ماذا يري الجنين في بطن امه؟؟؟

[حمادو]

السلام عليكم ورحمة الله وبركاته
وصلتني الرسالة دي من شخص مجهول على الايميل...بالرغم من ان انا بامسح كل الرسائل اللى بتيجي من اشخاص مجهولين(حتى لو اصدقاء ولكن لم يضعوا عنوان للرسالة) الا ان عنوان الرسالة دي خلاني اقراها.
ودا كان محتواها

((بسم الله الرحمن الرحيم))
اللهم صلي على الحبيب المصطفى صلى الله عليه وسلم

السلام عليكم ورحمة الله

ثبت علمياً .. أن الجنين في فترة نومه في بطن أمه

يرى دورة حياته منذ الولاده وحتى مماته ،

لذلك في أثناء ممارسة الحياة الطبيعية ، يصادف المرء مواقف يظن أنه قد رآها سابقاً

ولكن لا يذكر أين ؟؟ ومتى ؟؟

لايدري ؟!

سبحانك يارب
انتهت الرسالة

اولا فيه شوية ملاحظات هاقولها على الموضوع.

كلمة ثبت علميا دي كلمة من اخطر ما يكون...وفيها تجني على العلم لان العلم ليس بثابت...والدليل على كده قصص كتيرة جدا ابتداءا من خلق الكون وصولا بالارض كروية ام مسطحة وما الى خلافه.

ثانيا وهو الاهم
الشخص اللى كاتب الرسالة بيقول ان الجنين بيشوف دورة حياته...بالله عليكم ازاي؟ دا اذا كان الشخص بيكون موجود امام الاطباء ومتوصل بالاف الاسلاك الكهربائية ومافيش حد بيعرف هو بيحلم بايه...بالله عليكم هايعرفوا الجنين في بطن امه بيحلم بايه؟ طيب طالما عرفوا...ليه مابيسجلوش الكلام دا علشان يتنبأوا بمستقبل الجنين من قبل ما يخرج ولو اكتشفوا انه هايكون زي هتلر يعملوا للام عملية اجهاض.

ثالثا ودا بأه اهم ما في الموضوع.
فيه مرض تسميته باللغة العربية لقد رأيت هذا من قبل(already seen) او الاسم العلمي ديجافو.
اسمه العلمي ايه يا اخوانا؟؟؟ديجافو.
المرض دا بيصيب تقريبا 80% من سكان الكرة الارضية..مافيش حد في الدنيا تقريبا ماكانش في موقف وقال ايه دا؟؟؟انا كنت هنا قبل كده.
طيب ايه حكاية الديجافو دا؟
فسره اكثر من عالم في اكتر من مجال ولكن التفسير الاكثر قبول هو وجود سائل في الرأس بيقوم بتوصيل المعلومات من العين للمخ علشان يحط المعلومة في الذاكرة.
كل اللى بيحصل ان السائل دا بيروح لمنطقة في المخ ينقل نص المعلومة...والنص التاني بيدخل متأخر تقريبا نص ثانية, او بمعني تاني السائل لايقوم بنقل كامل المعلومة للمخ في نفس اللحظة...علشان كده المخ لما تدخل له نفس المعلومة بس متأخرة شوية يقوم يدي اشارات انه شاف دا قبل كده(ومن هنا كانت تسمية لقد رأيت هذا من قبل)

اما بأه جنين وامه وبطن ودورة حياة دا كله للاسف لا يقوله الا ........ ولا بلاش

دا تعريف المرض في موسوعة ويكيبديا...وللاسف الشديد لان لغتنا هي اللغة العربية فلا يوجد اي تغطية لاي علوم وانما مقتطفات بسيطة جدا(انا لا اعيب على اللغة العربية ولكنى اعيب على العقول العربية)
ديجا-فو ، Déjà vu كلمة فرنسية تعني شوهد من قبل اطلق عليها هذا الاسم العالم إمِيل بُويَرْك و هي ظاهرة تحدث لكثير من الناس و يحسوا بأنهم عِاشوا الاحداث من قبل وأنها ليست تحدث لأول مرّة لها عدة تفسيرات تفسر سبب حدوثها.

اختلِفَ كثيراً في تفسير ظاهرة الديجافو وسبب حدوثها؛ الباحث الإنجليزي فريدريك دبليو يقول: بأنّ العقل اللاشعوري ـ أو الباطن ـ سجّل معلومات في فترة قريبة مع العقل الواعي؛ لذا يتوهّم الشخص أنّه مرّ بالتجربة. ـ

بينما ينسُبْ عدّة محلّلون نفسانيّون الظاهرة إلى الخيال البسيط لدى الإنسان، وبعض الأطباء يعزون ذلك إلى خلل لحظي في الدماغ لمدّة ثواني قليلة. ـ

وهناك من قال أنّها جزء خافت مجهول من ذكريات الطفولة. ـ

أمّا التفسير الأوْهَن ممّن رأى أنّها ذكريات من حياة ماضية عشْنَاها ! ـ يقولون أنّها ذكريات حياة قديمة تُزعج إلى سطح العقل حين مُلائمة بيئة مُحيطة أو ناس مألوفين ! ـ

ربّما ما يُفنّد الرأي الأخير؛ ظاهرة أخرى تُسمّى ( Jamais Vu ) حيثُ تكون في مكان مألوف ودائم، ثمّ تشعر فجأة بأنّ ما يُحيطك غريب كُليّاً.

لها تفسير علمي هو تأخر وصول الدم من الفص الصدغي الايمن إلى الأيسر بعد ان يكون المشهد اصبح ذكرى بالنسبة للفص الأيسر

و أكثر فئة عمرية اصابة بهذه الظاهرة هم من 15 - 25 عاما .. يصاب به اكثر المصروعين قبل صرعهم او بين النوبتين الصرعيتين ..ولكنه قد يقع في جميع شرائح الأفراد بدون سبب طبي او مرض عضوي في احيان كثيرة تفسر هذه الظاهرة عن محللون نفسيون كثر بأنه وهم او تحقيق رغبة مكبوتة اما تفسيراتها اخرى .. فقيل انه عندما مسح الله على ظهر ادم واخذ من ذريته العهد رآى كل الناس اعمالهم و يتذكرونها احيانا.

ولمعرفة المزيد...وبالمرة معرفة الفرق بين شرح موضوع ما باللغة العربية وشرحه بالانجليزية نقدر ندخل على الرابط دا في نفس موسوعة ويكيبديا بس باللغة الانجليزية وشارح بالتفصيل ما هو المرض.

ديجافو..Deja vu (http://en.wikipedia.org/wiki/D%C3%A9j%C3%A0_vu)

ودمتم

[emerald]

السلام عليكم .


فعلا يا حمادو انا سمعت عن الظاهرة دي وقرأت عنها شويتين .. سبحان الله ..

الغريب يا حمادوالرسالة الي وصلك على البريد .. ترسل الاف منها في اليوم الواحد .. واحلي شئ .. كلمة تذييل في نهاية المقالة المحرفة تقول (( لا تنسي تحويل الراسلة الي كل من تعرفه ))

سبحان الله ..

شكرا لك على المرجع والمعلومات ..


بارك الله فيك .

[شعاع من نور]

و عليكم السلام ورحمة الله و بركاته..

بجد بجد تسلم إيدك يا حمادو إنك ألقيت الضوء على الموضوع ده...حقيقي أشكرك...
عايزة أقولك...قبل أما أقرا تعليقك على الرسالة قلت في سري بعد أما قريت الرسالة...يا سلاااااام!!!!والله!!!!!...
أنا قريت قد ما قريت في تفسير الظاهرة دي بس أقولك الحقيقة اقتنعت في الآخر بجملة واحدة...الجملة دي هي"و يخلق ما لا تعلمون"......و جملة تانية بردو..."و ما أوتيتم من العلم إلا قليلاً"...

افتكرت موقف كان حصل لي قبل كده...حلمت بمكان معين و شفت كل تفاصيله في الحلم و من زاوية و قوفي في المكان ده...و الحلم فضل معلم في دماغي قوي لأنه المكان كان مميز...بعدها بأسبوعين رحت نفس المكان و شفت التفاصيل اللي كنت شايفاها في الحلم !!!!!!!....
و قعدت أفتكر شفت المنظر ده إمتى و فين و أقول لأصحابي أنا كنت هنا مع إنه أول مرة لي أروح المكان ده...فين و فين افتكرت الحلم!!!!!...
بس على فكرة يا أحمد ده مش مرض...هي ظاهرة و بتحصل لناس كتير جداً...

حاجة تانية كمان أنا %100 معاك بالنسبة لموضوع الويكيبيديا و اللغة العربية...فعلاً أنا لما ببقى بادور على حاجة في الويكيبيديا باجيب من الآخر و بافتح الإنجليزي....لنفس الأسباب اللي ذكرتها...
و على فكرة أنا كنت با ستخدم الويكيبيديا كمان لما كنت بادرس....كل و باقول كل....ال articles العلمية كانت متاحة ليها اللغة العبرية...بلا إستثناء!!!!!!!!.......اللغة العربية كانت متاحة في article أو اتنين و كمان مش مهمين أساساً...دي حاجة حاجة تانية المعلومات لا تفيد طفل في حضانة!!!!!!!!!!!!!!!!....

باكرر شكري على موضوعك الرائع...

تحياتي....

[حمادو]

السلام عليكم emerald
اشكرك على تواجدك الجميل والحمد لله ان المعلومة عجبتك.
وبخصوص بأه جملة لا تنسى تحويل الرسالة والا ابو رجل مسلوخة جالك في المنام يعيط , او انك لو لم تقم بنشر الرسالة هاتيجي الارواح الشريرة من فيلم الانس والجن وتحرق بيتكم وبيت الجيران.
الكلام دا كله للاسف الشديد يعبر عن سطحية عجيبة, وليه لأ؟واحنا عايشين حالة من الفراغ اللى وصل لها المجتمع. فراغ وجهل يؤدي الى كل هذه الاشياء والخزعبلات.
يااااااااه يا ايمي دا انا لو اتكلمت مش هاسكت...سكتيني بأه علشان ماحدش يطردني من المنتدى.

الزميلة شعاع من نور
اولا اشكرك على تصحيح المعلومة وهي ان ديجافو ظاهرة وليس مرض, بس اعذريني لان في احيان كتيرة فيه بعض الكلمات بتتوه منى لظروف وجودي في مجتمع لا يتكلم العربية.
ثانيا انا اتفق معاكي في الايات اللى قلتيها فوق(اصلا لا يحق لي الاعتراض) وفعلا كل ما العلم بيزيد كل ما بيواجه تعقيدات وصعوبات اكتر, وكما قيل انه كلما علم العالم شئ اكتشف جهله باشياء اخرى كثيرة.
كمان موضوع الاحلام دا سبحان الله بيحصل مع ناس كتيرة..كنا في مصر متخيلين انه بيحصل للناس القريبين من ربنا سبحانه وتعالي, انما لما تبصي في كل دول العالم وكل لغات العالم وكل ديانات العالم بيطلع منهم من يحلم بشئ ويتحقق الحلم بعدها, ويمكن من اشهر الاحلام هو حلم شخص بفيضان شديد في هامبورج شمال المانيا سنة 1962 , وبعدها بشهر حصل الفيضان فعلا.
يعني الموضوع لا علاقة له باولياء الله الصالحين وانما الاحلام كمان ظاهرة وموجودة عند ناس كتير.

بخصوص بأه ويكيبديا واللغة العبرية...انا لازم اقول انى احترم العقول الاسرائيلية...انا لم اقل انى احبهم ولا اواليهم, ولكني احترمهم لانهم دولة صغيرة ومع ذلك قوية.
تحارب وتقتل وتدمر وفي نفس الوقت تمارس دبلوماسية العصابات.
تهين وتمحو امم من على الارض ومع ذلك يولد الامل في معاملها وعلى يد باحثيها.
ودا يعتبر تفوق لدولة بالرغم من حجمها الصغير ومشاكلها السياسية والحدودية والعسكرية الا انها كانت الدولة رقم 12 من احسن الدول الحاضنة لاحسن جامعات العالم.
اذن مش من الغريب انك تلاقي وجود للغة العبرية في كل المجالات.

وفي نفس الوقت الدول العربية مجتمعة بالرغم من الثراء الفاحش فيها الا انها لم تبني معمل واحد يفيد البشرية...دي حتى ما عملتش مصنع يعتمد على نفسه اعتماد ذاتي لانتاج اي سلعة حتى لو كانت لبان دكر.

اشكركم على المرور واتمنى لمن كان يظن ان الجنين يري دورة حياته في بطن امه ان يقرأ هذا الموضوع ويعرف بوجود ظاهرة تسمى ديجافو.

[يسرا]

فعلا الظاهرة دى بتحصل كتير وانا كمان سمعتلها اكتر من تفسير
منهم واحد بيقول ان دى الحاسة السادسة!!!
ومنهم واحد بيقول ان بيحصل خلل فى حاجة معينة مختصة بنقل المعلومات



بالنسبة بقى لحكاية الجنين بيشوف حياته...ايه ياحمادو اوعى تكون مش مقتنع ياراجل..
ممكن اوى تلاقيهم مطلعين اشاعة علمية بتقلك ان الاجنة المصرية بس بأعتبارها اذكى انواع الاجنة
او الاجنة المسلمة بس
هههه ويدخلوك بقى فى تصنيفات عنصرية..
وده كله علشان يثبتولك عظمة الخالق اللى مش محتاجة افترا فى العلم علشان تتثبت..
شايف حتى بادين الرسالة بالصلاة على الرسول عليه الصلاة والسلام..(علشان بقى تعيش فى الدور)
وناهينها بالتسبيح...(لنفس الغرض)
خد من ده كتير...وماتستغربش انت فى عصر المثقفين

[حمادو]

فعلا الظاهرة دى بتحصل كتير وانا كمان سمعتلها اكتر من تفسير
منهم واحد بيقول ان دى الحاسة السادسة!!!
ومنهم واحد بيقول ان بيحصل خلل فى حاجة معينة مختصة بنقل المعلومات



بالنسبة بقى لحكاية الجنين بيشوف حياته...ايه ياحمادو اوعى تكون مش مقتنع ياراجل..
ممكن اوى تلاقيهم مطلعين اشاعة علمية بتقلك ان الاجنة المصرية بس بأعتبارها اذكى انواع الاجنة
او الاجنة المسلمة بس
هههه ويدخلوك بقى فى تصنيفات عنصرية..
وده كله علشان يثبتولك عظمة الخالق اللى مش محتاجة افترا فى العلم علشان تتثبت..
شايف حتى بادين الرسالة بالصلاة على الرسول عليه الصلاة والسلام..(علشان بقى تعيش فى الدور)
وناهينها بالتسبيح...(لنفس الغرض)
خد من ده كتير...وماتستغربش انت فى عصر المثقفين

هههههههههههههههه
بصراحة يايسرا موضوع الجنين المصري دا ضحكني جامد قوي.
بس فعلا زي ما انتى قلتي ان عظمة الخالق مش محتاجة افترا في العلم علشان يثبتوها.
وهاقولك موقف حصل لي شخصيا واتسبب في اني اتفصلت من الشغل القديم لاني ضحكت بهستريا وكان المدير وقتها متضايق(لما كنت في مصر)
انا كنت بحب تصميم الجرافيك ثلاثي الابعاد جدا جدا جدا, وفي مرة عملت تصميم لكوكب احمر زي المريخ كده وعملت عليه جبل مكتوب عليه اسم الله, وبعد كده ارسلت الصورة لصديق لي يقول رأيه بما انه محترف تصميم ثلاثي الابعاد.
بعد ما ارسلت الصورة وعملت التعديلات المطلوبة ونسيت اصلا الصورة لقيت ايميل جاي لي ومكتوب فيه "انظر يا اخي ماذا وجد الكفار في كوكب المريخ؟؟؟ اسم الله محفور على جبل, سبحان الله وبحمده سبحان الله العظيم"
طبعا انا لما شفت الصورة اللى انا كنت عاملها مكتوب عنها انها صورة ملقوطة من القمر الصناعي انفجرت في الضحك بطريقة فعلا مستفزة وتخيلت كام مليون واحد قاعد بيتفرج على الصورة ومصدق انها من وكالة ناسا مش من وكالة حمادو...هههههههه
المهم ان دا بيورينا شئ محزن جدا وهو فقدان ثقتنا باي شئ واحساسنا دايما بالاضطهاد ونظرية المؤامرة, علشان كده مابنصدق نشوف اي حاجة نحورها ونعمل عليها قصة علشان نحس اننا صح ولو حتى كدبنا على نفسنا..في حين ان الاسلام وعظمة الخالق مش محتاجه اي شئ من دا وانما الامر ابسط من كده بكتير جدا جدا علشان نؤمن بالله.

[زيزى على]

فعلا الظاهره دى بتحصل كتير
سبحان الله العلى العظيم
شكرا على المعلومات والموقع

[Egyptian eagle]

ايه الجمال دا يا عم حمادو ...

الناس المعوقين اللي بعملوا حاجات زي دي بيكرهوا الناس المثقفين في الدين ...

تعالى نرد عليهم من الجتة اللي بيتكئوا عليها : الدين ....

اصحابنا بيقولوا ان الجنين بيشوف كل حاجة أوكي ... مش دا اسمه غيب و لما رجعت لبعض اصدقائي المثقفين في الدين عرفولي الغيب بإنه ما غاب عن العباد او انفرد الله بعلمه ..... فدا هو الرد من الناحية الدينية...................................

الرد العلمي : الكلام دا بيفكرني ببعض الحاجات اللي تقوللك ايه .. تقول عالم امريكي اكتشف ان مش عارف ايه رايح فين و عالم ياباني لقا ان البتاع لازم يحصلوا بتاع ... طبعا انا اقصد انهم لو صادقين فيقولوا مين العالم الامريكي اللي بيكتشف الحاجت الهايلة دي ومين العالم الياباني العظيم دا اللي كل يوم بيكتشف جديد و مفيش علماء ياعني غير من اليابان و أمريكا !!!!! شيء ساذج ... و انا كنت قبل كدا شاكك في الاسلام بسبب افتراء البعض عليه و لكن بعد ما قريت الاعجاز العلمي للكتور زغلول النجار خلاص مفيش حاجة ممكن تخلليني اشك في دين الله ,, طيب الناس اللي ملقوش حاجة توعيهم مثلا اكيد هيشكوا و ممكن يغيروا دينهم ... يااه دي الحكاية كبيرة اوي اوي....

ناس تانيين بيحبوا يفسروا الموضوع على انها ارواح و اشباه و حاجات زي كدا ... سبحان الله !!! و لكن اعتقد انك جبت الدليل العلمي الصح و وفرت عليا جهد التفكير في الموضوع لان اجابتك كاملة متكاملة .. شكرا ليك........

موضوع رااااائع

[قلب مصر]

يااااااااااااااه دا انا بتحصلي الحكاية دي كتير
بس لما بتحصلي بعيش فى حالة تأمل فترة وأحاول أعرف ليه وازاى انا حسيت بكدة

حقيقي معلومات قيمة جدا حمادو ومتضايقة من نفسي قوى أنى لم أسمع عن هذه المعلومات بشكل علمي من قبل
بالرغم من أن تخصصي مقترب من هذا المجال بشدة

شكرا لك مرة ثانية :f:

[حمادو]

فعلا الظاهره دى بتحصل كتير
سبحان الله العلى العظيم
شكرا على المعلومات والموقع
السلام عليكم الزميلة زيزي على

حقيقي فعلا الظاهرة دي بتحصل كتير جدا وبتسبب في بعض الاحيان قلق كبير خصوصا اذا كان الشخص ماشي في الشارع ومرة واحد حصلت له الظاهرة دي واقنعه العقل الباطن ان فيه حادثة هاتحصل ونلاقيه بدأ يصوت ويجرى في الشارع بدون اي داعي لمجرد ان عقله الباطن كان اقوى من عينه ومن عقله الواعي للحظة.
وفعلا سبحان الله على كل شئ
اشكرك على المداخلة والرد
تقبلي تحياتي

[حمادو]

ايه الجمال دا يا عم حمادو ...

الناس المعوقين اللي بعملوا حاجات زي دي بيكرهوا الناس المثقفين في الدين ...

تعالى نرد عليهم من الجتة اللي بيتكئوا عليها : الدين ....

اصحابنا بيقولوا ان الجنين بيشوف كل حاجة أوكي ... مش دا اسمه غيب و لما رجعت لبعض اصدقائي المثقفين في الدين عرفولي الغيب بإنه ما غاب عن العباد او انفرد الله بعلمه ..... فدا هو الرد من الناحية الدينية...................................

الرد العلمي : الكلام دا بيفكرني ببعض الحاجات اللي تقوللك ايه .. تقول عالم امريكي اكتشف ان مش عارف ايه رايح فين و عالم ياباني لقا ان البتاع لازم يحصلوا بتاع ... طبعا انا اقصد انهم لو صادقين فيقولوا مين العالم الامريكي اللي بيكتشف الحاجت الهايلة دي ومين العالم الياباني العظيم دا اللي كل يوم بيكتشف جديد و مفيش علماء ياعني غير من اليابان و أمريكا !!!!! شيء ساذج ... و انا كنت قبل كدا شاكك في الاسلام بسبب افتراء البعض عليه و لكن بعد ما قريت الاعجاز العلمي للكتور زغلول النجار خلاص مفيش حاجة ممكن تخلليني اشك في دين الله ,, طيب الناس اللي ملقوش حاجة توعيهم مثلا اكيد هيشكوا و ممكن يغيروا دينهم ... يااه دي الحكاية كبيرة اوي اوي....

ناس تانيين بيحبوا يفسروا الموضوع على انها ارواح و اشباه و حاجات زي كدا ... سبحان الله !!! و لكن اعتقد انك جبت الدليل العلمي الصح و وفرت عليا جهد التفكير في الموضوع لان اجابتك كاملة متكاملة .. شكرا ليك........

موضوع رااااائع

بصراحة انا مش عارف انده لك بايه.
اقولك ؟ هاديك اسم مستعار وليكن ديفيد شارل سامحون..حاسس كده انك منهم مش عارف ليه :m19:
المهم بأه ياعم ديفيد...فعلا زي ما انت قلت ان فيه ناس معوقين بيكرهوا المثقفين في الدين.
وزي ما انت عرضت في موضوع الناحية الدينية والعلمية. بس المشكلة ان فيه ناس معوقين بجد مابيفهموش ولا بيصدقوا...مع العلم تماما ان المرجعية في العلم كله ترجع لله سبحانه وتعالي ولكن لازم نقر ان العلم البشرى وصل لحل ظواهر كتيرة واشياء كانت تعتبر لفترة بسيطة من اعمال الشياطين والسحرة.

بخصوص بأه التشكيك في الدين, بما ان انت عايش في اسرائيل يبقي اكيد سمعت عن كتاب اسمه كود التوراة, ودا كان عبارة عن كاتب ومؤرخ اثبت وجود اسم هتلر في التوراة والحربين العالمية الاولي والتانية وهكذا. وتنبأ بان نهاية البشرية هاتكون في سنة 2006 (السنة اللى فاتت يعني)
ملخص القول ان كل دين فيه ناس بتحط فيه خرافات ودا بيعمل حالة نفور من الدين زي ما انت قلت لانه في وقت ما بتطغي الخرافات على الدين وتقتله زي الخرافات اللى انتشرت عن الديانة المسيحية وقتلتها...وزي ما بيحصل خرافات دلوقتي في الاسلام ولا حول ولا قوة الا بالله.

جملتك بأه بتاعة عالم امريكي اكتشف ان مش عارف ايه رايح فين و عالم ياباني لقا ان البتاع لازم يحصلوا بتاع ضحكتني جدا جدا وبجد عندك حق فيها.

اشكرك على مرورك يا ديفيد وان شاء الله نتقابل قريبا في لقاء اخر وحوار اخر

[حمادو]

يااااااااااااااه دا انا بتحصلي الحكاية دي كتير
بس لما بتحصلي بعيش فى حالة تأمل فترة وأحاول أعرف ليه وازاى انا حسيت بكدة

حقيقي معلومات قيمة جدا حمادو ومتضايقة من نفسي قوى أنى لم أسمع عن هذه المعلومات بشكل علمي من قبل
بالرغم من أن تخصصي مقترب من هذا المجال بشدة

شكرا لك مرة ثانية :f:

العزيزة على قلبي وأختى الكبيرة قلب مصر
انا كمان بيحصل لي الظاهرة دي كتير جدا واحيانا اكتر من مرة في اليوم الواحد واحيانا باختبر نفسي لما تحصل لي الظاهرة دي انى اقول دلوقتي هايحصل كذا وفلان هايقول كذا...ولكن لا بيحصل ولا حد بيقول اللى انا كنت متخيله ودا بيدل فعلا على انها لا علاقة لها بالجنين وما الى خلافه.

دا غير ان لو دققنا قوي في الموضوع دا هانحس ان اول ما بيجي لنا بنلاقي دفى مرة واحدة في المخ ودوخة لمدة ثانية او اقل وبعدها علطول بنحس اننا كنا هنا او شفنا المكان دا قبل كده.

اخيرا مش تضايقي من نفسك بسبب الموضوع دا لانه مايقع الا الشاطر :m7:

اشكرك على الرد وتقبلي تحياتي

[حسام عمر]

سبحان الله العلى العظيم
شكرا على المعلومات

[حمادو]

سبحان الله العلى العظيم
شكرا على المعلومات
فعلا استاذ حسام سبحان الله على كل شئ
وكل ما العلماء اكتشفوا شئ او حلوا لغز من الالغاز عرفوا ان قدامهم المشوار طويل لن ينتهي في حل ولو جزء بسيط من نعم الله سبحانه وتعالي علينا.

اشكرك على المرور الكريم
تقبل تحياتي

[bascouta]

انا اول ماقريت الرساله بجد استغربت اوى وقلت سبحان الله معقول

بس لو الواحد فعلا فكر شويه هايقول ازاى يعنى العلماء اكتشفوها

لانك زى مانت قلت ان الواحد بيكون متوصل بالاف الاسلاك وميعرفوش هوا بيحلم بايه

وتسلم ايديك عالموضوع الهايل دا

[حمادو]

انا اول ماقريت الرساله بجد استغربت اوى وقلت سبحان الله معقول

بس لو الواحد فعلا فكر شويه هايقول ازاى يعنى العلماء اكتشفوها

لانك زى مانت قلت ان الواحد بيكون متوصل بالاف الاسلاك وميعرفوش هوا بيحلم بايه

وتسلم ايديك عالموضوع الهايل دا

اشكرك بسكوتة على الدخول والمرور...
وان شاء الله تكون الاحوال في المنصورة كويسة, اصل انا من المنصورة على فكرة.

اشكرك مرة تانية على المشاركة...واكرر معاكي ومع كل الزملاء فعلا سبحان الله على كل شئ, ولكن المهم اننا نعرف ونتعلم واكيد العلم دا مرجعه الى الله سبحانه وتعالي...

تقبلي تحياتي اختى الفاضلة.

[سوما]

أستاذ\ أحمد..
انا كنت قرأيت موضوعك ده من سنة تقريبا أول ما رجعت أشارك بالمنتدىومن كتر المعلومات والمفاجات اللى أخدها من الموضوع مش عرفت أرد وقعدت أردد سبحان الله وأنشغلت ساعتها.. ودلوقتى أفتكرته وانا فى القاعة.. بجد موضوع كنت أول مرة أعرف عنه منك..... وبجد صدق الله تعالى فى قوله (و ما أوتيتم من العلم إلا قليلاً) ..
تسلم أيدك يا حمادو على موضوعك الجميل..:f2: