انتخابات طلائع المستقبل

[الصعيدي]

أهلا حبايبي .. أبنائي وبناتي طلائع المستقبل
عندي لكم النهارده حدوتة .. بس حصلت فعلا

انتخابات طلائع المستقبل

مروة .. بنتي الصغيرة .. في الصف الرابع الابتدائي
عندها مشكلة كبيرة .. وموضوع مضايقها أوي
قعدت معاها .. أحاول أحل معاها المشكلة
- خير يا مرمور .. قوليلي ايه اللي مضايقك
- أنا مش باحب ميرنا خالص ومش طايقة أشوفها
- ومين ميرنا ؟
- دي زميلتي معايا في الفصل .. واختاروها أمينة الفصل امبارح
- طيب .. وايه اللي مزعلك منها
- أنا كنت مرشحة نفسي قصادها عشان ابقى انا امينة الفصل
- آآآآآآه .. قلتيلي بقى .. وخدتي كام صوت
- كل الفصل اختارها وانا اخدت 3 أصوات بس
- طيب يا مروة يبقى أكيد شايفينها تنفع اكتر
- بس انا متضايقة جدا وكان نفسي اكون انا الأمينة
- هههههههه .. انتي كده بتغيري منها
- انا الفصل كله كان بيحبني السنة اللي فاتت لغاية ما هي جت .. بقوا يحبوها اكتر مني
- طيب ما فكرتيش ليه حبوها اكتر .. ممكن تتعلمي منها
- هي دايما تجيب حاجات حلوة وستيكرات وتوزعها على البنات
- آآآآآه .. شفتي بقى .. يبقى بتعمل حاجة كويسة .. ليه ما تتعلميش منها
- يعني لازم اعمل زيها عشان يحبوني ؟
- مش لازم زيها .. بس ليه تضايقي نفسك .. انا لو منك استفيد منها
- يعني تعمل ايه ؟
- أشوف اللي نجح ده نجح ليه .. واشوف الحاجات الكويسة اللي بيعملها واتعلم منه .. وكمان مادام هي كويسة أصاحبها واساعدها في شغلة الأمينة دي
- بس هي اتريقت علينا لما كسبت واحنا لأ
- معقول عملت كده ؟؟
- أصل انا عيطت لما هي كسبت وانا خسرت
- ما كانش لازم تعيطي .. وهي برضه لو كانت اتريقت عليكم يبقى ما لهاش حق
- وأنا زعلت لإني رشحت نفسي أمينة .. لو كنت اخترت أمينة مساعدة كانوا اختاروني
- أمال انتي أمينة ايه ؟
- اللجنة العلمية .. بس ما كنتش اعرف الأمين المساعد ده بيعمل ايه
- ده المفروض يبقى شغله دايما مع الأمين ويساعده .. ولو الأمين مش موجود يشتغل بداله
- بس ميرنا مش بتحب حد يشتغل معاها .. ودايما تعمل كل حاجة لوحدها
- لأ .. المفروض تتعلموا تبقوا فريق واحد .. بس لازم تحبوا بعض .. لو هتغيروا من بعض وماتحبوش بعض .. مش هينفع تبقوا فريق ناجح
- يعني ميرنا ممكن تخلينا نساعدها ؟
- المفروض .. بس قوليلي انتي كنتي عايزة تبقى الأمينة ليه ؟
- عشان كلهم يحبوني
- بس ؟؟
- آه ..
- لأ .. الأمين ده المفروض يعمل حاجات كتير .. وينظم الأنشطة اللي كل لجنة بتعملها .. ويتأكد انها بتعمل الأنشطة صح .. وحاجات كتير .. أنا بيتهيألي لو عرضتي على ميرنا تساعديها أكيد هتفرح
- طيب خلاص .. هاقول لها
- وتتعلمي منها .. وتبطلي تغيري منها .. عشان تحبيها .. الرسول عليه الصلاة والسلام قال ( لايؤمن أحدكم حتى يحب لأخيه ما يحب لنفسه)
- يعني إيه ؟
- يعني عشان ندخل الجنة لازم نحب بعض
- ماشي .. هاساعدها .. وابطل اغير منها
- شاطرة يا مروة

وتوتة توتة .. خلصت الحدوتة .. أشوفكم على خير

[أم أحمد]

ما شاء الله عليكي يا الصعيدي
قصة جميلة وصغيرة بس فيها عبرة جميلة
ايوة كده احنا عاوزين نعلم اولادنا بطريقة غير مباشرة
حب العمل مع الاخرين وحب الاخرين وعدم الغيرة منهم والتعاون حتي ننهض سويا


الله يكرمك يا استاذ محمد يا ريت بقي قصص للمرحلة اللي اصغر من دي شوية
جزك الله خيرا وجعله في ميزان حسناتك

[الصعيدي]

ما شاء الله عليكي يا الصعيدي
قصة جميلة وصغيرة بس فيها عبرة جميلة
ايوة كده احنا عاوزين نعلم اولادنا بطريقة غير مباشرة
حب العمل مع الاخرين وحب الاخرين وعدم الغيرة منهم والتعاون حتي ننهض سويا
الله يكرمك يا استاذ محمد يا ريت بقي قصص للمرحلة اللي اصغر من دي شوية
جزك الله خيرا وجعله في ميزان حسناتك

جزاك الله خيرا أم احمد على مرورك العطر ومشاركتك الطيبة .. على فكرة الحوار ده دار فعلا بيني وبين مروة بنتي والموقف حصل فعلا بس حبيت أنشره لإني حسيت إن المشكلة ممكن تواجه أبناءنا وبناتنا في المرحلة السنية دي كتير .. بس موضوع الكتابة للمرحلة الأصغر من دي صعب أوي .. يعني رابعة ابتدائي حوالي 9 سنين .. إذا فيه أعضاء أصغر من كده نحاول ان شاء الله .. تقبلي تحياتي أختي الكريمة *8*

[osha]

أخي الفاضل ابو يحيى
الموقف دا حصل معايا وانا في اولى اعدادي وكنت متميزة جدا في المدرسة وبالفعل تم انتخابي على مستوى الفصل ثم صعدت الى مستوى المدرسة وتم انتخابي عن المدرسة كلها ثم على مستوى الادارة التعليمية ووصلت الى انتخابات المنطقة التعليمية وكانت من اجمل سنواتي الدراسية حيث كنت غالبا باخرج من المدرسة 3 مرات اسبوعيا عشان الاجتماعات في المنطقة وطبعا السفر الى المحافظات المختلفة للتعارف والذي منه
لكن الدرس اللي اتعلمته اني لما وصلت للصف الثاني وحاولت ان اكرر الموقف وارشح نفسي لم احصل على اصوات وغالبا كان السبب اني قد اصبت بالغرور نظرا لما تمتعت به من مميزات في العام السابق وبالتالي تغيرت معاملتي "للناخبين" وبالضرورة كان يجب ان اخسر في الانتخابات بجدارة
الدرس كان اني فهمت بدري اوي ان الغرور بيهدم كل انجاز مهما كان الانجاز دا قوي
وبالتالي قررت اني اضغط على نفسي عشان ابطل التصرفات اللي كنا باعملها من منطلق اني متميزة

لكن الحقيقة اللي حصلت بعد كده اني امتنعت تماما اني ارشح نفسي في اي انتخابات في المدرسة وحتى لما وصلت للكلية بالرغم من اني اصدقائي كانوا بيطلبوا مني كده
ولكن مرارة الفشل في تلك الانتخابات لم تبرح فمي قط
احساس بكاء مكبوت وكرامة مجروحة مازلت اتذكر كم كان مؤلما

[الصعيدي]

لكن الدرس اللي اتعلمته اني لما وصلت للصف الثاني وحاولت ان اكرر الموقف وارشح نفسي لم احصل على اصوات وغالبا كان السبب اني قد اصبت بالغرور نظرا لما تمتعت به من مميزات في العام السابق وبالتالي تغيرت معاملتي "للناخبين" وبالضرورة كان يجب ان اخسر في الانتخابات بجدارة
الدرس كان اني فهمت بدري اوي ان الغرور بيهدم كل انجاز مهما كان الانجاز دا قوي
وبالتالي قررت اني اضغط على نفسي عشان ابطل التصرفات اللي كنا باعملها من منطلق اني متميزة

أختي الفاضلة أم محمد
الحقيقة درس مهم جدا .. وتجربة جميلة أشكرك على عرضها مع ما فيها من مرارة بالنسبة لك .. ولكن الدوا غالبا ما بيكون مر .. والمهم نستفيد من التجربة
ثقافتنا اللي اتربينا عليها بنسبة كبيرة في مجتمعنا هي ان المسئولية تشريف وتكريم .. وممكن الواحد يتعب كتير عشان يوصل لموقع المسئولية والصدارة ومجرد ما يوصل يريح ويتصور انه المفروض يجني ثمار تعبه في الوصول للمنصب ..
في حين ان الموضوع على العكس تماما وان المسئولية أمانة وتكليف وعبء ثقيل .. وان التعب الحقيقي يبدأ بعد الوصول للمنصب لأداء تكاليف هذا المنصب .. هو ده من وجهة نظري الفهم الصحيح للعمل العام
وأشكرك مرة أخرى أختي الكريمة على مشاركتك القيمة وإفادتنا وإفادة أبنائنا وبناتنا بتجاربك وخبراتك *8*

[بنت مصر]

درس جميل جدا ولو كل مسئول في بيوتنا بيهتم بتوجيه ابناءه
للصح والغلط ويوقظ داخلهم الضمير وخوف الله
كانت زمان مجتمعاتنا افضل المجتمعات

درسك دا ياصعيدي مش للصغار مش للطليعة بس ولكن هو درس للكبار وولاة الامر في البيوت


شكرا ليك وتقبل كل احترامي وتقديري اخي الغالي


بسنت

[الصعيدي]

درس جميل جدا ولو كل مسئول في بيوتنا بيهتم بتوجيه ابناءه
للصح والغلط ويوقظ داخلهم الضمير وخوف الله
كانت زمان مجتمعاتنا افضل المجتمعات
درسك دا ياصعيدي مش للصغار مش للطليعة بس ولكن هو درس للكبار وولاة الامر في البيوت
شكرا ليك وتقبل كل احترامي وتقديري اخي الغالي
بسنت

أشكرك جدا يابسنت على مرورك الكريم *8* .. وربنا يعيننا على حسن التوجيه .. وإن كان الدرس ده موجه للأطفال بصراحة وما جاش في بالي موضوع ولاة الأمر ده .. خلينا في حالنا أحسن .. :d

[المفكر]

أخي العزيز
ما فعلته هو أنجح وأحدث الطرق التربوية
وطبعا كانمن الطيعي من شخص مثلك أن يربي أبنائه هكذا
وعلى فكره أنا بعاني من هذه المشكله لأني مدرس
كل طالب اجتماعي وشاطر عايز يبقى الأمين
بس صعب إنك تفهمهم
لأنهم مش كلهم متفهمين زي بنتنا الغالية
وربنا يخليهالك وتشوفها عروسه

[الصعيدي]

أخي العزيز
ما فعلته هو أنجح وأحدث الطرق التربوية
وطبعا كانمن الطيعي من شخص مثلك أن يربي أبنائه هكذا
وعلى فكره أنا بعاني من هذه المشكله لأني مدرس
كل طالب اجتماعي وشاطر عايز يبقى الأمين
بس صعب إنك تفهمهم
لأنهم مش كلهم متفهمين زي بنتنا الغالية
وربنا يخليهالك وتشوفها عروسه

أخي الحبيب المفكر .. أسعدتني بمرورك العطر .. وياريت فعلا ربنا يقدرنا على حسن تربية أبنائنا .. والبركة فيكم ان شاء الله وانتم المربين أكتر مننا وربنا يعينك على هذه المهمة الجليلة .. جزاك الله خيرا *8*