أنا نفسى أكون وأكون

[سمـاء]

أنا نفسى أكون وأكون= بكرة نحقق أحلامنا
والحلم اذا كان مجنون= ممكن يعقل فى خيالنا
*****
أنا نفسى أكون عصفور= وأزور كل الأشجار
الصبح أصحى النور= وأغنى لأحلى نهار
من شجرة لشجرة أطير= وأرفرف كده بجناحى
ويا صحابى العصافير= ويشاركونى فى أفراحى
*****
وأنا نفسى أكون أغنية= تتغنى فى كل مكان
وكلامها يبقى هدية= متغلفة بالألحان
وأطلع وأنزل ع السلم= وألعب مع مفتاح صول
مع دو رى مى اتكلم= والفا تسمعنى وأقول
*****
وأنا نفسى أكون الفرشة= فى صوابع الرسام
ع الورقة البيضة أتمشى= أرسم عصافير وحمام
أو أرسم يوم العيد= والأطفال فيه فرحانة
ويا جميع الألوان= والأسود مش ويانا
*****
وأنا نفسى أكون كمبيوتر= وأصاحب الأطفال
وأكلمهم بزراير= أو ماوس يمين وشمال
ممكن يرسموا لوحات= أو يتعلموا ويايا
أو ندخل فى مسابقات= أو يسمعوا منى حكاية
*****
أنا نفسى أكون وأكون= بكرة نحقق أحلامنا
والحلم اذا كان مجنون= ممكن يعقل فى خيالنا
*****

[محسن يونس]

سماء
الله .. الله
ما هذا الجمال الآثر والكتابة البسيطة بساطة الفن الأصيل !!
تعرفين لماذا ؟ لأن الشعر المكتوب لم يكن وعظيا ممجوجا ، ولكنه كان قريبا من قلب طفلى وهو يسمعها ..
أرجو من الزميلة " توتا " أن تلحنها وتغنيها مع أطفالها .. لأن الحلم مشروع يا صديقتى ..
تقديرى واحترامى

[سمـاء]

الأديب محسن يونس

كم أسعدنى تعليقك الرقيق....

وربما كان قريبا من قلب طفلك وهو يسمعها ..

لأنه مستوحى من أحلام الأطفال حقا...

وقد غناها فعلا بعض الاطفال فى احدى الحفلات المدرسية

شكرا لحضورك وكلماتك

[أم أحمد]

الله حلوة اوي يا سماء
اسلوبك جميل خالص
وسهلة الوصول لقلب اي طفل
سلمتي حبيبتي
مودتي
:f2:

[سمـاء]

أم أحمد

الحمد لله إنها عجبتك...

يا ترى عجبت أحمد؟؟؟؟

الكتابة للأطفال بحبها جدا... بتكون صادقة جدا

حتى لو كلها خيال...

شكرا....

[ريـم]

جميلة جداً يا سماء ! حبتها أوي و خلتني نفسي أكون و أكون !

[سمـاء]

شكرا جدا ياريم...

وطبعا من حقك إنك تحلمى...

وأعتقد كمان إن من واجبك إنك تحلمى

لإن كل الأعمال الكبيرة بتبتدى بحلم...

وأن شاء الله تحققى كل اللى حلمتى بيه

وتكونى فعلا زى ما نفسك تكونى...

[قلب مصر]

والحلم إذا كان مجنون
ممكن يعقل بخيالنا
ما أجمل أحلام الطفال وما أجمل جنونها
اتمنى دائما أن تظل أحلام الأطفال معلقة في ذاكرتى
كما أنى اتمنى لها دائما أن تظل بحالة جنونها
فجنون الحلم هو اجمل ما فيه
سماء قصيدتك رائعة مثلك
استمتعت بمفردات الكلمات وجذبتنى لعالم الأمنيات والأحلام
تحياتي :f:

[ليلة عشق]

الأخت الغالية سماء

رسمتِ بكلماتك لوحة فنية جميلة متعددة الالوان ......
فأسرتيني بها دون عناء بأسلوب سلس وجميل ......
ماأجمل الكتابة للأطفال .....
سلمتِ وسلم قلمك الرشيق ......
لكِ خالص الشكر والتقدير ......

تحياتي
ليلة عشق

[سمـاء]

أم يوسف

أعتقد أن الكثير مما نتمتع به

فى عصرنا الحالى

كان مجرد أحلام مجنونة

لكنها عرفت طريقها للواقع..

الحمد لله أنها عجبتك، ياترى عجبت يوسف؟؟؟

[سمـاء]

ليلة عشق

تذوقك لمختلف الكلمات رائع

شكرا لك على كلماتك الرقيقة

خالص تقديرى

[عاطف الجندى]

جميلة يا سماء
فى لهجة عامية بسيطة أحسنت

[سمـاء]

عاطف الجندى

شكرا على كلماتك الرقيقة...

وعذرا على التأخر فى الرد..

خالص تقديرى