الصعيدي علي كرسي التعارف

[أم أحمد]

السلام عليكم ورحمة الله وبركاته



اخوتي في الله اعضاء ومشرفي ابناء مصر يسرني اليوم ان اعلن عن خبر جميل الا وهو جلوس عضو محبوب من ابناء مصر " الصعيدي " علي كرسي التعارف وهو الحمد لله قد وافق علي ذلك بكامل اردته :d يعني مفيش اي ضغط عليه ولا حاجة وده معناه انه ذو صدر رحب وسوف يتقبل جميع الاسئلة التي سوف تعرض عليه من قبل الاعضاء والمشرفين


اخوتي ارجو منكم عدم الاكثار من الاسئلة والا يزيد عدد الاسئلة في كل مشاركة عن 5 اسئلة حتي يتسني للصعيدي ان يجيب عليها كلها ونعطي لغيرنا ايضا المجال لذلك
واطلب منكم ايضا عدم وجود احاديث جانبية في الموضوع بمعني ان يقتصر الموضوع علي توجيه الاسئلة للصعيدي ويقوم الصعيدي بالرد عليها وذلك للحفاظ علي رونق الموضوع وجماله وعدم خروج الموضوع عن الهدف الاساسي له


اتفضل يا الصعيدي علي الجلوس علي كرسي التعارف ومده الجلوس هي اسبوع ان شاء الله سوف تبدا من اليوم الي يوم الاربعاء المقبل ان شاء الله ويمكن لك ان تجاوب علي جميع الاسئلة واللي مش عجبك ما تردش عليه وتجاهله تماما بس ما تزودهاش اوي وما تردش علي كل الاسئلة وتقول لا تعليق :d

اتمني ان تقضي وقتا ممتعا علي كرسي التعارف

[أم أحمد]

بسم الله الحمن الرحيم
ابدا بقي انا بالاسئلة

بطاقة حضرتك الشخصية
الاسم
السن
محل الميلاد
الاقامة
الوظيفة


يا ريت تعرفنا علي شخصة حضرتك في جملة قصيرة غير الشخصية التي نعرفها من خلال المنتدي

من هو الصعيدي ولماذا اخترت لقب الصعيدي

كيف تقضي وقت حضرتك يعني وضح لنا يوم من اوله لاخره كيف يبدا وكيف ينتهي

كفاية كده بقي وان شاء الله لي لقاء اخر

[حنـــــان]

الحمد لله أنا جيت من أول الموضوع عشان أتابع
معنديش أسئلة دلوقتي بس أول ما افكر في حبة حلوين حاجي على طول
كل الاحنرام للصعيدي... وشكرا لقمر وبوكي بوكي :)

[Abdou Basha]

عزيزي محمد عبدالسلام ......

إنت واحشني خالص .. *3*

عايز أسألك .. *4*

- جذورك العائلية منين ..؟!
- دراستك الأصلية.. إيه..؟
- أكتر حاجة بتكرهها..؟؟ (غير الأسئلة دي :d )
- إحك عن نقطة تحول في حياتك ..

وربنا يوفقك دايما في كل الخير ... *3*
وفي انتظار اجاباتك.

[م. بسمة]

السلام عليكم ورحمة الله وبركاته

مم نَدُر هذه الأيام أن يصادف الانسان شخصيات تعبر عن نفسها بشفافيتها وصدقها وذلك مم يجعلك تصدق ما تقول وتثق فيه وقد يعبر عن كثير مم بداخلك دون البوح به ..

وتكون تلك الصفات ملامحا قويه رسمت لنا شخصيه طيبه عبرت عن نفسها بصدق..
ولقد فاز أبناء مصر بأكثر من نموذج من تلك الشخصيات وها نحن باب واحد منهم..
وأجدني الآن لا احتاج لأسئله ولكن سأتابع الأعضاء الكرام..

دمتم جميعا بخير..

[بسمة أمل]

بسم الله الرحمن الرحيم
فرصة حلوة واختيار جميل يا قمر
يلا بقى نبدأ الاسئلة بسرعة.......
ما هي اهم مرحلة تحول فى حياتك
ايه هو هدفك من دخول النت بشكل عام والمنتدى بشكل خاص؟
ايه اللى استفدته من وجودك كعضو مميز ومشرف نشيط فى المنتدى؟
سلسة قصص شريف ومحسن التى اعشقها ما هى اهم حلقة اردت ان توجه بها رسالة هامة؟
وشكرا يا صعيدى على اتاحة تلك الفرصة الرائعة لنا
والسلام عليكم

[boukybouky]

إيه ده !! الصعيدي عندنا يا مرحبا يا مرحبا http://smilies.sofrayt.com/fsc/party2.gif

منور الكرسي يا الصعيدي http://smilies.sofrayt.com/fsc/gentleman.gif

أبدأ بقي الأسئلة ....تم تم تم أمخمخلك بقي في شوية ...اممممممممم

1- ما هو مبدأك في الحياة؟؟

2- ما هو رأيك في المقولة التي تقول: "المساواة في الظلم عدل" ؟؟

3- يقولون: "الغِني في الغربة وطن و الفقر في الوطن غربة" ... ماذا يقول الصعيدي؟؟

اممم دول بس لكن ليس آخر ما عندي http://smilies.sofrayt.com/sae/basketball3.gif

دمت بكل خير و إلي العودة

في رعية الله ،،،

[الصعيدي]

آآآآآآه .. ده اللي كنت خايف منه وعامل حسابه .. :d

تفضل يا الصعيدي علي الجلوس علي كرسي التعارف ومده الجلوس هي اسبوع ان شاء الله سوف تبدا من اليوم الي يوم الاربعاء المقبل ان شاء الله

أشكرك جدا أخت أم احمد على الدعوة الكريمة .. وإن شاء الله أكون عند حسن ظنكم جميعا

اللي مش عجبك ما تردش عليه وتجاهله تماما

طب والله مافيش مانع .. كده الموضوع بقى سهل خالص .. ههههههههه .. ;)

[ملك الحب الضائع]

والله اقولك علي حاجه سر بيني وبنك يا محمد
انا اول ما رجعت للمنتدي كان من يومين اتنين بس
قريت الرسايل الخاصه
وعجبني موضوع الكرسي ده
وفضلت اتابع الردود والاسئله بتاعت ابن البلد
وفي نهاية الموضوع
وطبعا كان عدي اكتر من الاسبوع بأسبوع كمان
اتمنيت والله ان يكون انت اللي عليك الدور والحمد لله اتحققت
تعلالي بقي يا حلو
اولا طبعا مش فكرني (نبقي نشفولك عقاب بعدين)
المهم بقي يا حلو الاسئله
(1)
ايه رأيك في الحب عن طريق النت ؟
وهل هو نفس رأيك في تكوين علاقة الصداقة عن طريق النت
ولو كان ردك بوجود صداقة وده انا متأكد منك في رده عن طريق النت
مين هو احسن صديق اتعرفت عليه علي النت
ومين اللي ندمت علي معرفتك بيه برده علي الانترنت؟
(2)
هقولك اسماء اعضاء في المنتدي وعايز تعليق واحد وصغير لكل واحد فيهم
ابن البلد؟؟
الازهري المصري؟؟
د فاضل؟؟
انوبيس؟؟
ماما زوزو؟؟
جمال النجار؟؟
وبلاش انا عشان عارف انك مش فكرني
وبرضه اللي متفتكرهوش من كل دول تقول (مش فاكر)
بس مش كلهم يعني
(3)
ايه كان اكبر حلم للصعيدي وقدر يحققه ؟ وازاي حققته؟
وايه الحلم الكبير قوي اللي بتحلم بيه وان شاء الله ربنا يحققهولك؟
(4)
محمد عبد السلام الانسان والصعيدي علي النت ما الاختلاف وما التشابه بينهما؟
ولو مره قعدت مع نفسك وفكرت في كل شخصيه منهم ايه اللي ممكن يزعلك من كل شخصيه علي حده
استني بس منتي هتقول كمان ايه اللي بيعجبك فيهم
(5)
لحظه ضاع فيها الحب ؟؟
ولحظه اتولد فيها من جديد ؟؟
ــــــــــــــــــــــــــــــــــــــــــــــــــ ــــــــــــــــــ

عارف اني تقلت عليك في الاسئله دي
بس صدقني من اعجابي واحترامي الشديد لشخصك الكريم
تحياتي وتقديري مره تانيه

[الصعيدي]

أهلا قمر الليل .. الأسئلة صعبة كده ليه ؟؟؟ :d .. أتجاهلها يعني .. ؟؟؟ :d


الاسم


محمد عبد السلام


السن


واحد واربعين سنة


محل الميلاد


بورسعيد


الاقامة


الاسكندرية


الوظيفة


كيميائي في مجال البترول


يا ريت تعرفنا علي شخصة حضرتك في جملة قصيرة غير الشخصية التي نعرفها من خلال المنتدي


رجل مسلم مهتم بالعمل الاجتماعي والدعوة إلى الله بالحكمة والموعظة الحسنة ونشر الفهم الإسلامي الصحيح


من هو الصعيدي ولماذا اخترت لقب الصعيدي


الحقيقة السؤال محرج شوية .. لإن كتير بيفكروا ان فيه سبب معين لاختيار الاسم .. والحقيقة انها كانت شوية تجارب لاختيار يوزرنيم .. والمنتدى ما قبلش غير الاسم ده .. بدون أي ترتيب سابق مني .. وان كان فيه جانب ايجابي في الموضوع وهو انه عرفني باحمد ناصر وقربنا من بعض كتير .. وهو فعلا نعم الأخ


كيف تقضي وقت حضرتك يعني وضح لنا يوم من اوله لاخره كيف يبدا وكيف ينتهي


إيه ده بقااااااااا .. ما تفقناش على كده .. طيب .. على أي حال .. أنا غالبا بابدأ يومي قبل الفجر بقليل .. ومتعود أصلي الوتر في الوقت ده .. ولو كان ضميري صاحي ممكن أصلي ركعتين .. وباحاول أصلي الفجر في المسجد .. وبارجع أتابع المنتدى شوية وافطر قبل ما انزل الشغل .. وبارجع من الشغل العصر .. اتغدى .. اتفضلوا معايا .. ههههههههه
لغاية دلوقت عمال آكل بس .. حسب ظروف اليوم إما يكون فيه ارتباطات سواء خاصة بالأولاد أو العائلة .. أو ممكن أنام ساعة كده .. قترة بعد المغرب ممكن يكون فيه دروس في المسجد .. أو أنشغل بالقراءة والتحضير لإني باخطب الجمعة وأحيانا بالقي بعض الدروس .. وباحرص ان فيه أيام أكون فيها متفرغ للأولاد نقعد مع بعض .. أحيانا الظروف تضغط عليا واقصر في الجانب ده شوية بسبب كثرة المعارف وبالتالي الانشغالات ولكن باحاول ما اقصرش في هذا الجانب
طبعا بين ده كله .. بقى عندي مش عارف اقول ابن رابع وللا ايه .. وهو المنتدى .. لازم كل شوية أدخل أشوف إيه الأخبار .. بس غالبا مش باقعد فترة طويلة غير بالليل قبل ما انام ممكن اقعد ساعة مثلا .. أشارك وارد على الأعضاء .. واناااااااااااااااام .. تصبحوا على خير

شكرا مرة أخرى قمر الليل على دعوتك الكريمة .. وجزاك الله خيرا

[الصعيدي]

الحمد لله أنا جيت من أول الموضوع عشان أتابع
معنديش أسئلة دلوقتي بس أول ما افكر في حبة حلوين حاجي على طول
كل الاحنرام للصعيدي... وشكرا لقمر وبوكي بوكي :)

الحمد لله .. أنا عارف سؤالاتك شدييييييييييدة أوي .. خليكي متفرجة كده وبلاش الاسكندرانية يعضوا ف بعض :d

[mad boy]

بصراحه الاسئله كتير فا انا هكتفى بسؤالين لحضرتك بس

1- حضرتك طيب يا ترى ده بيؤثر على طريقه اشرافك؟

2- ادينى نبذه عن يوم الى الفت فيه (منتدى ابناء مصر...حلم لا علم) ؟

وشكرا لحضرتك وسلامى ليك وليحيى

محمد.....

[الصعيدي]

عزيزي محمد عبدالسلام ......
إنت واحشني خالص .. *3*


أهلا بالحبيب أبو باشا ;) .. عبدو باشا .. والله يا أخي انت واحشني أكتر .. ونفسي فعلا اتعرف عليك ونلتقي .. قريبا ان شاء الله


- جذورك العائلية منين ..؟!


الجذور العائلية تمتد إلى محافظة المنوفية .. واستقرار العائلة في الأسكندرية كان من سنة 1970 .. في القرن الماضي .. :)


- دراستك الأصلية.. إيه..؟


بكالوريوس علوم قسم كيمياء سنة 1987


- أكتر حاجة بتكرهها..؟؟ (غير الأسئلة دي :d )


هي الأسئلة دي بس .. مش باكره حاجة تانية .. هههههههه .. ياعبد الرحمن باشا أسئلتك على قلبي زي العسل .. وأما أكتر حاجة باكرهها هي الظلم و القهر .. وان صاحب الحق ما يقدرش ياخد حقه أو يدفع الظلم الواقع عليه .. وكمان باكره اسرائيل :)


- إحك عن نقطة تحول في حياتك ..


الحقيقة .. تقريبا .. ما فيش نقطة تحول واضحة في حياتي .. يعني من صغري وأنا ليا نفس الأفكار أو المبادئ .. نتيجة لتنشئتي وطبيعة العائلة .. ولكن مع الوقت الواحد بيزداد خبرة بالواقع من حوله .. وده بدون شك بينعكس على سلوكه .. وبيطور تفكيره عشان يناسب الجديد دائما .. ومش عايز اقولك ان المنتدى بالنسبة لي من أحد هذه التطورات .. وانفتاح على شريحة كانت مجهولة بالنسبة لي تماما .. ولكن حاسس اني والحمد لله قدرت أندمج فيها

أشكرك جدا أخي عبد الرحمن على أسئلتك ومشاركتك الجميلة وأرجو انها تكون قربتنا من بعض أكتر .. *8*

[أحمد ناصر]

محمد بيه باشا عبد السلام على كرسى الإعتراف
يا مرحبا يامرحبا
*6*
يعنى نشغل الكهرباء على أعلى فولت بقى
*109*
معلش بقى أنا هأسأل كتير
بس على فترات إن شاء الله
وده من عشمى
1
-كيف تحضر لخطبة الجمعة
2-هل هناك حاجة ملحة بالفعل لتجديد الخطاب الدينى وكيف ؟
3-كان توفيق الحكيم يسمى نفسه محسن فى رواياته ومسرحياته فهل شريف هو محمد عبد السلام؟
4-ما هى أكثر خمسة موضوعات لك تعتز بها فى المنتدى
5-هل ترى أن هناك موضوع لك فى المنتدى لم تجد معه تفاعل جيد من وجهة نظرك
*3*
:f2:

[الصعيدي]

السلام عليكم ورحمة الله وبركاته
مم نَدُر هذه الأيام أن يصادف الانسان شخصيات تعبر عن نفسها بشفافيتها وصدقها وذلك مم يجعلك تصدق ما تقول وتثق فيه وقد يعبر عن كثير مم بداخلك دون البوح به ..
وتكون تلك الصفات ملامحا قويه رسمت لنا شخصيه طيبه عبرت عن نفسها بصدق..
ولقد فاز أبناء مصر بأكثر من نموذج من تلك الشخصيات وها نحن بباب واحد منهم..
وأجدني الآن لا احتاج لأسئله ولكن سأتابع الأعضاء الكرام..
دمتم جميعا بخير..

م. بسمة الفاضلة .. بيتهيألي لو انطبق هذا الكلام فإنما ينطبق فعلا على شخصيتك بصدق وبدون مجاملة .. والأعضاء يشهدون بذلك .. أشكرك جدا على كلماتك الطيبة .. وربنا يتقبل منا جميعا *8*

[حسام عمر]

محمد عبد السلام

*4*
ابو يحيى
*11*
اهلا بك على كرسى التعارف

*3*

قعد كده وضبط نفسك لاسئلتى

*8*

1_ ما الاسباب التى جعلتك تدخل معهد الدرسات الاسلاميه ؟؟؟؟؟؟؟؟؟


2_هل تصلى صلاواتك بالنوافل؟؟؟؟؟؟؟؟؟؟؟؟؟؟


3_هل تحرص على قيام الليل؟؟؟؟؟؟؟؟؟

4_هل اديت الحج أو العمره انت واهل بيتك؟؟؟؟؟؟؟؟؟؟؟



5_ هل حضرت نفسك لليوم اللى حجيلك فيه انا واحمد ناصر وشودى واحمد صلاح و محمد فاروق؟؟؟

احكيلى بس عن السفره

[الصعيدي]

أختي الكريمة .. بسمة أمل .. نورتي موضوعنا .. وسعدت فعلا بتواجدك *8*


ما هي اهم مرحلة تحول فى حياتك


سبقك بهذا السؤال عبد الرحمن باشا :) .. وبصفة عامة مافيش مرحلة تحول عند نقطة معينة


ايه هو هدفك من دخول النت بشكل عام والمنتدى بشكل خاص؟


علاقتي بالنت بدأت سنة 1998 وكان النت بالنسبة لي بريد الكتروني وبرامج تخاطب مع العائلة لإني كنت خارج مصر .. وفي الدرجة الثانية كانت المواقع الإخبارية والإسلامية والأدب والشعر .. بجانب البحث العلمي في مجال تخصصي .. وفي الوقت ده جربت دعوة غير المسلمين للإسلام عن طريق برنامج ICQ .. ولكن لقيت انه بياخذ وقت كتير جدا .. وما كنتش فاضي له أوي .. وما استمرتش فيه كتير
ومع الوقت بدأت أستفيد جدا من النت في إعداد المادة اللي ممكن أخطب منها الجمعة أو أدي درس أو كلمة في المسجد أو في مناسبة عامة .. ولكن فضل موضوع المنتديات والتخاطب مع أشخاص لا أعرفهم بعيد عني .. لغاية ما اتكعبلت :) في منتدى أبناء مصر .. وكانت وقعة .. بيضااااااا .. الحمد لله
ومن وقتها المنتدى بقى يمثل لي حاجات كتير ..
أولها .. إني اكتشفت مجتمع كبير جدا .. ومحترم جدا .. ولقيت نفسي باستفيد كتير من أفكاره وآراؤه
ثانيا .. إني لقيت مجال لتوصيل فكرتي وفهمي لبعض معاني الإسلام وأخلاقياته .. والحمد لله لقيت قبول وترحيب من الزملاء
ثالثا .. ومع الوقت .. بدأت أكون علاقات صداقة واقعية مع بعض الزملاء .. والحمد لله سعدت جدا بهذه العلاقات
يعني المنتدى بقى بالنسبة لي مجتمع جديد .. أضاف لي كتير .. وسعدت بيه جدا .. وأتمنى إني أكون أسعدت بعض أعضاؤه


ايه اللى استفدته من وجودك كعضو مميز ومشرف نشيط فى المنتدى؟


إيه اللي استفدته ؟؟ وجع الدماغ طبعا .. هههههههههههه :d .. ما احنا دافنينه سوا يا بسمة .. ;) .. هههههههههه ..
الحقيقة ان الفايدة من موضوع الإشراف انها قربتني أكتر من أعضاء كتير .. المشرفين بالطبع .. وأعضاء آخرين تراسلت معهم كتير على الخاص إما لأسئلة خاصة بالقاعة .. أو لاستشارات دينية .. وأشكرك يا بسمة طبعا على حسن ظنك بيا كعضو مميز ومشرف نشيط .. أعتقد إني محتاج جهد أكبر من كده عشان أستحق الصفات دي فعلا


سلسة قصص شريف ومحسن التى اعشقها ما هى اهم حلقة اردت ان توجه بها رسالة هامة؟


هي الحقيقة مش حلقة واحدة .. كل حلقة من الحلقات كان هدفي منها توصيل رسالة مختلفة .. إما عن الاختلاط أو العلاقات الاجتماعية مع الجيران أو أسلوب النصيحة .. وهكذا .. وتقريبا هي بتتأثر بالواقع اللي باعيشه .. يعني فترة الصيف والنشاط في العمل الخيري ليها رسالتها .. فترة المذاكرة كذلك .. تقدري تقولي الشخصيات دي هي الأدوات اللي من خلالها باحاول أوصل الرسالة بشكل جديد يجد قبول أكثر عند القارئ .. ودي على فكرة من بركات المنتدى عليا .. لإني أول مرة أخطو هذه الخطوة وأكتب الحاجات دي .. فجزاكم الله خيرا

أشكرك يا بسمة مرة أخرى .. وأشكرك شكر خاص على سعة صدرك وتعاونك الدائم كمشرفة مشتركة على قاعة لقاءات في حب الله *3*

[ديدي]

اخى العزيز الصعيدى
منور على الكرسى والله
تسجيل حضور للمتابعة ولى عودة للاسئلة ان شاء الله
تحياتى للجميع

[الصعيدي]

إيه ده !! الصعيدي عندنا يا مرحبا يا مرحبا
منور الكرسي يا الصعيدي


منور بوجودك يا بوكي بوكي .. شكرا لمشاركتك ألف شكر


1- ما هو مبدأك في الحياة؟؟


مبدأي في الحياة ؟؟ .. سؤال كبير بصراحة .. يعني أنا من أهم مبادئي ودي يمكن حاجة لفت نظري ليها أحد أصدقائي من فترة طويلة هي إني لا أحب الخلاف أبدا .. دايما باحاول في سلوكي مع من حولي اني اتقبلهم ويتقبلوني وآخر حاجة أفكر فيها إني أخسر حد .. مش عارف ده يعتبر مبدأ وللا لأ .. بس يعني أنا باحرص على كده دايما


2- ما هو رأيك في المقولة التي تقول: "المساواة في الظلم عدل" ؟؟


من وجهة نظري هي مقولة خاطئة .. وغير صحيحة .. أحيانا تكون حيلة الظالم أو العاجز عن تحقيق العدل .. وبدلا من أن يجهد نفسه في تحقيق العدل يظلم الجميع .. والعدل من أصعب وأشق الأمور .. ولكن ثوابه عظيم .. ولذلك كان الإمام العادل من أول السبعة الذين يظلهم الله في ظله يوم لا ظل إلا ظله


3- يقولون: "الغِني في الغربة وطن و الفقر في الوطن غربة" ... ماذا يقول الصعيدي؟؟


ده هيحتاج مننا توضيح لمعنى الغنى .. إذا نظرنا للغنى على أنه غنى النفس واتفقنا على كده .. يبقى فعلا القول ده جميل .. ولو الصعيدي له انه يقول .. يبقى يقول ( الأخوة في الله في الغربة وطن .. والوحدة في الوطن غربة ) .. فعلا من أجمل المشاعر اللي الواحد عاشها وخلت الحياة في الغربة جميلة هي الأخوة في الله

[الدكتورة نسيبة]

سعيدة جدا ان حضرتك من مواليد بورسعيد يعنى ممكن نقول بلديات

وبالنسبة للاسئلة فانا همخمخ واجى

وسلامــــــــــى

[على درويش]

أخى الحبيب الصعيدى

أتابعك بكل الحب وأتابع سيرة ذاتية يشرفنى أنها تتشابه فى بعض أجزائها بسيرتى وخاصة فى مسألة الدروس وخطب الجمعة وتمنيت كثيرا أن أتعرف عليك عن قرب كما تعرفت على الكثيرين من أعضاء المنتدى آخرهم شادى جلال (شودى) وسعدت بهم كثيرا جدا جدا
تمنياتى لك بالتوفيق وليتك تحدد لنا
أكثر الكتب تأثرت بها
أكثر الشخصيات المحببه اليك والتى تركت بصمة فى حياتك
من تحب من العلماء معاصرين وراحلين
صحابى أحببته كثيرا وبكيت وأنت تقرأ سيرته
فترة من فترات التاريخ كنت تتمنى ان تعيشها

تقبل تحياتى وحبى وتقديرى

[العربى الأول]

الأخ الاستاذ \ محمد عبد السلام
تحياتى وتقديرى لشخصك الكريم ، عرفتك من خلال ما كتبت ووجدت أنك تستحق أن يقرأ لك عن جداره

سؤالى
ما سر اعتزازك بتسمية نفسك (( الصعيدى ))
وهل هو لقب ام انك صعيدى فعلا

أخيك العربى الأول (( الصعيدى الصغير ))

[فاضــل]

هناك قلائل ممن يلتقي المرء بهم في مسيرة حياته ينفذون إلى القلب من أول وهلة .. و يتربعون فيه من أول كلمة .. و تزداد مكانتهم تصاعديا بغير نهاية كلما أدرك المرء مدى نبل أخلاقهم و استواء فطرتهم

و محمد عبد السلام (هكذا بدون ألقاب فالألقاب تضع مسافة بين القلوب و لا أريد لهذه المسافة أن توضع) من أولهم .. نحسبه كذلك و لا نزكي على الله أحدا

دخل قلبي من اول مشاركة

و تربع فيه من أول رسالة خاصة

و مازالت مكانته عندي تزداد بغير توقف

و لدي سؤال واحد:

من اين استقيت تلك الروح النقية المرحة الصافية التي تنشر الحب في اي موضع تحل فيه؟

و ربما يكون هناك عودة .. بعد عودة .. إن شاء الله

[الصعيدي]

تعلالي بقي يا حلو
اولا طبعا مش فكرني (نبقي نشفولك عقاب بعدين)
المهم بقي يا حلو الاسئله


جاي لك يا ملك .. ههههههههههههه .. بالراحة بس عليا الله يسترها معاك :) .. وبعدين ازاي مش فاكرك .. احنا تقريبا ما شاركناش مع بعض في موضوعات كتير .. ولكن أنا مازلت فاكرك .. وياريت نشارك مع بعض على طول ان شاء الله


(1)
ايه رأيك في الحب عن طريق النت ؟
وهل هو نفس رأيك في تكوين علاقة الصداقة عن طريق النت
ولو كان ردك بوجود صداقة وده انا متأكد منك في رده عن طريق النت
مين هو احسن صديق اتعرفت عليه علي النت
ومين اللي ندمت علي معرفتك بيه برده علي الانترنت؟


لا يا ملك .. أنا باعرف اعد برضه .. دول خمس أسئلة مش واحد .. الأسئلة الزيادة عليها ضريبة مبيعات .. :d

طبعا كلمة الحب ليها معاني كتير .. بس أنا هاعتبر انك تقصد الحب بمعناه الدارج وهو العلاقة العاطفية بين الشاب والفتاة .. أنا لا أقر هذه العلاقة .. وكذلك لا أعتقد بجدواها .. لا أقرها يعني هي شرعا غلط .. زيها زي العلاقة العادية خارج النت .. لا يقبل بها الشرع قبل الزواج .. أما عدم جدواها فلإنها علاقة وهمية .. يعني ما حدش عارف حاجة عن التاني .. وكله بيضحك على بعضه .. وممكن في الآخر يطلع ولدين بيشتغلوا بعض .. أو بنتين كذلك .. وقصص المآسي في المواضيع دي لا حصر لها

وعلاقة الصداقة هنا بقى هاعتبرها بين الشباب وبعضهم أو الفتيات وبعضهن .. هنا يبقى ممكن تكون علاقة الإنترنت مدخل للصداقة وليست صداقة حقيقية .. ودي تجربة أنا مريت بيها حديثا .. والحمد لله اتعرفت من خلال المنتدى على بعض الزملا .. لم أندم فعلا على التعرف عليهم شخصيا .. والعلاقة مستمرة بيننا إما بالتليفون أو بنلتقي لما تسمح الظروف

الحقيقة أنا التقيت شخصيا بثلاثة أصدقاء فقط اتعرفت عليهم من خلال المنتدى .. وهم احمد صلاح واحمد ناصر وحسام عمر .. أظن من غير ما اتكلم عنهم .. الثلاثة سعدت جدا بالتعرف عليهم .. والعلاقة بيننا مستمرة والحمد لله .. وفيه بعض الزملا اتصلت بيهم تليفونيا بس لسه ما جاتش فرصة أشوفهم .. وأتمنى أشوفهم قريبا ان شاء الله

الوحيد اللي ندمت على التعرف عليه من خلال النت هو العضو .. اسمه اييييييييييه .. اسمه ايييييييه .. أيوه .. الصعيدي .. ههههههههههه .. ياعم هدي النفوس .. الطيب احسن


هقولك اسماء اعضاء في المنتدي وعايز تعليق واحد وصغير لكل واحد فيهم

قول يا عم ملك .. كده احنا في السؤال العشرتاشر .. هههههههههه


ابن البلد؟؟

ابن البلد .. اللي يحب يعرفه كويس يطلع له بره .. ههههههه .. جوه المنتدى مش فاضي أبدا


الازهري المصري؟؟

آآآآآآآآه .. ياعم ما تقلبش علينا المواجع .. الأزهري حبيب قلبي .. أمانة عليك لو شفته تبوسهولي من هنا ومن هنا


د فاضل؟؟

د. فاضل .. أستاذي في هذا المكان .. أكتر واحد استفدت منه .. وأتمنى أعرفه شخصيا ان شاء الله


انوبيس؟؟

مظلووووووووووم .. قلب أبيض بجد .. وجربت نصيحته في بعض المواقف .. أشهد إنه كان مثال الخلق الجميل


ماما زوزو؟؟

أنا أقول ايه بس عن ماما زوزو .. أمنا الغالية كلنا .. ربنا يخليهالنا ويبارك لنا فيها


جمال النجار؟؟

أ. جمال النجار .. اختلفت معه بشدة .. وقد يكون رأيي خطأ .. ولكن أشهد له انه كان بيحترم أدب النقاش


ايه كان اكبر حلم للصعيدي وقدر يحققه ؟ وازاي حققته؟
وايه الحلم الكبير قوي اللي بتحلم بيه وان شاء الله ربنا يحققهولك؟


حلم كبير .. مش عارف .. ما كانش عندي حلم معين .. أنا بصراحة مش طموح أوي يعني .. ولكن باحلم فعلا ان الاسلام يعود من جديد ليحكم العالم .. وتسود أخلاقه الجميلة بين الناس


(4)
محمد عبد السلام الانسان والصعيدي علي النت ما الاختلاف وما التشابه بينهما؟


محمد عبد السلام الإنسان .. مختلف بالطبع عن الصعيدي على النت .. هو ممكن يكون له نفس المبادئ .. ولكن ساعة التطبيق بيكون الصعيدي عنده فرصة يفكر كويس ويتكلم كويس وينصح بأسلوب كويس .. يعني سهل يتحكم في نفسه .. خارج المنتدى كلنا بشر .. ننفعل .. نغلط .. ولكن الحمد لله لا أصر على الخطأ


(5)
لحظه ضاع فيها الحب ؟؟
ولحظه اتولد فيها من جديد ؟؟


كده بقى هتخليني أقولك كش ملك .. هههههههه .. بصراحة مش فاهم السؤال .. وبما انك انت ملك الحب الضائع مش انا .. فهاسعد جدا لو وضحته وسألتني مرة تانية .. هههههههههه


عارف اني تقلت عليك في الاسئله دي
بس صدقني من اعجابي واحترامي الشديد لشخصك الكريم
تحياتي وتقديري مره تانيه


الله يخليك يا ملك الحب الضائع .. سعدت جدا بأسئلتك .. قطعت نفسي الله .......... يكرمك .. تحياتي *8*


[/QUOTE]

[الصعيدي]

محمد باشا .. حبيب قلبي .. معقول انت لسه قاعد عالنت .. ههههههههههه .. نورتني والله


بصراحه الاسئله كتير فا انا هكتفى بسؤالين لحضرتك بس


الله يخليك يا ماد .. مش هانسالك الجميل ده أبدا ;)


1- حضرتك طيب يا ترى ده بيؤثر على طريقه اشرافك؟


طيب ؟؟ .. الله يخليك يا بو حميد .. ده من ذوقك بس .. ياريت فعلا أكون طيب .. ولكن لو على الإشراف بالذات فأنا أظن إني بامارسه بطيبة شديدة .. وحذر على مشاعر الزملا .. وأحيانا ده بيسبب لي بعض المتاعب ولكن أهم حاجة عندي إني ما أجرحش حد أو أخسره .. وربنا يعينني على الموضوع ده


2- ادينى نبذه عن يوم الى الفت فيه (منتدى ابناء مصر...حلم لا علم) ؟


ما تخافش يا ماد .. ما كنتش عامل دماغ عالية ولا طالع من غرزة .. ههههههههه .. بس أنا بصراحة كنت على اتصال بابن البلد باستمرار .. وكان على طول بيشتكيلي من مشاكل السرفر .. فالفكرة جت في دماغي .. ودايما في الكتابة بتكون المشكلة في الفكرة .. لو الفكرة اتوجدت بتبقى الكتابة سهلة .. وأما التهريج اللي فيها فبيني وبينك ده طبع .. بس في مناسبته بس .. هههههههه *109*


وشكرا لحضرتك وسلامى ليك وليحيى
محمد.....


الشكر لك يا محمد على مشاركتك الجميلة .. وربنا يوفقك دايما لكل خير

[أنفـــــال]

بسم الله الرحمن الرحيم
أبو يحيى .. الغالي دوماً..
أنا لا أوجه الأسئلة .. :)
لكنني أمر فقط .. لإلقاء التحية على الجالسين ..
إزيك يا أبو يحيى؟؟ عامل إيــه؟؟
و اتفضل .. دي كمان..

http://www.paulinesbouquets.com/images/Misc/Spring%20Wedding%20Bouquet.JPG

نورت الكرسي يا أبو يحيى..
*3*
دم بخير و وعافية.

[الصعيدي]

محمد بيه باشا عبد السلام على كرسى الإعتراف
يا مرحبا يامرحبا.
يعنى نشغل الكهرباء على أعلى فولت بقى


أحمد ناصر شخصيا .. عميد الصعايدة .. كده يا ريس تسيبهم يحبسوني على كرسي التعارف .. وبمناسبة الكرسي فبلاش سيرة الكهرباء والفولت العالي دي لغاية ما نسيب الكرسي على خير .. هههههههههه


معلش بقى أنا هأسأل كتير
بس على فترات إن شاء الله
وده من عشمى


كده يا بو حميد ؟؟.. ما كانش العشم برضه .. ولو ان عشمي عشمك .. ;)


كيف تحضر لخطبة الجمعة


وبعدين بقى .. ده سر المهنة .. هههههههه .. أنا باكون غالبا عالمنتدى طول الليل باقرا عن المشركين والمشركات .. ههههههههه .. :d
غالبا من أول الأسبوع باكون محدد الموضوع اللي هاتكلم فيه .. وبابدأ بتقسيمه لعناصر واضحة عشان المستمع يقدر يخرج بفايدة محددة .. وباراعي ظروف المكان اللي هاخطب فيه واحتياجات أهله
وأثناء الأسبوع أحاول أجمع الآيات والأحاديث ومواقف الصحابة اللي ممكن تكون تناولت الموضوع .. بحيث يكون ده محتوى الخطبة
الخطبة الثانية غالبا بتكون عن أمور حديثة .. إما حدث في المنطقة اللي احنا فيها ويهم أهل المكان الكلام عنه أو خبر في جريدة .. أو موضوع عام يخص المسلمين .. بحيث يكون دايما فيه ارتباط بالواقع
دي يعني الصورة المثالية .. ومش دايما باقدر أستكملها .. ولكن ده المنهج اللي باحاول اتبعه دايما


2-هل هناك حاجة ملحة بالفعل لتجديد الخطاب الدينى وكيف ؟


مصطلح ( تجديد الخطاب الديني ) في حد ذاته مصطلح جميل لأنه يعني التطور ومواكبة المتغيرات (في أسلوب الخطاب - مش في المبادئ ) المبادئ ثوابت لا تتغير .. المشكلة ان هذا المصطلح الآن يستخدم لتغيير الثوابت بحجة مواكبة التطور ..
ولذلك خلينا ناخد موضوع تجديد الخطاب الديني بمعنى تجديد أسلوب الخطاب بما يناسب فهم المجتمع .. ويلبي احتياجاته ويوقظ الإيمان في قلبه .. ده بالتأكيد مطلوب .. وأنا باعتبر ان واحد زي الأستاذ عمرو خالد من أنجح الدعاة في هذا .. لو تلاحظ هو لم يغير شيئا من ثوابت الدين .. ولكن استخدم الأسلوب المناسب للوصول للناس ولذلك حقق نجاح كبير .. لم يحققه غيره ممن توافر لهم علم أكثر وإخلاص لا يقل عن إخلاصه .. نحسبهم جميعا كذلك ولا نزكيهم على الله


3-كان توفيق الحكيم يسمى نفسه محسن فى رواياته ومسرحياته فهل شريف هو محمد عبد السلام؟


لأ مش شريف .. أنا محسن برضه .. ههههههههههه .. لا بالطبع .. أنا باعتبر شخصية شريف دي مثالية زيادة عن اللزوم .. ولكن هي رمز للصواب والالتزام .. ياريت أكون نصه .. أو يمكن هي شخصية بتعبر عن طموح في داخلي اني أكون كده .. ولكن في كل الأحوال ما أظنش إني في هذا المستوى


4-ما هى أكثر خمسة موضوعات لك تعتز بها فى المنتدى


الحقيقة مع إن فيه مواضيع أنا سعيد إني وصلت من خلالها فكرة .. ولكن أنا باعتز أكتر بالموضوعات اللي من كتاباتي الشخصية .. بتحس انك أخرجت - بفضل الله - شيئ جديد الى الوجود .. شعور أجمل بكتير من النقل .. مع ان النقل مطلوب برضه لما يكون الموضوع يستحق


5-هل ترى أن هناك موضوع لك فى المنتدى لم تجد معه تفاعل جيد من وجهة نظرك


السؤال ده جميل بصراحة .. مادام جبنا سيرة التفاعل .. فأنا أتمنى دايما ان التفاعل مع الموضوع مايكونش معناه المشاركة بكلمة مديح للموضوع .. وانما قدر الإمكان المناقشة حول المعاني اللي فيه .. طبعا بيسعدني ان الأعضاء يحبوا كتاباتي .. وأشكرهم على مجاملتهم .. ولكن فعلا أتمنى إن التفاعل يكون بالنقاش حول بعض الدروس المستفادة من قصة أو موقف .. عشان الفايدة تزيد .. وللإجابة على سؤالك .. مسرحية صاحب النقب .. كنت أتمنى يكون فيها هذا النوع من التفاعل بشكل أكبر

أشكرك يا حاج احمد كل الشكر على أسئلتك الجميلة .. وأدام الله الحب بيننا .. وتقبل تحياتي *8*[/B]

[الصعيدي]

محمد عبد السلام .. ابو يحيى
اهلا بك على كرسى التعارف
قعد كده وضبط نفسك لاسئلتى


إيه يا عم حسام .. أضبط نفسي ايه بس .. انت هتحلقلي وللا ايه ؟؟ .. مش كفاية البشر كلهم حالقين لي .. :d .. نورتني والله .. وربنا يستر على سؤالاتك دي *9*


1_ ما الاسباب التى جعلتك تدخل معهد الدرسات الاسلاميه ؟؟؟؟؟؟؟؟؟


الحقيقة أنا كان نفسي من زمان اني اثقف نفسي بالعلم الشرعي الأكاديمي .. مش بس الوعظ والتذكرة .. وانما الفقه ومصطلح الحديث وأمور من المهم مادام الواحد بيتصدر لدعوة الناس مهم انه يتعلمها قدر الإمكان .. والحمد لله استفدت السنة دي استفادة كبيرة جدا من السنة الدراسية دي .. كفاية اني شفتك أيام الامتحانات .. هههههههههه .. *3*


2_هل تصلى صلاواتك بالنوافل؟؟؟؟؟؟؟؟؟؟؟؟؟؟


اجتهد في ذلك .. ساعات ما بقدرش اواظب عليها .. ولكن باحاول .. وبلاش فضايح بقى بعدين يحيى يسمع .. مانت دورك جاي *9*


3_هل تحرص على قيام الليل؟؟؟؟؟؟؟؟؟


مكررررررررررررررررررررررررر .. هههههههههه .. تحب انقلهولك بقى ؟؟ .. خليها بيننا دي *109*


4_هل اديت الحج أو العمره انت واهل بيتك؟؟؟؟؟؟؟؟؟؟؟


الحمد لله .. ربنا يتقبل منا .. حجيت أنا وزوجتي وإحدى بناتي (كان عمرها سنة) .. سنة 1995 .. في مكة برضه :d


5_ هل حضرت نفسك لليوم اللى حجيلك فيه انا واحمد ناصر وشودى واحمد صلاح و محمد فاروق؟؟؟احكيلى بس عن السفره


ياساتر .. زي ما تكون بتقوللي لليوم اللي ..... مش عارف إيه .. ياعم ده يبقى يوم المنى .. بس تعالوا انتوا بس .. وهنفرش لكم الأرض سمك .. محمد فاروق بيقوللي عندكو سمك وللا نجيب معانا .. قلت له لا ما تقلقش هنصطاد .. فانت كمان ما تقلقش .. هاحضر نفسي لليوم ده .. وهصوم .. هههههههههه :d

حبيب قلبي حسام .. فرفشت الموضوع بروحك الجميلة .. تحياتي لك دائما *8*

[الصعيدي]

اخى العزيز الصعيدى
منور على الكرسى والله
تسجيل حضور للمتابعة ولى عودة للاسئلة ان شاء الله
تحياتى للجميع

أختي الكريمة .. ديدي .. وفي انتظار عودتك .. وأسئلتك .. خليها سؤال واحد الله يخاليكي .. :) .. وشكرا على المرور

[الصعيدي]

سعيدة جدا ان حضرتك من مواليد بورسعيد يعنى ممكن نقول بلديات

وبالنسبة للاسئلة فانا همخمخ واجى

وسلامــــــــــى

أهلا دكتورة نسيبة .. يسعدني والله إننا نكون بلديات .. والأعضاء البورسعيدية هنا ما شاء الله كلهم شخصيات محترمة .. زيي كده .. ههههههههه *109*.. في انتظار المخمخة *8*

[sea_wolf]

*185*

هههههههههههههههههههههههههههههههههههههههههههههههههه *9* *9*


اهلا اهلا باستاذنا الغالى *4* نورت وانست *8* اتفضل

انا تعبعتك من اول لحظة جلست على كرسى الاعتر اف . وتابعت اسئلة الاعضاء ليك*7**27* وكمان اجابتك ليهم

*184*
وجة دورى الان *8*
بس هكون ضيف خفيف عليك متقلقش هو سؤال واحد وبس

متى شعرت ان الله يحبك ...........وماذا تفعل لتكرار هذة اللحظة وهذا الشعور ؟
يمكن ارجع تانى اسئل . لو افتكرت حاجة *42*


*185*

[الصعيدي]

أخى الحبيب الصعيدى
أتابعك بكل الحب وأتابع سيرة ذاتية يشرفنى أنها تتشابه فى بعض أجزائها بسيرتى وخاصة فى مسألة الدروس وخطب الجمعة وتمنيت كثيرا أن أتعرف عليك عن قرب كما تعرفت على الكثيرين من أعضاء المنتدى آخرهم شادى جلال (شودى) وسعدت بهم كثيرا جدا جدا


ولك مثل هذا الشعور وأكثر أستاذي الفاضل وشاعرنا المبدع .. وأتمنى لو أتيحت لي الفرصة للتعرف عليك شخصيا .. بعد أن تلاقت أرواحنا وائتلفت


أكثر الكتب تأثرت بها


من بعد كتاب الله تعالى .. فقد تأثرت جدا بكتاب في ظلال القرآن للأستاذ سيد قطب عليه رحمة الله


أكثر الشخصيات المحببه اليك والتى تركت بصمة فى حياتك


والدي عليه رحمة الله .. وأتمنى لو أكون مثله


من تحب من العلماء معاصرين وراحلين


تعجبني جدا شخصية الإمام الحسن البصري .. والإمام عبد الله بن المبارك رضي الله عنهما
ومن المعاصرين .. الشيخ حسن البنا عليه رحمة الله


صحابى أحببته كثيرا وبكيت وأنت تقرأ سيرته


أبو بكر الصديق رضي الله عنه


فترة من فترات التاريخ كنت تتمنى ان تعيشها


الحقيقة ما خطرليش الخاطر ده قبل كده .. ولكن أحب أعيش فترة سيدنا عمر بن الخطاب رضي الله عنه


تقبل تحياتى وحبى وتقديرى


وتقبل خالص حبي ومودتي أستاذي الفاضل .. وجزاك الله خيرا *8*

[الصعيدي]

الأخ الاستاذ \ محمد عبد السلام
تحياتى وتقديرى لشخصك الكريم ، عرفتك من خلال ما كتبت ووجدت أنك تستحق أن يقرأ لك عن جداره

سؤالى
ما سر اعتزازك بتسمية نفسك (( الصعيدى ))
وهل هو لقب ام انك صعيدى فعلا

أخيك العربى الأول (( الصعيدى الصغير ))

أخي الحبيب ..العربي الأول .. الصعيدي الصغير .. تحية من القلب من أخيك الصعيدي .. التايواني (حسب تصنيف أحمد ناصر عميد الصعايدة بالمنتدى ) ههههههههه .. والحقيقة ان اختيار اسم الصعيدي ما كانش عن رغبة معينة ولكن هو ده الاسم اللي سمح بيه المنتدى أثناء التسجيل .. ولكن أنا دلوقت باعتز بيه فعلا لإن هو ده الاسم اللي اتعرفت بيه هنا .. وأشكرك أخي الكريم على مشاركتك ومشاعرك الطيبة *8*

[حنـــــان]

طب بس مش حاسأل أسئلة عويصة المره دي بس خد بالك... ممكن قوي أرجع! *9*

هل انت ناوي تسيب شغلك ككميائي وتتفرغ للدعوه الدينية؟

قلت انك بتقول خطبة الجمعه... قبل ماتبدتي... بتحس بتوتر وقلق؟ ولا خلاص اتعودت عالموضوع؟

اكتر مكان تحبه في اسكندريه وتحب تروحه انت والعائلة تتفسحوا هناك.

سؤالين بقى سألتهم قبل كده وماجاوبتش عليا!... :d
أصغر ولادك عنده كام سنه؟
وكمان احنا في اسكندريه بنقول على مين حانوتي (http://www.egyptsons.com/misr/showthread.php?t=32104)؟ مانت عارف انا لسه باتعرف عالبلد وماليش في المصطلحات الاسكندراني قد مانت متخيل...

احتمال أرجع *4*

[سـلـوى]

*7* ممكن ادخل؟؟؟؟؟

انا مش بعرف اسال و كفاية اوى اللى شفتة هههههههه

انا بس داخلة اشجع *15* *15* *15*

و بجد حضرتك تستحق كل خير و من الشخصيات صاحبة المكانة الرائعة العالية فى المنتدى و قلوب الجميع
ربنا يزيدك يا رب

[ملك الحب الضائع]

احنا تقريبا ما شاركناش مع بعض في موضوعات كتير .. ولكن أنا مازلت فاكرك ده كان اول رد ليك عليا
واحب افكرك باللمون يمكن تقدر تفتكرني
بس ما علينا المهم المضمون
وبعديها علي اخر رد تقول
الله يخليك يا ملك الحب الضائع .. سعدت جدا بأسئلتك .. قطعت نفسي الله .......... يكرمك .. تحياتي *8*
وبأتباع نظرية اكمل الفرغات بكلمات مناسبه
فأنا من وجهة نظري *4*
الله يخليك يا ملك الحب الضائع (منك لله) سعدت جدا بأسئلتك (البيخه قوي دي)قطعت نفسي الله( يخرب بيتك و)يكرمك(زي ما كرم السادات) تحياتي
كده اعتقد ان هي دي الرساله اللي انت وجهتهالي:d
الدور عليك تكمل انت الفراغات *9* وده يكون اول سؤال
*7*
اما التاني
واللي اتسأل قبل كده وانت مفهمتهوش
لحظه ضاع فيها الحب ؟؟
ولحظه اتولد فيها من جديد ؟؟
يعني ما هي اللحظه في حياة محمد عبد السلام التي ضاع فيها الحب او افتقده؟
وما هي اللحظه التي عاد لمحمد قلبه فيها من جديد؟
يعني امتي خسرت حبك وامتي رجعت حبيت تاني بالعربي كده بقي ومن الاخر
ومتخفش مش هنقول حاجه للمدام سرك في بيير يا ابو العربي
نسيت اقولك صحيح الاسم حبيب ومن مواليد بورسعيد
المهم جينا علي التالت
عرفناك كلنا بالطيبه في التعامل مع الاعضاء وخصوصا اللي بيكتب موضوع في قاعتك
ايه اكتر موضوع اتوجد في قاعتك واضيقت منه وحبيت تحزفه بس متحزفش نقول لاسباب فنيه مثلا:d
وايه الموضوع اللي اتخذت فيه قرار بالحذف وبعد كده رجعت فيه
واخيرا ايه الموضوع اللي نفسك يكون موجود في القاعه عندك
وتلاقي نسبة تفاعل غير مسبوقه عليه سواء منك او من عضو اخر
معلش كمان سؤال بلييييييييز بس ممعيش لا ضريبه ولا دمغه بلييييييييز
ممكن تدوم علاقة الصداقه ما بين اتنين علي النت من غير برولة العلاقة دي بالمقبلات الشخصيه ولا المقبلات اهم ما يكون في العلاقة؟ وليه من وجهة نظرك
مع تحياتي
حبيب

[الصعيدي]

هناك قلائل ممن يلتقي المرء بهم في مسيرة حياته ينفذون إلى القلب من أول وهلة .. و يتربعون فيه من أول كلمة .. و تزداد مكانتهم تصاعديا بغير نهاية كلما أدرك المرء مدى نبل أخلاقهم و استواء فطرتهم
و محمد عبد السلام (هكذا بدون ألقاب فالألقاب تضع مسافة بين القلوب و لا أريد لهذه المسافة أن توضع) من أولهم .. نحسبه كذلك و لا نزكي على الله أحدا
دخل قلبي من اول مشاركة
و تربع فيه من أول رسالة خاصة
و مازالت مكانته عندي تزداد بغير توقف


الحبيب .. فاضل *3*
يعلم الله أنك أول من دخل قلبي في منتدى أبناء مصر .. لدرجة اني قعدت فترة طويلة ما اعرفش في المنتدى غير قاعة المناقشات .. ويعلم الله كم ازداد هذا الحب ونما .. وأدعو الله أن يستمر حتى نلقاه *8*


و لدي سؤال واحد:
من اين استقيت تلك الروح النقية المرحة الصافية التي تنشر الحب في اي موضع تحل فيه؟


*7* *7* *7*
والله يا أخي بتحرجني بالكلام ده .. *7* .. يعني هاقول ايه عن نفسي .. اذا كان ده شعورك فعلا وما عهدت عليك الا كل صدق .. فأحسب أن هذا من فضل الله عليّ .. ونعمة كبيرة أسأله تعالى أن يعينني على شكرها
والحقيقة إن أنا أي مكان جديد باروحه أو باتعرف على أصحابه بادعو الله دائما بهذا الدعاء (اللهم حببني إلى أهل هذا المكان .. وحبب صالح أهلهم إليّ) .. ولإن الأمور المشتركة بيني وبين الناس ليس فيها ما يغضب الله سبحانه وتعالى .. فأحسب أن الله تعالى يؤلف بين هذه القلوب ويضفي عليها هذه الروح .. وده بيدفعني دايما للبحث عن إدخال السرور على إخواني داخل المنتدى وخارجه *8*
أهم ما أذكر به نفسي وأنصح به إخواني بالمنتدى .. إن كسب المواقف يبقى خسارة كبيرة إذا تسبب في كسر القلوب .. ولا بأس بالتنازل في موقف ما مع حبيب أو صديق لكي لا تجرحه .. وعشان تُبقي على حبه .. باحاول أعمل كده .. وأتمنى من الله أن يعينني على ذلك

جزاك الله خيرا أخي فاضل .. ودائما ما أقول أن لك من هذا الاسم أوفر النصيب .. وفي انتظار عودتك ان شاء الله *8*

[الصعيدي]

أبو يحيى .. الغالي دوماً..
أنا لا أوجه الأسئلة .. :)
لكنني أمر فقط .. لإلقاء التحية على الجالسين ..
إزيك يا أبو يحيى؟؟ عامل إيــه؟؟


الغالية .. أنفال

تحية عاطرة .. ومرور كريم .. أشكرك كل الشكر .. والحمد لله أنا بكل خير .. وأسال الله أن تكوني بكل خير وصحة وعافية:f2:

[نانيس]

السلام عليكم ورحمة الله وبركاته
أري الموضوع الآن للمرة الأولى ، فأنا لم أتلقَ رسالة خاصة تخبرني بالموضوع ، لكنني رأيته قدرا ، وسعدت كثيرا حين وجدت ضيف الكرسي هذا الأسبوع هو أستاذنا الفاضل محمد عبد السلام.
قرأت الموضوع من أوله وحتي آخر مشاركة قبل مشاركتي وتابعت إجابات حضرتك عن الأسئلة بكل سرور واستفادة.
وأستأذنكم ببعض الأسئلة؛
1) ما العوامل المؤثرة في بناء شخصية حضرتك على هذا النحو الرائع بعد فضل الله سبحانه وتعالى؟
2) اذكر موقف تربوي أثر في حضرتك.
3) كيف يمكن التعامل مع الشخصية الدكتاتورية المتعالية التي تفرض آرائها ولا تتقبل المناقشة حتى وإن كان مخطئا مع اعتبار أن هذا في الغالب يكون من شخص يكبر محدِّثَه سنا؟
4) تعليم الطفل حب إخوته واحترام الكبير منهم والانتماء إليهم ، كيف يمكن غرس هذه المعاني في الطفل حتى يشب عليها؟
أكتفي بهذا القدر من الأسئلة وربما يكون لي عودة إن ورد بذهني أسئلة أخرى.
خالص التحية والاحترام والتقدير لحضرتك أستاذنا الفاضل.

[ابن البلد]

صبعا أنت كنت فاكر انك فلت لما المنتدى قفل
لكن هاع
انت ما زلت علي الكرسي وهنبتدي من الأول :d


الأسئلة لحين اظبط شوية حاجات وأجي

1- هل تفكر في تغير المهنه الوظيفية علي المدى البعيد ؟

2- هل تستطيع تغير فكرك بسهوله وتقتنع بوجهة نظر الآخرين ؟

دول دلوقتي والباقي بعد كام يوم كده :d

[الصعيدي]

اهلا اهلا باستاذنا الغالى *4* نورت وانست *8* اتفضل

انا تبعتك من اول لحظة جلست على كرسى الاعتر اف . وتابعت اسئلة الاعضاء ليك*7**27* وكمان اجابتك ليهم


أبو حميد حبيب قلبي .. انت اللي منور الموضوع .. وأتاريني طول الوقت حاسس ان فيه حد بيراقبني :d .. كويس انه طلع انت والحمد لله *6*


متى شعرت ان الله يحبك ...........وماذا تفعل لتكرار هذة اللحظة وهذا الشعور ؟


سؤال عويص أوي ده يابوحميد .. الحمد لله ان المنتدى فضل واقع كام يوم عشان أفكر في الإجابة .. :d
الحقيقة ان التفكير في ان ربنا سبحانه وتعالى بيحبني .. دي أمنية غالية جدا .. ومش عارف هل أنا اهل للمنزلة دي وللا لأ .. ولكن فعلا في بعض المواقف باحس بهذا الشعور .. من أهم المواقف دي الأمور المصيرية اللي استخرت فيها ربنا سبحانه وتعالى .. كل هذه المواقف بلا استثناء لقيت ان ربنا سبحانه وتعالى اختار لي الأفضل .. ومهما كان رأيي أو الميل القلبي قبل الاستخارة بالاقي نفسي في بعض الأمور مشيت في اتجاه تاني خالص .. والحمد لله رب العالمين كان الاتجاه الأصوب .. ساعتها باحس فعلا ان ربنا سبحانه وتعالى بيحبني وأرجو أن أكون أهلا لهذا الحب وأن ربنا يديمه عليا.

شكرا أخي محمد على مشاركتك وسؤالك الجميل .. وربنا يجعلنا جميعا من أهل حبه ومن أهل الجنة *8*

[الصعيدي]

طب بس مش حاسأل أسئلة عويصة المره دي بس خد بالك... ممكن قوي أرجع! *9*


أهلا بيكي يا حنان .. تنورينا دايما ونسعد بوجودك معانا .. بس بلاش أسئلة عويصة الله يخليكي :d


هل انت ناوي تسيب شغلك ككميائي وتتفرغ للدعوه الدينية؟


الحقيقة ما فكرتش أعمل كده .. لإن تصوري ان الإسلام ما فيهوش رجال دين .. يعني ممكن الكيميائي والطبيب والمهندس والميكانيكي والخياط وأي واحد بيشتغل اي مهنة .. ممكن يكون داعية يدعو إلى الله سبحانه وتعالى .. ولازم يثقف نفسه بالشكل الصحيح قد ما يقدر لإن الدعوة دي أمانة فلازم يؤديها على أكمل وجه
ولما باقول مافيش في الإسلام رجال دين ارجع اقول ولكن فيه في الإسلام علماء في الفقه أو التفسير أو الشريعة .. دول مهمتهم الإفتاء والاجتهاد في أمور الدين .. ده تخصص .. ولكن لا يشترط أبدا للقيام بواجب الدعوة الى الله ان الواحد يتفرغ ويسيب شغله


قلت انك بتقول خطبة الجمعه... قبل ماتبتدي... بتحس بتوتر وقلق؟ ولا خلاص اتعودت عالموضوع؟


وبعدين في الإحراج ده بقى *7* .. كنت باحس طبعا بهذا الشعور أول ما بدات أخطب .. في سن العشرين تقريبا .. بس الحمد لله زال هذا الشعور مع التعود .. بس مازلت باشعر بهذا الشعور لما اخطب العيد .. الموقف بيكون ليه رهبة اكتر من خطبة الجمعة


اكتر مكان تحبه في اسكندريه وتحب تروحه انت والعائلة تتفسحوا هناك.


ده بقى سؤال عويص فعلا .. لإن اسكندرية بقت الفسحة فيها صعبة أوي .. ولكن أنا باحب أكتر أروح نادي أصحاب الجياد .. بس أنا مش من أصحاب الجياد .. :d .. وممكن بعد ما الأولاد يلعبوا هناك شوية آخدهم جرين بلازا .. بس مش في الصيف طبعا .. المناظر هناك لا تطاق بصراحة .. .. في الصيف بافضل نروح أماكن على البحر ..


سؤالين بقى سألتهم قبل كده وماجاوبتش عليا!... :d
أصغر ولادك عنده كام سنه؟


مش فاكر امتى سألتيني السؤال ده .. بس هو يحيى وعنده 6 سنوات

وكمان احنا في اسكندريه بنقول على مين حانوتي (http://www.egyptsons.com/misr/showthread.php?t=32104)؟ مانت عارف انا لسه باتعرف عالبلد وماليش في المصطلحات الاسكندراني قد مانت متخيل...


آآآآآه .. دي تعبيرات خاصة أوي .. ومش منتشرة كتير .. كلمة حانوتي في اسكندرية بتطلق على البخيل الجلدة .. بيقولوا .. أيووووه عليك .. ده انت حانوتي يا أخي :d .. يعني بخيل جدا .. بس مش عايزين نطلع أسرار اسكندرية بره بقى *5*

أسعدتيني يا حنان بمشاركتك وأسئلتك .. ومرحبا بعودتك في أي وقت .. وتقبلي تحياتي *8*

[الصعيدي]

*7* ممكن ادخل؟؟؟؟؟
انا مش بعرف اسال و كفاية اوى اللى شفتة هههههههه
انا بس داخلة اشجع *15* *15* *15*
و بجد حضرتك تستحق كل خير و من الشخصيات صاحبة المكانة الرائعة العالية فى المنتدى و قلوب الجميع
ربنا يزيدك يا رب

ألف شكر يا سلوى على المرور والكلمات الجميلة .. وأهلا بيكي وبأسئلتك في اي وقت *8*

[الصعيدي]

وبأتباع نظرية اكمل الفرغات بكلمات مناسبه
فأنا من وجهة نظري
الله يخليك يا ملك الحب الضائع (منك لله) سعدت جدا بأسئلتك (البيخه قوي دي)قطعت نفسي الله( يخرب بيتك و)يكرمك(زي ما كرم السادات) تحياتي
كده اعتقد ان هي دي الرساله اللي انت وجهتهالي
الدور عليك تكمل انت الفراغات وده يكون اول سؤال


هههههههه .. الله يجازيك يا ملك :d .. وقعتني من الضحك .. لا ياعم انت حبيبي والله :d .. ومش ممكن أقول عليك كده .. وأشكرك جدا للعودة *6*


اما التاني
واللي اتسأل قبل كده وانت مفهمتهوش
لحظه ضاع فيها الحب ؟؟
ولحظه اتولد فيها من جديد ؟؟
يعني ما هي اللحظه في حياة محمد عبد السلام التي ضاع فيها الحب او افتقده؟
وما هي اللحظه التي عاد لمحمد قلبه فيها من جديد؟
يعني امتي خسرت حبك وامتي رجعت حبيت تاني بالعربي كده بقي ومن الاخر
ومتخفش مش هنقول حاجه للمدام


لا .. لا .. بلاش الأسئلة المحرجة دي .. وبعدين في البيت عندنا رقابة على المصنفات الفنية .. أقولك إيه يعني .. قول الشاعر ( حب إيه اللي انت جاي تقول عليه ) .. ههههههههه
الحقيقة في أشد المشاكل اللي مريت بيها في حياتي الزوجية ما حصلش إني خسرت الحب أبدا والحمد لله .. بل بالعكس أنا باعتقد ان الحب العميق والقوي بيكون من أسباب تجاوز الخلافات والمشاكل .. وأحمد الله تعالى على هذه النعمة .. بس بلاش قرررررررررر .. الله أكبر .. :d


عرفناك كلنا بالطيبه في التعامل مع الاعضاء وخصوصا اللي بيكتب موضوع في قاعتك
ايه اكتر موضوع اتوجد في قاعتك واضيقت منه وحبيت تحزفه بس متحزفش نقول لاسباب فنيه مثلا
وايه الموضوع اللي اتخذت فيه قرار بالحذف وبعد كده رجعت فيه
واخيرا ايه الموضوع اللي نفسك يكون موجود في القاعه عندك
وتلاقي نسبة تفاعل غير مسبوقه عليه سواء منك او من عضو اخر


لأسباب فنية مافيش .. ولكن أنا لما بيكون فيه موضوع مضايقني ولكن مش بيخالف قوانين المنتدى باسيبه .. حتى ولو اتضايقت منه .. لإن القانون فوق الجميع وعلى المشرف قبل العضو
أنا أكتر مواضيع باتضايق منها على قاعة لقاءات في حب الله المواضيع اللي بتتحيز لرأي فقهي معين مع إن الموضوع مختلف فيه والآراء فيه مختلفة .. باقول المفروض إن القاعة لمواضيع الوعظ والتذكير وتحبيب الناس في ربنا سبحانه وتعالى ودين الإسلام .. إذا تحولت القاعة إلى مكان للمناظرات الفقهية وعرض آراء العلماء في قضية خلافية يبقى مش هننتهي وهتكون مكان لإثارة الجدل وتبدأ المشاكل
حتى الآن تقريبا مافيش موضوعات اتخذت فيها قرار بالحذف ورجعت فيه .. تقريبا لإني قليل جدا ما باحذف إلا لو الموضوع مكرر .. ومع ذلك مش كل المكرر باحذفه
واحب هنا أذكر بالخير الأخت الفاضلة أمة الله .. قبل ما تعمل موضوع تحس انه ممكن يكون مكرر بتبعت تسأل .. ولما يكون فعلا مكرر بتكتفي برفع الموضوع القديم .. ده يدل على إنها عايزة الفايدة فقط ومش مهم ان الموضوع يكون باسمها


معلش كمان سؤال بلييييييييز بس ممعيش لا ضريبه ولا دمغه بلييييييييز
ممكن تدوم علاقة الصداقه ما بين اتنين علي النت من غير برولة العلاقة دي بالمقبلات الشخصيه ولا المقبلات اهم ما يكون في العلاقة؟ وليه من وجهة نظرك


لازم يا حبيب يعني تسأل في الآخر سؤال مش مفهوم .. المرة الجاية بقى لازم تدفع .. ههههههه
يعني إيه (برولة العلاقة دي بالمقبلات الشخصيه) فعلا مش فاهم الكلمة دي .. والصداقة بين اتنين تعني شاب وفتاة وللا إيه .. وفي انتظار عودتك يا حبيب .. وأهلا بيك دايما *8*

[وردة فلسطين]

ربنا يعطيك الف الف عافية

يا لهوي

عندك نفس طويل لدرجاتي
تقعد وترد عالاسئلة

كان ربي في عوند
وزادك من العافية والصحة

[على درويش]

السلام عليكم جميعا ورحمة الله وبركاته
ما أراه أمام عينى ينم عن شفافية ونقاء سريرة وحب لا تحركه منفعه
ودليل واضح على نوعية فريدة من الشخصيات التى تجمعت فى هذا المنتدى المميز جدا والذى أشبهه بنيل مصر من شرب منه شربة لا يستطيع أن يبقى بعيدا عنه

أتابعك أخى الحبيب الصعيدى بكل اعجاب

وأتابع الأسئلة الراقية والاجابات الرائعة

تقبلوا جميعا حبى وتقديرى

[Amira]

صباح الخير يا صعيدي

أنا بصراحة كل ما أفكر في السؤال و اجي علشان أكتبه ألاقي حد سأله قبلي *7*
فا انا هاكتفي حاليا بقراءة الأسئلة و إجابات حضرتك و ربنا يقويك *8*

علي فكرة خلي بالك أنت لسة قاعد علي الكرسي - ياعني صدقت لما قلت أن أكتر حاجة مضمونة في بلدناهي الكرسي
:d :d :d

تقبل مني خالص تحياتي و احترامي *8* *8*

[أمة الله]

بسم الله الرحمن الرحيم
السلام عليكم و رحمة الله و بركاته

بسم الله ما شاء الله مبسوطه جدا بكل الحب اللى شايفاه و طبعا انت تستاهل هذا الحب و اكثر قرأت الموضوع كله و طبعا انا شفته من قبل المنتدى ما يقع ربنا يجعل كلامنا خفيف و مالحقتش اقرا الأسئله كلها عشان احدد انا هاسأل فى ايه بس عموما انا شايفه الأسئله كلها رائعه و الأجابات اروع

ربنا يديم عليكم نعمة حب الناس و يجعل المسلمين يحبوا بعض لله

عندى سؤال شخصى معلهش يعنى اصله انا سمعت من بعض شيوخنا الكرام ان الحب قبل الزواج حرام و عليه بتكون الحياة بعد الزواج مش موفقه لأن ربنا بيكون غضبان عليهم و بما انى انا حبيت زوجى و زوجى حبنى قبل الزواج فأنا مش شايفه اللى بيقولوا عليه ده و الحمد لله حياتنا سعيده فى طاعة الله على قدر المستطاع رغيت كتير بس عشان اشجعك تجاوب

المهم سؤالى هو هل حبيت زوجتك قبل الزواج ام كان زواج تقليدى؟ و لك حرية الأجابه من عدمها

[الصاعق]

صعيدي يا حبيب قلبي

ايه الرسالة اللي عايز تؤديها بوجودك في المنتدى؟

[ابن البلد]

سؤال بقه كمان عقبال ما ترد علي اللي فات

هل تواجدك في المنتدى آثر علي حياتك الشخصيه ؟ طبعا مع الشرح لو نعم ليه :f: ولا لأ ليه برضك :@

:d

[ديدي]

أختي الكريمة .. ديدي .. وفي انتظار عودتك .. وأسئلتك .. خليها سؤال واحد الله يخاليكي .. :) .. وشكرا على المرور

والله يا ابو يحيى صعبت عليه من اللى عاملينه فيك

الاسئلة جميلة والاجابات كمان

وبما انك حددت لى سؤال واحد فانا هالتزم بيه رأفة بس بيك:)

ايه الامنية اللى طول عمرك بتتمناها ولحد الان لم تتحقق؟

[shadia-ebeltagy]

أنا سعيدة جدا انك من بلدى الحبيبة بورسعيد
ويكفينى هذا بدون أن أسأل

وفخورة جدا لوجودك فى المنتدى
ووجود
المهندس على درويش
والشاعر عصفور الشعر
*167*
شادية

[عزت الابنودي]

بسم الله الرحمن الرحيم

الاخوة والاخوات

ما المقصود بهذا الحوار ؟ ما الهدف منه ؟

عزت الابنودي

[الصعيدي]

السلام عليكم ورحمة الله وبركاته
أري الموضوع الآن للمرة الأولى ، فأنا لم أتلقَ رسالة خاصة تخبرني بالموضوع ، لكنني رأيته قدرا ، وسعدت كثيرا حين وجدت ضيف الكرسي هذا الأسبوع هو أستاذنا الفاضل محمد عبد السلام.


أنا الأسعد بحضورك ومشاركتك أختي الفاضلة .. ويعلم الله كم أغبطك على مشاركاتك الجادة وروحك الطيبة


1) ما العوامل المؤثرة في بناء شخصية حضرتك على هذا النحو الرائع بعد فضل الله سبحانه وتعالى؟


بصراحة ماكنتش أحب السؤال يكون بالصيغة دي .. لإني في حرج شديد من المدح ده .. والله أعلم بحالي .. وأتمنى أن أكون رائعا فعلا .. ولكن الحقيقة إني أقل من كده بكتير .. ولكن .. جزاك الله خيرا على حسن ظنك بأخيك الصعيدي
طبعا الفضل لله سبحانه وتعالى في اي صفة طيبة أتصف بها .. وأعتبر أن حفظي لكتاب الله سبحانه وتعالى من هذه العوامل .. فوالدي عليه رحمة الله حفظني القرآن وختمته في سن عشر سنوات .. وأشعر أنها نعمة كبيرة أثرت في تكويني وأسأل اله أن أكون من أهل القرآن علما وعملا
وربما من العوامل أيضا إني في مجال الدعوة الإسلامية منذ الدراسة الإعدادية .. وهذا الوسط وسط طيب .. من الطبيعي أن ينضح على من فيه بصفات طيبة .. فالفضل في ذلك لأساتذتي الأفاضل الذين احتضنوني وربوني في هذا الوسط .. لغاية ما بقيت صعيدي .. مش عارف أقول ايه تاني .. وفعلا أنا محرج جدا


2) اذكر موقف تربوي أثر في حضرتك.


الحقيقة مريت بمواقف تربوية كتير جدا أثرت فيا .. ولكن أذكر لكم آخرها .. من حوالي أسبوعين
عندنا في المسجد درس أسبوعي يوم السبت .. والمحاضر فيه أخ فاضل وصديق عمر وزميل دراسة وجار أيضا .. يعني تقريبا مع بعض في كل حاجة .. المهم .. نظرا لضيق المكان في المسجد بنفرش خيمة للسيدات يوم الدرس خارج المسجد .. والجيران اتعودوا يركنوا سياراتهم بعيد عن المكان لغاية ما الدرس يخلص .. واللي ما بيقدرش بيبعت المفتاح نركن له العربية بعيد
في هذا اليوم رحت متأخر .. وبعدين بعد الدرس ما انتهى .. قاللي صديقي ده .. فيه واحد من جيراننا الأستاذ فلان (أعرفه جيدا) ما رضيش يشيل العربية بتاعته .. وبعتنا له ناخد المفتاح قاللنا مش هاديكم المفتاح ومش هاشيلها .. طبعا اتضايقت جدا .. وما صدقتش انه يعمل كده وأنا عارف علاقته الطيبة بينا وبالمسجد .. قاللي هم قالوا لي انه كان تعبان وشكله نايم .. يمكن راحوا له في وقت غير مناسب فاتضايق .. قلت له يمكن .. بس برضه مايصحش .. وهو عارف ان المكان ما يستحملش
قاللي .. أنا شايف انه مادام تعبان .. نروح نجيب ورد ونزوره .. حقه علينا كده
قلت له بس الوقت متأخر .. الساعة 11 ونص بالليل .. خلينا لبكره
قاللي لأ .. أنا خايف إنه يلوم نفسه على التصرف ده ويحرج مننا والموضوع ده يسبب جفاء بيننا .. وبعدين خلينا نحسن الظن
الحقيقة عجبني كلامه .. وهو طول عمره أعقل مني .. مش صعيدي .. ههههههه .. المهم رحنا اشترينا الورد وكارت ظريف كده وبصينا على البيت من تحت لقينا النور والع .. يبقى لسه صاحي .. طلعنا له
خبطنا الباب .. فتح الراجل .. وأول ما شافنا حسيت إنه مذهول ومش مصدق .. سلمنا عليه .. وقلنا له القوت متأخر بس عرفنا ان حضرتك تعبان وقلنا ما يصحش نروح قبل ما نطمئن عليك .. الراجل أصر إن احنا ندخل
ودخلنا .. وأنا محرج جدا .. لإني اكتشفت انه مش قادر يقف وتعبان جدا
واكتشفت إنه عامل عملية كبيرة من أسبوع .. ومش بينزل من البيت .. وقعد يعتذر لنا إن فيه في العربية فلوس مش بتاعته عشان كده ما رضيش يبعت المفتاح
قلنا له غحنا مش جايين نعاتبك .. ولكن حقك علينا نطمئن عليك .. وكده احنا مقصرين جدا ان ما نسألش عنط طول الفترة دي .. وكان موقف جميل ولقاء أجمل
وشكرت صديقي جدا على الدرس التربوي العملي ده .. وحسيت ان فعلا مهم جدا كسب القلوب .. بأمور بسيطة ووقت قليل .. ولو كان الموضوع عدى بدون الموقف ده كان ممكن فضلنا واخدين موقف من الراجل والراجل محرج مننا

معلش يا أخت نانيس .. أنا هاكتفي بالسؤالين دول لإن الوقت متأخر .. وبكره إن شاء الله نكمل .. والسلام عليكم ورحمة الله وبركاته

[lost]

بسم الله الرحمن الرحيم

أستاذى الفاضل محمد عبد السلام

أنا اول مرة أرى هذا الموضوع الآن وصراحة أنا استفدت منه جدا وشعرت انك فعلا شخصية من

الشخصيات الايجابية والفعالة فى اى بيئة أو محيط تتواجد فيها .

هذا بالاضافة ان هناك صورة جميلة لك تكونت بذهنى لعدة أسباب أهمها انك كيميائى وانا اعشق

الكيمياء وكنت اتمنى ان اصبح كيميائية ولكن القدر أعطانى هبة اخرى الحمد لله .

عندى طلب وهو أن تتكلم عن اولادك وكيف تعاملهم وحلمك لهم و ياترى عندما تغمض عينيك

وتحلم بالمستقبل كيف ترى اولادك ؟؟؟؟؟؟؟؟؟؟؟؟؟؟؟؟؟؟؟؟؟؟

[الصعيدي]

3) كيف يمكن التعامل مع الشخصية الدكتاتورية المتعالية التي تفرض آرائها ولا تتقبل المناقشة حتى وإن كان مخطئا مع اعتبار أن هذا في الغالب يكون من شخص يكبر محدِّثَه سنا؟


عدنا .. ومازلنا مع أسئلة الأخت نانيس
بصراحة أنا مش هاقدر أجاوب إجابة شافية أو خبيرة بمثل هذه الأمور .. أنا بس بانصح أي واحد في أسلوب النقاش أو محاولة تغيير المفاهيم إنه أولا يحاول يكسب الإنسان اللي قدامه .. يبقى محل ثقته .. يحب يتقبل منه .. ده مدخل مهم .. ولكن الحالة اللي حضرتك بتتكلمي عنها دي موجودة كتير .. وماليش تجربة محددة معاها


4) تعليم الطفل حب إخوته واحترام الكبير منهم والانتماء إليهم ، كيف يمكن غرس هذه المعاني في الطفل حتى يشب عليها؟


برضه ماعنديش خبرة متخصصة واضحة في المجال ده .. بعض القراءات في كتب تربية الأولاد .. وده جانب أنا مقصر فيه بصراحة .. ولكن الله المستعان .. محتاج فعلا أبذل فيه بعض الجهد


أكتفي بهذا القدر من الأسئلة وربما يكون لي عودة إن ورد بذهني أسئلة أخرى.
خالص التحية والاحترام والتقدير لحضرتك أستاذنا الفاضل.


ولك خالص الشكر والتقدير أختي الفاضلة نانيس .. وتقبل الله جهدك على صفحات المنتدى .. وتحية خاصة من قاعة لقاءات في حب الله

[أحمد ناصر]

أهلاااااا محمد *3*
رجعت لك تانى
:d
أفكرك بالأسئلة التى وجهت لك حتى الآن
بسم الله الرحمن الرحيم
بطاقة حضرتك الشخصية
الاسم
السن
محل الميلاد
الاقامة
الوظيفة
يا ريت تعرفنا علي شخصة حضرتك في جملة قصيرة غير الشخصية التي نعرفها من خلال المنتدي

من هو الصعيدي ولماذا اخترت لقب الصعيدي

كيف تقضي وقت حضرتك يعني وضح لنا يوم من اوله لاخره كيف يبدا وكيف ينتهي
- جذورك العائلية منين ..؟!
- دراستك الأصلية.. إيه..؟
- أكتر حاجة بتكرهها..؟؟ (غير الأسئلة دي )
- إحك عن نقطة تحول في حياتك ..
ما هي اهم مرحلة تحول فى حياتك
ايه هو هدفك من دخول النت بشكل عام والمنتدى بشكل خاص؟
ايه اللى استفدته من وجودك كعضو مميز ومشرف نشيط فى المنتدى؟
سلسة قصص شريف ومحسن التى اعشقها ما هى اهم حلقة اردت ان توجه بها رسالة هامة؟
- ما هو مبدأك في الحياة؟؟

2- ما هو رأيك في المقولة التي تقول: "المساواة في الظلم عدل" ؟؟

3- يقولون: "الغِني في الغربة وطن و الفقر في الوطن غربة" ... ماذا يقول الصعيدي؟؟
(1)
ايه رأيك في الحب عن طريق النت ؟
وهل هو نفس رأيك في تكوين علاقة الصداقة عن طريق النت
ولو كان ردك بوجود صداقة وده انا متأكد منك في رده عن طريق النت
مين هو احسن صديق اتعرفت عليه علي النت
ومين اللي ندمت علي معرفتك بيه برده علي الانترنت؟
(2)
هقولك اسماء اعضاء في المنتدي وعايز تعليق واحد وصغير لكل واحد فيهم
ابن البلد؟؟
الازهري المصري؟؟
د فاضل؟؟
انوبيس؟؟
ماما زوزو؟؟
جمال النجار؟؟
وبلاش انا عشان عارف انك مش فكرني
وبرضه اللي متفتكرهوش من كل دول تقول (مش فاكر)
بس مش كلهم يعني
(3)
ايه كان اكبر حلم للصعيدي وقدر يحققه ؟ وازاي حققته؟
وايه الحلم الكبير قوي اللي بتحلم بيه وان شاء الله ربنا يحققهولك؟
(4)
محمد عبد السلام الانسان والصعيدي علي النت ما الاختلاف وما التشابه بينهما؟
ولو مره قعدت مع نفسك وفكرت في كل شخصيه منهم ايه اللي ممكن يزعلك من كل شخصيه علي حده
استني بس منتي هتقول كمان ايه اللي بيعجبك فيهم
(5)
لحظه ضاع فيها الحب ؟؟
ولحظه اتولد فيها من جديد ؟؟
- حضرتك طيب يا ترى ده بيؤثر على طريقه اشرافك؟

2- ادينى نبذه عن يوم الى الفت فيه (منتدى ابناء مصر...حلم لا علم) ؟
1
-كيف تحضر لخطبة الجمعة
2-هل هناك حاجة ملحة بالفعل لتجديد الخطاب الدينى وكيف ؟
3-كان توفيق الحكيم يسمى نفسه محسن فى رواياته ومسرحياته فهل شريف هو محمد عبد السلام؟
4-ما هى أكثر خمسة موضوعات لك تعتز بها فى المنتدى
5-هل ترى أن هناك موضوع لك فى المنتدى لم تجد معه تفاعل جيد من وجهة نظرك
_ ما الاسباب التى جعلتك تدخل معهد الدرسات الاسلاميه ؟؟؟؟؟؟؟؟؟
2_هل تصلى صلاواتك بالنوافل؟؟؟؟؟؟؟؟؟؟؟؟؟؟
3_هل تحرص على قيام الليل؟؟؟؟؟؟؟؟؟
4_هل اديت الحج أو العمره انت واهل بيتك؟؟؟؟؟؟؟؟؟؟؟
5_ هل حضرت نفسك لليوم اللى حجيلك فيه انا واحمد ناصر وشودى واحمد صلاح و محمد فاروق؟؟؟
أكثر الكتب تأثرت بها
أكثر الشخصيات المحببه اليك والتى تركت بصمة فى حياتك
من تحب من العلماء معاصرين وراحلين
صحابى أحببته كثيرا وبكيت وأنت تقرأ سيرته
فترة من فترات التاريخ كنت تتمنى ان تعيشها
ما سر اعتزازك بتسمية نفسك (( الصعيدى ))
وهل هو لقب ام انك صعيدى فعلا
من اين استقيت تلك الروح النقية المرحة الصافية التي تنشر الحب في اي موضع تحل فيه؟
هل انت ناوي تسيب شغلك ككميائي وتتفرغ للدعوه الدينية؟

قلت انك بتقول خطبة الجمعه... قبل ماتبدتي... بتحس بتوتر وقلق؟ ولا خلاص اتعودت عالموضوع؟

اكتر مكان تحبه في اسكندريه وتحب تروحه انت والعائلة تتفسحوا هناك.

سؤالين بقى سألتهم قبل كده وماجاوبتش عليا!...
أصغر ولادك عنده كام سنه؟
وكمان احنا في اسكندريه بنقول على مين حانوتي؟
1) ما العوامل المؤثرة في بناء شخصية حضرتك على هذا النحو الرائع بعد فضل الله سبحانه وتعالى؟
2) اذكر موقف تربوي أثر في حضرتك.
3) كيف يمكن التعامل مع الشخصية الدكتاتورية المتعالية التي تفرض آرائها ولا تتقبل المناقشة حتى وإن كان مخطئا مع اعتبار أن هذا في الغالب يكون من شخص يكبر محدِّثَه سنا؟
4) تعليم الطفل حب إخوته واحترام الكبير منهم والانتماء إليهم ، كيف يمكن غرس هذه المعاني في الطفل حتى يشب عليها؟
1- هل تفكر في تغير المهنه الوظيفية علي المدى البعيد ؟

2- هل تستطيع تغير فكرك بسهوله وتقتنع بوجهة نظر الآخرين ؟
هل حبيت زوجتك قبل الزواج ام كان زواج تقليدى؟ و لك حرية الأجابه من عدمها
ايه الرسالة اللي عايز تؤديها بوجودك في المنتدى؟
هل تواجدك في المنتدى آثر علي حياتك الشخصيه ؟ طبعا مع الشرح لو نعم ليه ولا لأ ليه برضك
ايه الامنية اللى طول عمرك بتتمناها ولحد الان لم تتحقق؟
ما المقصود بهذا الحوار ؟ ما الهدف منه ؟
تكلم عن اولادك وكيف تعاملهم وحلمك لهم و ياترى عندما تغمض عينيك

وتحلم بالمستقبل كيف ترى اولادك ؟؟؟؟؟؟؟؟؟؟؟؟؟؟؟؟؟؟؟؟؟؟
هههههههه
واضح حب الناس لك يا محمد
وإن شاء الله ده يكون نابع من حب الله لك
أسأل الله أن يحبنا وأن يجمعنا على حبه

لو سمحت أذكر لى
1- سؤال أعجبك جدا
2-سؤال أحرجك جدا
3-سؤال كنت تتمنى أن تسأل عنه وما هى إجابته

[الصعيدي]

صبعا أنت كنت فاكر انك فلت لما المنتدى قفل
لكن هاع
انت ما زلت علي الكرسي وهنبتدي من الأول :d


هاع ؟؟.. حلوة منك يابويوسف .. سبت إيه لاحمد ناصر بقى .. هههههههههههههه .. ده انا قلت انت حبيبي و هتحذف الموضوع قضاء وقدر أثناء النقل من غير ماحد ياخد باله .. *8*


1- هل تفكر في تغير المهنه الوظيفية علي المدى البعيد ؟


لا .. بصراحة ما فكرتش في الموضوع ده .. إلا لو لقيت وظيفة مشرف عام منتدى .. لو اتحايلوا عليا شوية ممكن أفكر
ههههههههههه


2- هل تستطيع تغير فكرك بسهوله وتقتنع بوجهة نظر الآخرين ؟


أيوه .. أنا فعلا في أحيان كتير بانزل على آراء الآخرين .. يمكن ده من الحاجات اللي بتريحني وتريح اللي يتعامل معايا .. بس ده طبعا مش في الثوابت أو المبادئ .. وإنما في الأمور اللي ينفع يكون فيها آراء .. بس بصفة عامة أنا مش باتشبث بآرائي .. وأعتقد ان اللي عايز يحافظ على استمرارية علاقته بمن حوله لازم يتنازل شوية في الأمور اللي تحتمل التنازل ومش لازم رأيه هو اللي يمشي على طول

نورتنا يا بويوسف .. وأشكرك جدا على زيارتك للموضوع .. وتقبل حبي وتحياتي *8*

[الصعيدي]

ربنا يعطيك الف الف عافية

يا لهوي

عندك نفس طويل لدرجاتي
تقعد وترد عالاسئلة

كان ربي في عوند
وزادك من العافية والصحة

الله يعافيكي .. وشكرا كتير يا روزالين .. وسعدت جدا بزيارتك للموضوع .. *8*

[الصعيدي]

السلام عليكم جميعا ورحمة الله وبركاته
ما أراه أمام عينى ينم عن شفافية ونقاء سريرة وحب لا تحركه منفعه
ودليل واضح على نوعية فريدة من الشخصيات التى تجمعت فى هذا المنتدى المميز جدا والذى أشبهه بنيل مصر من شرب منه شربة لا يستطيع أن يبقى بعيدا عنه

أتابعك أخى الحبيب الصعيدى بكل اعجاب

وأتابع الأسئلة الراقية والاجابات الرائعة

تقبلوا جميعا حبى وتقديرى

تسعدني متابعتك جدا أخي الكريم باشمهندس علي .. وأحبك الله الذي أحببتني فيه .. أدام الله الود *8*

[الصعيدي]

صباح الخير يا صعيدي

أنا بصراحة كل ما أفكر في السؤال و اجي علشان أكتبه ألاقي حد سأله قبلي *7*
فا انا هاكتفي حاليا بقراءة الأسئلة و إجابات حضرتك و ربنا يقويك *8*

علي فكرة خلي بالك أنت لسة قاعد علي الكرسي - ياعني صدقت لما قلت أن أكتر حاجة مضمونة في بلدناهي الكرسي
:d :d :d

تقبل مني خالص تحياتي و احترامي *8* *8*

أهلا برنسيس .. نورتي موضوعنا .. وأهلا بيكي في المنتدى .. لك خالص تحياتي .. وألف شكر على مرورك الكريم *8*

[R17E]

الصعيدي ...باشا .. بيه ... çزاده الله سعه في العلم و اليوزرات*80*

.

في وجود أمثالك ... يفترض أن يتواري أمثالي خجلاً و لكنني قررت ألا أفعل



لذا أجب عن أربعة أسئلة فقط مما يأتي *117*



1-







2- يقال بأن السعاده هي ذلك الشعور الذي يأتيك حينما تكون مشغولاً عن التعاسة ... و لم أصدقهم رغم علمي بأنهم لا يكذبون ...

و السؤال يرحمك الله هو

ماذا تعني "السعاده"؟



3- يقول يراع "قدس الله سره" حينما يكون النفاق صناعة وطنية يُتباهي بها , تصبح الهزيمه قاعدة , والنصر حاله إستثنائيه !



ما تعلقيك ؟



4 – "فزوره "





خمّن اسمه


أعمى .. يخطو
يصحو .. يغفو
يستكشف ساحة ألغام
يتقلب في كوم قنابل
مخموراً يختار مصائر
سكراناً بهوى سلطانه
يسمع نفسه ..
يبصر ليله ..
يعلم وحده .. يفهم وحده .. يقدر وحده
لو كان وحيداً فسيهلك
ما بالك لو قاد الأمه؟ّّّ

*84*


تحية لروحك الطيبه

[الصعيدي]

بسم الله الرحمن الرحيم
السلام عليكم و رحمة الله و بركاته

بسم الله ما شاء الله مبسوطه جدا بكل الحب اللى شايفاه و طبعا انت تستاهل هذا الحب و اكثر قرأت الموضوع كله و طبعا انا شفته من قبل المنتدى ما يقع ربنا يجعل كلامنا خفيف و مالحقتش اقرا الأسئله كلها عشان احدد انا هاسأل فى ايه بس عموما انا شايفه الأسئله كلها رائعه و الأجابات اروع ربنا يديم عليكم نعمة حب الناس و يجعل المسلمين يحبوا بعض لله


أهلا أختنا الغالية أمة الله .. أسعدتينا بالمشاركة .. ولو إن أسئلتك صعبة أوي :)


عندى سؤال شخصى معلهش يعنى اصله انا سمعت من بعض شيوخنا الكرام ان الحب قبل الزواج حرام و عليه بتكون الحياة بعد الزواج مش موفقه لأن ربنا بيكون غضبان عليهم و بما انى انا حبيت زوجى و زوجى حبنى قبل الزواج فأنا مش شايفه اللى بيقولوا عليه ده و الحمد لله حياتنا سعيده فى طاعة الله على قدر المستطاع رغيت كتير بس عشان اشجعك تجاوب

المهم سؤالى هو هل حبيت زوجتك قبل الزواج ام كان زواج تقليدى؟ و لك حرية الأجابه من عدمها


هو الحب قبل الزواج - بمعنى إقامة علاقة عاطفية بين الشاب والفتاة قبل الارتباط الرسمي - هذه العلاقة حرام لإن شرعا العلاقة لاتكون بين الرجل والمرأة إلا في ظل الزواج .. ولكن ما مدى تأثير هذا الخطأ على الحياة الزوجية فالله أعلم .. هل بالضرورة يجعل الحياة غير موفقة وللا لأ .. ما قريتش في الموضوع ده .. ولكن المؤكد إن لو الزوجين دول ربنا سبحانه وتعالى هداهم بعد الزواج وتخلقوا بأخلاق الإسلام فالله تعالى يقبل التوبة ويبارك في حياة هذين الزوجين .. ونسأل الله تعالى الهداية لجميع المسلمين
وأما عني أنا فمعرفتي بزوجتي تمت قبل عقد الزواج بعشرين يوم فقط .. عن طريق أختي .. والحمد لله رب العالمين أشعر أن الله تعالى بارك في هذا الزواج .. وإن كنت مش ناوي أكرر التجربة دي تاني .. ههههه :)

جزاك الله خيرا أختنا الفاضلة على المشاركة والسؤال الجميل .. وتقبلي تحياتي *8*

[الصعيدي]

صعيدي يا حبيب قلبي

ايه الرسالة اللي عايز تؤديها بوجودك في المنتدى؟

صاعقي العزيز .. هههههه .. بيتهيألي النسب هنا ما ينفعش :) .. خليها أخي الحبيب الصاعق .. نورت الموضوع .. وأسعدتني كثيرا بحضورك *8*
الحقيقة أنا أكثر ما يشغلني في حياتي هو دعوة المجتمع إلى الله سبحانه وتعالى .. توضيح جمال الأخلاق الإسلامية .. وتنشيط كل من في قلبه إيمان للعمل لله سبحانه وتعالى
وأول ما دخلت المنتدى وشفت الوسط الجميل ده حسيت إن المنتدى منبر لا يقل أهمية عن منبر المسجد .. وإن الرسالة اللي باوصلها في المسجد من الممكن توصيلها هنا مع اختلاف الوسيلة والأسلوب .. والحمد لله الأعضاء الكرام اللي اتعرفت عليهم هنا شجعوني على ذلك .. ولقيت منهم تجاوب وترحيب .. ومش هاكون مبالغ إذا قلت إني كنت بالفعل نسيت هواية الكتابة والشعر .. والبيئة الجميلة اللي لقيتها في المنتدى شجعتني وفجرت فيا طاقات كتيرة لاستكمال هذه الرسالة .. فلكم جميعا كل الشكر على ذلك .. ولك أخي الصاعق كل الشكر على مشاركتك الجميلة .. وتقبل خالص حبي *8*

[الصعيدي]

سؤال بقه كمان عقبال ما ترد علي اللي فات

هل تواجدك في المنتدى آثر علي حياتك الشخصيه ؟ طبعا مع الشرح لو نعم ليه :f: ولا لأ ليه برضك :@

:d

أهلا ابويوسف .. ريس كبير بقى وتسأل زي مانت عايز .. ههههههه *3* .. خد راحتك يا عم
الحقيقة طبعا المنتدى أثر على حياتي الشخصية .. أولا من ناحية الوقت .. بقى فيه وقت مستقطع لحساب المنتدى .. ولكن أنا باعتبر وجودي هنا مش مضيعة للوقت .. والحمد لله باحاول استغله في طاعة الله سبحانه وتعالى ..
وثانيا فتح لي مجال للتعرف على شخصيات رائعة .. اقتحمت عليّ حياتي .. ولكني سعدت بهذا الاقتحام وسعدت بالتعرف عليهم .. وعلى عالم جديد عليّ تماما .. ولكنه عالم جميل
وبعدين ما نت السبب في ده كله يا بن البلد *9* .. أنا كان مالي ومال الشغلانة دي .. ههههههههه :d ..تحياتي حبيب قلبي *8*

[الصعيدي]

والله يا ابو يحيى صعبت عليه من اللى عاملينه فيك

الاسئلة جميلة والاجابات كمان

وبما انك حددت لى سؤال واحد فانا هالتزم بيه رأفة بس بيك:)

ايه الامنية اللى طول عمرك بتتمناها ولحد الان لم تتحقق؟



أهلا ديدي .. سعدت بعودتك .. وسؤالك .. وأهلا بيكي دايما .. مادام الموضوع سؤال واحد :d
الحقيقة ما عنديش أمنية شخصية محددة .. أو حاجة باحلم بيها على المستوى الشخصي .. ولكن أنا فعلا باحلم دايما إن الإسلام يحكم العالم من جديد .. وإن الناس ترجع تعيش سلوكيات وأخلاق الإسلام الجميلة .. يمكن ده يكون شيء بعيد المنال دلوقت .. ولكن حقائق اليوم أحلام الأمس .. وأحلام اليوم حقائق الغد .. ولكل وجهة هو موليها فاستبقوا الخيرات .. وأسأل الله تعالى إني أكون لبنة في هذا البناء العظيم .. الحكم الإسلامي
أشكرك جدا أختي الغالية ديدي على زيارتك ومشاركتك .. وتقبلي تحياتي *8*

[الصعيدي]

أنا سعيدة جدا انك من بلدى الحبيبة بورسعيد
ويكفينى هذا بدون أن أسأل

وفخورة جدا لوجودك فى المنتدى
ووجود
المهندس على درويش
والشاعر عصفور الشعر
*167*
شادية

أهلا بيكي أخت شادية .. يشرفني والله إني أنتمي للمدينة الباسلة بورسعيد .. وإن كنت غادرتها وعمري 3 سنوات في حرب 67 .. واستقرينا في الأسكندرية .. ولكن مازالت لنا علاقات عائلية في بورسعيد .. وأشكرك جدا على مشاركتك وكلماتك الجميلة *8*

[الصعيدي]

بسم الله الرحمن الرحيم

الاخوة والاخوات

ما المقصود بهذا الحوار ؟ ما الهدف منه ؟

عزت الابنودي

أهلا بيك أخي الكريم عزت الأبنودي *3* .. ونورت الموضوع بمشاركتك وزيارتك الكريمة *6*
والحقيقة أنا كنت أحب إن الأخوات الكريمات اللي منظمين الموضوع هم اللي يجاوبوا على السؤال .. ولكن من ناحيتي فأنا شايف إن الهدف من الموضوع هو إتاحة الفرصة لمزيد من التعارف الموسع بين الأعضاء عن طريق طرح هذه الأسئلة .. وبالتالي بيتم اختيار أحد الأعضاء لمدة أسبوع عشان باقي الأعضاء يسلخوه بأسئلتهم زي ما حضرتك شايف :d .. بس لحد دلوقت جت سليمة .. وربنا يستر لحد ما نخلص .. وأهلا بيك معانا أخي الكريم *8*

[أخ فى الله]

الحبيب الغالى دوما الصعيدى*3*


ليس عندى جديد من الأسئلة


وربما يمنعنى تقديرى الشديد لك من القاء المزيد من الأسئلة وانت على كرسى الإعتراف*15*


بارك الله فيك ومتعك بالصحة والعافية وخلصك من هذا الكرسى اللعين *13*


وجزاك عنا خيرا الجزاء


وكما اسجل اعجابى بشخصيتك المتميزة الفاضلة


أسجل ايضا اعجابى بروحك المرحة ودماثة خلقك الرائعة


وختاما اؤكد لك على أنى أحبك فى الله *8*


ومن الناس الذين يطير قلبى سعادة عندما أرى صورتهم فى الماسنجر واسارع بإلقاء السلام عليهم مباشرة


جزاك الله خيرا


والسلام عليكم ورحمة الله وبركاته

[أشرف المجاهد]

بسم الله الرحمن الرحيم

أخى الحبيب محمد الصعيدى *8* *8*

انى أحبك فى الله *8*

وبرغم انك لم تسأل عنى ولو برسالة لغيابى الفترة الماضية ولكن ...

أحببت أن أشارك فى الحوار معك وهذا بالطبع يشرفنى ويسعدنى كثيرا

ورغم انى لسه راجع من السفر والجهاز به بعض المشاكل ولكن أحببت المشاركة قبل حل مشاكل الجهاز

أسئلتى بسيطة وهى ما طرأ على بالى الآن ... فلم أكن مستعدا لها ...


************************

* ماذا استفدت من دخولك عالم النت بكل ما فيه ؟

* ما هى أفضل عشرة كتب فى مكتبتك الخاصة ؟

* ما الذى يعجبك وما الذى لا يعجبك فى كل ما يدور حولك وما يدور فى ذهنك الآن ؟

* ما هى الأدعية التى تداوم على الدعاء بها يوميا ؟؟

* ما رأيك فى كلا من :

المنتديات

الشات

مواقع البحث عن زوجة والعكس

الصداقة عبر النت

الأمة الاسلامية الآن

****************

سامحنى ان كنت قد اطلت عليك ..


وربنا يوفقك لكل خير ان شاء الله يا محمد

جزاك الله خيرا

[الصعيدي]

بسم الله الرحمن الرحيم
أستاذى الفاضل محمد عبد السلام
أنا اول مرة أرى هذا الموضوع الآن وصراحة أنا استفدت منه جدا وشعرت انك فعلا شخصية من
الشخصيات الايجابية والفعالة فى اى بيئة أو محيط تتواجد فيها .
هذا بالاضافة ان هناك صورة جميلة لك تكونت بذهنى لعدة أسباب أهمها انك كيميائى وانا اعشق
الكيمياء وكنت اتمنى ان اصبح كيميائية ولكن القدر أعطانى هبة اخرى الحمد لله .


مرحبا بك أختي الفاضلة لوست في موضوعنا .. وأشكرك جدا على كلماتك الطيبة .. وأسأل الله أن يوفقك لكل ما تتمنين إن شاء الله


عندى طلب وهو أن تتكلم عن اولادك وكيف تعاملهم وحلمك لهم و ياترى عندما تغمض عينيك
وتحلم بالمستقبل كيف ترى اولادك ؟؟؟؟؟؟؟؟؟؟؟؟؟؟؟؟؟؟؟؟؟؟


أما عن الأولاد .. فإجابة السؤال تحتاج إلى صفحات .. ولكن لو تحدثت في عجالة فسأهتم بعنصر رئيسي .. فأنا أحلم بأن يكون لهم شخصية مستقلة .. تختار طريقها بنفسها .. في مراحل حياتهم الأولى أختار أنا لهم .. وأحاول أن أعودهم حسن الاختيار .. لأن معترك الحياة يختلف عن تربية المنزل .. الآن لا يشاهدون في التليفزيون إلا ما أختار لهم .. أتمنى أن يأتي الوقت الذي يختارون فيه الحسن ويتركون القبيح .. بيئتهم وأصدقاؤهم في الوقت الحالي أعتبر أنهم مفروضين عليهم .. أتمنى أن يحسنوا اختيار أصدقائهم .. تنشئة إنسان يفكر ويختار .. ويعلم جيدا ما يصلحه أصبح أمرا صعبا في هذا الزمان .. ولكني أعتقد أنه المفتاح لسعادتهم .. فتوجيهات الأب والأم تصلح في مرحلة .. ولكنها لا تدوم باقي المراحل .. ووضع الطفل على الطريق الصحيح .. وثباته عليه هو أهم مافي هذه المرحلة

أشكرك أختي الفاضلة على زيارتك وسؤالك .. وتقبلي تحياتي *8*

[الصعيدي]

هههههههه
واضح حب الناس لك يا محمد
وإن شاء الله ده يكون نابع من حب الله لك
أسأل الله أن يحبنا وأن يجمعنا على حبه


ويعلم الله كم أحبك أخي أحمد *3* .. وأسأل الله أن يجعلنا ممكن يظلهم في ظله يوم لا ظل إلا ظله *3*


سؤال أعجبك جدا


الأسئلة التي تخص تعاملي مع الانترنت والمنتدى .. ورسالتي في المنتدى


سؤال أحرجك جدا


يعني .. هو فيه أسئلة كانت محرجة *7* .. ويمكن أنا في إجابتي عنها كان باين حرجي .. بس ما اقدرش أقولها هنا بعدين أحرج صاحب السؤال .. وكفاية واحد بس يحرج في الموضوع .. *7*


3-سؤال كنت تتمنى أن تسأل عنه وما هى إجابته


أهو ده بقى سؤال محرج .. ههههههه .. :d أنا هأجل إجابة السؤال ده .. مش في بالي حاجة دلوقت بصراحة .. خلينا لما نشوف بقية الأسئلة .. وألف شكر على التجميعة الحلوة دي يابو حميد .. ولك خالص حبي *8*

[الصعيدي]

الصعيدي ...باشا .. بيه ... çزاده الله سعه في العلم و اليوزرات
في وجود أمثالك ... يفترض أن يتواري أمثالي خجلاً و لكنني قررت ألا أفعل


يراع باشا .. إيه الجمال ده .. خطوة عزيزة ياباشا .. وكان نفسي الموضوع يخلص قبل ما تشوفه .. بس حظي الحلو بقى .. نورت يالحبيب *3*


1-


إجابة السؤال الأول :
طبعا .. وبيتهيألي كان واضح كده من الأول .. هههههههه ;)


يقال بأن السعاده هي ذلك الشعور الذي يأتيك حينما تكون مشغولاً عن التعاسة ... و لم أصدقهم رغم علمي بأنهم لا يكذبون ... و السؤال يرحمك الله هو ماذا تعني "السعاده"؟


يعني قصدتك سعادتك وللا سعادتي .. وللا سعادة الوزير .. تفرق كتير سعادتك .. هههههه .. معلش والله كان نفسي أجاوب سؤالك .. بس انا ماليش في التفاصيل دي .. ولذلك أحيلك لقصيدة الدكتور يوسف القرضاوي بعنوان السعادة


قـل للـذي يبـغي السعـادة هل علمـت من السعيـد؟
إن السعـادة: أن تـعـيـش لفـكرة الحـق التـليـد
لعقـيـدة كـبـرى تـحـل قضيـة الكـون العتـيـد
وتـجيـب عما يسأل الحيران فـي وعــي رشـيـد
من أيـن جئت؟ وأيـن أذهب؟ لم خلقت؟ وهل أعـود؟
فتشيـع في النفس اليـقيـن وتـطرد الشك العنـيـد
وتـعلم الفـكـر السـوي وتـصنـع الخـلق الحميـد
وتـرد للنـهـج المـسدد كل ذي عــقــل شـرود
تـعطـي حيـاتـك قيـمة رب الحيـاة بـها يـشيـد
ليـظل طـرفـك رانـيـا في الأفـق للهدف البـعيـد
فتـعيـش في الدنيا لأخـرى لا تـزول ولا تـبـيـد
وتـمد أرضـك بـالسمـاء وبالمـلائـكة الـشهـود
وتـريـك وجـه الله فـي مـرآة نـفـسك والوجـود


3- يقول يراع "قدس الله سره" حينما يكون النفاق صناعة وطنية يُتباهي بها , تصبح الهزيمه قاعدة , والنصر حاله إستثنائيه ! .. ما تعلقيك ؟


أقول .. والاسكندرانية يعرفون جيدا ما أقول .. لا .. لا يصبح النصر حالة استثنائية .. بل سيتحول النصر إلى باكوس :d .. (ولوعايزين تفاصيل ممكن)


4 – "فزوره "
خمّن اسمه
أعمى .. يخطو
يصحو .. يغفو
يستكشف ساحة ألغام
يتقلب في كوم قنابل
مخموراً يختار مصائر
سكراناً بهوى سلطانه
يسمع نفسه ..
يبصر ليله ..
يعلم وحده .. يفهم وحده .. يقدر وحده
لو كان وحيداً فسيهلك
ما بالك لو قاد الأمه؟ّّّ


قاد .. يقود .. فهو ؟؟؟؟؟؟؟؟؟؟؟ .. ههههههه .. تسلم لي يا لحبيب .. :d



تحية لروحك الطيبه


قصدك الفاتحة على روحي الطيبة .. ابقى اطلب لي الرحمة الله يسترها معاك .. ده انا كنت باحبك أوي .. بصراحة .. فرحت جدا بوجودك .. روح .. ربنا ما يحرمكش مني *3*

[الصعيدي]

الحبيب الغالى دوما الصعيدى*3*
ليس عندى جديد من الأسئلة
وربما يمنعنى تقديرى الشديد لك من القاء المزيد من الأسئلة وانت على كرسى الإعتراف*15*
بارك الله فيك ومتعك بالصحة والعافية وخلصك من هذا الكرسى اللعين *13*
وجزاك عنا خيرا الجزاء
وكما اسجل اعجابى بشخصيتك المتميزة الفاضلة
أسجل ايضا اعجابى بروحك المرحة ودماثة خلقك الرائعة
وختاما اؤكد لك على أنى أحبك فى الله *8*
ومن الناس الذين يطير قلبى سعادة عندما أرى صورتهم فى الماسنجر واسارع بإلقاء السلام عليهم مباشرة
جزاك الله خيرا
والسلام عليكم ورحمة الله وبركاته

لايا عم مش للدرجة دي .. هو الكرسي مش لعين ولا حاجة .. وبعدين ما حدش في البلد دي بيسيب الكرسي بمزاجه .. ههههههه *9* .. وأشكرك جدا على المشاركة .. وربنا يعلم أني باحبك جدا .. وربنا يجمعنا دايما على الخير وعلى طاعته .. وجزاك الله كل خير على كلماتك الجميلة ومشاعرك الطيبة *8*

[عصفور الشعر]

بسم الله توكلت على الله

شوية أسئله نقاوه يا أستاذ محمد .. معلش أسئله كثيره حبتين أصلى ما بصدق:d


معظم الاسئله من وحى أفكارى وان شاء الله تعجبك:)




- لو لم تكن مصريا لوددت ان تكون ........ ولماذا؟

-اذا عدنا بك الى الوراء هل كنت ستختار نفس الوظيفه التى انت فيها الان ام لا ..ولماذا؟


-ماهو القرار الذى اتخذته ولم تندم عليه رغم اعتراض من حولك عليه...وما هو القرار الذى اخذته وما زلت تعض بنان الندم لاتخاذك اياه؟


-من واقع خبرتك بالحياه واستقرائك للواقع ..كيف ترى مستقبل العلم بصفه عامه.. ومصر بصفه خاصه؟


- ماهو الشخص الذى تراه اصلح الاشخاص لخلافة مبارك فى حكم مصر؟


_اذا طلب منك احد المتسولين بعضا من المال هل تعطيه بدون تفكير.. ام تتريث قليلا ثم تعطيه.... ام انك لا تثق فى المتسولين وتتجاهلهم تماما؟


-لو معك تمثال من دهب لمن تهديه؟


-لو معك باقة ورد لمن تهديها؟


_لو معك قنبله ذريه على من تلقيها؟


- ما هى اجمل مدينه او دوله زرتها .. وما هى المدينه او الدوله التى تتمنى زيارتها .. ولماذا؟


-ما رايك فى كل من:

العولمه

الجات

الكويز

نانسى عجرم

ماريا

روبى

الكره المصريه

مبارك

السفر

الغربه

الحياه

-ماهى الاغنيه الوطنيه التى تحب دائما سماعها؟


-هل فى حياتك شخص تحبه اكتر من نفسك ؟


-ما هى القناه الفضائيه التى تحب دائما متابعتها .. ولماذا..؟


-اذكر لى اصعب موقف فشل فى حياتك


- اذكر لى اكبر نجاحاتك؟


-هل الصعيدى راضى عن محمد عبد السلام وبنسبة كام فى الميه؟


-اذكر لى بعض من اصدقائك المقربين؟


-عمرك طلعلك عفريت او حتى اتهيألك ده.. وهل بتخاف من الضلمه والا ممكن تنام عادى من غير نور ولوحدك؟


-هل انت سريع البكاء .. ام سريع الضحك؟


-((مفيش فايده)) جمله مشهوره لسعد زغلول... امتى حسيت انك بتقولها من قلبك وباقتناع تام..اذكر لى موقف؟


-بدون ذكر اسماء .. مين هو الشخص اللى بتقوله انا مش مسامحك ابدا... وليه مش ح تسامحه.. ايه اللى عمله فيك..؟


-شخص بتطلب منه السماح .. وعملت فيه ايه عشان يزعل منك كده؟


- ايه الدعاء اللى دايما بتحب تدعيه فى صلاتك؟


- ايه هى احلامك وطموحاتك وتطلعاتك المستقبليه؟


-واخيرا...شخص تريد ان توجه له شكر خاص جدا.. شخص ليس من اقاربك او اصدقاءك ... شخص قد يكون لاتعرفه او يعرفك ولكنه اثر فى مشوار حياتك بالايجاب ولكن بطريقه غير مباشره.. قد يكون شخص قابلته فى الشارع قد يكون ممثل مطرب ..كاتب .. شاعر..الخ

وشكرا على سعة صدرك يا صعيدى ومستنى ردك زاد فضلك*15*


المحاور توت *3*

[الصعيدي]

بسم الله الرحمن الرحيم
أخى الحبيب محمد الصعيدى
انى أحبك فى الله
وبرغم انك لم تسأل عنى ولو برسالة لغيابى الفترة الماضية ولكن ...
أحببت أن أشارك فى الحوار معك وهذا بالطبع يشرفنى ويسعدنى كثير


ويسعدني جدا أخي الحبيب *3* .. وألف حمدلله على سلامتك .. وآسف جدا لتقصيري الشديد .. وسامحني أخي الكريم


ماذا استفدت من دخولك عالم النت بكل ما فيه ؟


أخي الحبيب .. تصور أني لا أتصور الآن عالم بدون نت .. ابتداء من الميل .. مرورا بالمواقع الإخبارية .. وانتهاء بأهم ما يمثل لي النت وهو البحث في المواقع المتخصصة في الخطب والدروس والمحاضرات عما يلزمني من مواد للدروس والمحاضرات .. الإنترنت الآن أصبح مكتبة هائلة لا تماثلهما مكتبة عادية في كم المادة المقروءة والمسموعة والمرئية في آن واحد .. ده احنا كده ما تكلمناش عن المنتدى لسه .. ههههههه .. فالحمد لله على نعمة النت .. ربنا يديمها نعمة ويحفظها من الزوال


ما هى أفضل عشرة كتب فى مكتبتك الخاصة ؟


سؤال امتحانات ده يا حاج أشرف .. بطل شغل المدرسين ده .. ههههههههه
في ظلال القرآن لسيد قطب
كتاب مختصر تفسير بن كثير
رياض الصالحين للإمام النووي
فقه السنة لسيد سابق
إحياء علوم الدين للإمام الغزالي
مجموعة الرسائل لحسن البنا
السيرة النبوية لمحمد علي الصلابي
صور من حياة الصحابة .. وصور من حياة التابعين لعبد الرحمن رأفت الباشا
مصابيح الهدى للدكتور محمد سليمان فرج
خلق المسلم لمحمد الغزالي
دي الحقيقة بالنسبة لي مراجع لا أستغنى عنها .. ولكن فيه كتب كتير استفدت منها جدا .. وقيمة جدا


ما هى الأدعية التى تداوم على الدعاء بها يوميا ؟؟


ماتخليها بيني وبين ربنا دي يا حاج أشرف .. وهادعيلك ان شاء الله .. ومافيش حاجة خاصة أوي غير اللأدعية المأثورة تقريبا


ما رأيك فى كلا من :
المنتديات
الشات
مواقع البحث عن زوجة والعكس
الصداقة عبر النت
الأمة الاسلامية الآن


المنتديات
فيها الخير والشر .. وجدت فيها مجال طيب جدا للدعوة إلى الله والتعرف على الآخرين .. والاستفادة العلمية .. فهي مفيدة جدا لمن أراد الخير ..

الشات
لا أتعامل معه كثيرا إلا في مجال الأقارب وأصدقاء المنتدى .. ولكن بيتهيألي برضه فيه الخير والشر .. وإن كانت المنتديات شيء آخر وفائدة أكبر

مواقع البحث عن زوجة والعكس
ما جربتش التعامل معاها .. ولكن شايف ان مش دي المكان المناسب للبحث عن الزوجة

الصداقة عبر النت
أنا جاوبت على السؤال ده في الشاركة رقم 24 .. ولكن نحط الرد تاني هنا للحاج أشرف الحبيب
وعلاقة الصداقة هنا بقى هاعتبرها بين الشباب وبعضهم أو الفتيات وبعضهن .. هنا يبقى ممكن تكون علاقة الإنترنت مدخل للصداقة وليست صداقة حقيقية .. ودي تجربة أنا مريت بيها حديثا .. والحمد لله اتعرفت من خلال المنتدى على بعض الزملا .. لم أندم فعلا على التعرف عليهم شخصيا .. والعلاقة مستمرة بيننا إما بالتليفون أو بنلتقي لما تسمح الظروف

الأمة الاسلامية الآن
الأمة الإسلامية الآن في بداية مرحلة صعود ونهضة .. وإن شاء الله يستمر هذا الصعود حتى يسود الإسلام العالم من جديد .. وأسأل الله أن يستعملنا لنصرة دينه ولا يستبدلنا


سامحنى ان كنت قد اطلت عليك ..
وربنا يوفقك لكل خير ان شاء الله يا محمد
جزاك الله خيرا


*8* العفو يا أخي الحبيب .. يعلم الله كم أحبك من كل قلبي وجزاك الله خيرا *8*

[الصعيدي]

بسم الله توكلت على الله
شوية أسئله نقاوه يا أستاذ محمد .. معلش أسئله كثيره حبتين أصلى ما بصدق
معظم الاسئله من وحى أفكارى وان شاء الله تعجبك


آآآآآآآآآه .. انت بقى طلعت لي منين .. ده انا ما صدقت خلصت أسئلة أشرف وقلت أسيب الكرسي بكرامتي بدل ما يقوموني بالعافية .. تقوم تعمل لي صفحتين أسئلة .. ده انت كده مش محاور .. ده انت جون ومحاور .. ههههههههه :) .. نورتنا يا توت .. بس دي زنقة جامدة بصراحة .. خليك فاكرها :d


- لو لم تكن مصريا لوددت ان تكون ........ ولماذا؟


بعيدا عن العصبية القومية .. فأنا أكره العصبية جدا .. واتربيت على معني قول الشاعر
وطني الإسلام لا أفدي سواه
وبنوه أين كانوا إخوتي
مصر والشام ونجد ورباه
مع بغداد جميعا أمتي
فأنا أعتبر وطني هو كل بلاد المسلمين .. وتعرفت أثناء إقامتي خارج مصر بإخوة كرام من دول أخرى .. لا أزكيهم على الله .. وفعلا باحس إن الخير موجود في كل المسلمين كلما اقتربوا من ربهم سبحانه وتعالى وتخلقوا بأخلاق الإسلام
ولكن أقول لك الحق يا محمود .. أنا ما اتصورش اني ما اكونش مصري .. مش عارف .. مش متصور اني اكون من بلد تانية .. فيه روح وطبيعة في الشعب المصري مالقيتهاش في ناس كتير .. أحب برضه أكون مصري


-اذا عدنا بك الى الوراء هل كنت ستختار نفس الوظيفه التى انت فيها الان ام لا ..ولماذا؟


الحمد لله أنا سعيد بالوظيفة اللي أنا فيها .. وباحبها .. وبافهم فيها كويس .. وباحمد ربنا سبحانه وتعالى عليها


-ماهو القرار الذى اتخذته ولم تندم عليه رغم اعتراض من حولك عليه...وما هو القرار الذى اخذته وما زلت تعض بنان الندم لاتخاذك اياه؟


قرار اتخذته ولم أندم عليه هو قرار استقراري في مصر عام 2000 .. والحقيقة ان كتير من الزملاء في الخارج حذروني من ظروف العمل والأوضاع الاقتصادية في مصر .. ولكن برضه لقيت منهم اللي شجعني على الخطوة دي .. والحمد لله بعد استخارة ربنا سبحانه وتعالى أخدت القرار .. وأنا سعيد بهذه الخطوة
وأما القرار الآخر .. فمافيش حاجة مصيرية كبيرة تستاهل الندم بصراحة .. يمكن بعض القرارات البسيطة في أمور حياتية واقتصادية .. ولكن صدقني أنا موضوع الندم ده ما اتعرضتش ليه والحمد لله .. ممكن توفيق من ربنا .. تثبيت من ربنا .. الحمد لله


-من واقع خبرتك بالحياه واستقرائك للواقع ..كيف ترى مستقبل العلم بصفه عامه.. ومصر بصفه خاصه؟


العلم جزء لا يتجرأ من واقع مصر ومستقبلها ككل .. في ظل الأوضاع السياسية الحالية في مصر .. مستقبل العلم مظلم .. حتى الجهل هيهرب من مصر .. هههههههه


- ماهو الشخص الذى تراه اصلح الاشخاص لخلافة مبارك فى حكم مصر؟


للأسف نظام الحكم في مصر منذ ابتلاء البلاد بحكم العسكر ألغى كل شخصية بخلاف رئيس الجمهورية .. ما عادش فيه شخصيات وطنية سياسية قوية وليها دور مؤثر تقدر الناس تشاور عليها وتقول ده رئيس مصر القادم .. أكيد فيه كفاءات عالية جدا ولكن الظروف لم تسمح لها بالظهور .. هشان كده أنا مع القوى الوطنية اللي بتطالب بالإصلاح السياسي .. إلغاء قانون الطوارئ .. حرية إقامة الأحزاب .. مش مجرد انتخابات تعددية صورية يسمح فيها لبعض الشخصيات الهامشية بترشيح نفسها كديكور ديموقراطي
في ظل الإصلاح السياسي وإطلاق الحريات ممكن إن شاء الله نقول فيه شخصية مناسبة لخلافة مبارك في حكم مصر


اذا طلب منك احد المتسولين بعضا من المال هل تعطيه بدون تفكير.. ام تتريث قليلا ثم تعطيه.... ام انك لا تثق فى المتسولين وتتجاهلهم تماما؟


أنا أتجاهل المتسولين تماما كمبدأ .. وإن كنت أحيانا أجد نفسي مدفوعا للصدقة على بعضهم .. رزقهم بقى .. ولكن بانصح اللي عايز يتصدق يكون من خلال جمعية خيرية أو ناس هو يعرف حالتهم كويس


-لو معك تمثال من دهب لمن تهديه؟


أنا مش باحب الدهب .. أنا باحب الألماظ .. ههههههههه .. أفهم من سؤالك مين أحب إنسان تهديه أغلى هدية .. أغلى هدية أقدمها لأبي وأمي .. جزاهم الله عني كل خير


-لو معك باقة ورد لمن تهديها؟


ولو اني مقصر في موضوع الورد ده .. بس أهديها لزوجتي أم يحيى


لو معك قنبله ذريه على من تلقيها؟


أعوذ بالله .. ما اتصورش اني ارمي قنبلة ذرية على حد .. ولكن أدعو الله تعالى بالهداية لكل الناس .. وأدعو الله بإزالة دولة إسرائيل الغاصبة من فلسطين .. ولكن القنبلة الذرية دي تدمير للبشرية وللأجيال المقبلة .. البشرية لم تعرف هذه الأسلحة الرهيبة في ظل الإسلام وإنما في ظل الحضارة المادية الزائفة


- ما هى اجمل مدينه او دوله زرتها .. وما هى المدينه او الدوله التى تتمنى زيارتها .. ولماذا؟


أنا مازرتش بلاد كتير .. فقط مكة والمدينة والإمارات .. لو اتكلمنا على الجمال المادي .. المعروف .. فالإمارات من اجمل البلاد اللي زرتها .. ولكن أجمل مكان أحبه وأرتاح فيه وأتمنى أروحه دايما هو مكة والمدينة

هاخد نفسي وارجع لك .. ان كان في العمر بقية *8*

[الصعيدي]

نكمل يا عم عصفور .. استعنا على الشقا بالله .. :)


العولمه .. الجات

شريعة الغاب .. وحكم القوي على الضعيف .. ببساطة هي الأمركة


الكويز

كارثة على الدول المشاركة .. ولكن .. أعتقد أن نجاح المقاطعة من أسباب هذه الاتفاقية


نانسى عجرم .. ماريا .. روبى

مش محتاجين رأيي دول .. هاقول ايه بس .. آآآآآآآآآآآآآآه .. وتلات اربع


الكره المصريه

صفر .. بحكم القانون


مبارك

ياعم انت عايز ايه بالظبط .. خلينا في الكورة أسهل


السفر

جميل .. أحب السفر جدا


الغربه

صعبة جدا .. وخاصة غربة الإنسان في وطنه


الحياه

حلوة للي يفهمها .. بس يفهمها صح .. جميلة في طاعة الله سبحانه وتعالى .. ومرضاته


ماهى الاغنيه الوطنيه التى تحب دائما سماعها؟

الله أكبر فوق كيد المعتدي


هل فى حياتك شخص تحبه اكتر من نفسك ؟

نظريا أيوه .. ولكن عمليا ما اتعرضتش لموقف اختبار حقيقي


ما هى القناه الفضائيه التى تحب دائما متابعتها .. ولماذا..؟

قناة إقرأ في برامجها الدينية والاجتماعية .. وقناة الجزيرة للجوانب الإخبارية ,, وسمارتس وي للبرامج الثقافية
بس بصراحة بصراحة ماعنديش وقت لهم كلهم


اذكر لى اصعب موقف فشل فى حياتك

ده انا ما صدقت نسيته .. لازم تفكرني يعني .. ماشي .. هاذكرهولك .. حاجة تاني ؟؟


اذكر لى اكبر نجاحاتك؟

آه .. كده ماشي .. بصراحة أحلى فرحة نجاح أفتكرها يوم ما نجحت في امتحان قيادة السيارات في أبوظبي
بس ده مش أكبر نجاح يعني .. ههههههههه


الصعيدى راضى عن محمد عبد السلام وبنسبة كام فى الميه؟

انت بتجيب الأسئلة دي منين ؟؟ .. ههههههه .. لأ مش راضي .. بنسبة كبيرة


اذكر لى بعض من اصدقائك المقربين؟

عمرو وحسام وخالد .. أصحاب شريف .. هههههههههههه


عمرك طلعلك عفريت او حتى اتهيألك ده.. وهل بتخاف من الضلمه والا ممكن تنام عادى من غير نور ولوحدك؟

لا بصراحة ما عنديش تجارب في المواضيع دي .. بس كنت باخاف من الضلمة وانا صغير .. وانا مهما كبرت صغير


هل انت سريع البكاء .. ام سريع الضحك؟

الاتنين


مفيش فايده .. جمله مشهوره لسعد زغلول... امتى حسيت انك بتقولها من قلبك وباقتناع تام..اذكر لى موقف؟

ساعات فعلا باحس ان مافيش فايدة لما ظروفي توقعني في مصالح حكومية ويكون فيه مشكلة ورقية محتاجة حد يتحمل مسئولية والصنف ده خلص من عندنا .. مافيش فايدة


بدون ذكر اسماء .. مين هو الشخص اللى بتقوله انا مش مسامحك ابدا... وليه مش ح تسامحه.. ايه اللى عمله فيك..؟

بعد كل اللي عملته فيا يا توت .. يا عصفور الشعر .. أكييييييييييييييييد .. مسامحك


شخص بتطلب منه السماح .. وعملت فيه ايه عشان يزعل منك كده؟

الحمد لله .. الحمد لله .. مافيش


ايه الدعاء اللى دايما بتحب تدعيه فى صلاتك؟

أن يرزقني الله الشهادة في سبيله


ايه هى احلامك وطموحاتك وتطلعاتك المستقبليه؟

على المستوى الشخصي تربية أولادي تربية صالحة .. وعلى المستوى العام .. أتمنى أن أكون داعية ناجح إلى الله عزوجل


واخيرا...شخص تريد ان توجه له شكر خاص جدا.. شخص ليس من اقاربك او اصدقاءك ... شخص قد يكون لاتعرفه او يعرفك ولكنه اثر فى مشوار حياتك بالايجاب ولكن بطريقه غير مباشره.. قد يكون شخص قابلته فى الشارع قد يكون ممثل مطرب ..كاتب .. شاعر..الخ

نعم .. أوجه هذا الشكر للأستاذ عمرو خالد .. لإنه وجه تفكيري في الفترة الأخيرة لجوانب كانت غايبة عني .. واستفدت جدا من فكره وأسلوبه .. جزاه الله كل خير


وشكرا على سعة صدرك يا صعيدى ومستنى ردك زاد فضلك

معقول الأسئلة خلصت .. ياااااااااااااااااااااااااااااااه .. العفو يالحبيب .. وسعدت جدا جدا .... بانتهاء الأسئلة
هههههههه .. حبيب قلبي *8* .. كل ده هزار :d .. وانا فعلا سعدت بأسئلتك ومشاركتك .. تقبل تحياتي *3*

[أم أحمد]

السلام عليكم ورحمة الله وبركاته
معلش انا قولت بقي الحق حضرتك قبل ما الاسبوع يخلص واسال سؤالين كده بسرعة يا ريت تتقبلهم ان شاء الله ويتسع وقتك للرد عليهم


يا ريت حضرتك توضح لينا كيف يمكن تحضير درس ديني بمعني ما هي الخطوات التي تتبعها لتحضير الدرس ؟


ما عدد اولادك وكم اعمارهم؟وما هي الطرق التي تستخدمها في تربية اولاد حضرتك ؟ وهل عندك وقت كافي بتقضيه مع الولاد ولا الشغل والنت بياخد كل وقتك ؟

عاوزة بقي نصيحة من حضرتك ازاي نقدر نستغل وجودنا علي النت بطريقة مفيدة وناخد منها ثواب ولا يكون مجرد مضيعة للوقت ؟


ازاي ممكن الانسان يستغل وجوده في الغربة لخدمه دينه برغم وجود بعض الظروف التي تعوق ذلك ؟

معذرة للاطالة علي حضرتك
تقبل تقديري وجزاك الله خيرا لسعة صدرك
اسفة لو كنت طولت في الاسئلة

[كانت لنا اوطان]

بدايه السلام عليكم ورحمه الله وبركاته
هاى ترا ممكن نتعرف على بعض ونفتكر بعض ونوعد بعض اننا منزعلش ومن زعلش بعض
طبعا انته فاهمنى يا بن عمى
غايته انا فكرت اسئلك سؤال ممكن يكون غريب شويه بس انا مستحير فيه عل الاخر تعرف ايه هوه
اقوهولك اسمع بقه تقدر تقولى انته بتحب مين بس بصراحه ويا ريت تقنعنى بحد غير ابوك وامك وربما انا؟
ويا ريت بلاش تجاوب علشان متنضربش
مرحا مرحا لا تنضاق هذا سوال تجريب
خش على السؤال التانى سوال جغرافى وشلن لو جاوبت عليه
تقدر تقولى الرئيس ياسر عرفات مكان دفنته فى غزه فين
اما رقم 3 يا سيدى ومحدش سيد حد
تقدر تقولى اخطر معلومه عرفتها وحاسيت انها كانت تافهه و للاسف انك تعلمتها على كبر
رابعا والاهم
انته حزب وطنى ولا لاء مع التعليل فى حاله الاجابه
علشان انته من دمى ولحمى بردو وبينا صله رحم
مش هحبسك
هديلك سؤال بديل
انته بتحب سندوتشاتك فى الغداء ايه بردو مع التعليل مثال سندوتش يتكون من عيش بلدى ولا افرنجى والحشو بالدولار ولا بالجنيه المصرى علشا متعبش معدتى وجيبى فلافل ولا فياجرا من جاااد علشا ن اول مشوفك تعزمنى ونته مطمن وجيبك مليان
خامسا
ومش هسيب حق ليا عليك اننا نتعرف ببعض وتعطينى مما وهبك الله من بحر علمه وفيض كرمه
الاسم والاول والهوايه وبصفه عامه انته
تكره ايه فى صاحبك
ولا تعليق
بس انا تعبت
من البحر لكن عمرى يصر على البعد عن بؤس برى
اخيكم عاشق المحبه المضطهد
سااااااااااااااهر

[الصعيدي]

السلام عليكم ورحمة الله وبركاته
معلش انا قولت بقي الحق حضرتك قبل ما الاسبوع يخلص واسال سؤالين كده بسرعة يا ريت تتقبلهم ان شاء الله ويتسع وقتك للرد عليهم


أهلا ومرحبا أخت أم احمد .. الحقيقة أنا اول ما شفت اسمك في المشاركات فرحت جدا جدا جدا .. تصورت انك داخلة تنهي الموضوع .. وتعتقيني من الكرسي ده .. ههههههههه .. لإن طبعا الأسبوع خلص من زماااااااااااااااااان .. بس وماله .. مرحبا بيكي وبأسئلتك أختنا الكريمة


يا ريت حضرتك توضح لينا كيف يمكن تحضير درس ديني بمعني ما هي الخطوات التي تتبعها لتحضير الدرس ؟

في البداية احب أذكر نفسي وأذكر أي حد ناوي يحضر درس ديني بأهمية الإخلاص وقصد وجه الله سبحانه وتعالى .. أحد العلماء كان ينصح تلميذه ويقول (إذا جلست للناس فكن واعظا لهم بقلبك .. ولا يغرنك اجتماعهم عليك .. فإنهم يطلعون على ظاهرك والله تعالى مطلع على باطنك) .. فيبقى الواحد همه الصدق مع الله وليس إعجاب المستمعين
أما بالنسبة لخطوات التحضير فهي إني في البداية باحدد الهدف أو المعنى اللي عايز أوصله من خلال الدرس .. يعني حث المستمع على الصلاة .. أو الإنفاق .. أو صلة الرحم .. مثلا .. بحيث يكون الهدف واضح دايما في عناصر الدرس
والخطوة التانية بتكون تقسيم الموضوع لعناصر .. مشروعية الموضوع وحكمه .. فضله وثوابه .. كيفية اكتسابه إذا كان خلق من الأخلاق مثلا .. الترهيب من تركه وعقوبة تاركه
وبعدين باجمع الآيات والأحاديث وقصص السيرة وآثار التابعين حول الموضوع وأوزعها على كل عنصر من العناصر عشان لا يخلو الدرس في أي مرحلة من مراحله من الآية والحيث والقصة
أما إن كان الدرس في المنتدى فباكتب قصة حول الموضوع .. ومن خلال القصة باحاول أوصل للهدف وأحبب القارئ فيه :)


ما عدد اولادك وكم اعمارهم؟وما هي الطرق التي تستخدمها في تربية اولاد حضرتك ؟ وهل عندك وقت كافي بتقضيه مع الولاد ولا الشغل والنت بياخد كل وقتك ؟

عدد الأولاد 3 .. وأعمارهم على الترتيب 11 - 9 - 6 .. وطول الوقت ماسك لهم العصاية .. عشان أدافع عن نفسي .. هههههههههه
طبعا هو الشغل والنت بياخد وقت كتير فعلا .. بس باحاول يبقى دايما فيه أيام بتاعتهم .. ما ارتبطش فيها بحاجة غيرهم .. وباهتم بالذات في الصيف بإنهم يشتركوا في رياضات في النوادي .. وبعض الدورات الثقافية اللي تناسب سنهم .. واللغة الانجليزية .. والحقيقة والدتهم بيكون عليها العبء الأكبر في متابعة الحاجات دي .. ده بالإضافة لحفظ القرآن وده مستمر طول السنة


عاوزة بقي نصيحة من حضرتك ازاي نقدر نستغل وجودنا علي النت بطريقة مفيدة وناخد منها ثواب ولا يكون مجرد مضيعة للوقت ؟

وجودي على النت هو عبارة عن :
- البحث عن مواد دينية أو ثقافية أو فتاوى شرعية
- متابعة الأخبار والتحليلات السياسية
- منتدى أبناء مصر للتواصل مع الأحباب .. والإفادة والاستفادة
- البريد الالكتروني
- السلام والتحية ودردشة سريعة مع بعض الأصدقاء على الماسنجر (المعارف فقط .. ومش راندم شات)
يعني بالشكل ده أظن إن الحاجات دي مفيدة وفيها ثواب ان شاء الله .. وأرجو ما يكونش فيها مضيعة للوقت


ازاي ممكن الانسان يستغل وجوده في الغربة لخدمه دينه برغم وجود بعض الظروف التي تعوق ذلك ؟

بصراحة أنا ماليش تجارب في المجتمعات الغربية .. وكنت فترة وجودي في دولة الإمارات في محيط مسلم .. وبالتالي كان التواصل مع العائلات اللي اتعرفت عليها .. ودعوة بعضهم إلى الالتزام زي ما باعمل في مصر .. وبصراحة الواحد بيلاقي إن أفضل وسيلة لدعوة الآخرين هو السلوك والقدوة من غير كلام ولا محاضرات .. ومن خلال التعامل ممكن الناس تحب هذا الخلق وهذا السلوك ودي أهم وسائل الدعوة


معذرة للاطالة علي حضرتك
تقبل تقديري وجزاك الله خيرا لسعة صدرك
اسفة لو كنت طولت في الاسئلة

لا مافيش إطالة ولا حاجة .. جزاك الله خيرا أختي الفاضلة :) .. وأشكرك جدا على استضافتي على هذا الكرسي *8*

[الصعيدي]

بدايه السلام عليكم ورحمه الله وبركاته
هاى ترا ممكن نتعرف على بعض ونفتكر بعض ونوعد بعض اننا منزعلش ومن زعلش بعض
طبعا انته فاهمنى يا بن عمى

وعليكم السلام ورحمة الله وبركاته .. منور يا عبدو .. ترا نفسي ما زعلش منك .. بس اديني فرصة .. يابن عمي *9*


غايته انا فكرت اسئلك سؤال ممكن يكون غريب شويه بس انا مستحير فيه عل الاخر تعرف ايه هوه
اقوهولك اسمع بقه تقدر تقولى انته بتحب مين بس بصراحه ويا ريت تقنعنى بحد غير ابوك وامك وربما انا؟
ويا ريت بلاش تجاوب علشان متنضربش

ومستحير ليه وتاعب نفسك يا بن عمي *13* .. أنا لو منك لا أتعب نفسي ولا أسأل أصلا .. بس مادام سألت بقى أقول لك .. يعني لو عايز حد غير أبويا وأمي .. فيه طبعا .. بس أكيد مش انت .. هههههههه :d .. بس مش عارف ليه مش عايزني احب أبويا وامي .. طب عايزني أحب مين .. أحب سوسو واحب لولو .. وللا كمننة .. ؟؟


مرحا مرحا لا تنضاق هذا سوال تجريب

لا .. خد راحتك .. معاك للصبح *5*


خش على السؤال التانى سوال جغرافى وشلن لو جاوبت عليه
تقدر تقولى الرئيس ياسر عرفات مكان دفنته فى غزه فين

لا ما قدرش .. كان نفسي من قلبي أخدمك *7* .. بس ما كانش ينعذر .. وخلي لك الشلم


اما رقم 3 يا سيدى ومحدش سيد حد
تقدر تقولى اخطر معلومه عرفتها وحاسيت انها كانت تافهه و للاسف انك تعلمتها على كبر

أقول لك يا CD .. فاكر أنا معلومة من النوع ده .. وكانت طريقة من طرق الرؤية من خلال الجدران .. في الأول افتكرتها مهمة .. وبعدين طلعت الشباك :d


رابعا والاهم
انته حزب وطنى ولا لاء مع التعليل فى حاله الاجابه

أنا طبعا وطني .. وباحب وطني جدا *5* .. وبدون تعليل .. حب الوطن مش محتاج أسباب


علشان انته من دمى ولحمى بردو وبينا صله رحم
مش هحبسك
هديلك سؤال بديل
انته بتحب سندوتشاتك فى الغداء ايه بردو مع التعليل مثال سندوتش يتكون من عيش بلدى ولا افرنجى والحشو بالدولار ولا بالجنيه المصرى علشا متعبش معدتى وجيبى فلافل ولا فياجرا من جاااد علشا ن اول مشوفك تعزمنى ونته مطمن وجيبك مليان

بصراحة ما باحبش اتغدى شندوتشات *12* .. بس من ناحية العزومة اطمن تماما .. مش هاعزمك *9*


خامسا
الاسم والاول والهوايه وبصفه عامه انته
تكره ايه فى صاحبك

الهواية حاليا منتدى أبناء مصر .. وبكره الغلاسة كره العمى *3* .. بس باستحملها من اصحابي .. زي ما بيستحملوها مني


ولا تعليق
بس انا تعبت

قلبي عندك يا صاحبي .. لما ترتاح .. أنا في انتظارك .. سلااااااااااااااااام

[Abdou Basha]

الله يكون في عونك يا أ / محمد........
الأسئلة بقت صعبة حبة... وعجيبة شويتين.

[الصعيدي]

الله يكون في عونك يا أ / محمد........
الأسئلة بقت صعبة حبة... وعجيبة شويتين.

عبدو باشا .. الحبيب .. دورك جاي يا باشا .. مجهز لك شوية حاجات عجيبة .. هههههههههه ;) .. أشكرك على مرورك أخي الحبيب .. حقيقي أسعدتني بتشجيعك *8*

[ماما زوزو]

بسم الله الرحمن الرحيم
ابنى الغالى محمد
اسفة للتاخير ارجو قبول اعتذارى
انا اثبت حضور لحين قراءة الموضوع
لك كل التحية والتقدير...

*169*
................

[الصعيدي]

بسم الله الرحمن الرحيم
ابنى الغالى محمد
اسفة للتاخير ارجو قبول اعتذارى
انا اثبت حضور لحين قراءة الموضوع
لك كل التحية والتقدير...

*169*
................

أمنا الغالية الفاضلة .. ماما زوزو
ألف حمد لله عالسلامة
وسعدت جدا بعودتك وتشريفك للموضوع
إن شاء الله يكون سلامي وصل لك
وفي انتظار عودتك إن شاء الله
:f2:

[أم أحمد]

السلام عليكم و رحمة الله و بركاته

الف شكر لك استاذ محمد بجد أمتعتنا بتواجدك معنا في الموضوع

و بردودك الطيبة و نرجوا ألا نكون قد أثقلنا عليك

كل الشكر لك و دمت بكل خير

وجزاك الله كل الخير

إن شاء الله غداً ستعلن لكم بوكي بوكي عن العضو الجديد علي كرسي التعارف

في إنتظاركم معنا دوماً

كل الشكر لكم و دمتم بكل خير

*184*

[كانت لنا اوطان]

مشاء الله مشاء الله هوا دا
اعتقد اننا ممكن نكون اصدقاء بس ....دلوقتى اقولك انك
يا ريت تقبل منى احلى باقه من الورود والياسمين والرياحين
وتسامحنى على الاسئله اللى انته كنت بارع فى الاجابه عنها وصحيح
كده الصعيدى ولا بلاش
ردودك على الاسئله كانت اكثر من ممتازه
وعندك سعه صدر تحسد عليها وربنا يخليلك
ويخليك للاسره والاولاد
يسلمواااااااااااااا
وعاش الصعيدى عاااااااااااااااااااااش
اخيك
عاشق المحبه المضطهد
سااااااهر