيون بل وأمريكان مسلمون (تحديدا) أفلسوا في السنوات الثلاث الماضيات لكونهم أصحاب موسسات خيرية ومراكز عون مادي ومعنوي بل منهم من يمتلك بنوكاً بعد فرمان أصدره الشيطان الأعظم "حكومة أمريكا" لحكومات وأجهزة أمن الدول المنتسبين اليها هؤلاء الرجال بتحديد إقامتهم وللبنوك بتجميد كل أرصدتهم ومشاريعهم ليصبحون هم أنفسهن في الحاجة الى العون والمساعدة وحتى أرصدتهم فى بنوك سويسرا لم تكن ببعيدة عن سلطتهم وسطوتهم بدعوى بل بإعتقاد أنهم مساندي الإرهاب ومموليه وبالتالي من يتبرع لمؤسساتهم وجمعياتهم !!!!! (وبالمناسبة التحقيقات تتم بمعرفة ال FBI !! وهم منتشرون بشوارع الرياض والقاهرة وغيرهما) يا ألهي ما هذا الذي يحدث بنا !!

والله يا اخي لم أقصد أن أقلل من عظيم فكرتك فهي لوجه الله ولنصرة معوزينا من المحيط الى الخليج ولا أقصد ان اسبط من حماسك ويقظة ضميرك وطيب معدنك ومرؤتك

وأخيراً وليس أخراً لك عظيم إحترامي ومحبتي في الله، وأختم بدعائي لله عز وجل ان ينصرنا لنصرته بعد أن شلت أيدينا لعمل الطيب وخرصت ألسنتنا لقول الحق! ولم نعد حتى لنجهر بالدعاء وأصبحنا نسره اليه سبحانه

بحر الإسكندرية
02-12-2003, 02:46 AM
أخي الكريم / Eskandarani
أنا بأشكرك على تنبيهك الكريم ده , بس بصراحة أنا حسيت بعد لما قرأت ردك اني داخل السجن ( متزعلش :) )
مفيش فكرة جديدة أول لما تبدأ بتبدأ كبيرة و نشاطها واسع , أنا وجهة نظري في الفكرة انها تبدأ بسيطة صغيرة , يعني مثلاً في الأسكندرية و مش لازم يكون رقم الحساب اللي في البنك باسم جمع التبرعات , يعني بنّا و بين بعض , و بعض كده ربنا يسهلها , دي وجهة نظري .
تحياتي لك أخي الكريم

طارق بن زياد
08-12-2003, 07:51 PM
أخي الفاضل جزاك الله كل خير على طرح هذا الموضوع الهام لشريحة موجودة في مجتمعنا لا تملك مؤهلات و لا مصدر للدخل و لا معاشات و تحتاج الى المساعدة للعلاج و المعيشة و مواجهة أعباء الحياة
ولكن ما دامت هناك عدة جمعيات فعلا منها:
1- ليلة القدر التي تحتاج للتبرعات لحالات معروفة لديهم
2- جمعية علاج معهد الأورام أو استكمال مشروع 57357 الذي يعلن في التليفزيون
3- جمعيات الايتام على مستوى الجمهورية
و غيرها من جمعيات خيرية تحتاج مساهمات من أهل الخير

و الواجب دعم تلك الجمعيات التي بها قائمة مستحقين جاهزة
و موضوع تجميع تبرعات هو موضوع قانوني اجتماعي حتى يكون بطريقة غير معرض للانتقاد من أي جهة رسمية أو غير رسمية
فاذا توافرت وسيلة لذلك بعد الموافقات الممكنة فاتمنى لها التوفيق و الاستمرار

بحر الإسكندرية
09-12-2003, 01:02 AM
أخي العزيز / طارق بن زياد
جزاك الله كل خير على مشاركتك في الموضوع ,
و أنا كنت بأتمنى ان الفكرة دي تتعمل بس ظهرت بعض الحاجات أنا مكنش عندي فكرة بيها و مكنتش أعرفها .
بس أنا بأشكر كل اللي شاركوا معايا في التفكير في الفكرة دي و كل من ساهم بأقتراح و كل اللي ردوا في الموضوع , و ان شاء الله تتنفذ الفكرة دي بشكل أو بآخر في وقتها المناسب بإذن الله .

تحياتي للجميع