سافر إلي أمريكا ! _._._ تجربة لدعم المنتدى _._._ الديك الرومي ؟؟ القصة الكاملة ليوم الشكر _._._ هل ترغب بالسفر إلي تركيا
إسلاميات - معرض الصور - عيلة النجعاويه - سفر وسياحة - إنفلونزا الطيور - مدونات - الموبايل - المجلة - هريدي اورج - المصدر التعليمي - بريد مجاني - ألعاب فلاشية - قس سرعة النت - أركيد الألعاب - بحث


المساعد الشخصي الرقمي

مشاهدة النسخة كاملة : برهان جديد....اتفضلوا...

شعاع من نور
13-02-2007, 10:41 PM
السلام عليكم و رحمة الله و بركاته
"إنعدام الأضداد دليل على وحدانية الخالق"..كلمة رائعة للإمام الشافعي و أكيد إحنا كمسلمين من الوهلة الأولى لما نسمعها ح نقول منطقي....
أنا ح اقدملكم إثبات رياضي لطيف للجملة دي و في نفس الوقت دليل قاطع على ضآلة الإنسان حتى في علومه الوضعية الأساسية و دليل قاطع على ضعف الإنسان مهما ظن بنفسه الظنون.....
للمتبحرين في علم الرياضيات يوجد ما يعرف بالمتناقضة أو paradox هذه المتناقضة عبارة عن حقيقة مستنتجة من معطيات تناقض ثوابت في العلم...يعني بالبلدي كده العلم نفسه...بيناقض نفسه..
ح اقولكم متناقضة مشهورة في علم الرياضيات إسمها متناقضة الحلاق..barber paradox ...و هي كالتالي..
عندنا في قرية حلاق واحد بس بيحلق للرجالة اللي مش بيحلقوا لنفسهم...السؤال مين اللي بيحلق للحلاق؟؟؟؟؟؟...
الإجابة مش ح تخرج عن أحد إحتمالين:
1_إنه يحلق لنفسه...على أساس إنه هو الحلاق الوحيد في القرية زي ماقلت..
2_إنه ما يحلقش لنفسه...
نمسك الحالة الأولانية...إنه يحلق لنفسه...ح نلاقي إنه الحالة دي بتناقض معطى عندنا و هو إنه بيحلق للرجالة اللي مش بيحلقوا لنفسهم عشان كدع ح نستبعد الحالة دي...
نمسك الحالة التانية...إنه مايحلق لنفسه...برضه في الحالة دي ح نلاقي تناقض لمعطى برضه لأنه بيحلق للرجالة اللي مش بتحلق لنفسها..بالتالي لازم يحلق لنفسه...

و بكده الحالتين بيعملوا تناقض و مش نافعيع علميا في دليل قاطع على ضآلة عقل الإنسان و ثغراته مهما ظن من تمكنه في العلوم...
و كمان دليل قاطع على عدم إجتماع ضددين...و اللي يثبت مقولة الإمام الشافعي رحمه الله..
وصدق الحق حين قال و قوله الحق:"يسألونك عن الروح..قل الروح من أمر ربي و ما أوتيتم من العلم إلا قليلا"
خالد محمود
24-02-2007, 01:40 PM
السلام عليكم و رحمة الله و بركاته.
متشكرين يا "شعاع من النور" على إثارة الموضوع المهم ده.
بس لو سمحتي عايزين شرح أكتر من كده.
يعني ... إيه العلاقة بين مقولة الأمام الشافعي و متناقضة الحلاق.
و السلام عليكم و رحمة الله و بركاته.
شعاع من نور
27-02-2007, 09:53 AM
و عليكم السلام و رحمة الله و بركاته

الأخ...خالد محمود..

شكراً جداً على مشاركتك...الحقيقة أنا كنت نسيت تماماً الموضوع و دخلت القاعة هنا من قبيل الصدفة...
المهم..
بتقولي إيه العلاقة بين متناقضة الحلاق و مقولة الإمام الشافعي...
لو متابع للعلوم والإنجازات الخطيرة اللي توصلها الإنسان(الغربي في الغالب)...و تلاحظ إنهم بيفخروا قد إيه بالعلوم دي لدرجة إنه في كتير منهم بيعتقدوا إنهم وصلوا للحقيقة....افتكر إني قريت مرة عن اللي حصل للناس ساعة تجربة بنيامين فرانكلين مع البرق...في كتير ظنوا إنه بالإكتشاف ده الإنسان عرف الحقيقة...._حقيقة الكون و الوجود و كل الكلام ده يعني_....
ييجي موضوع ال paradox يهد كل حاجة و يثبت إنه لأنه الإنسان ضعيف و تفكيره و نظرته البشرية قاصرة....لا يمكن أبداً إنه يضاهي الخالق في كمال الخلق....مهما تطور و مهما تصور إنه بلغ من كمال ودقة العلوم....بردو عاجز و بيناقض نفسه زي ما هو واضح في ال paradox ...الأمر اللي يدي دليل قاطع على وجود خالق واحد...و إلا ماكنتش بقت دي paradox ...و بقت منطقية بالنسبة لناو تقبلها عقلنا و ما بقتش متناقضة....
مش عارفة وصلتلك المعنى و لا لخبطك زيادة؟؟؟؟...
تحياتي...
قلب مصر
29-03-2007, 11:54 AM
موضوع رائع شعاع
يستحق أن يكون في الصدارة من حيث المناقشة
فبالفعل هناك من الأشياء التي يقف أمامها الإنسان عاجزا
ولا يسعه إلا أن يقول فى النهاية إلى أن الكمال لله وحده
وصدقيني مهما يصل الإنسان إلى علم ومكانة رفيعة من العقل فأنه فى النهاية لن يكون وصل إلا إلى أدنى القليل مما أعطاه الله من حق العلم
وتتحقق هنا الآية الكريمة ... "وما أوتيتم من العلم إلا قليلا"

فمهما وصل الإنسان من العلم لن يكون في حقيقته إلا قشور القشور من العلم الرباني والآلهي

تحساتى شعاع على الموضوع المميز :f:
emerald
31-03-2007, 03:45 PM
السلام عليكم ..

اختي العزيزة شعاع .. موضوع جدا جميل .. تسلم ايدك على الطرح ..

في عالم قبل كم سنة اكتشف خلل في احدى نظريات الرياضيات المشهورة .. لا يحضرني اسمة هو على العموم باكستاني من شكله كده .. عارفة الناس صعقت وكدبته .. بس في النهاية اكتشفو انه على حق ..


المشكلة النظرية بيت على اساسها نظريات عدة .. واعتقد الانسان انه وصل لاقصى مراحل العلم . وسبحان الله اكتشفو ان الاساس كان خاطئ في الاصل ..

فعلا والله نسيت اسم العالم .. وحتى اسم النظرية ..

ان شاء اله ادور عليها .. واجيبها ..

شكرا يا شعاع على الموضوع ..

بارك الله فيك .
شعاع من نور
31-03-2007, 04:48 PM
الغالية...قلب مصر..

نورتيني و الله...و فعلاً عندك حق...الإنسان في أحيان كتير بيظن بنفسه الظنون...و بينسى إنه هو نفسه سر كبير قوي...عمره ما ح يقدر يفهم نفسه...و أفتكر تعبير لطيف قوي قريته بس بصراحة مش فاكرة لمين...بيقول النفس البشرية عاملة زي البصلة..كل أما تشيلي طبقة تلاقي تحتها طبقة تانية خالص براقة...

أشكرك على تواجدك الرائع المميز...

تحياتي..

العزيزة..إيميرالد...

و عليكم السلام و رحمة الله و بركاته...

العفو يا حبي...و الله ده بس من ذوقك...

بتقولي في عالم باكستاني أثبت بطلان نظرية رياضية مشهورة...اممممممممم...
إوعى تكون فيثاغورث؟؟؟؟...كنت سامعة إنه في قلق عليها...و بيقولوا في طالب أثبت إنها غلط...
بس على فكرة إثبات بطلان نظرية دي حاجة مش بسيطة...ألف مثال مايبنوش نظرية..إنما مثال واحد يهد أعظم نظرية....
ف طالما العالم الباكستاني ده أثبت بطلان النظرية دي...يبقى أكيد جاب مثال...بجد يا إيميرالد يا ريت لو تدوريلي عليها...بجد ح اكون شاكرة جداً...

عارفة كمان...متهيألي لو قعدنا و دورنا في النظريات الموجودة ح نلاقي تناقضات كتير...
العلوم الأساسية مش منزلة....العلوم دي توصلها إنسان و وارد جداً إنه يثبت خطأوه إنسان...إحنا محتاجين نتجرأ أكتر في تفكيرنا سواء طلبة أو دكاترة و نفترض الخطأ و نحاول نوصل للصح...و بالذات في الجامعات بتاعتنا...الطلبة في الغالب متخيلة إنه العالم الفلاني توصل للنظرية يبقى خلاص هي %100 صح و غير قابلة للنقاش....

ماتتصوريش مدى سعادتي بالتواجد الرائع...

تحياتي يا قمر.....


ملاحظة..

من باب الأمانة العلمية عايزة أقول إنه متناقضة الحلاق مدخل لمتناقضة في فرع من فروع الرياضيات إسمه نظرية المجموعة..Set Theory ...المتناقضة دي إسمها متناقضة راسل Russel's Paradox ...

تحياتي...
hino27
18-04-2007, 12:52 PM
شكرااااااااا على الموضوع
شعاع من نور
18-04-2007, 04:58 PM
أخي..hino 27 ...

أشكرك على المرور و التواجد....

تحياتي...
red_dragon
19-04-2007, 05:53 AM
الاخت شعاع من نور : موضوع رائع
بس عندى سؤال :
يعنى ايه واحد يثبت ان فيثاغورس غلط ؟؟؟ طب ازاى ؟
اقصد ان ديه نظرية على حاجة مادية يعنى ملموسة ( لانها مش مثلا بتتكلم على ثوابت فيزيائية او اطياف كيميائية)
يعنى ببساطة ممكن امسك مسطرة و اقيس و اشوف النظرية صح ولا غلط يا ريت تفهمينى النقطة ديه

حاجة كمان احب اعلق عليها و هى الصورة الى فى توقيعك بجد اهنيكى عليها .. صورة حلوة قوى قوى حاسس انها هتتكلم :)
شعاع من نور
20-04-2007, 02:25 AM
أخي..red dragon ..

حقيقي مرورك هو الأروع...
هقولك إزاي ممكن تكون النظرية دي غلط....

في علم الرياضيات لو جبت مثال واحد يثبت خطأ نظرية يبقى كافي جداً لتدمير النظرية دي...يعني إيه؟؟
يعني مثلاً بالنسبة لنظرية فيثاغورث...النظرية بتقول(في واحد من المنطوقات_مش عارفة منطوقات دي صح و لاغلط بس أنا قصدي جمع منطوق_بتاعتها) إنه في المثلث قائم الزاوية مجموع مربعي طولي ضلعي القائمة يساوي مربع طول الوتر...لو حد حب يثبت خطأ النظرية دي...يبقى لازم يجيب مثلث قائم و يثبت إنه النظرية مش بتحققه...لأنه المفروض النظرية عامة و تصلح لكل الحالات...و بكده يكون دمر النظرية نهائياً بالمثال ده...

بس أنا مش عارفة هل فعلاً حد أثبت إنها غلط و لا لأ.....

يارب أكون وضحتلك...

و merci بجد على كلامك عن توقيعي...و الله ده بس من ذوقك...

تحياتي....

إسلاميات - معرض الصور - عيلة النجعاويه - سفر وسياحة - إنفلونزا الطيور - مدونات - الموبايل - المجلة - هريدي اورج - المصدر التعليمي - بريد مجاني - ألعاب فلاشية - قس سرعة النت - أركيد الألعاب - بحث