إسلام شمس الدين
15-02-2003, 10:55 AM
كعادتي كل يوم خميس توجهت إلى المقهى مساءً. .
وقفت أبحث عن الأصدقاء الذين اعتدت الجلوس معهم فلمحت من يشير إليّ منادياً من آخر المقهى :
- يا عبقري . . يا عبقري . . أنا فهمان فهيم
و فهمان فهيم هو أشهر وكيل محامي بالقاهرة ، أو على وجه الدقة وكيل محامين ، فقد عمل مع معظم محاميّ القاهرة إن لم يكن كلهم ، حتى ذاع صيته باسم ( المتر فهمان ) باعتبار أن الخبرة أكثر أهمية من الدراسة في مهنة المحاماة . .
قابلته بابتسامة ترحيب . .
- أهلاً أستاذ فهمان . . مش باين ليه بقالك فترة
- والله مشاغل يا أستاذي
- ربنا يكون في عونك
- المهم انت أخبارك ايه يا عبقري ؟
- الحمد لله ، ماشية . . بس ايه حكاية عبقري دي ؟
- طبعاً عبقري و أستاذ العباقرة كمان
- يا سيدي شكراً . . بس على ايه كل ده ؟
- آه من العباقرة و تواضعهم
- يا سيدي مش تواضع ولا حاجة . . تقدر تقول بس اني مش واخد بالي انت بتتكلم عن ايه
- يا عبقري دا كتابك مكسر الدنيا
- اه ، انت قصدك على الكتاب . . مش قوي كده ، هو يعني الحمد لله ناجح و ماشي في السوق
- ما تقولش كده يا راجل ، هو في حد في مصر كلها إلا لما اشترى الكتاب .. أنا عن نفسي اشتريت منه 3 نسخ .
(ما قدرتش أقوله اني لسه جاي من عند الناشر و عرفت ان كل اللي اتباع من الكتاب 8 نسخ ، انا اشتريت منهم 5 نسخ ، والحمد لله عرفت مين اللي اشترى الباقي )
- عموماً يا أستاذ فهمان أن سعيد جداً ان الكتاب عجبك
- عجبني وبس . . دا انا حفظته . . تحب اسمعهولك
- لا وعلى ايه ما فيش داعي
- المهم انا عايزك في موضوع خطير
- خير إن شاء الله ؟
- الأستاذ خلف الله مخلوف قرأ كتابك و معجب به جداً ، و عايزك تنضم لهم .
- يا سيدي شكراً لك و له . . بس مين الأستاذ مخلوف ده ؟
( ضحك ضحكة فرجت علينا كل اللي قاعدين في القهوة ، وخلتني قاعد في نص هدومي )
- ايه الحكاية ؟ هو غرور الشهرة حيبتدي يظهر ولا ايه ؟ انا لسه بأقول عليك متواضع
- غرور ايه و شهرة ايه بس ؟ انا فعلاً ما اتشرفتش قبل كده بالأستاذ مخلوف
- معقول يا راجل ؟ بقى في حد في مصر كلها ما يعرفش الأستاذ خلف الله مخلوف
- والله يا أستاذ فهمان انت عارف اني لسه في بداية الطريق و كتير من المفكرين والأدباء ما لحقتش اتشرف بيهم
- أدباء ايه يا راجل ؟ دا الأستاذ خلف الله مخلوف ؛ السياسي و الصحفي المشهور . . رئيس حزب ( القومية ) أكبر حزب معارض في مصر .
- انا بصراحة يعني . . اهتمامي بالسياسة ضعيف . . على قد القضايا الرئيسية مش أكتر
- أوعى تقولي كمان انك ما بتقرأش جريدة ( القومية ) ؟
- و الله يا أستاذ فهمان . . أنا يادوب باسمع نشرة الأخبار ، وكل كام يوم لما بيكون في حاجة مهمة ، بأجيب جريدة من الجرايد الرسمية
- طيب قولي كده يا راجل
- أقولك ايه ؟
- قولي انك من المؤيدين للحكومة . . هو بصراحة الأستاذ خلف الله مخلوف كان عايزك معاهم في الحزب ، لكن طالما انت مع الحكومة ، أنا ممكن أخليك في حزب ( الوطنية ) بتاع الحكومة
- و مين قالك بس اني عايز عضوية حزب الحكومة
- مش انت اللي قلت ما بتقرأش جرايد المعارضة و بتجيب جرايد الحكومة
- يا أستاذ فهمان أن قلت باجيب الجرايد الرسمية مش جرايد الحكومة ، ويعني هو كل اللي بيجيب جريدة رسمية يبقى مع الحكومة ؟
- ما هو الحكومة هي اللي بتصدر الجرايد دي . . يبقى جرايد حكومية
- منطق غريب والله . . طيب ما هو الحكومة هي اللي بتنتج رغيف العيش ، يبقى اللي يشتري رغيفين عيش بيكون مؤيد للحكومة ؟
- طيب يا سيدي ما تزعلش ، قولي بس انت مع الحكومة ولا مع المعارضة ؟
- يا سيدي انا لا مع الحكومة ولا مع المعارضة
- إزاي يعني . . مالكش رأي ؟
- تقدر تقول كده
- اقول ايه ؟ أقول انك مالكش رأي
- افهم يا أستاذ فهمان . . أنا قصدي ماليش رأي مسبق
- مش فاهم
- يعني ما بقولش الحكومة كويسة ، ولا بأقول الحكومة وحشة
- أمال بتقول ايه ؟
- ما بأقولش حاجة خالص . . خلاص ؟
- يا راجل ما تتنرفزش كده . . خليك سياسي دا انا عايز اساعدك
- تساعدني في ايه ؟
- حأقولك ، بس اعرف انت مؤيد ولا معارض
- ما أنا قلتلك لا أنا مؤيد ولا معارض
- طيب معلهش فهمهالي دي تيجي ازاي ؟
- يعني لما الحكومة بتصدر قرارات صحيحة . . أكيد لازم أؤيدها ، ولما تصدر قرارات خاطئة لازم أعارضها .
- بالذمة في حد عاقل يقول الكلام ده ؟ . . و انا اللي عايز أخليك سياسي ، وأدخلك لعبة السياسة .
- يا سيدي أنا لا بحب السياسة و لا عايز ألعب لعبتها
- اسمع بس . . انت لما تكون سياسي وليك مواقفك السياسية حتقدر تبقى كاتب معروف وكتبك تتباع في كل مكان .
- وايه علاقة السياسة بالأدب ؟
- مش مهم ايه العلاقة . . المهم ايه الفايدة ؟
- طيب ايه الفايدة ؟
- انا أقولك : لو بقيت مؤيد ، و اعلنت مواقفك المؤيدة للحكومة حتتفتحلك الصحف الحكومية و تكتب زي ما انت عايز ويبقى ليك قرائك ، وأكيد كمان الحزب حيساعدك في طبع و نشر كتبك ، مش أحسن ما تفضل تجري بالمشوار وراء الناشرلحد ما يحن عليك و يرضى يطبعلك 500 نسخة وعلى حسابك كمان . . ده غير انك حتبقى و جه معروف في الندوات اللي بيعملها الحزب ، وشوية شوية تبقى ضيف مستديم في جميع برامج التليفزيون
- يا ريت والله يا أستاذ فهمان ، بس ازاي ؟
- قلتلي ازاي . . أول حاجة هنعملك كارنيه عضوية في حزب ( الوطنية ) عشان يبقى نشاطك كله من خلال الحزب ، وفي نفس الوقت تستفيد من مميزات أعضاء الحزب ، وما تنساش ان ده حزب الحكومة ، يعني المميزات لا لها أول ولا آخر .
- طيب أول حاجة وعرفناها ، تاني حاجة بقى ؟
- تاني حاجة : تسيبك خالص من موضوع القرارات الصحيحة و القرارات الخاطئة دي ، انت لازم تكون مع الحكومة على طول الخط ، وتعلن موقفك ده في كل مكان حتى هنا في القهوة
- يعني الحكومة تطلع قرار غلط و ضد مصلحة الناس ، وبرضه أؤيدها ؟
- لازم طبعاً ، أمال إزاي تبقى من حزب الحكومة ؟
- أيوه بس ده يبقى نفاق ، وخيانة للواجب الوطني .
- سيبك بس من الكلام الكبير ده و اسمعني ، دي مش خيانة ولا نفاق ، لأنه مافيش قرار غلط 100% ، كل قرار ليه سلبيات و ليه إيجابيات حتى لو كانت قليلة ، وانت كل اللي هتعمله انك تسيبك خالص من السلبيات الكتيرة للقرار . . .
- و اخليني في الإيجابيات القليلة
- عليك نور ، أديك بدأت تفهمني . . تمسك الإيجابيات دي تبروزها كده بكام كلمة من الكلام الكبير بتاع المفكرين والمثقفين عشان تخلي الناس تنبسط من القرار . و يؤيدوه
- لا يا عم ، سيبك من حزب الحكومة ، خلينا في حزب المعارضة أحسن ، حأستفيد منه ايه ؟
- أكيد طبعاً المميزات حتكون أقل لكن برضه حيفتحولك جرايدهم ، تقول اللي انت عايزه ، وتكتب اللي انت عايزه ، وما تنساش انك حتكتب في جرايد معارضة يعني حتبقى في نظر الجميع قلم حر و نزيه و يمكن كمان تبقى بطل ثوري .
- من غير ما يعرفوا انا حاكتب ايه ؟
- مش مهم بتكتب ايه ، طالما بتهاجم الحكومة يبقى حتبقى بطل ثوري
- طيب وانا ايه اللي يخليني أهاجم الحكومة ؟
- ما تركز معايا شوية يا عبقري
- أديني معاك يا سيدي
- انت بعد ما تاخد عضوية حزب ( القومية ) ، الأستاذ خلف الله مخلوف حيخصصلك مساحة في الجريدة عشان تكتب مقال يومي .
- جميل
- كل اللي على سيادتك انك يومياً تهاجم الحكومة و الوزرا و الهيئات واي حاجة ليها علاقة بالحكومة .
- من غير سبب كده ؟
- مي اللي قال من غير سبب ؟
- مش انت اللي بتقول كده
- هي مش الحكومة كل يوم بتطلع قرارات جديدة ؟
- أكيد
- انت بقى كل اللي هتعمله انك تهاجم القرارات دي و اللي طلعوها وحتى اللي أيدوها ، وتبين للناس ان القرارات دي ضدهم و انها بتخدم مصالح أشخاص معينين في الحكومة .
- طيب افرض القرارات دي كانت كويسة و في صالح الناس ؟
- يوه ، انت غلبتّني معاك
- يا سيدي بالراحة بس ، ما أنا قلتلك اني لسه ماليش خبرة في موضوع السياسة ده
- انت المفروض انك بتنتمي لحزب معارض يعني أي حاجة تقول عليها الحكومة لازم تعارضها و تطلع فيها القطط الفاطسة
- طيب افرض مالقتش فيها قطط فاطسة ، وكانت القرارات كلها مدروسة و في صالح الناس
- يا سيدي الكمال لله وحده . . أكيد القرارات حيكون فيها سلبيات ، وأكيد في ناس حتضرر منها . . لو واحد حتى .
- يعني عشان مصلحة واحد أعارض مصلحة السبعين مليون ؟
- ما تبصش للموضوع من الزاوية دي
- طيب ابص له من أي زاوية ؟
- من زاوية ان الحكومة هي اللي عملت القرار ده ، يبقى لازم انت تبين للناس ان القرار غلط ، عشان يقولوا ان الحكومة غلط . . أمال عايز تبقى معارض ازاي بقى ؟
- الظاهر يا أستاذ فهمان ، أنا مش هانفع خالص في لعبة السياسة دي .
- ليه بس ؟
- أصل انا ما أعرفش أعارض على طول الخط ، ولا أعرف أؤيد على طول الخط . .
- ولا يهمك يا سيدي ، أنا طالما قلت انك حتبقى سياسي يبقى لازم حتبقى سياسي . . انت مش واثق في قدراتي ولا ايه ؟
- العفو يا أستاذ فهمان . . بالعكس انت واضح انك محترف سياسة
- العفو العفو . .
- طيب حتدخلني اللعبة ازاي بالشكل ده ؟
-----------------
يُتبع
وقفت أبحث عن الأصدقاء الذين اعتدت الجلوس معهم فلمحت من يشير إليّ منادياً من آخر المقهى :
- يا عبقري . . يا عبقري . . أنا فهمان فهيم
و فهمان فهيم هو أشهر وكيل محامي بالقاهرة ، أو على وجه الدقة وكيل محامين ، فقد عمل مع معظم محاميّ القاهرة إن لم يكن كلهم ، حتى ذاع صيته باسم ( المتر فهمان ) باعتبار أن الخبرة أكثر أهمية من الدراسة في مهنة المحاماة . .
قابلته بابتسامة ترحيب . .
- أهلاً أستاذ فهمان . . مش باين ليه بقالك فترة
- والله مشاغل يا أستاذي
- ربنا يكون في عونك
- المهم انت أخبارك ايه يا عبقري ؟
- الحمد لله ، ماشية . . بس ايه حكاية عبقري دي ؟
- طبعاً عبقري و أستاذ العباقرة كمان
- يا سيدي شكراً . . بس على ايه كل ده ؟
- آه من العباقرة و تواضعهم
- يا سيدي مش تواضع ولا حاجة . . تقدر تقول بس اني مش واخد بالي انت بتتكلم عن ايه
- يا عبقري دا كتابك مكسر الدنيا
- اه ، انت قصدك على الكتاب . . مش قوي كده ، هو يعني الحمد لله ناجح و ماشي في السوق
- ما تقولش كده يا راجل ، هو في حد في مصر كلها إلا لما اشترى الكتاب .. أنا عن نفسي اشتريت منه 3 نسخ .
(ما قدرتش أقوله اني لسه جاي من عند الناشر و عرفت ان كل اللي اتباع من الكتاب 8 نسخ ، انا اشتريت منهم 5 نسخ ، والحمد لله عرفت مين اللي اشترى الباقي )
- عموماً يا أستاذ فهمان أن سعيد جداً ان الكتاب عجبك
- عجبني وبس . . دا انا حفظته . . تحب اسمعهولك
- لا وعلى ايه ما فيش داعي
- المهم انا عايزك في موضوع خطير
- خير إن شاء الله ؟
- الأستاذ خلف الله مخلوف قرأ كتابك و معجب به جداً ، و عايزك تنضم لهم .
- يا سيدي شكراً لك و له . . بس مين الأستاذ مخلوف ده ؟
( ضحك ضحكة فرجت علينا كل اللي قاعدين في القهوة ، وخلتني قاعد في نص هدومي )
- ايه الحكاية ؟ هو غرور الشهرة حيبتدي يظهر ولا ايه ؟ انا لسه بأقول عليك متواضع
- غرور ايه و شهرة ايه بس ؟ انا فعلاً ما اتشرفتش قبل كده بالأستاذ مخلوف
- معقول يا راجل ؟ بقى في حد في مصر كلها ما يعرفش الأستاذ خلف الله مخلوف
- والله يا أستاذ فهمان انت عارف اني لسه في بداية الطريق و كتير من المفكرين والأدباء ما لحقتش اتشرف بيهم
- أدباء ايه يا راجل ؟ دا الأستاذ خلف الله مخلوف ؛ السياسي و الصحفي المشهور . . رئيس حزب ( القومية ) أكبر حزب معارض في مصر .
- انا بصراحة يعني . . اهتمامي بالسياسة ضعيف . . على قد القضايا الرئيسية مش أكتر
- أوعى تقولي كمان انك ما بتقرأش جريدة ( القومية ) ؟
- و الله يا أستاذ فهمان . . أنا يادوب باسمع نشرة الأخبار ، وكل كام يوم لما بيكون في حاجة مهمة ، بأجيب جريدة من الجرايد الرسمية
- طيب قولي كده يا راجل
- أقولك ايه ؟
- قولي انك من المؤيدين للحكومة . . هو بصراحة الأستاذ خلف الله مخلوف كان عايزك معاهم في الحزب ، لكن طالما انت مع الحكومة ، أنا ممكن أخليك في حزب ( الوطنية ) بتاع الحكومة
- و مين قالك بس اني عايز عضوية حزب الحكومة
- مش انت اللي قلت ما بتقرأش جرايد المعارضة و بتجيب جرايد الحكومة
- يا أستاذ فهمان أن قلت باجيب الجرايد الرسمية مش جرايد الحكومة ، ويعني هو كل اللي بيجيب جريدة رسمية يبقى مع الحكومة ؟
- ما هو الحكومة هي اللي بتصدر الجرايد دي . . يبقى جرايد حكومية
- منطق غريب والله . . طيب ما هو الحكومة هي اللي بتنتج رغيف العيش ، يبقى اللي يشتري رغيفين عيش بيكون مؤيد للحكومة ؟
- طيب يا سيدي ما تزعلش ، قولي بس انت مع الحكومة ولا مع المعارضة ؟
- يا سيدي انا لا مع الحكومة ولا مع المعارضة
- إزاي يعني . . مالكش رأي ؟
- تقدر تقول كده
- اقول ايه ؟ أقول انك مالكش رأي
- افهم يا أستاذ فهمان . . أنا قصدي ماليش رأي مسبق
- مش فاهم
- يعني ما بقولش الحكومة كويسة ، ولا بأقول الحكومة وحشة
- أمال بتقول ايه ؟
- ما بأقولش حاجة خالص . . خلاص ؟
- يا راجل ما تتنرفزش كده . . خليك سياسي دا انا عايز اساعدك
- تساعدني في ايه ؟
- حأقولك ، بس اعرف انت مؤيد ولا معارض
- ما أنا قلتلك لا أنا مؤيد ولا معارض
- طيب معلهش فهمهالي دي تيجي ازاي ؟
- يعني لما الحكومة بتصدر قرارات صحيحة . . أكيد لازم أؤيدها ، ولما تصدر قرارات خاطئة لازم أعارضها .
- بالذمة في حد عاقل يقول الكلام ده ؟ . . و انا اللي عايز أخليك سياسي ، وأدخلك لعبة السياسة .
- يا سيدي أنا لا بحب السياسة و لا عايز ألعب لعبتها
- اسمع بس . . انت لما تكون سياسي وليك مواقفك السياسية حتقدر تبقى كاتب معروف وكتبك تتباع في كل مكان .
- وايه علاقة السياسة بالأدب ؟
- مش مهم ايه العلاقة . . المهم ايه الفايدة ؟
- طيب ايه الفايدة ؟
- انا أقولك : لو بقيت مؤيد ، و اعلنت مواقفك المؤيدة للحكومة حتتفتحلك الصحف الحكومية و تكتب زي ما انت عايز ويبقى ليك قرائك ، وأكيد كمان الحزب حيساعدك في طبع و نشر كتبك ، مش أحسن ما تفضل تجري بالمشوار وراء الناشرلحد ما يحن عليك و يرضى يطبعلك 500 نسخة وعلى حسابك كمان . . ده غير انك حتبقى و جه معروف في الندوات اللي بيعملها الحزب ، وشوية شوية تبقى ضيف مستديم في جميع برامج التليفزيون
- يا ريت والله يا أستاذ فهمان ، بس ازاي ؟
- قلتلي ازاي . . أول حاجة هنعملك كارنيه عضوية في حزب ( الوطنية ) عشان يبقى نشاطك كله من خلال الحزب ، وفي نفس الوقت تستفيد من مميزات أعضاء الحزب ، وما تنساش ان ده حزب الحكومة ، يعني المميزات لا لها أول ولا آخر .
- طيب أول حاجة وعرفناها ، تاني حاجة بقى ؟
- تاني حاجة : تسيبك خالص من موضوع القرارات الصحيحة و القرارات الخاطئة دي ، انت لازم تكون مع الحكومة على طول الخط ، وتعلن موقفك ده في كل مكان حتى هنا في القهوة
- يعني الحكومة تطلع قرار غلط و ضد مصلحة الناس ، وبرضه أؤيدها ؟
- لازم طبعاً ، أمال إزاي تبقى من حزب الحكومة ؟
- أيوه بس ده يبقى نفاق ، وخيانة للواجب الوطني .
- سيبك بس من الكلام الكبير ده و اسمعني ، دي مش خيانة ولا نفاق ، لأنه مافيش قرار غلط 100% ، كل قرار ليه سلبيات و ليه إيجابيات حتى لو كانت قليلة ، وانت كل اللي هتعمله انك تسيبك خالص من السلبيات الكتيرة للقرار . . .
- و اخليني في الإيجابيات القليلة
- عليك نور ، أديك بدأت تفهمني . . تمسك الإيجابيات دي تبروزها كده بكام كلمة من الكلام الكبير بتاع المفكرين والمثقفين عشان تخلي الناس تنبسط من القرار . و يؤيدوه
- لا يا عم ، سيبك من حزب الحكومة ، خلينا في حزب المعارضة أحسن ، حأستفيد منه ايه ؟
- أكيد طبعاً المميزات حتكون أقل لكن برضه حيفتحولك جرايدهم ، تقول اللي انت عايزه ، وتكتب اللي انت عايزه ، وما تنساش انك حتكتب في جرايد معارضة يعني حتبقى في نظر الجميع قلم حر و نزيه و يمكن كمان تبقى بطل ثوري .
- من غير ما يعرفوا انا حاكتب ايه ؟
- مش مهم بتكتب ايه ، طالما بتهاجم الحكومة يبقى حتبقى بطل ثوري
- طيب وانا ايه اللي يخليني أهاجم الحكومة ؟
- ما تركز معايا شوية يا عبقري
- أديني معاك يا سيدي
- انت بعد ما تاخد عضوية حزب ( القومية ) ، الأستاذ خلف الله مخلوف حيخصصلك مساحة في الجريدة عشان تكتب مقال يومي .
- جميل
- كل اللي على سيادتك انك يومياً تهاجم الحكومة و الوزرا و الهيئات واي حاجة ليها علاقة بالحكومة .
- من غير سبب كده ؟
- مي اللي قال من غير سبب ؟
- مش انت اللي بتقول كده
- هي مش الحكومة كل يوم بتطلع قرارات جديدة ؟
- أكيد
- انت بقى كل اللي هتعمله انك تهاجم القرارات دي و اللي طلعوها وحتى اللي أيدوها ، وتبين للناس ان القرارات دي ضدهم و انها بتخدم مصالح أشخاص معينين في الحكومة .
- طيب افرض القرارات دي كانت كويسة و في صالح الناس ؟
- يوه ، انت غلبتّني معاك
- يا سيدي بالراحة بس ، ما أنا قلتلك اني لسه ماليش خبرة في موضوع السياسة ده
- انت المفروض انك بتنتمي لحزب معارض يعني أي حاجة تقول عليها الحكومة لازم تعارضها و تطلع فيها القطط الفاطسة
- طيب افرض مالقتش فيها قطط فاطسة ، وكانت القرارات كلها مدروسة و في صالح الناس
- يا سيدي الكمال لله وحده . . أكيد القرارات حيكون فيها سلبيات ، وأكيد في ناس حتضرر منها . . لو واحد حتى .
- يعني عشان مصلحة واحد أعارض مصلحة السبعين مليون ؟
- ما تبصش للموضوع من الزاوية دي
- طيب ابص له من أي زاوية ؟
- من زاوية ان الحكومة هي اللي عملت القرار ده ، يبقى لازم انت تبين للناس ان القرار غلط ، عشان يقولوا ان الحكومة غلط . . أمال عايز تبقى معارض ازاي بقى ؟
- الظاهر يا أستاذ فهمان ، أنا مش هانفع خالص في لعبة السياسة دي .
- ليه بس ؟
- أصل انا ما أعرفش أعارض على طول الخط ، ولا أعرف أؤيد على طول الخط . .
- ولا يهمك يا سيدي ، أنا طالما قلت انك حتبقى سياسي يبقى لازم حتبقى سياسي . . انت مش واثق في قدراتي ولا ايه ؟
- العفو يا أستاذ فهمان . . بالعكس انت واضح انك محترف سياسة
- العفو العفو . .
- طيب حتدخلني اللعبة ازاي بالشكل ده ؟
-----------------
يُتبع