اشتغالات البنات والولاد لبعض

[YALLA_YAD]

"إنتى البنت إللى فى خيالى نفس الشعر و نفس العينين و نفس الجسم و..." دى أول جملة الولاد بيقولوها للبنات فى بداية إشتغالاتهم لبعض و طبعا بيكون رد البنات "إنت فارس أحلامى ناقصك حصان و خوذة و تبقى صورة طبق الأصل للواد إللى باحلم بيه" الحياة بتفضل طبيعية لمدة شهر تقريبا فى كل مقابلة الولد بيحلق دقنه و بيمسح الجزمة و يغسل سنانه و يكوى هدومه و البنت بتسرح شعرها و تحط ميك اب و بتلبس هدوم شيك و لكن بعد مرور الشهر إياه كل واحد بيزهق من التانى .. الولد بيرجع للكورة و لعب الاستيميشن و قعدة القهوة و البنت بترجع لصاحباتها و النميمة و الفرجة على التليفزيون و الرقص فى أوضة النوم و بعد ما كان حاطط لها نغمة "قصاد عينى" بقى يحطلها نغمة "كلهم بيقولوا كده فى الأول" ، السبب الحقيقى للمشاكل دى إن كل واحد بيزهق من التمثيل على التانى و بيبدأ كل واحد يظهر على طبيعته ، الولد بقى بيتأخر على معاده مع البنت ساعة و بيروح يلاقيها لسه ماجاتش و بينزل ضارب شعره جيل و منعكشه و مربى ذقنه و البنت بتيجى لمه شعرها بتوكة و من غير ميك آب .. و بعد ما كان بيشدلها الكرسى علشان تقعد بقى بينقى الكرسى النضيف و يقعد عليه و بعد ما كانت بتصمم إنها تشرب أى حاجة على مزاجه مابقتش تشرب غير قهوة سادة زى اليوم الإسود إللى مش هيعدى ، العيوب إللى كانت مستخبيه كلها ورا التمثيل بتاع أول شهر حب بتظهر و كل واحد بيقول للتانى انه لازم يتغير علشانه لو بيحبه بعد ما كان الواد بيقولها إنه عارف إن مشكلته انه عصبى و هى ترد عليه مش مهم يا حبيبى أنا هاستحمل و مش هاستفزك و اول ما يتنرفز عليها و شها بيتقلب و الدنيا بتضلم و بتتقمص شخصية منى زكى فى فيلم خالتى فرنسا و هاتك يا ردح و الموضوع كتير بيتطور ليصل إلى إشتباك بالأيدى و طبعا الولد مش هيسكت و البنت هاترجع رابطة عينيها و الولد هيرجع مجبس رجله و بعدين هيرجعوا لبعض تانى ، و لو قعدوا فى المطعم ياكلوا و هو عارف إنها مش بتحب الشطة مثلا هيدلق إزازة الشطة كلها فى الطبق إللى قدامها و هيقولها علشان تتعودى لما نتجوز و طبعا علشان ما تحصلش إصابات زى الحادثة إللى فاتت بتضطر تاكل و لو إتصلت به فى وقت متأخر فى البيت يقولها إقفلى دلوقتى عاوز أنام كلمينى بكره و لو إتصل بيها على الموبايل تقوله بابا قاعد معايا فى الأوضة و تقفل فى وشه السكة ، كل واحد بيكون مصمم إن التانى يتغير علشان يقدروا يكملوا مع بعض و الرد الطبيعى بيكون أنا كده و عمرى ما هاتغير عجبك على كده ماشى .. مش عاجبك كل واحد يروح لحاله ، المشكلة إن كل واحد مش بيصارح إللى بيحبه بكل حاجة بيفتكر إنه لو قال الحقيقة الطرف التانى هيقلبه ، لو بيحبوا بعض صحيح الإثنين هيستحملوا بس المشكلة إن ده كله تمثيل فى تمثيل و لما بيزهقوا كل حاجة بتظهر على حقيقتها.

[abdo_1st]

هههههههههههههه

[العندليب الأسمر]

المشكلة إن كل واحد مش بيصارح إللى بيحبه بكل حاجة

عندك حق والله
بس في برده ناس صريحة جدا
وده بيخلي حياتهم ليها معني
تسلم علي الموضوع ياباشا


العندليب

[daria]

او تقدر تضيف انهم ناس عايزين يعيشواالدور من غير لازمة

وعندهم فراغ عاطفي
محتاجين بس شخص يركبوا عليه الاغاني والكلام اللى بيسمعوه بس مش بيقولوه

وعموما دي مش علاقات
دي فعلا اشتغالات ولعب عيال فاضية تافهة

بس كدة

[ميمة اسلام]

مرسية علي الموضوع وباعتقادي ان دة فراغ عاطفي بيعوضة في الاول وبعدين كل وحد بيمل وبيحب يشوف حد تاني ووجهة جديد

[bedo202]

موضو ع لذيذ واكيد ده فراغ عاطفي لكن مش ننكر انه في كتير بيلاقم الحب الحقيقي والاحتواء الكامل لكن الظروف المادية في الاساس والظروف الاجتماعية والعمل بتغير كل شئ وبتاثر علي كل شئ
ونتمني ان كل انسان سواء ولد او بنت ربنا يكرمه بالطرف الاخار الي يبادله الحب والرعاية والاحتواء
بس بشررررررررررررررررررررررررررررررررررط
بدون اشتغالاااااااااااااات

[جهاد سعيد سعد]

موضوعك لذيذ اوى وفعلا عندك حق بس انت شكلك شايل منهم اووووووووووووى
بس اللى بيحصل ده بيبيقى ناتج عن تلات اسباب
الاولى انهم يكون عندهم فراغ عاطفى
التانيه انهم يكونوا وخدنها تسليه وتضيع للوقت
التالته ان واحد منهم يكون عايز ينتقم من الجنس الاخر فبيعمل كده لمجرد الانتقام

[osha]

او تقدر تضيف انهم ناس عايزين يعيشواالدور من غير لازمة

وعندهم فراغ عاطفي
محتاجين بس شخص يركبوا عليه الاغاني والكلام اللى بيسمعوه بس مش بيقولوه

وعموما دي مش علاقات
دي فعلا اشتغالات ولعب عيال فاضية تافهة

بس كدة

انا شايفة ان الكلام داانسب كلام
كمان الاغاني بقت هي الموضة لكل واحد عنده فراغ سواء عاطفي او فراغ في الوقت

[ميمو المصرى]

تمام كلام معاصر وموجود فعلا
بس المشكله بقى ان التمثليات دى بتكون بايخه اوى اوى ونهايتها كمان ابوخ منها وعمرها ما تتقلب لحب حقيقى يعنى
والله حتى اللى بيعملوها تافهين
شكرا على تنزيل الموضوع

[eltaib_6]

والله انتة جبت كلام مفيد وجميل تسلم ايدك

[The agent]

موضوع حلو اوي..
بس انا شايف ان السبب الاساسي لكدا هو الأغاني الي بتقلب كيان الواحد..
وكمان محاولة تقليد الغرب في موضوع الحب والجيرل فريند..
كمان عدم رقابه الاهالي.. يعني لما واحدة قاعده مع والدها ويجيها مكالمة ترد تقول (بعدين بابا قاعد معايا) او حتى تدخل ترد في غرفتها.. مش لازم والدها ده يسألها مين ده وعايز ايه وكدا .. لإن الموضوع ممكن يكون له مضاعفات خطيرة اوي بعد كدا..

عموما موضوع حلو اوي اوي وتسلم ايدك...

[magdy_mego]

لازم نعذر الناس الي كده لأنهم متأثرين بالحب بشكل جنوني غير طبيعي يؤثر على تفكيرهم بشكل كامل
شكرا على موضوعك المفيد

[nono92]

ولاهى انا شايفة ان دة فراغ عاطفى وبيتقضى بس ممكن يكون كلامهم فعلا صح ويكونوا بيحبوا بعض والا مكانوش رجعوا لبعض انما فى حب وفى فشل وفى نجاح ودة بيقوم على حسب تفكير الطرفين بس ههههههههههههههه

[اسلام الظواهري]

هههههههههههه ... اول حاجه دمك خفيف في طرح الموضوع

تناي حاجه فعلا هوه ده اللي بيحصل ... بس السبب الأساسي فراغ وكانوا بيملوه اللي تنين ....

بس مقدرش ان كل العلاقات الحب كده لأن في ناس ربنا بيوفقهم لغاية الجواز .... وطبعا كالعاده بعد الجواز عينك ما تشوف ألا النور ....

وعموما علشان لو أي حد فيكم عايز يدخل علاقه بجد من ما قبل ما يكلمها يسأل نفسه سؤال ( هوه انا بحبها ليه ؟؟ )* ويجاوب عنه بصراحه مع نفسه ألا أذا كان بيحب يعيش في الوهم ولو لقيت جوااب منتطقي وانا بقول منتطقي يعني مش تعد تقول في نفسك ده قمر وشعرها ناعم وعيونها حلوه ولا حتي تقول مؤدبه جاوب مع نفسك جواب صريح ومدخلش التعميمات ديه في أجبتك .... وبعد ما تكلمها والعملية تحلو أسألها سؤال تعرف بيه هل العلاقه ديه هتستمر ولا أخرها أسبوع ( هوه أنتي ايه اللي عجبك فيه علشان أتطوره وأيه اللي مش عجبك فيه علشان أغيره ؟؟! ) والله يبن الحلال لو جوبتك أجابه فعلا وصفت فيها حجات بتمسك بجد يبقي بص للخطوه اللي قدام وهيه الخطوبه ولو جوبتك الأجبات العموميه ديه يبقي ريح نفسك من البدايه لأنها مش عرفاك كويس ومفيش حد بيحب حد ميعرفوش ..... ولا أيه ....

وهو ده العلاج برأي ................................................ شكراااااااااااااا

[somaaaa]

هههههههههههههههههههههههههههه
دنيااااااااااااااااااا

[ريـم]

ههههههههههههههه

بيزهقوا علشان محبوش بعش بجد من الأول..
لأنه إللي هيحب حد بجد هيصارحه و يرتاحله ..
و بس ..

[الفراشة]

دول اكيد اصلا بيتسلوا من الاول او بيضيعوا وقت فاضى عندهم

او ملل الحياة بخليهم يعملوا كدا ؟؟؟؟؟