ماكنتش ح اصدّق

[د. حورية البدرى]

زمان قلت مرّه :
ماكنتش ح اصدّق اذا حد قال لى :
" فى يوم ح تشوفيها فى سوق النخاسه " 00
عشان مش طريقى
ولاأقدر أخطّى فى سكّة نجاسه
شيطانه ورجيمه
وكان ياما كان من زمان جوزوها
بأجره زهيده
ووافقت
وداقت حلاوة فلوسه
وشبعت
وخطت قدمها تدوسه
ومدّت حبالها لكل الرجال
بضحكه وكلمه وشئ م النعومه بيقضوا المصالح
واذا حد فالح صادفها وقاوح
تحط ف طريقه بنات م البضاعه
يعصلج دقايق
يعصلج فى ساعه
ولكن ح يخضع لها فى النهايه
مادام رجله راحت لسوق النخاسه 00
زمان قلت مرّه :
ماكنتش ح اصدّق بانى ح اشوفها
وح اعرف ظروفها
وح اكتب عليها كلام مش عاجبنى
يوضّح قرفها
عشان رغم انى على الأرض حرّه
ولكن باحدد بعزمى طريقى
وباختار صديقى 00
زمان قلت مرّه : صحابها الأفاضل بيحيوا وجودها
فتنعم وتاخد
وتمشى على الوحل من غير ماتغرق
بفضل الأراذل
وساعة ماتطلب وجود حد فيهم
يرد ف تخاذل : عيونى عشانك
ياأنس الشوارع
وكنس المنازل
ح آجى لك ونازل
ولو حد لامنى ؛ أقول : انسانيّه !
ايه ذنب البنات البريئه اللقيطه
دى زى القطيطه
ومحتاجه ساعة أخوّه وتسالى
بدون مسئوليه !
زمان قلت مرّه ؛ ماكنتش ح اصدّق
وكانت بتسرق وجودها الملوّث
ودلوقت أصبح وجودها أساسى
ومش فى الليالى وستر الأماسى
كما اللى بيسرق
ولكن وجودها - بفضل الأراذل -
صبح عينى عينك
بيمسخ نهارنا الجميل المشقشق 00
زمان قلت مرّه : ماكنتش ح اصدّق
ودلوقت - رغم انى شايفاها دايما -
ضميرى ودينى وحتى يقينى
اللى شايف وجودها
كمان مش مصدّق !!!

د0 حورية البدرى

[ابن البلد]

كلام رائع فعلا
د/ حورية

[د. حورية البدرى]

أشكرك ابن البلد

[ابن مصر]

عظيمة يا دكتورة
وانا واللة بدات
افهم الشعرعلي
يدك - استاذتي
العظيمة
شعر جميل وبلغة
بسيطة -سهلةالفهم
نريد منك المزيد
يا كريمة --انت
تلميذك المطياع
عماد

[د. حورية البدرى]

أخى الفاضل عماد / ابن مصر

أشكرك لتواضعك 00 ودائما لايتواضع الا العظماء 00
أنت أستاذ بتواضعك الجميل 00 أستاذ بعطائك المتواصل للمنتدى 00 أستاذ بانسانيتك الراقية 00:)
أشكرك أخى

------ د0 حورية