عيد أضحى سعيد ... ولحم شديد

[ملك عمرى_88]

السلام عليكم ازيك ياسى هورس
وكل سنة وكلكم طيبييييييييييين
انا كنت عايزة اسأل سؤال ملوش دعوة بخروف العيد
بس ليه علاقة باللحمة
ايه هو احسن مقطع اخد منه كباب الحلة
وبالمرة بقى ادينا وصفتك لكباب الحلة
لان وصفاتك دايما بتبقى غير
وعيد سعيييييييييييييد

[sea horse]

العزيزه ملك
اهلا بيكى ودايما منورانا
بالنسبة لأفضل جزء لكباب الحله من الخروف فيفضل الفخذ
بس من الجزء الداخلى
يعنى لما نتخيل الفخده قدامك ففيه الجزء الخارجى ( وش الفخده )
والجزء الداخلى .. وده الافضل لنعومته مقارنة بالوش الخارجى
وعامة يفضل لكباب الحلة اللحم الملبس بقليل من الدهن للتسوية الجيده والطعم الجميل
وكل سنه وانتى والجميع طيبين
مساء الفل

[أيوب الصابر]

موضوع شهي جداً
ياعيني على الخرفان ياعيني
عندنا بفلسطين اللي بيضحي يوم العيد الصبح
بكون الفطار فتة لحمه بعظمها وعالوش حب حمص شامي مسلوق
مع توم مدقوق وحب هال
والوجبه المركزيه هي الشواء والشواء فقط
حتى انتهاء ما تبقى اللحم بعد التوزيع
واللي ماعندوش اضحيه فيتجه لشواء البتللو
وكل عام وأنتم بخير

[أم أحمد]

كل سنة وانتم جميعا بكل الخير
ايوة كده بشاير العيد هلت علينا
يا رب يكون عيد سعيد علي الجميع
وبلاش تكتروا من اكل اللحمة
وكتروا من السلطة والخضروات جنبها عشان تعمل توازن

انا بحب افطر كبده وكلاوي ولحمة متقطعة صغير ومتشوحة في شوية زبدة
بتكون خفيفة وسريعة ومتعودة علي كده من زمان
برغم ان في ناس بتفطر فتة بس انا مش اقدر علي الصبح كده اديها فتة وتوم وصلصلة بتكون صعبة شوية
عاوزين بقي طريقة حلوة للرقاق ولو اني مش عارفة هالاقيه هنا ولا لا

[sea horse]

العزيز ايوب
طبعا عادات العيد بتختلف من بلد لبلد وبتختلف كمان حسب المناطق داخل البلد
يعنى انا اصلا من احدى البلاد الساحلية فى مصر وبنفطر زيكم لازم الفته والتوم واللحم الهبر عالوش
لكن فى القاهره يفطروا كبد وكلاوى محمره ويخلوا الفته للضهريه
فواضح ان عادات سواحل البحر الابيض زى بعض مع انها بتكون فطار شديد ومحتاج مهضمات بعده
ههههههههههههههههه
العزيزه ام احمد
واضح انك تبع فرقة الكبد والكلاوى القاهرية
اهم حاجه تجميعة العيله وفطار غير تقليدى برضه ...ماحنا مش بنفطر ابدا حاجه محمره اى يوم
يوم مختلف جميل ويجعله عيد سعيد عالجميع
بصى بقى
لما كنت فى امريكا تحايلت على موضوع الرقاق ده بالعيش الشامى اللبنانى الكبير
فجبت حوالى 12 رغيف واخدت الوش بتاعهم بيكون ارق من القاعده
وتعاملت معاه على انه رقاق
وطلعت صينية رقاق برضه ... صحيح مش زى الاصل ..لكن برضه من ريحة المرحوم
هههههههههههههههههه
صباح الفل

[سمـاء]

sea horse

كفتة الرز طلعت حلوة جدا تسلم ايدك...

وبمناسبة الكفتة والعيد دى كانت وصفة من وصفاتك:

الكفته المصرية عالسيخ

نجيب كيلو لحم كندوز و نص كيلو لحم جملى و حتة صغيرة ليه ضانى من غير الجملى هاتقع الكفته من على السيخ
ونفرم المجموعة مع بعضها مرتين على الاقل مع التقليب للتجانس ولا نضع اى اضافات على اللحم... ونسيبه فى التلاجة
نبشر بصله كبيره ناعم ثم نعصرها فى شاشة وناخد مية البصل بس ونضيف لمية البصل فورا معلقة صغيرة ملح و نص معلقة فلفل اسود ونكون مخرطين حزمتين تلاتة بقدونس لاستقبال الكفته عليها بعد الشوى
المهم ... بعد ما نولع الفحم ..نسيبه يصفى خالص يعنى يبقى كله جمر مافيهوش لون اسود

نبل ايدنا فى مية البصل و ناخد قطعة من اللحم المفروم ونشكلها عالسيخ بطوله
و نضغط عليها بين الابهام والسبابه من مكانين لتشكيل تلات صوابع

بعد ما نخلص مجموعة اسياخ على قد الشوايه ..نبدأ الشوى فورا
ولا يستحب كثرة التقليب على النار ..يعنى نسيب كل جنب يستوى .. ونقلب ولما يستوى السيخ ننزل الكفتة على فرشة البقدونس فيمتص الرائحة وتبقى أحلى كفتة
بالهنا والشفا

بس السؤال برضه اللحمة من غير اضافات خالص طعمها هيكون حلو؟؟؟

وايه البديل للحمة الجملى علشان ماتقعش من على السيخ؟؟؟

[أيوب الصابر]

sea horse

الكفته المصرية عالسيخ

نجيب كيلو لحم كندوز و نص كيلو لحم جملى

ماهو اللحم الكندوز واللحم الجملي
أفيدونا أفادكم الله تعالى

[اليمامة]

مساء الفل
متابعه الموضوع الرائع دا...وكل الشكر لكل الناس الحلوة ..لانى حاسة بجد ببشاير العيد الحلوة فى لمتكوا الجميلة..
واحب اقولكوا على وصفة التقاطيع؟ ياترى عارفينها؟ او فاهمينها؟..انا بحبها بس لما تتعمل صح..اولا التقاطيع دى اى حاجة اعتقد جوا بطن الحيوان المدبوح..يعنى الكبدة والطحال والقلب والكلاوى والامعاء والرئة...فية حاجة تانية؟ مش بيسموها برضة حلويات...او فواكة المدبح؟
المهم بناخد الحاجات دى زى ما هى بحجمها او يعنى بنقطعها نصين ونغسلها كويس جدا ونغير عليها المية وفى النهاية بنسيبها منقوعة شوية فى مية بملح ودقيق وشوية خل..وطبعا حاجة زى الامعاء لازم تتنضف وتندعك فى الدقيق والملح وتتنقع فى خل علشان تبقى نضيفة اوى...اى حاجة محتاجة تنضيف بنضفها..بعد كدة بنغلى المية ونسقط الحاجات دى تغلى غلوتين وبعدين نشيلها ونرمى المية ونحط مية جديدة ولما تغلى بنحط الحاجات تانى مع بصلة كبيرة وفلفل اسود وحبهان ولورو وفص مستكة وجزر وممكن قرن فلفل اخضر ونسيبها تغلى وتستوىوبعدين بناخده ونبدا نقطع بسكينة حامية الحاجات دى كلها طرنشات رفيعة بقدر الامكان وطبعا لو الكمية كبيرة قطعى او قطع من كل صنف على اد الوجبة المطلوبة والباقى يتشال سليم فى اكياس خزين فى التلاجة..المهم بناخد المتقطع وفية كام طريقة او اضافة لطبخة...انا عن نفسى فى زيت او سمن باخدهم تشويح مع شوية فلفل اسود كتار والملح المضبوط وبس لكن ممكن فصين توم يتحطوا وممكن بصل بس وممكن بصل مع توم والاخطر انة ممكن يتحط طماطم بس انا باعمل التشويح السريع كأنة جريل مع فلفل اسود وملح وبس وبعد كدة باجيب العيش البلدى وباطبق نص الرغيف جوة الرغيف بحيث يطلع ساندويتش مزدوج بدون فصلة..وباكون مجهزة جرجسر مقطعاة بايدى خشن وباحط جوة السندويتش وبعد كدة باحشية تقاطيع ويتاكل سخن ومعاة طبق شوربة دسمة مليانة بهاريز وفيها حتة كوارع والليمون...وبكدة هاتكونوا قاعدين فى اى مسمط محترم فى السيدة زينب و الحسين....يارب تعجبكوا.

[اليمامة]

اهلا يا سماء...وصفة كفتة سى هورس هايلة فعلا..ميرسى انك فكرتينا بيها الايام دى...عايزة اقولك فعلا اى كفتة من اللحمة الجملى بتبقى هايلة لانها بتمسك نتيجة لنسبة الجليوتين العالية فى لحم الجمل...ومعروف ان لحم الجمل بيتاخد يتفرم للكفتة...غير انه لحم نقى ومسكر ونضيف..جدتى ربنا يرحمها كانت تعمل الكفتة كاملة بدون خلط من لحم الجمل...ولانى مش دايما بلاقية فابعمل الكفتة عادى بس بشرط ان اللحم المفروم يكون حوالى 25% منة دهن مفروم عادى مع اللحمة..وبعدين باخد تلت كمية اللحم افرمة تانى لوحدة...يارب كلامى يكون مفهوم بس هاوضح اكتر...يعنى مثلا لو بجيب كيلو لحم مفروم الجزار فارمهولى حالا باخدة وفى الكبة باخد تلت الكيلو المفروم دا وبافرمة فى الكبة تانى بيبقى ناعم جدا وبعد كدة باخلطة مع التلتين الباقيين المفرومين من الاول وباقلبهم فى بعض وعلى فكرة فى محلات الكبابجية بيعملوا كدة بيجيبوا اللحم عادى حتت مش مفروم ويحطوة فى المفرمة الكهربائية الضخمة دى يتفرم كلة الاول وبعد كدة بياخدوا نصة ويفرموه تانى انعم لوحدة ويخلطوة مع المفروم الاولانى والحكاية دى اسمها فرمة ونص ووظيفتها بتخلى صوباع الكفتة متماسك ميفوكش من على النار ..وغالبا بيعملوها باللحم البتلو وبالتالى بيحطوا لحم طماطم يعنى الفيلية مش مية الطماطم او القلب...لحم الطماطم المتماسك وبيفرموة مع اللحم وفايدتة بيدى لون احمر للحم وخاصة لو كان بتلو وطعم حلو مع نسبة الدهن اللى بيفرموها كمان وبيكونوا طبعا ناقعين اللحم قبلها فى مية بصل وبعدين بياخدوه يفرموة مع تفل البصل بس...وانا باعمل كدة بعد الفرمة والنص مع تفل البصل بس بدون ميتة باخد المية وباقلب فيها الفلفل الاسود والملح وممكن شوية قرفة وباصبعها وبارصها فى صينية وبادخلها الفرن بس اولا باعمل فحم مولع اوى جمر وباطفية فى الصينية والكفتة نية فى قشرة بصل فيها شوية زيت مقدوحين وباغطى الصينية بغطاء وباحكم بفوطة علشان اللحم يتشبع من ريحة الفحم وهو نى وبادخلها الفرن بعد ما اكون شيلت الفحم وانطفى...تستوى وتتحمر وباكون مجهزة تانى فحم وباعملة بنفس الطريقة الاولى مع احكام الفوطة وبكدة بتتطلع الريحة هايلة كأنها على شواية...كنت بس عايزة اقول انى باخد مية البصل مع الفلفل والملح وقرفة وبابل ايدى منها وباصبع الكفتة بيها بتبقى حلوة اوى...اما المفروم نفسة باكون حاطة علية فلفل وملح وقرفة برضة...جربى دى يمكن تعجبك.

[sea horse]

العزيزه سماء
بالنسبه للاضافات بتكون موجوده مع مية البصل زى الملح والفلفل واى شئ
وموضوع اللحم الجملى ده اساسى لعدم سقوط الكفته من السيخ
وطبعا زى ما قالت يمامه تنعيم جزء من المفروم بيساعد كمان

العزيز ايوب
الكندوز هو لحم عجل البقر الكبير بيكون وزن العجل لا يقل عن 400 كيلو
والجملى هو لحم الجمل او الناقه او الابل
والبتلو هو لحم رضيع الجاموس يكون سنه حوالى 40 يوم وقبل الفطام ووزنه من 80 ل 120 كيلو
الجاموسى هو لحم عجل الجاموس ويكون وزنه لا يقل عن 600 كيلو
مساء الفل