كابل المحبة انقطع ... هاتوا وزير اللحام

[بنت النيل]

موضوع انقطاع كابل المودة بين وزارة الضلمة حاليا " الكهربا سابقا " وبين المواطنين حكاية لها العجب ... رغم فواتير الكهربا المولعة نار الا اننا نعاني من الظلام الدامس والانقطاع المتكرر للكهربا حتى ان التيار الكهربي اصبح ضيف عزيز المنال وزيارته لنا نادرة جدا ;) وتعاني الاجهزة الكهربية في بيوتنا من هذا الظلم الواقع عليها وتشكو ونشكو معها ونحتسب عند الله ماكنا نملك من اجهزة ومنها المسكين الكمبيوتر الاكثر تضررا من المهزلة الكهربية .... ونقترح انشاء وزارة خاصة بالكابلات على ان تسمي وزارة الكابلات والطاقة ويراسها وزير يقال له الوزير اللحام على وزن الوزير الهمام ... لا نطلب منه الكثير كل مانتمناه ان يتفقد احوال الكابلات ويقوم بلحام المقطوع منها حتى ننعم بزيارة السيد تيار عزيز المنال لاننا افتقدناه بشدة ونأمل بل نشتاق لزيارته لنا ولا اراكم الله مكروه في جهاز لديكم وافاض عليكم بنعمة زيارة السيد تيار ... وفي النهاية اطلب اذاعة اغنية ضي القناديل

[إبن الحتة]

عليا النعمه الجدع وزير الكهربا ده ماعندوش اى فولت و الالاووز بتاعه محروق لانه لو كان راجل مسمار كان عرف يحكم الفيش اللى بيشتغلوا عنده فى وزارة الكلوب المطفى دى
حد يشوفله بريزه ولا حاجه يمشى بيها الكابل بتاعه يمكن يكون مرتبه ضاربه السلك

[شعاع الشمس]

الأخت بنت النيل

مشكورة على الموضوع.
المشكلة ان فاتورة الكهرباء تم اضافة النظافة عليها، ولم نجد الكهرباء بانتظام ولا توجد النظافة كما ينبغى.

تحياتى
شعاع الشمس

[deaa]

السلام عليكم ورحمة الله وبركاته ...

يا اختى الحاجه الى مش معموله صح من الأول لازم تجون ليها اعراضها الجانبيه ..

ولأننا ناس بنكروت وخلاص ...وبندهن مظلات مقاعد المترو مرتين فى السنه ...وبعدين حبينا نجدد قمنا عملنها رخام ( شحات وعايز عيش فينو ) يبقى لا لوم ...

اما موضوع ...النظافه ...سبحان الله ...ما احنا بنقول النظافه من الأيمان ...بس عشان مفيش ايمان مفيش نظافه ..

بس فى النهايه ...كونى واثقه اختى ان الموضوع دى هنهتم بيه ونحن نبذل اقصى وسعنا ...والحمد لله استطعنا انارة كل السينمات بلبن الجاز ...والملاهى الليليه على اضواء الشموع ...لتوفير الطاقه الكهربيه ...لشرم الشيخ والغردقه ...

[maistro]

حلوووووووووووة يا بنت النيــــل
المهم ان اللى ما عندوش كهربا وتجيله فواتير ده يبقى ايه !!
وكمان أنا مسافر وبارجع بعد فترة ألاقى الفاتورة أعلى من ما أكون موجووود غريبة فعلا !!!
:D :D :D :D :D :D
وبصراحة بعد أعنية ضى القناديل يا ريت أسمع أغنية قمـرين !!
تحياتى يا بنت النيل
المايسترو

[deaa]

السلام عليكم ورحمة الله وبركاته ...

اخى مايسترو ...

قمرين ايه ....دى ربنا امر بالستر ...