المساعد الشخصي الرقمي

مشاهدة النسخة كاملة : علاج للقضاء على العزوبية



منصورية
10-11-2008, 07:03 AM
نزلت في يوم الصيدلية

أسأل عن علاج للعزوبية
وصفولي الحياة الزوجية
ونصحوني قبل ما أخده أقرا النشرة الداخلية
قلت مش مهم بس أقضي على اسمها ايه دية
وفعلا دخلت قفص الحياة الرومانسية
حب ودلع وأهم من ده كله مابقيتش لوحدية
وفي كل مناسبة نجيب لبعض هدية
ونختلف لكن نتناقش ونوصل للحل بصورة ودية
ونجيب عيلين يبقو عزوة ويملو علينا البيت شوية
عظيم خفيت من العيا وعايشة حياة هنية
نتفسح ونخرج وكله مية مية
وتيجي خناقة, زي الموجة بسرعة تروح معدية
ونقول دي من توابل الحياة الأساسية
وتمر مشكلة بسيطة كدة, أمور شكلية
مش مهم مين غلطان دي مش مواضيع جوهرية
طالما القصد خير, فإنما الأعمال بالنية




هي مالها الحياة كده بقت عادية؟
والمعارك كترت كدة لية, كانت فين مستخبية؟
قومي اكوي لي القميص يا ولية
الله؟ مش ده اللي قبل كدة كان بيقول يا نور عنية؟
بص كويس في دولابك حتلاقى قمصانك كلها مغسولة ومكوية
هبلت في الرد أنا باين علية
مش مهم حأرد بطريقة أحسن المرة اللى جاية
ايه اللي أنا حاسة بية ده ايه اللي بيجرا فية؟
وصبحت في يوم الصبحية
لقيت الدنيا بتلف بية
ومش قادرة تشيلني رجلية
وضغطي تلتمية وعشرين على تلتمية
على شوية آلام معدية
قلت أقرا الآثار السلبية
العلاج كله جوانب ايجابية
إلا أن القولون حيبقى دايما في حالة عصبية
وقد يحدث تضخم في الغدة الدمعية
وانتفاخ في الجفون الفوقانية
يصاحبه اكتئاب في الحالة النفسية
وتورم في الأحبال الصوتية
وتقلبات في الحالة المزاجية
وتغيرات شكلية
يا إما سمنة يا إما نحافة مرضية
شراهة أو فقدان شهية
تخمة من الاختلافات الفكرية
حموضة واضطرابات في القناة الهضمية
أنيميا وسوء تغذية
بدل الحديد , بلع زلط وقنابل نووية
على نسيان شوية مشاعر ضرورية
وارتجاج في الأوضاع الدماغية
طول اليوم أعمال منزلية
بيت وولاد وتربية
أعباء وتحمل مسؤولية
تصل لآلام روماتزمية
وأوجاع في السلسلة الفقرية
زعيق وخناق وحاجات جنونية
تأخر في القوى العقلية
نشاط في في جهاز المناعة اللي بقى دايما في حالة دفاعية
ضد الحروب البكتيرية
تصلب في الشرايين الهيامية
وانقباض في المشاعر القلبية
إمساك عن الكلمات الاعتذارية
اسهال في الشتائم المؤذية
توطن أمراض النكدية
التحول من حالة طيبة لحالة مفترية
فتق من كتر العنادية
انفجار في الزايدة الدودية
قصور في الوظيفه الكلامية
زيادة افراز هرمون العبودية
برد ونزلات شعبية
من كتر الأمطار الرعدية
وقد تشتكي من حساسية
وجيوب أنفية
وقلة حيلة وضعف شخصية
وصداع على شوية كبت حرية
وحبة أمراض مزمنة مستعصية
تدهور عام في الحالة الصحية
ولتخفيف هذه الآثار يرجى شرب مياه معدنية
وأكل الكثير من الخضروات الورقية
وقريت ملحوظة تحت اللآثار الجانبية
يجب المواظبة على العقار والاستمرارية
لكل اللي عاوزين الحياة الاسرية
فقد اثبتت الابحاث العلمية
أنه الوحيد من بين الأدوية
اللي يقدر يقضي على الحالة اياها بمنتهى الفاعلية
وأنا اللي كنت فاكرة الحياة جميلة وردية
ياريتني سمعت كلامهم يوم ما كنت في الصيدلية

the_chemist
11-11-2008, 10:16 PM
ههههههههههههههههههههه

حلوة القصيدة الجراحية ديه

حلوة حياة الحرية والعزوبية

لكن لها أثارها السلبية

اللى أقوى من الزوجية

وحدة ومعاناة وآلام ليلية

برد في عز أيام الصيفية

لفحة هوا تقتلنا شوية

والزوجية برغم الحياة النكدية

بس فيها دفا في أيام الشتوية

ولما تقول الآه تلاقي الحنية

تلاقي إيد دافية بتطبطب عليه

ونون يملا الحياة بهجة وحيوية

ولما تقولى الآه تلاقي طفلك جنبك

بكل قلق وخوف يناولك الأدوية





طبعا مش بجمال كلماتك بس تمشي برضوا

هههههههههههههههههههههههههههههههه

:f: :f: :f: :f:

محمود عوده
11-11-2008, 11:07 PM
هاي القصيده خلت التكشيره مش حتفك بلمره

منصورية
12-11-2008, 07:42 AM
شكرا لمروركم
بس ماافتكرش ان كل الزواجات لازم تنتهي النهاية المئسوية ديه :y:

the_chemist
12-11-2008, 08:43 PM
المئسوية :y:

المأساوية هي كده الصح بتاعها

منصورية
13-11-2008, 06:57 AM
شكرا على تصحيح الغلطة الاملائية هههههههه

وريث تحوتمس 3
13-11-2008, 12:14 PM
المأساوية هي كده الصح بتاعها

شكلكم انتم الإتنين واكلين ملوخية

على وزن الفول والطعمية

وباين كل متزوج حيورينا الويل من إللى بتعمله فيه الولية

أنا أحسن حاجة أتجوز علشان أشوف مشاكلكم الزوجية
وأتفقد الموضوع بصيغة عملية
لأنى عايز أبعد عنكم الفقرة دى المؤذية


منكما لله
خلتونى أقرر مأتجوز بالمرة
بعد ما كنت ناوى أعمل العاملة ديا

سلام بقى علشان حماتى بتنده عليا

طـــــير في الســـما
13-11-2008, 02:04 PM
دي مش قصيدة لقضاء على العزوبية

دي قصيدة تطفيش يا عنيه.......

و لو الجواز كده......اوعوا تعملوا العملة ديه.........


شكرا لك........تحيـ ـ ـ ـاتي

مصراويةجدا
13-11-2008, 09:00 PM
قشطة قشطة
ومية مية
ايه كل الحلاوة ديه
وزي ما حطيتي القصيدة الجهنمية
قوليلنا روشتة لتطفيش اي عريس يا عينية
عشان اهلي ميطلعوش عينية
ويدوني في وشي بالكومية
وفي راسي بالبنية
وشكلك هتودينا في داهية يا منصورية

طـــــير في الســـما
13-11-2008, 09:35 PM
ههههههههههههههههههههههههههههههههههههههه

هههههههههههههههههههههههههههههههههههههههههههههه

بجد حقيقي مصراوية دي كلامها عجيب

الله يسعدك...............

منصورية
15-11-2008, 06:33 AM
هههههههههههههههههههههههه
واضح جدا ان القصيدة كشفت عن مواهب فذة جهنمية
وهو على فكرة الجواز مش منيل اوي بالطريقة دية
ولا انتي شايفة ايه يامصراوية


بجد سعيدة جدا بردودكم اللذيذة
ودايما متجمعين على الضحك والخير

منصورية
16-11-2008, 03:18 AM
........


Photo Gallery