المساعد الشخصي الرقمي

مشاهدة النسخة كاملة : اطلب الوصفه اللى على بالك ... تلاقيها قدامك الحاصل على ذهبية حورس 2010



الصفحات : 1 2 3 [4] 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57

sea horse
07-05-2006, 09:58 PM
اولا الف شكر يا جماعه على ردودكم الجميله
بس والله ولا زعل ولا حاجه هوه كان مجرد تساؤل
نثبته ليه ونفكه ليه ؟؟ ليس الا
:hop:
ولما رد العزيز فنسر فالقافيه حبكت .... وبس
:2:
وثانيا دعونا نطبخ فى صمت .. ومن غير تخبيط حلل
:4:
وللعزيزه waves
طبعا العجينه مختلفة وعلشان كده كتبت التانيه
لان عجينة الكريب بتكون سايله وتتصب فى طاسه سخنه ...الخ
اما السلطات فحاضر ..جاى
مساء الفل
:eat:

fencer
08-05-2006, 02:01 AM
دعونا نطبخ فى صمت .. ومن غير تخبيط حلل

:eat:

طالما هانطبخ في صمت فأنا عايز وصفة سد الحنك
بجد عايزها ;)
صباحك عسل
متشكرين على سعة الصدر و صباحكم ورد

sea horse
08-05-2006, 07:21 AM
العزيزه waves
مافيش اى مشاكل ان شاء الله ... مجرد تحابيش مطبخ عادى
سلطة الكوول سلو
كرنبايه افرنجى صغيرة وجزرايه وسط وبصله صغيرة
عودين كرفس افرنجى ومايونيز يخفف بقليل من الخل وملح وفلفل ابيض
يقطع ملئ كوبايتين شرائح رقيقة من الكرنب و تبشر الجزرايه بشر خشن
وتقطع البصلايه شرائح رقيقه ( يمكن الاستغناء عن البصل لمن لا يحبه )
يقطع ساق الكرفس رقيق ( ما يوازى نص كوبايه )
نخلط الخضروات كلها مع بعض ونضيف المايونيز بعد تخفيفه قليلا + الملح الخفيف
ونحط الخليط فى التلاجه ساعتين
وبالهنا والشفا
صباح الفل
:eat:

sea horse
08-05-2006, 07:26 AM
العزيز الغالى فنسر
احلى صباح من هنا لهناك ...
:f:
سد الحنك
نص كيلو سمن و دقيق كافى و نص كيلو سكر
يقدح السمن فى حله عميقه
وينزل من على النار ويضاف السكر مع التقليب بزمه وضمير
ونبدأ فى رش الدقيق والتقليب السريع
لغاية ما تبقى عجينه لينه و ترفع على نار هاديه
حتى درجة التماسك المطلوبه
ويقلب على النار لغاية ما نشم ريحة سوا الدقيق
وسلملى على اجدع رجيم
وبالهنا والشفا
صباح الفل
:eat:

أم أحمد
08-05-2006, 10:30 AM
احلي صباح يا سي هورس
ممكن اعرف انواع مختلفة لحشو اللازانيا
انا في الغالب باعملها باللحمة المفرومة وباحط معها بعض انواع الخضار زي مثلا مشروم وجزر مبشور وساعات من غير خالص
وتسلم ايدك علي الاكلات الهائلة

waves
08-05-2006, 03:02 PM
مرسيى جدا ياسى هورس على السلطة اصل ابنى بيحبها جدا ومابحبش يكلها من المحلات :-s

بالمناسبة عندى عيد ميلاد ابنى بعد 10 ايام وادبست فى عزومة لاصحابه فى البيت وطبعا بقى معاها اخواتى والجيران والاصحاب وطبعا انا محتاسة ومش عارفة اعمل ايه ؟ انا دايما كدة ادبس نفسى وارجع اندم :'( :eek: :( :no:

ممكن تقولى على الحاجات اللى ممكن تتقدم فى وجود الصغار والكبار وابتدى بتوضيب ايه من دلوقتى:cop:

وشكرا مقدما:f:

ديدي
08-05-2006, 03:16 PM
مساء الفل عليكم جميعا
دائما مطبخنا عامر ان شاء الله
سلطة الكول سلو 10 على 10 سى هورس
تقبل تحياتى وتقديرى

sea horse
08-05-2006, 08:16 PM
العزيزه ام احمد هانم
المطبخ منور بيكم .... وليكم
لازانيـــــــــــــا
مقادير العجينة
نص كيلو دقيق و أربع بيضات ومعلقة زيت و نص معلقة شاى ملح
نغربل الدقيق ونحطه في صحن غويط وعليه البيض والملح والزيت
نعجن كويس أوى لغاية العجينة المتماسكة
ونلف العجينه فى فوطه معصوره اوى ونسيبها نص ساعه
بعد كده نفرد العجينة لغاية ماتبقى رقيقة ( حوالى 3 مم ) مع رش الدقيق للتسهيل
نقطع العجينة بالسكين مربعات حسب الرغبه ( غالبا 7×7 سم )
نكون محضرين ماء يغلى ونسقط وحدات اللازانيا فيها واحده ورا التانية
غالبا تاخد 2-3 دقايق غليان للواحده
وطبعا ممكن استخدام عجينه جاهزه بدل اللى فات
:mazika2:
نجهز بقى الحشو
نص ك لحم مفروم و معلقتين أكل زبده وبصلايه كبيره مخرطه ناعم
وجزرايه مبشوره و بقدونس مفرى وطماطم مبشوره
وفلفل اخضر مقطع صغير اوى وتلات معالق جبن رومى قديم مبشور وملح وفلفل
نشوح البصله ووراها الجزر والفلفل والبقدونس واللحم المفروم والملح و الفلفل
وبعد عشر دقايق عالنار والتقليب نضيف الطماطم كمان عشر دقايق
ندهن الصينية ونبدأ نرص وحدات اللازانيا ونحط عليها الحشو ونغطيها بواحده تانيه
أو ممكن نحط حشو قليل ونطبق الأطراف عليها بالشكل المطلوب
نحط الصينية في الفرن بدرجة حرارة 225 لغاية ما يلون بنى
ولا نستعجل في قص وتوزيع اللازانيا على الأطباق
وهي ساخنة فذلك لايساعد على تماسكها
وبالف هنا
مساء الفل
:eat:

sea horse
08-05-2006, 08:25 PM
العزيزه waves
اعياد ميلاد الصغار لازم يكون فيها الحاجات اللى بيحبوها
يعنى الشيكولاته تكون غالبه عالاصناف
وكمان العصائر .. وافضل حاجه تجيبى باليركس عميق كبير
ويتملى كوكتيل من عصير فراوله مع مانجه وتحطى جواه علبتين كمبوت كريز ومكعبات تلج
وبالمغرفه وكوبايات بلاستيك...بس بعدها هاتحتاجى شركة تنظيف للشقة
:no2:
والتورتات تكون شيكولاته .. وممكن موس شيكولاته باللبن ( زى المهلبيه )
وكمان الكريم كراميل بيبقى حلو مع الاطفال اوى
اما الساندوتشات فيفضل تشترى بيتى بان صغير اوى .. بيتباع فى المخابز بالكيلو
وتحشيه خلطة تونه بالزيتون الاسود المقطع رفيع .. و فراخ بانيه شرائح ..الخ
ولو عايزه الحفله تبقى ..واوو .. يبقى تورتة ايس كريم
وكل سنه وهو طيب
مساء الفل
:eat:

sea horse
08-05-2006, 08:27 PM
العزيزه ديدى
بالف هنا وشفا
والرك عالنفس فى المطبخ
:y:
مساء الفل
:eat:

osha
09-05-2006, 03:18 AM
صباح الورد عليكم جميعا
سؤالي النهارده عن تخزين الطعام مجمد وجاهز على الأكل
المدد المناسبة لتخزين الانواع المختلفة بما يحافظ على نسب الفوائد فيها بقدر الامكان
اشرح تاني
يعني لو الاكل المخزن عبارة عن وجبات لفرد واحد عبارة عن لحوم (كمونية وكباب حلة ) خضار (بامية ) بقول (لوبيا)
كله يكون نصف سوا طبعا
السؤال عن الفترة المثالية للحفاظ على القيمة الغذائية
وصباحك فل ياعم سي هورس

أم أحمد
09-05-2006, 05:28 AM
صباح الفل عليكم جميعا
تسلم ايدك سي هورس
بس طبعا انا باشتري اللازانيا جاهزة وباريح دماغي
بس كنت عاوزة اعرف لو في انواع حشو مختلفة ومش يقتصر علي الحشو التقليدي
وجزاك الله كل الخير

sea horse
09-05-2006, 07:12 AM
اوشا هانم
ياعينى عليك يا حسام يا خويا واللى هايجرالك
:notme:
هاتاكل تلات اشهر من الفريزر ؟؟؟ طيب ما تقضيها ايس كريم وخلاص ؟؟؟
:notme:
ولا اقولك ؟؟ خليها نايمه وبيع التلاجه والفريزر
:hey:
وبعدين ولا يهمك.. احنا مع بعض اون لاين وهانخليها ترجع المطبخ ماتعرفوش
:hey: :l2: :hey:
بصى اوشا هانم ....
ممكن طبعا تخزين خضار مطبوخ لمدة حتى شهر كامل بدون تغيير
بس المهم اننا نحط كل وجبه على حدى فى علبه مستقله
لان مايفسد الطعام المجمد هو اخراجه من التجميد وتسييحه والغرف منه ثم تجميده مره اخرى
وبالنسبه للحوم يفضل وضعها فى اكياس صغيرة بحجم الوجبه
يعنى كل قطعتين لحم مثلا فى كيس..فنخرج الخضار يفك من التجميد ثم يسخن مع اللحم حتى الغليان
و نفس الكلام مع المكرونه او الرز ولكن لا يزيد عن اسبوع
كما يراعى الا يكون بالفريزر اشياء لها رائحه نفاذة حتى لا تغير طعم الطعام المحفوظ
وربنا معاك يا حسام
صباح الفل
:eat:

sea horse
09-05-2006, 07:38 AM
ام احمد هانم
هيه بصراحه اللازانيا بتبقى حلوه بالحشو التقليدى
لكن طبعا فيه حاجات تانيه بتبقى حلوه برضه
زى الحشو بالبسلة المسلوقه مع جزر مع بسطرمه متشوحه بالزبده
و ممكن بالجبن الشيدر مع حلقات الزيتون الاسود
وصباح الفل
:eat:

سمـاء
09-05-2006, 12:54 PM
Sea horse

واضح ان الأكلات هنا طعمة ولذيذة جدااااااااااااااا

شكرا ليك وللأفكار الجديدة دايما

بس عندى اضافة صغيرة لـ waves وهى ان زى الاصناف ما بتكون مهمة شكل التقديم كمان، يعنى ممكن لابنك تعملى تورتة على شكل كورة، وهى أصلا مدورة بس تزوقيها بالكريمة البيضا والبنى على شكل الكورة، أو ممكن تعملى واحدة مستطيلة وترشى عليها فستق مبشور وتخططى عليها ملعب كورة مثلا....

يعنى حاجات من الخبرة.... وكل سنة وانتم طيبين

سماء

waves
09-05-2006, 02:18 PM
سى هورس

بجد مش عارفة اقولك ايه على ردك السلس ده وحسستنى وكأن الموضوع سهل جدا ومافيش اى مشاكل بالمرة للعزومات وخاصة لاعياد ميلاد الصغار ....:y1:

وفكرة كوكتيل العصير دي هايله تنفع حتى للتقديم العادى وخصوصا فى الصيف:4:

بشكرك تانى على اهتمامك بالرد والافكار الجميله اللى قدمتها:mazika3:

وسؤالى انهاردة طريقة عمل تورتة الموس شيكولاتة اللى ذكرتها فى ردك:mm:

وشكرا مقدما:f2:

waves
09-05-2006, 02:27 PM
الاخت العزيزة سماء:bye:

اشكرك جدا لاهتمامك بالرد وانا طبعا معاكى فى موضوع ان الشكل كمان مهم للصغار زى الكبار بالظبط:2:

وفكرة الكورة او الملعب جميله جدا وان شاء الله اعملها بنفسى او حتى اقولها لمحل يصممها :good:

اكرر شكرى لكى *8*

ديدي
09-05-2006, 03:11 PM
مساء الفل على اعضاء مطبخنا الجميل
سى هورس لو سمحت عاوزه اعرف طريقة عمل الباتيه فى البيت
وازاى اقدر احشيه حلو او حادق
ميرسى مقدما

fencer
09-05-2006, 05:11 PM
اوشا هانم
ياعينى عليك يا حسام يا خويا واللى هايجرالك
:notme:
هاتاكل تلات اشهر من الفريزر ؟؟؟ طيب ما تقضيها ايس كريم وخلاص ؟؟؟
:notme:
ولا اقولك ؟؟ خليها نايمه وبيع التلاجه والفريزر
:hey:
وبعدين ولا يهمك.. احنا مع بعض اون لاين وهانخليها ترجع المطبخ ماتعرفوش
:hey: :l2: :hey:
بصى اوشا هانم ....
ممكن طبعا تخزين خضار مطبوخ لمدة حتى شهر كامل بدون تغيير
بس المهم اننا نحط كل وجبه على حدى فى علبه مستقله
لان مايفسد الطعام المجمد هو اخراجه من التجميد وتسييحه والغرف منه ثم تجميده مره اخرى
وبالنسبه للحوم يفضل وضعها فى اكياس صغيرة بحجم الوجبه
يعنى كل قطعتين لحم مثلا فى كيس..فنخرج الخضار يفك من التجميد ثم يسخن مع اللحم حتى الغليان
و نفس الكلام مع المكرونه او الرز ولكن لا يزيد عن اسبوع
كما يراعى الا يكون بالفريزر اشياء لها رائحه نفاذة حتى لا تغير طعم الطعام المحفوظ
وربنا معاك يا حسام
صباح الفل
:eat:

شفت اللي هايحصل لي *22*
انا مقدر تعبها طبعا يا سي هورس :y: ما توديناش في داهية زي ما انت عارف و راسي اه ه ه *78*
طبعا يا سي هورس زي ما انت فاهم فكرة الفريزر دي هايلة و بلاش كلام كتير في السياسة عشان نهارنا يبقى فل و الليلة دي تعدي *38*
يا ساتر استر يا رب *36*
يا منجي الجحش من الوحش :xx:
يجعل كلامنا خفيف عليهم
و كمان فكرتك اننا مع بعض دي اساسية و هاوجع دماغك كل يوم :mazika:
و بالمناسبة عايز وصفة تورتة شيكولاتة في السريع *64*

osha
09-05-2006, 07:10 PM
اوشا هانم
ياعينى عليك يا حسام يا خويا واللى هايجرالك
:notme:
هاتاكل تلات اشهر من الفريزر ؟؟؟ طيب ما تقضيها ايس كريم وخلاص ؟؟؟
:notme:
ولا اقولك ؟؟ خليها نايمه وبيع التلاجه والفريزر
:hey:
وبعدين ولا يهمك.. احنا مع بعض اون لاين وهانخليها ترجع المطبخ ماتعرفوش
:hey: :l2: :hey:
بصى اوشا هانم ....
ممكن طبعا تخزين خضار مطبوخ لمدة حتى شهر كامل بدون تغيير
بس المهم اننا نحط كل وجبه على حدى فى علبه مستقله
لان مايفسد الطعام المجمد هو اخراجه من التجميد وتسييحه والغرف منه ثم تجميده مره اخرى
وبالنسبه للحوم يفضل وضعها فى اكياس صغيرة بحجم الوجبه
يعنى كل قطعتين لحم مثلا فى كيس..فنخرج الخضار يفك من التجميد ثم يسخن مع اللحم حتى الغليان
و نفس الكلام مع المكرونه او الرز ولكن لا يزيد عن اسبوع
كما يراعى الا يكون بالفريزر اشياء لها رائحه نفاذة حتى لا تغير طعم الطعام المحفوظ
وربنا معاك يا حسام
صباح الفل
:eat:


إني أرى رؤوسا قد أينعت وحان قطافها :3:

شكرا يا سيدي على النصيحة والله انا كنت حاملة هم كل يومين تليفون شكوى من اكل المطاعم
ما علينا
انا فعلا كنت عاملة حسابي ان الوجبة تكون فردية تخلص في اكلة واحدة والسلام بس شهر افتكر انه قليل اوي
وبعدين فيه حاجة مافهمتهاش اخلي اللحمة لوحدها وانا طابخاها مع الخضار أصلا
طبعا المكرونة والرز مش في الخطة اصلا لانه بيعرف يعملهم
انما كنت بافكر في صواني صغيرة مكرونة بشاميل تكون جاهزة على السواء مش مستوية خالص
وكمان سؤال عن البقول زي اللوبيا

sea horse
10-05-2006, 07:27 AM
العزيزه سماء
شكرا لردك ونورتى مطبخنا الجميل
وطبعا افكارك فى التقديم هايله
بلاش تبعدى عن المطبخ ... وتبقى مسئولة عن شكل التقديم
صباح الفل
:eat:

sea horse
10-05-2006, 07:31 AM
العزيزه waves
بالهنا والشفا وعقبال 100 سنه لابنك
موس الشيكولاتة
ربع كيلو شيكولاتة خام و5 معالق كبيرة كاكاو
وتلات بيضات ( نفصل الصفار لوحده )
كوبايتين كريم شانتى وطبعا ممكن الجاهز ...وربع كوباية لبن
سكر بودره للتحلية وورق نعناع للتجميل
ندوب الشيكولاتة الخام على حمام ماء لغاية ما تدوب تمام
نقلب الشيكولاته لما حرارتها تهدأ شوية ونضيف اللبن ونقلب بزمة وضمير
:hop:
نضرب بياض البيض جدا لغاية ما يتماسك ونخلطه بالكريم شانتى
ونروح مقلبينهم مع الشيكولاتة باللبن تقليب يدوى...برضه بضمير
ونصبه فى اى كاسات او كوبايات ويجمل بالنعناع ويبرد
و صباح الفل
:eat:

sea horse
10-05-2006, 10:49 AM
العزيزه ديدى
طبعا الباتيه مش سهل اوى... لكن المحاوله تستاهل

الباتيه
كيلو دقيق وكوبايتين ميه تقريبا لضبط العجين
10 معالق كبيره سكر ومعلقة كبيره ملح
كيسين خميره جافه منشطه بشوية سكر فى ميه دافيه قليله
معلقة كبيره محسن عجين وده مهم جدا ويتجاب من درب البرابره
بيضتين و أربع معالق كبيره زبده
:y:
و 600 جرام زبده للطبقات
هانخلط العجين كله ونضبطه بالميه ونسيبه يخمر ساعه
ثم يفرد العجين كله ونحط طبقة زبده ونطبق العجين ونفرده تانى
ونحط طبقه تانيه وهكذا لغاية ما نخلص الزبده ..بتبقى حوالى 4-5 مرات
ونلم العجين ويدخل التلاجه متغطى بقماشه لمدة 24 ساعه
ويطلع نقطعه ونفرد كل قطعه ونحط الحشو المرغوب
ممكن جبنه فيتا بعد عجنها لسهولة الفرد
وممكن مبشور شيكولاته خام .. وممكن مربه
وبالهنا
:eat:

sea horse
10-05-2006, 10:53 AM
الأعزاء جدا فنسر و أوشا
طبعا انا بس بهدى النفوس
;) :notme: ;)
لكن ولا يهمك وراك رجاله والكلام بينا هايحلو ويحدق كمان
:sh:
بالنسبه لموضوع اللحم والخضار يا اوشا
لازم تسلقى اللحم لوحده و تطبخى الخضار بشوربة اللحم لكن بدون وضع اللحم فيها
وساعة الاكل يخلطهم ويسخنهم ويغليهم
لان وضعهم مع بعض هايسرع بالفساد جدا
وطبعا لو كباب حله او ما شابه فبرضه يحفظ لوحده
وطالما هوه محترف رز وكرونه يبقى فاضل شوية عدس وبصل وياكل كشرى ما حصلش
:king:
و صباح الفل
:eat:

waves
10-05-2006, 02:19 PM
سى هورس
مرسيى جدا على الموس شيكولاته...واشكرك على التهنئة:f2:

بس انا لو عايزة اعملها على شكل تورتة هل الكيكة بتكون الكيكة الاسفنجية العادية بتاعت التورتة وبعدين احط الموس شيكولاتة على الوجة وبعدين برضه احطها فى التلاجة ؟؟؟؟:notme:

وشكرا مقدما:f:

ديدي
10-05-2006, 02:47 PM
مساء الفل
شكرا سى هورس :y1:
هو صحيح شكله دوشه شويه بس انا نفسى اجربه
ان شاء الله يوم الاجازة اجرب ويطلع كويس
وبالهنا والشفا

sea horse
10-05-2006, 06:59 PM
العزيزه waves
الموس مع الكيك يعمل تورته مثلجه طبقات
تورتة الموس بالكيك
بمعنى ممكن فى قارب بيركس عميق نصب شوية موس
ونحط طبقة كيك رقيقه ونصب تانى وهكذا ... بحيث اخر طبقه تبقى موس برضه
و تدخل التلاجه كام ساعه تمسك نفسها
بعد كده نسخن حوالين القارب بسرعه علشان يفصل عن الموس
ونقلبها فى طبق تقديم ... وتزين بمبشور الشيكولاته
مساء الفل
:eat:

sea horse
10-05-2006, 07:00 PM
العزيزه ديدى
جربى ومستنيين النتائج
:4:
مساء الفل
:eat:

aynad
10-05-2006, 09:16 PM
يااااااااااا سي هوووووورس
ازيك يا باشا
انا جبت من السوبر ماركت باكت كسكسي بس شكله غريب عبارة عن حبيبات كبيرة مش زي اللي احنا متعودين عليها
بيتعمل ازاي
ممكن
وتسلم ايدك مقدما

sea horse
11-05-2006, 07:00 AM
العزيزه ايناد
الكسكسى له اشكال مختلفة من بلد لبلد
فتلاقى الكسكسى المغربى انعم بكتير من التونسى
لكن الوصفه عاديه ..وهيه تسويته على البخار ودى افضل طريقة
وبعد كده نسيح سمن او زبده ونرشها عليه وقت التقديم
وفيه يحبوا يعملوا الكسكسى بشوربة اللحم
وفى الحالة دى هانسويه فى حله ونرش عليه الشوربه كل شويه مع التقليب حتى السوى
وبالف هنا
:eat:

aynad
11-05-2006, 08:09 AM
الف الف شكر يا سي هورس
بس هو مينفعش يتحط عليه سكر بودرة او لبن حليب ؟؟؟
ولا عادي زي الطريقة بتاعتنا العادية ؟؟؟
وتسلم يا رب يلي فاتح مطابخ بيوتنا http://www.lakii.com/vb/smile/21_130.gif (http://www.lakii.com/vb/uploader/smilies.php)

sea horse
11-05-2006, 08:53 AM
العزيزه ايناد هانم
طبعا ينفع
لان اشكال تقديم الكسكسى كتير
ومنها برش السكر عليه و ممكن بالعسل و ممكن بمربة النارنج ( دى احلى واحده بالنسبه لى )
لكن اضافة اللبن ده شكل تانى برضه ..و ممكن دمج اكتر من طريقه
يعنى بعد تسوية الكسكسى ممكن تقدميه بطريقتين تلاته
وبالف هنا
والف شكر لزوقك و تشجيعك
صباح الفل
:eat:

أيوب الصابر
11-05-2006, 10:11 AM
سي هورس
متشكر عالوصفه
واتفضل كل معايا

waves
11-05-2006, 01:14 PM
اشكرك ياسى هورس على تورته الموس بالكيك شكلها كدة تحفة ولما اعملها حقولك النتايج:no1:

معلش نرجع للسته تانى ....ممكن لو سمحت طريقة كفته الكبدة :2:

وشكرا مقدما:f:

sea horse
11-05-2006, 09:29 PM
العزيز ايوب
بالف هنا وشفا وكتر الدقه
مساء الفل
:eat:

sea horse
11-05-2006, 09:35 PM
العزيزه waves
عمل الكبده كفته يحتاج مجرد ضبط تخانة العجين
و زيها بالضبط كفتة المخ
كفتة الكبده
نجيب كبده ونشيل كل الاغشية المحيطه بها و العروق
بعد كده نضربها فى الكبه والافضل تتفرم لو فيه مفرمه مع شوية بقسماط
نحطها فى حاجه غويطه ونضيف الملح والفلفل و مبشور جوزة الطيب
ونضرب بيضتين تلاته كويس اوى و نضيفهم
:y1:
ونضيف بقسماط مع العجن بشوكه كبيره لغاية تخانه تنفع للتصبيع
ونبلل ايدنا بالزيت ونصبع الكفته ونرصها فى صينية
بعد كده نقلبها فى بقسماط ونسقطها فى زيت بيغلى عميق
وتطلع على بقدونس مفرى
و بالف هنا
مساء الفل
:eat:

osha
13-05-2006, 05:42 AM
قلنا نصبح
سؤالي عن صوص التارتار
وهل يمكن تقديمه مع باقي الأكل والا هو حكر على السمك

سؤال تاني عشان تخزين الاكل :hop: - وياريت بلاش تهدي النفوس هي هادية لوحدها :@
انا بافكر حاليا اغسل فراخ واحطها في الفريزر تطلع عدل على حلة المية المغلية والبصل والحبهان والذي منه
عشان بقى ماكترش - ايه الفترة المناسبة اللي تتاكل فيها الفراخ دي
وكمان هل الافضل تطلع مجمدة - مغسولة طبعا - على الحلة عدل والا الأفضل تسيح الأول
وتشكر ياباشا يا معمر مطابخنا:4:

sea horse
13-05-2006, 07:15 AM
العزيزه اوشا
صوص التار تار يستعمل اساسا مع الاسماك ومع المشويات من اللحوم
وتلاقيه من ضمن انواع الصوص الاختيارية فى حفلات الباربيكيو
اما موضوع حفظ الفراخ مغسوله فى اكياس بالفريزير فممكن حتى 6 شهور
بشرط انها ماتفكش ونجمدها تانى
وطبعا لو هانستعملها نخرجها بالليل وتلاقيها فكت التلج عالصبح ثم نتعامل معاها
لان لو حطتيها مباشرة من الفريزر على الميه المغليه هاتستوى من بره وتلاقيها لسه ساقعه من جوه
وبعدين ....:-s
ماتقولى بصراحه وعلانيه ودون مواربه انتى مسافره وسايبه اخونا لوحده كام شهر ؟؟؟ ولا سنه ؟؟؟
برضه بحاول اهدى النفوس
:evil:
صباح الفل
:eat:

sea horse
13-05-2006, 07:17 AM
للعزيزه اوشا
معلش طلب غير مطبخى
كيف يمكن وضع اغنيه مرفقه زى اللى انتى منزلاها فى ردك ؟؟؟
صباح الفل
:eat:

waves
13-05-2006, 03:10 PM
سى هورس

اشكرك على كفته الكبدة وشكلها كدة سهلة العمايل :hey:

وسؤالك لأوشا عن كيفية وضع الاغانى بصراحة كان نفسى اسأله انا كمان ياريت ياأوشا تقوللنا الاجابة
واشكرك مقدما:f2:

osha
13-05-2006, 03:31 PM
والله مش كتير
اخلص بس المآسي والكوارث اللي ورايا واجي على طول
بس اعتقد مش اكتر من شهرين ان شاء الله ولاحظ ان المدارس هنا بتبتدي في نصف اغسطس وبالتالي دا كفيل اني ماطولش أكثر من كده
وِشكرا على الفراخ وسبب سؤالي عن السواء والتجميد هو اني اتذكر فيما قد اتذكر اني سمعت ان فكها من التجميد قبل السلق يفقدها بعض من الفائدة.
عامة تبقى سيادتك تدي له التعليمات كاملة بقى وخد بالك منه

وشكرا على صلصة التارتار
أما عن الأغنية هي بسيطة أوي انت بتجيب موقع الأغنية من على النت عن طريق انك تعمل رايت كليك عليها وبعدين تختار خصائص - بروبرتيز- حتلاقي جنب كلمة:أدرس - لينك طويل خده كله كوبي
وبعدين تروح على لوحة التحكم بتاعتك وتعديل التوقيع
حتلاقي فيها دائرة بيضاء وبها حرف دوس عليها حيطلع لك نافذة تحط فيها اللينك اللي انت اخدته كوبي وتدوس اوكي والسلام عليكم
وابقى قولي عملت ايه

sea horse
13-05-2006, 05:56 PM
ماتشيليش هم حسام يا اوشا
هاترجعى تلاقيه انشاء الله شيف كبير ومنافس خطير
بس طالما مسافره شهرين يبقى اكيد ممكن تغطى بمخزوناتك شهر بالكتير
وبعد كده هوه يجيب طازه بطازه احسن
انتى بس غزيه كويس اليومين دول واتوصى بيه وبلاش تلكيك فى لبخة السفر
برضه باهدى النفوس
:notme:
وشكرا على وصفة الاغنية
مساء الفل
:eat:

ديدي
14-05-2006, 03:46 PM
مساء الفل على اعضاء مطبخنا الجميل
سى هورس بليز عاوزه طريقة الارز بالخلطة اللى بنحرق له سكر
وميرسى مقدما

sea horse
14-05-2006, 04:34 PM
العزيزه ديدى
الأرز بالخلطة
الأساس طبخ الارز عادى مفلفل بس نضيف قليل من القرفة والقرنفل
وطبعا هانستعمل الشوربه فى تسوية الرز مع اضافة معلقتين كراميل
ونعمله بحرق معلقتين سكر مع معلقتين ميه فى طاسه بالتقليب المستمر
لغاية درجة اللون المطلوبه
:y1:
ونوضب الخلطة
من لوز وبندق وعين جمل و صنوبر ( مجروشين أو أنصاف أو سليم ) + زبيب
ويتم تحميرهم للون الذهبى فى سمن ثم ينشلوا ويتركوا جانبا
وهنا فيه بقى طريقتين
ممكن أدخل الخلطة دى فى أثناء تسوية الارز...أو أضيفها بعد ما يستوى
وانا افضل الاضافة بعد تسوية الرز لعدم هرى الخلطه
:4:
فممكن تتقلب مع الارز فى وعاء خارجى ثم تقدم
أو توزع الخلطة فى قاع اناء نصف كروى ثم يضغط عليها الارز وتقلب
يعنى موضوع التقديم له أشكال كتير
وبالف هنا
:eat:

sea horse
14-05-2006, 04:38 PM
وجربى دى كمان للعزومات بتبقى هايله
رز ألوان للعزومات
نطبخ شوية رز ابيض ونخليه على جنب
وشوية رز بالصلصه( او فلفل ارناؤطى احمر) وبرضه نخليه على جنب
وشوية رز أخضر ( بالبقدونس المفرى ناعم اوى بالكبه ) وعلى جنب
وشوية رز بالكارى اصفر ونخليه على جنب
وبعدين نجيب طبق غويط او قالب كبير
و نحط فى قاعه طبق شوربة غويط مقلوب
متخيلين ؟؟؟
وبعدين نبدأ نحط الرز طبقه من كل لون بترتيب الالوان اللى تحبوه
المهم الرز الابيض يكون فى القاع
ونضغط على الطبقات علشان تاخد شكل القالب
ونقلبها فى طبق التقديم هاتلاقى تورتة رز ملونه عجب
فى الحفره الفوقانيه اللى مكان الطبق الصغير المقلوب نحط صلصه باللحمه المفرومه
بس كتير علشان تسيل على الاجناب
ونزوق القمه بعودين بقدونس
وبالهنا والشفا
:eat:

بنت مصر
14-05-2006, 04:45 PM
مساء الخير عليك يا سي هورس
انا جاية وعاوزة حاجة متعلقة بالسي برضه
وهو ازاي اعمل شوربة السي فودز بالتفصيل الممل

وبأسماء السبايسز اللي بتضاف لها

بنت مصر
14-05-2006, 04:54 PM
مساء الخير يا سي هورس
انا جاية اسأل برضه عن حاجة متعلقة بالسي برضه
وهي ازاي اعمل شوربة السي فودز بالتفصيل الممل
وماتنساش تحديدا اسم السبايسز اللي بتضاف اليها

وكمان عايزة أعرف طرق متجددة لعمل الجمبري غير الشوي والسلق

بسنت

sea horse
15-05-2006, 07:35 AM
العزيزه بنت مصر المحروسه
شوربة السى فود لها كذا طريقه
لكن هاقولك هنا الطريقه البورسعيدية والدمياطية ... ودى احلى طريقه
وفيها بنسلق حاجات لوحدها ونخلطها فى الاخر
وبنجهز اساس الشوربة من السمك بس
شوربة السمك
اهم حاجه ان السمك يكون طازه جدا ومش مجمد ولا متلج حتى
واحسن انواعه للشوربه القاروص يليه الوقار ثم البورى و الدنيس
ويتنضف ويتغسل ويتقطع ترانشات محترمه
نحط معلقتين زيت دره ومعاهم فصين تلاته مستكه فى حله عالنار
ولما يسيحوا نحط اربع كوبايات ميه ومعاهم بصله مشققه وفصين حبهان
ولما الميه تغلى نحط الملح والفلفل واربع عيدان كرفس بلدى أخضر
ونسقط ترانشات السمك ونقفل الحله تغلى 10 دقايق بس
وننزلها من على النار ونحط ربع كيلو لحم جمبرى
بس من اللى لونه رمادى
الجمبرى الاحمر ما ينفعش
:no:
ونقفل الحله يستوى الجمبرى على حرارتها .. بعد كده ننشل السمك والجمبرى
ونضرب الشوربه بالحبهان والبصل والكرفس فى الخلاط ونصفيها
ونحطها عالنار ونسلق فيها مكعبات بطاطسايه وجزرايه
ولو هانضيف سبيط يبقى يتنضف ويتسلق كويس فى ميه وملح وتترمى ميته
وناخده بعد السوى نقطعه زى ما نحب ونضيفه للشوربه مع السمك والجمبرى
ويتحطوا عالنار غلوه واحده وخلاص
وطبعا الشوربه تحتاج ليمون كتير بس ساعة الاكل مش قبل كده
وبالف هنا وشفا مع رز ابيض جميل
صباح الفل
:eat:

بنت مصر
15-05-2006, 06:46 PM
ألف شكر أخي العزيز على هذه الوصفة الشهية
وان شاء الله هطبقها يوم الجمعة وأقول لك على النتائج


بسنت

osha
16-05-2006, 04:49 AM
السي فود وصل يا ولاد
ايه الشغل العالي دا ياعمنا

طيب بهذه المناسبة السعيدة احب اسأل على حاجة مش عارفة اضبطها ابدا ابدا
وهي كمية العسل اللي تتحط على صينية الجلاش الحلو
يعني انا باعمل الصينية حلو جدا وبعدين ييجي العسل يا اما كتير او قليل او خفيف او تقيل
نفسي في قاعدة محددة للوصول الى ضبط العسل وكثافته وكميته
بس بسرعة والنبي الوقت ضاق على الأخر وحانزل على قويدر عدل


Photo Gallery