اثبت ان 1 =2

[Egyptian eagle]

مين في المنتدى يقدر يثبت ان 1 =2 :huh: ,, المهلة لغاية الساعة 9 مساءا غدا بتوقيت جرينيتش و هحاول اني اكون موجود ساعتها :plane:

في انتظار الردود



ملاحظة : اعتذر عن خطئي في العنوان فالكلمة : اثبت و ليست اثبن

[Egypt lover]

في البداية اهلا بحضرتك.......

انا مش عارفة ايه الحل الغريب دا بصراحة بس ان شاء الله هعيد المحاولة وأجبها......

تحياتي

[Egyptian eagle]

شكرا على رد حضرتك........


الموضوع أبسط بكتير أوي مما يبدو عليه

[حنـــــان]

ماتجيش!

[Egyptian eagle]

أهلا بحضرتك يا فندم ......


ممكن تيجي بس نحاول نحس إن المسألة سهلة و هتيجي بإذن الله ,,,,,



بالمناسبة مدرس كنت بتكلم معاه في مواضيع عامة فقالي اللغز ده و افتكرت انا كمان انها متجيش و بصراحة معرفتش اجيبها بس هو قالي الحل و لقيت الحل بسيط جدا و بالمناسبة دا كان مدرس علوم مش حتى رياضيات



مفيش تلاعب بالألفاظ بل دي ثغرة في الرياضيات

الساعة 9 بتوقيت جرينيتش هقوللكم الحل بإذن الله

[emerald]

السلام عليكم

كيف حالك يا اخي االنسر المصري .. اهلا بعودتك يا اخي ..

بالنسبة للسؤال .. !!!!

اعتقد ان النظرية صحيحة وممكن ايضا ان يكون 2=1

عشان اوضح وجهة نظري ..

لو هناك عامل نشيط جدا .. بحيث انه يستطيع ان ينتج ضعف العمل المطلوب في زمن محدد بجوة معينة ..بحيث ان


انتاج عامل واحد يساوي انتاج عاملين في نفس المستوى وفي نفس اليوم .. اذن نستطيع ان نقول 1=2

والعكس صحيح

عاميلن انتاجهم يساوي انتاج عامل واحد في اليوم .. هنا تحقق نظرية 2=1

انا هنا اتحدث من الناحية الادارية ..

ممكن ان تتحدث انت اخي من ناحية اخرى .. وربما اكون على خطأ ..

شكرا لك اخي العزيز .. وبارك الله فيك.

[Egyptian eagle]

مرحبا.....

أشكر حضرتك يا فندم على المحاولة و على الأسلوب المميز في طريقة الحل و اللي تناولت الموضوع من جانب آخر ,,, لكن للأسف الشديد المحاولة غير صحيحة و إن كانت الفكرة جيدة جدا ,,,,,

المثل دا يسمى بلغة الفيزيائيين القدرة (power) و ممكن نقول انها انجاز عمل (Work) خلال زمن (Time)

معنى كدا ان القدرة مش شيء مجرد لإنها تساوي العمل\ الزمن (w/t) و بتقاس بالوات نسبة للمهندس الأسكتلندي جيمس وات اتولد سنة1736 و مات سنة 1819 و بالمناسبة هو اللي اخترع الآلة البخارية

و معنى كدا انها شيء مركب مش شيء مجرد و بالتالي منقدرش نقول انها تحقق 1=2

ودا لا يقلل إطلاقا من المحاولة لإنها محاولة جيدة جدا

شكرا لحضرتك يا فندم.....

[Egyptian eagle]

ازاي نثبت ان 1=2

مش هستعمل رمز x بل همشي على رمز ن لإنه بحس إنه جميل و خفيف على اللسان :-

بتركيز عالي جدا هتلاقوا طريقة الحل سهلة أوي :

طبعا أي شيئين متساويين نحط بنهم علامة يساوي و ن2-ن2 = ن2-ن2 .........................(شيء بسيط جدا)

ناخد أول مقدار و نحلله فهيبقى:-

(ن-ن) (ن+ن) = ن2-ن2 ............. ( و دي الخطوة الأصعب):mazika2:

ناخد المقدرا التاني و ناخد عامل مشترك هو ن فهيبقى :-

(ن-ن)(ن+ن)= ن(ن-ن)......................................(تاني أصعب خطوة):1:

في معانا مقدارين متشابهين على جانبي علامة = شلوهم و هيبقى :

ن+ن=ن ,,, و دا بيعني ان :

2ن=ن

و من العبارة اللي فاتت يبقى 2=1 :no1: :omg:

شكرا لكل من شارك و أخص أكتر اللي حاول

[حنـــــان]

طب بالذمة ده اسمه حساب؟ :d
بس هيه لعبة ظريفة يا نسر مصري... وتسلم على الموضوع

[Egyptian eagle]

أشكر حضرتك على الإطراء يا فندم ....

طريقة الحل ممكن يعملها أي طالب في مصر في إعدادي علام اعتقد و لكنها و برغم سهولتها المطلقة لا يوجد بها أي ثغرة رياضية و لا يمكن أن بشكك فيها أي عالم رياضيات..

و بالطبع الحل السهل جدا دا يشكل ثغرة في الرياضيات!!!!!!!!!!!

[حنـــــان]

طبب صدقني يا نسر أنا كنت فاكراك بتهزر طول الوقت... بس شكلك مقتنع فعلا بالمعادلة اللي حطيتها دي.

عمر ما واحد تساوي اتنين.

المعادلة خاطئة لأنك في مرحلة من المراحل بتقسم على صفر وده ببساطة ماينفعش رياضيا.

حتلاقي شرح الموضوع ده هنا
http://www.mathmojo.com/interestinglessons/1equals2/1equals2.html

تحياتي

[Egyptian eagle]

من غير شرح للموضوع أتفهم وجهة نظر سيادتك....

أولا علشان نبقى عارفين التقسيم على صفر ناتجهة مش فاي بل غير معرف و دا لضخامة الناتج......................................... ملاحظة أولى

طيب إيه الدليل على كلامي: أنا باستعمل fx-570ms و لما اعمل مثلا علامة +7+7+ تكون الإجابة sYntax error بينما لما لعمل مثلا على التوالي 7 EXP 99 , و نضرب الناتج في 7 هتكون النتيجة math error و شتان بين اللي اتنين و لو قسمنا اي ناتج على صفر هتدينا الجواب الثاني و دا بسبب:: الضخامة الكبيرة جدا للناتج مش علشان مفيش ناتج

أنا مفيش خطوة قسمت فيها على صفر و ممكن تكون النتيجة صفر مثلا للأرقام في البداية لكنني لم أطرحها و على حد علمي المتواضع جدا انا لم اقسم على صفر و هعمل الخطوات تاني بس بأرقام و معلهش معرفش أكتب الأسس على الكمبيوتر فقولها شفوي:

5 ( أس 2) - 5 ( أس 2 ) = 5 ( أس 2 ) - 5 ( أس 2 )........................... لم أطرحهم

(5-5)(5+5) = 5(5-5)

5+5 = 5

10 =5
2=1

مستعد بشدة لأي خطأ ممكن يرى في الحل ...........

و شكرا لحضرتك يا فندم

[حنـــــان]

أدي يا نسر الخطوة اللي قسمت فيها على صفر

(5-5)(5+5) = 5(5-5)

5+5 = 5

الخطوتين دول في بينهم خطوة...
ازاي حذفت (5-5) من الناحيتين؟ مش لازم تقسم الناحيتين على (5-5)؟
طيب 5 - 5 مش بيساوي صفر؟ اذا انت في الخطوة دي

(5-5)(5+5) = 5(5-5)

قسمت لناحيتين على (5-5)... اللي ناتجها صفر... وبالتالي القسمة ماتنفعش... والمعادلة مش حتستمر بعد النقطة دي.

الكلام ده كان موجود في الرابط اللي كتبتهولك. اقراه وفي هنا رابط كمان يمكن يكون أوضح شويه...

http://mathworld.wolfram.com/Fallacy.html

[يسرا]

ازاي نثبت ان 1=2

مش هستعمل رمز x بل همشي على رمز ن لإنه بحس إنه جميل و خفيف على اللسان :-

بتركيز عالي جدا هتلاقوا طريقة الحل سهلة أوي :

طبعا أي شيئين متساويين نحط بنهم علامة يساوي و ن2-ن2 = ن2-ن2 .........................(شيء بسيط جدا)

ناخد أول مقدار و نحلله فهيبقى:-

(ن-ن) (ن+ن) = ن2-ن2 ............. ( و دي الخطوة الأصعب):mazika2:

ناخد المقدرا التاني و ناخد عامل مشترك هو ن فهيبقى :-

(ن-ن)(ن+ن)= ن(ن-ن)......................................(تاني أصعب خطوة):1:

في معانا مقدارين متشابهين على جانبي علامة = شلوهم و هيبقى :

ن+ن=ن ,,, و دا بيعني ان :

2ن=ن

و من العبارة اللي فاتت يبقى 2=1 :no1: :omg:

شكرا لكل من شارك و أخص أكتر اللي حاول
ازيك ياايجل
بينى وبينك بصراحة لو كان مدرس رياضة اللى قلك على المعلومة دى يبقى عليه العوض ومنه العوض
بس اللى مهون الموضوع شوية هو انه مدرس علوم
علشان لو كنت رحت لأى مدرس رياضة فاهم كويس..كان ببساطة شديدة هيشرحلك العلاقة بين الاعداد واللى على اساسها اتعمل خط الاعداد كمتسلسة
وطبعا كان هيقلك برضه ايه هى خواص المتسلسلة
يعنى لو اشتغلنا بالرمز ن اللى انته فرضته
هيبقى خط الاعداد اللى هو الف باء الجبر
ن,ن+ن,ن+ن+ن,......الى مالانهاية من المرات
يعنى فى الاساس استخدمنا الرمز ن كوحدة.....وبالتالى كل ن موجودة فى المتسلسلة متساوية
يعنى ماتقدرش تساوى الطرف ن بالطرف ن+ن والا مش هتبقى متسلسلة ويبقى كده خط الاعداد باظ
تانى حاجة
لما تيجى تحل معادلة علشان تلاقى مجهولين مش لازم يكون عندك معادلتين...صح؟؟
لازم طبعا
دلوقتى انت حطيت معادلة ن2-ن2=ن2-ن2
من غير معادلة تانية....وافترضت ان ن الاولى غير ن التانية علشان كده ماطرحتهمش من بعض وماسوتهمش بالصفر
يعنى بالزبط زى متاكون قلت ن2-س2=ن2-س2..الى اخر الاثبات اللى انت اثبته
علشان وببساطة شديدة...لو ن الاولى فى فرضك هى نفسها ن التانية...يبقى اول خطوة تتعمل هى انك تبسط المعادلة
بمعنى انك تطرح وتجمع المتشابه...يعنى هيطلع ن2-ن2=0..اذن ن2=ن2..اذن ن=ن
لكن لو مشينا مع الحل اللى انت عملته وهو انك من الاول مابسطتش المعادلة
معنى كده اعتبارك ان ن الاولى لاتساوى ن التانية وبالتالى مش مفروض تختصرها فى الخطوة الاخيرة
اللى هى دى
2ن=ن
ويبقى فعلا اثباتك ان ن = 2ن صحيح
فهمتنى
اتمنى يكون المعلومة وصلتلك وبعد كده ياايجل ماتعتمدش على معلومات مدرس علوم غير فى العلوم بس
الجبر اكبر بكتير ومعقد من ان حد يجي فى يوم يثبتلك خطأ فى اساسه
وبعدين ياأخى بالبديهى كده
انت معاك جنيه...تقدر تشترى بيه حاجة تمنها 2 جنيه
يعنى ماتحاولش تلاقى ثغرة فى علم اصله المنطقية....وانت مش منطقى فى تفكيرك
بس كده...شكرا ياايجل

[سـيف الديـن]

أولا علشان نبقى عارفين التقسيم على صفر ناتجهة مش فاي بل غير معرف و دا لضخامة الناتج......................................... ملاحظة أولى
أهلا بك يا Egyptian eagle :f:
اللعبة دى كنا بنلعبها أيام أولى إعدادى :d
ناتج قسمة صفر على صفر هو كمية غير معينة وليس كمية ضخمة أو لا نهائية
ناتج قسمة أى رقم آخر على الصفر هو كمية لانهائية ( كمية غير معرفة )
فى مرحلة من مراحل الحل أنت قسمت صفر على صفر وذلك بحذفك للمقدار ( ن - ن ) من كلا طرفى المعادلة وكأنك تقول ( بقسمة كلا طرفى المعادلة على الصفر ) وهذا قول لايجوز رياضياً

هذه ليست ثغرة رياضية ولكنها نكته رياضية غير منطقية :1:

شكرا على الطرفة الرياضية

:f2:

[قلب مصر]

ما شاء الله عليكم جميعا
انا عجبنى تسلسل الموضوع وتسلسل الردود ومقارعة الردود بالحجة والبراهين
بصراحة الموضوع كله جميل والأجمل منه هو اشتراكم جميعا في محاولة اثبات الصواب والخطأ
شكرا أيها النسر المصرى على محاولة تنشيط المخ التي قمت بها وعلى فكرة انا عدلت لك العنوان علشان يبقى مظبوط
:f: :f:

[Egyptian eagle]

بسم الله الرحمن الرحيم

يااااااااه دا الموضوع طلع كبير أوي .......


قبل ما أبدا في بعض الأشياء عايز أقولها:

1- شكرا جدا جدا لحضرتك يا ( قلب مصر ) على الكلام الجميل دا و على تعديل العنوان و أرجو إني أكون قد الكلام دا كله .........

2- أقدم اعتذار شديد جدا جدا لتأخري عنكم لكن و الله بجد انا كنت مشغول جدا جدا جدا الفترة الماضية أكرر الإعتذار مرة أخرى لكم و آمل إنكم تسامحوني على التأخير في الرد.....

3- الشيء الثالث هو كلكو عليا و لا إيه ( مقطع من مسرحية ) و أقصد به المزاح بالطبع......

ندخل بقا في الكلام العلمي الرياضي :

في البداية هرد على أ. يسرا :

في البداية شكرا جدا لحضرتك على المشاركة اللي أثرت الموضوع و على طريقة تفكيرك ,, كون إنه مدرس علوم ( كيمياء بالتحديد ) أو رياضيات فالاتنين المفروض علمهم واحد لا يتجزأ .........

و بالنسبة لوجهة نظر حضرتك فلو حضرتك راجعتي الموقعين اللي كتبتهم أ. حنان هتلاقي مفيش اعتراض غير على الخطوة الرابعة و مش على طريقة الحل ,, و بالمناسبة أنا نادرا جدا لما تكون طريقة حلي تشبه مدرس و لكن بتكون النتيجة واحدة دائما ,, يعني مش شرط أبسط المسألة و كمثال على كلامي المعادلة من الدرجة الثانية ممكن يبقى لها أكثر من طريقة للحل و المصفوفات ( Matrix ) لها نفس الشيء و حاجات ملهاش نهاية ,,,, و بالمناسبة المدرس دا له مكانة خاصة جدا بالنسبة لي و هو أكثر من أخ ليا و من صديق .. و بالطبع ممكن جدا أكون مش فاهم وجهة نظر سيادتك كويس و الرياضيات علم بشري و كل شيء بشري مش كامل و بالطبع كلامي لا يقلل إطلاقا من وجهة نظر سيادتك الجديرة بالاحترام و متأسف على تطويلي في الرد .......

ثانيا : أ, سيف الدين :

أد إيه أنا سعيد برد حضرتك و أنا متفهم وجهة نظر سيادتك و ردي على أ.حنان كنت ساعتها مأعرفش أي الخطوات المقصودة فأنا كنت بحس مقدار ( ستار ) هو المقسوم على الصفر و الجواب كمية غير معرفة ساعتها مش فاي و مسألة الجدل في نوعية الكمية دي نفس كدا لما تجيب جذر لعدد سالب لإن لها ناتج بس اسمه ( عدد مركب ) ,, و فعلا أن سعيد لأني شايف مصريين لهم عقلية علمية ممتازة و أنا مش عارف هل الموضوع منتشر في مصر أم لا لإن بيني و بينكم آلاف الكيلو مترات و أكرر سعادتي الشديدة برد حضرتك ,, و آمل دائما إني أتفاعل معكم في مواضيع ( مش هايفة ) و للمرة الثالثة أنا سعيد جدا برد حضرتك يا فندم

أ. حنان :

أعتذر بشدة لحضرتك عن تأخري في الرد في الحلقة العلمية الجميلة دي ,, خطوة حذف المقدارين استعملت فيها خاصية الحذف و لما قرأت رد حضرتك قلت أكيد حضرتك تعرفيها , يبقى لازم فيه شيء يمنعها ,, رجعت لمرجع عندي في الرياضيات و أشوف شروط الحذف لقيت في حالة الضرب لازم يبقى العدد المحذوف يكون كل الأعداد ( ستار ) و برهان الحذف هو القسمة طبعا و لما قرأت المواقع اللي حضرتك كتبتيها اقتنعت بوجهة نظر سيادتك و بالفعل خطوة الحذف ميعتمدش عليها قانون الحذف اللي انا استعملته في المسألة , و على فكرة أنا كلمت الأستاذ على نقطة اعتراض سيادتك و أقنعته بيها و اتفقنا على عشوة في المقابل........ ,,,,, و أشكر حضرتك فعلا على العقلية الممتازة ,,,, شكرا لحضرتك يا فندم

و مرة أخرى أنا آسف جدا للتأخير في الرد على وجهات النظر لحضراتكم و اللي فادتني جدا......................

بالتوفيق ........

[ابن البلد]

فيه مليون طريقة لأثبات أن 1 = 2
وأغلب بتوع كلية هندسة يعرفوا الحل بسهوله

ولو قلنا أن أي رقم في صفر بيساوي صفر
فا
1×0 = 2× 0
لو ضربنا المعادله كلها في 1/0
هيبقه ا× 1 = 2 × 1

ودي مش نكت رياضية أو ثغرات رباضية ولكن دي من عجائب الأرقام

وأدهشها ماتحدث عنها م/ عاطف هلال بأن الكل يساوي الجزء
أي أن
الأعداد الفردية في مجموعها تساوي كل الأعداد

علي العموم لو فيه وقت هبقه أكتب لكم شوية

[emerald]

السلام عليكم..

شكرا يا نسر على كلامك ..

بس الحقيقة .. انا اميل لتفسير الاخ نسر..مع احترام لباقي الاعضاء الكرام ..

ومن الناحية الرياضية.. زي ما قال الاستاذ احمد في اكثر من طريقة لاثبات الشئ دا ..

على العموم .. شكرا لكل الاخوة الى اثروا الموضوع ..

بارك الله فيكم.

[^حامل المسك^]

كلامك منطقى جدا ياابن البلد
بس هرجع واقول ان الكيمياء اسهل بكيتر من اللى عمالين تقولوة دا :d

[Egyptian eagle]

السلام عليكم ورحمة الله و بركاته ,,,,,,,


مرحبا ...

بداية أشكر كل من شارك برأيه في الموضوع و بالتأكيد فكل شخص شارك في الموضوع زادني فخرا ,,,,,

كالعادة سأرد عليكم واحد بعد التاني و يارب أوفق في ردي , نبتدي بقا :

أ . حامل المسك .....

أريد شكرك على مواضيعك المتميزة في القاعة العلمية و مجال الكيمياء ممتع لكنه في وجهة نظري ليس الأجمل بين العلوم فعندك الجيولوجيا و بالذات سلم الزمن الجيولوجي بتلاقي فيه متعة كبيرة جدا من خلال أدلة الأحافير و تشوف ازاي تلاقي شجرة شكلها عادي جدا جدا و بعد كدا تيجي تلمسها تلاقيها حجر إنت حاسس أد إيه المتعة في تفسير كدا , بلاش دا , لما تيجي كدا و انت كل اللي عملته قرأت كتابين عن الجيولوجيا و تفكر كويس فيهم تقدر تعرف مثلا فين حقول النفط أو الذهب أو كدا و الدليل على كلامي إنك تعرف ازاي طلعوا النفط من مدينة عراقية اسمها كركوك علام أتذكر من غير ميغرموا و لا مليلم الراجل الو احفر هنا يا عم و حفر و النفط خرج و من منطقة اللب core !!! و لما تشوف سلم الزمن الجيولوجي Geological Time Scale و تقدر تعرف حاجات حصلت من خمسة آلاف مليون سنة و تتعمق في زمن اللاحياة Azoic Eon و زمن الحياة المستترة Cryptozoic Eon و العصور الأحدث و لا يكون إيه شعورك لما تلاقي حيوان عاش من خمسة مليون سنة و ثلاثمئة و تلاقيه مثلا لما بياكل نبات و تلاقي النبات دا لسه جوه فمه و تلاقي حتى شعره موجود كإنه عايش بالظبط ياه أد إيه المتعة في البحث عن سبب حاجة زي كدا و على فكرة الحيوان دا اسمه الماموث عاش في عصر البلايوسين Pliocene ,,,, دا ملخص بسيط جدا لمتعة الجيولوجيا

و الفيزياء لها نفس المتعة في المجال النووي و الكهربي و الهندسي و الأحياء تعرفك آلية عمل كل كائن حي و نظريات التطور و الجينوم و البريتيوم و حاجات كتير و الكيمياء بقى علم لا يقل في شأنه عن باقي العلوم و بتكون متعتي بيه دائما لما بقرأ عن الكيمياء في المجالات العسكرية,,,,,,,,,,,,,,

دي بقى العلوم و متعتها و لكن بالنسبة ليا الرياضيات امتع كتير و اسهل شوية عن الباقي و لكن لو سئلت أيهما أفضل كيمياء و لا رياضيات هقول لك الرياضيات ...

و في النهاية هي وجهات نظر بيننا و انا عارف إنك قلتها بهزار و لكني أحببت توضيح وجهة نظري ليس إلا............

أ.emerald

أشكر حضرتك على المشاركة و على إبداء حضرتك للرأي و أرجو أن أكون قد إن رأيي حضرتك توافيقي عليه و شكر آخر لحضرتك إن حضرتك صاحبة المبادرة الأولى لإثبات ان 1=2 ......


أ. ابن البلد

لو ضربنا المعادله كلها في 1/0
هيبقه ا× 1 = 2 × 1

أنا مش فاهم وجهة نظر سيادتك لإن كدا احنا لما نضرب على صفر تقسيم واحد بيكون الناتج صفر ...

ممكن جدا أكون مش فاهم وجهة نظر حضرتك كويس فأرجو إن كان فهمي قاصرا أن توضحه لي

شكرا جدا لحضرتك يا فندم..........

[Egyptian eagle]

حاولت إني أعدل مشاركتي لأضيف استفسار لكن تقريبا غير مسموح ...


استفساري ل أ. ابن البلد

ممكن بعد إذن حضرتك توضح الرقم ا× 1

فيه رقم منهم هو 1 التاني دا ايه ؟؟؟

و لك خالص شكري ,,, بالتوفيق

[elleader]

ن2-ن2 = ن2-ن2 .........................(شيء بسيط جدا)

ناخد أول مقدار و نحلله فهيبقى:-

(ن-ن) (ن+ن) = ن2-ن2 ............. ( و دي الخطوة الأصعب):mazika2:

ناخد المقدرا التاني و ناخد عامل مشترك هو ن فهيبقى :-

(ن-ن)(ن+ن)= ن(ن-ن)......................................(تاني أصعب خطوة):1:

في معانا مقدارين متشابهين على جانبي علامة = شلوهم و هيبقى :

ن+ن=ن ,,, و دا بيعني ان :

2ن=ن

و من العبارة اللي فاتت يبقى 2=1 :no1: :omg:

شكرا لكل من شارك و أخص أكتر اللي حاول

اولا الكلام من أوله غلط مفيش حاجة أسمها ثغرة فى الرياضة الرياضة هى العلم الوحيد الغير قابل للتعديل ولكنه قابل لأضافة طرق أخرى من الحلول وهذا هو الدليل


المعادلة المكتوبة أساسا غلط لأن ن2-ن2 = ن2-ن2
يعنى 0=0
وبالتالى مفيش حاجة تتحلل ولنفرض اننا كملنا وحللنا
(ن-ن)(ن+ن)= ن (ن-ن) أنت عايز تقسم الطرفين على (ن-ن)
يعنى عايز تقسم على 0 وايه حاجة مقسومة على صفر تكون غير معرفة أو مالا نهاية
وبالتالى المعادلة الثانية برده غلط .

ده بقى ماسمهوش ثغرة فى الرياضيات ولكن أسمه التحايل على الرياضيات لأنك شغال طول ا لأثبات بمعادلات أطرافها أصفار وتتحايل على اللى قدامك بأنها متغيرات لكن هذه المتغيرات متساوية .

[Egyptian eagle]

سيدي العزيز ...

لقد توصلنا في النهاية لما قلته ولو راجعت الردود فستجد ذلك بنفسك و أشكرك على ردك ....

اعتقد أن الموضوع الآن انتفت الفائدة منه و قتل بحثا و نقاشا ...

تقبل تحياتي

[خالد محمود]

السلام عليكم و رحمة الله و بركاته .

أنا مبسوط أوي إن في شباب في مصر عندهم العقلية الرياضية الجامده دي.

أولاً : الحقيقة ممكن يكون في ثغرة في نظرية رياضية أو هندسية ، لكن لو كان الإثبات ده ثغرة رياضية ، يبقى هدينا علم الرياضيات من أساسه ، لأن من أساسيات الرياضيات إن القسمة على صفر تدينا كمية غير معرفة أو كمية غير محددة زي ما حنان قالت .

ثانياً : أحب أوضح الفرق بين القسمة على الصفر و بين القسمة على رقم يقترب من الصفر ، فالقسمة على رقم يقترب من الصفر يدينا ما لا نهاية ، لكن القسمة على الصفر نفسه زي ما قلنا حتدينا كمية غير معرفة أو كمية غير محددة .

ثالثاً : يظهر إنك مشغول شوية يا إبن البلد ، فبعد إذنك أوضح وجهة نظرك لـ Egyptian Eagle ، و بعد إذنك يا Egyptian Eagle أَوضحلك وجهة نظر إبن البلد .

إبن البلد قال إن

2 × 0 = 1 × 0

لأن ناتج الطرفين يساوي صفر .


بعد كده نضرب كل طرف × 1\0 (1 على 0) .


إذن 2 × 0 × 1\0 = 1 × 0 × 1\0

بعد كده كل صفر حيضيع مع الصفر اللي في المقام .

إذن 2 × 1 = 1 × 1

إذن 2 = 1

الحقيقة هو عمل زَيَكْ يا Egyptian Eagle ، بس الفرق إن إنت قسمت على مقدار يساوي صفر لكن إبن البلد قسم على الصفر ذات نفسه على طول .

ع العموم زي ما قلت أنا مبسوط إن في ناس بتحب تتناقش في الرياضيات .

و معلش طولت عليكم .

و السلام عليكم و رحمة الله و بركاته .

[Egyptian eagle]

مرحبا بك سيدي العزيز .. خالد محمود

شكرا لك على أسلوبك الجميل في الحوار .. بداية ...

و أعتذر عن عدم مشاركتي في المنتدى طيلة الفترة الماضية أو بالأحرى منذ نزولي مصر ..

..........بعد كده نضرب كل طرف × 1\0 (1 على 0) ..............

هو هنا مفتاح اللغز في المشاركة و حضرتك وضحته ... انا للأسف قرأتها من الشمال لليمين .... فأشكرك ..


لك تحياتي ..أخي العزيز



شيء آخر .. انت مش طولت و لا حاجة بل على العكس مشاركت حضرتك مفيدة و جميلة ....

[شعاع من نور]

اللعبة دي كنا بنلعبها على بعض أيام الكلية...فكرتني بالذي مضى يا محمود....

المعيد رص المعادلة قدامنا ع السبورة و راح مستنتج بمنتهى البساط انه 1=2 و كتبها بالأحمر....و احنا مسبهلين و مش مصدقين حاجة...http://www.egyptsons.com/misr/images/smilies/080402cool_prv.gif

بعد كده بدأن نستوعب...انه في خطوة اتقسم فيها على صفر...و القسمة على صفر تدي كمية غير معينة....رمز _لاتيني على ما اعتقد_ كده يشبه الفيونكه..أو infinity ...المالا نهاية...

المعيد قالنا لو كنتوا عديتوها كان بقى لي معاكوا تصرف تاني....http://www.egyptsons.com/misr/images/smilies/080402cool_prv.gif

بس دي مش ثغرة يا نسر...دي زي ما تقول لعبة كده عشان تشوف سرعة بديهة اللي قدامك...و هياخد باله من الغلطة و لا لأ...

بجد تسلم ايدك...مواضيعك كلها مميزة....

تقبل تحياتي....

[Egyptian eagle]

أختي العزيزة ..شعاع من نور ... ساره ..

طلعت فعلا مقالب أساتذة ,, هههههه .. شكرا ليكي على المشاركة و الموقف الجميل و برغم اتضاح الأمور و انتفاء الفائدة تقريبا مش هقفل الموضوع علشان لو فيه أي شخص عنده رأي في المسألة أو يحب إضافة شيء..

لكم تحياتي