تحت دائرة الضوء

[محيي ابراهيم]

الافاضل اعضاء المنتدى
هذه المشاركة محاولة من مشرفي القاعة
تامر عبد الغني
محيي الدين ابراهيم
لان يتم التواصل الاخوي بين الاعضاء وبعضهم البعض عن طريق اختيار عضو كل ثلاثة ايام لنطرح عليه الاسئلة التي تكشف لنا عن ابعادة الانسانية وطموحاته ومبادئه مع الاخذ في الاعتبار ان العضو الذي ستوجه له الاسئلة ليس مطالبا بالاجابة على اي سؤال يرى ان الاجابة عليه سرا من اسرارة وسنحترم هذا منه تماما لان الغرض هو التواصل وليس الفضول والذي قمنا بترشيحة ليكون اول الضيوف هو المشرف العام " ابن البلد " على ان نتلقى الاسئلة ابتداء من اليوم بحد اقصى ثلاثة اسئلة فقط لكل عضو على ان يراعي كل سائل ان لايكون سؤاله مكررا لعموم الفائدة
وجزاكم الله خيراً

ضيف تحت دائرة الضوء الان هو : ابن البلد
ونرحب بأسئلتكم له رغم انه غرقان لشوشته في الجرد السنوي وربنا يعينه

[بنت مصر]

الله الله محيي فكرة جميلة



أنا حبدأ بأسأئلتي


وححاول اكون حنينة شوية عشان مش من اولها يفيص في ايدينا :D


1- تصرف اتصرفته يا ابن البلد وندمت عليه


2- ماذا يعني المنتدى بالنسبة لك وما هو تصورك له مستقبلا


3- هل انت راض عن نفسك؟

بسنت

[master_of_hell]

شكرا لك استاذ محى على الفكرة الجميله والرائعة

وربنا يقدرنا وربقدر ابن البلد المرة دى

ابن البلد
1_ماذا تعنى كلمة مصر بالنسبه لك ؟
2_ما معنى الانتماء وهل يختلف مستوى الآنتماء بالنسبه لك؟

وكفايه علي كده ونسيب الباقى يسأل

[ابن البلد]

بنت مصر
1- تصرف اتصرفته يا ابن البلد وندمت عليه
أني أشتغلت في شركة موتورولا الله يحرقهم

2- ماذا يعني المنتدى بالنسبة لك وما هو تصورك له مستقبلا
يعني لي كل شيء
تصوري للمنتدي انه هيكون أكبر منتدي في العالم العربي وليس الدولي لان المواقع الدولية لو شافت منتدي يكون أكبر موقع أكيد هيخربوه
المهم غن شاء الله بفضل الله وتعاونكم هيكون اكبر موقع عربي ‘ن شاء الله

3- هل انت راض عن نفسك؟
الحمد لله راضي عن نفسي و الحمد لله

[ابن البلد]

master_of_hell

1_ماذا تعنى كلمة مصر بالنسبه لك ؟
مصر هي الهواء اللي بتنفسه وهي الدم اللي بيجري في عروقي
مصر هي النيل اللي بيروينا الخير وهي الحنان اللي عايشين بيه
وهي الخير والحنان
ده مش كلام شعارات ده حقيقة واللي يعرف قيمة مصر هو الوحيد اللي بعد عنها بيعرف قد ايه قيمة مصر

2_ما معنى الانتماء وهل يختلف مستوى الآنتماء بالنسبه لك؟
معني الإنتماء والله يا أ/ تامر أنا أتكلمت في الموضوع ده في موضوع في المنتدي وأتكلمنا فيه كتير قوي بيتهيالي كان أسم الموضوع سؤال إلي هيه أو حاجه زي كده بس أتكلمت بما فيه الكفاية :D
بس الإنتماء معناه كبير قوي
وليه طبعا مستويات كتيرة موت
من اول إنتماءك لنفسك ولبيتك ولإسرتك إلي أنتماءك لدينك واهلك وبلدك و عالمك

[UNKNOWN]

1. هل تقبل أن تسافر إسرائيل تحت أي ظرف من الظروف ؟؟ على سبيل المثال هناك شركة عالمية قررت فتح فرع لها في الشرق الأوسط و بمرتب مجزى وتطلب عاملين في مختلف المجالات و هؤلاء العاملين سيقومون بالسفر لعدة دول من بينها إسرائيل لكونها دولة مهمة في الشرق الأوسط
:cool:
2. ماذا تفعل لو إكتشفت أن إبنك يقوم بأعمال منحرفة و أن نفس هذه الأعمال قمت أنت بها في سنه .. و هل ستستطيع أن تقسو عليه؟
:cool:
3. م أكثر موقف محرج تعرضت له؟

:cool:

[heba]

بسم الله الرحمن الرحيم

ابن البلد
ما نوعية الكتب التى تفضل قراءتها ؟
ماذا تتمنى ليوسف ان يكون فى المستقبل ان شاء الله؟
ماذا تفعل لو وضعت فى موقف محرج بين صديقين عزيزين عليك و مضطر لأرضاء الأثنين ؟
تحياتى لك يا ابن البلد و تحيه لمحى و ماستر على الفكره الجميله دى

[وادكول مش معقول]

فكرة جديدة لنج .... تسلم ايديك وقلمك يا محي باشا ..

ابن البلد يا حبيبي ... تعال .. تعال لحموووو يا خويا ..ههههه
=============

1 - ما الفرق بين ابن البد واحمد ؟ بمعني ما الفرق بين ابن البلد الرمز في المنتدي واحمد الانسان في الحياة ؟

2 - هل انت تعطي رأيك في المنتدي من خلال مشاركاتك علي الحياد دائما من اجل ان يعم السلام فقط ؟؟؟ ام لانك مقتنع بمدأ الحياد علي طول الخط ؟

3 - ما معني الصداقة في نظرك ؟ وبالاخص الصداقة الانترنتية التي بالتأكيد تختلف علي الصداقة في شارعنا المصري الجميل .....؟

4 - هل تري في احد ابناء منتدانا صفات سيئة تحب تقويمها .. او هل تجد فيهم من لا ترتاح لهم ؟؟ وتحس تجاههم بالشك والريبة نحو سلوكهم ..
(والرجاء الاجابة بنعم او لا مع ذكر تلك الصفات او موضع الريبة دوووووووووون ذكر اسماء لعدم الاحراج او بث الشك والريبة في قلوب الاخرين )


*** السؤال الاول اجباري
*** اختر سؤالين من 2 و 3 و 4..... ولو جاوبت عليهم كلهم تاخد درجات المستوي الرفيع ههههههههههه

[ابن البلد]

UNKNOWN
1. هل تقبل أن تسافر إسرائيل تحت أي ظرف من الظروف ؟؟
لأ طبعا حتى وولو كان مفيش شغل غير هناك
ياعم يضربوني ولا حاجه :D


2. ماذا تفعل لو إكتشفت أن إبنك يقوم بأعمال منحرفة و أن نفس هذه الأعمال قمت أنت بها في سنه .. و هل ستستطيع أن تقسو عليه؟
زي الي والدي فعله هفعله
بس بابا معرفش أي حاجه فاسده أنا عملتها وأنا صغير و حتى الآن
لكن لو عرفت ممكن أحاول اصلح من شانه
او بقه انت عارف يا هاشم هكون مجبر أني أساعده وأقسم معاها :D علشان مقولش لمامته
3. م أكثر موقف محرج تعرضت له؟
يوه المواقف المحرجه كتيرة
آخرها وهو شيء يخص المنتدي
كان مطلوب مني أني أفصل بين نزاعين بين عضوين
و العضوين كانوا غاليين عليا قوي ومكنتش عارف أزاي هقول كلمة الحق
بس الحمد لله ربنا ستر :D

[ابن البلد]

هبه

ما نوعية الكتب التى تفضل قراءتها ؟
الكتب التي أفضل قرائتها هي الكتب العليمة والكتب التي تخص الكمبيوتر
كمان بحب أقرا لمصطفي محمود موت
أنا بصراحه قرأت له كتب كثيرة جدا جدا جدا جدا

ماذا تتمنى ليوسف ان يكون فى المستقبل ان شاء الله؟
أتمني ان يكون أقرب إلي الله منى :( لاني بصراحه حاسس أني بعمل أخطاء كثيرة
كمان أحب أن يكون واد بروجرامينج بس بروجرامينج ويب مش أي كلام ;)

ماذا تفعل لو وضعت فى موقف محرج بين صديقين عزيزين عليك و مضطر لأرضاء الأثنين ؟
و الله حصل
و معرفتش اعمل أيه
بس حاولت الإصلاح و الحمد لله محدش زعل مني وتفهمني لانهم عارفين أني دايما طايب ومبقصدش غير الخير ( لكني مش غبي :D )

[ابن البلد]

واد كول مش معقول

1 - ما الفرق بين ابن البد واحمد ؟ بمعني ما الفرق بين ابن البلد الرمز في المنتدي واحمد الانسان في الحياة ؟
بص هو مفيش فرق كتير
بس ناس كتير بتزعل من ابن البلد
لكن الحمد لله أنهم مبيزعلوش من أحمد صلاح
انا عن نفسي بكتب بكل طبيعتي في المنتدي و بكتب اللي عايزة بالظبط حتى ولو كنتم هتزعلوا مني خصوصا سياسيا لاني بجد بجد يعني السياسة بنظر لها نظرة أن لو مفيش سياسة في ناس كتير هتعقد في بيتهم ومش هتلاقي حاجه تعملها

2 - هل انت تعطي رأيك في المنتدي من خلال مشاركاتك علي الحياد دائما من اجل ان يعم السلام فقط ؟؟؟ ام لانك مقتنع بمدأ الحياد علي طول الخط ؟
لا انا بعطي راي في المنتدي علي الحياد لكن أنا مش ملاك و مش معصوم من الخطا ولي كتير أخطاء في المنتدي لكن لما بدركها بحاول أعتذر واتداركها

3 - ما معني الصداقة في نظرك ؟ وبالاخص الصداقة الانترنتية التي بالتأكيد تختلف علي الصداقة في شارعنا المصري الجميل .....؟
ياااااااااااه :5:
الصداقه في نظري واد كول هي كل شيء جميل ممكن أكون عليه الصداقه هي حالتي النفسية لو لقتني مضايق اعرف أن في واحد صديقي زعلان مني لو لقيتني مبسوط أعرف أني بسط كل أصدقائي
الصداقه بالنسبه لي هي أغلي من حاجات كتير يمكن تكون اغلي من ابني ( حتى أصادقه ;) )
بالنسبة للصداقه عبر الإنترنت بحترمها جدا لكن مبتعيش كتير لكن هي سبيلي الوحيد لتكوين صداقات فبدون صداقات مفيش أحمد صلاح

4 - هل تري في احد ابناء منتدانا صفات سيئة تحب تقويمها .. او هل تجد فيهم من لا ترتاح لهم ؟؟ وتحس تجاههم بالشك والريبة نحو سلوكهم ..
نعم
في كتير
أغلبهم مشتركين المنتدي علشان يراسلوا الأعضاء والعضوات ( لانهم بنات وأولاد مش بنات فقط ) لكن مبتفرقش معايا كتير المهم يكون شكله في المنتدي جيد و محترم
كمان في نوعيه بتزعل بسرعة جدا وتتقمص من اقل شيء
وده بيضايقني جدا
لاني بحاول أصالح فيهم سنتين :D


أنا جاوبت علي الأربع أساله غيظتا فيك يا كول يا مش معقول :3::1:

[مناضل]

الأخ الفاضل ابن البلد ..
قرأت في قاعة كلام في الممنوع موضوعك ( مَن الحمار ؟ ) ..
سؤالي وبصراحة شديدة :
1ـ من تقصد بالثعلب !
2- من تقصد بالأسد !
3ـ من هو الحمار !

همسة : لو كنت مُحرج عندي استعداد لسحب تساؤلي وأعفيك من الاجابة ..!

[ابن البلد]

والله يا أ/ مناضل أنا مقصدش حد بعينه

لكن هذا الموضوع ممكن أن تأخده علي احد ما في مجال المنتدي
احد ما في مجال الاسرة
احد ما في مجال البلد
أحد ما في مجال المجتمع
احد ما في مجال العالم أجمع

فالدنيا مليئة بالذئاب والثعالب والحمير :D

[Eskandarani]

أبو يوسف الغالي
كل سنة و يوسف و اخوات يوسف و امهم بكل خير وصحة وسعادة (وزى بعضه انت كمان معاهم!)

حقيقي كل سنة و كلكم طيبين و كل الأعضاء الأفاضل و عائلتهم

وربنا يخلي كلامي خفيف عليك! وتكون أسئلتلي مش في الممنوع!

1) لماذا أنشأت المنتدى؟ (ليه وجع دماغ)
2) هل تتوقع ان المنتدى و أعضائه الكرام يمكنهم بالتأثير اجابا وسلبا في المجتمع المصري ؟
3) ماذا تستفيد من المنتدى (هل هو لوجه الله والوطن والمصلحة العامة)
4) "الناس معادن"(الأعضاء) أوليس كذلك! كيف تحتفظ و تحمي النفيس منهم و الغالي من عبث العابثين و لهو اللاهون وكيف تعامل و تتعامل مع الخارجين
من الأعضاء و الزوار؟ سواء خارجين عن النص او الياقة او خارجين عن الأدب

من السؤال 5 الى 500 في المره القادمة (أم العيال حاتضربني)

[محيي ابراهيم]

1- تخيل نفسك احد هؤلاء ... ماذا تفعل؟
ياسر عرفات
صدام حسين
شعبان عبد الرحيم
2- يوسف احمد صلاح اصر على السفر لفلسطين ليصاحب اطفال الحجارة هناك ضد العدو المحتل .... ماهو رد فعلك؟
3- نعاني كثيرا من اضطهادات وسلطويات اصحاب الاعمال ... ماذا ستفعل للعمال والموظفين المظلومين لو قمت من النوم الصبح لاقيت نفسك رئيس مجلس ادارة شركة موتورولا؟ كدة خبط لزق
محيي الدين ابراهيم

[ابن البلد]

Eskandarani
1) لماذا أنشأت المنتدى؟ (ليه وجع دماغ)
بص يا سيدي
في الأول كان بناء علي طلب و توجيه من الأخت الغاليه بسنت ( بنت مصر )
وبعد كده كبر الموضوع في دماغي وأقتنعت بفكرتها موت لاني كنت بعاني من وجودي في كثير من المنتديات العربية والأجنبية الأخري و حاجات بقه سياسية ونفسيه بين الدول العربية وبعضها
المهم يعني مش هكلم كتير عون السبب لكن زي ما قلت في الأول لجعل لابناء مصر صوت علي النت صوت حر بدون تجريح

2) هل تتوقع ان المنتدى و أعضائه الكرام يمكنهم بالتأثير اجابا وسلبا في المجتمع المصري ؟
بص هو في الوقت الحالي معتقدش أنه يأثر جامد إجابيا علي المجتمع كا كل
لكن علي الأقل بيأثر في كل أسرة المنتدي وفي أسر أعضاء المنتدي وأكيد أنا وانت وغيرنا أتعلم كتير من المنتدي ومن بعضنا البعض

3) ماذا تستفيد من المنتدى (هل هو لوجه الله والوطن والمصلحة العامة)
لحد دلوقتي إستفادي من المنتدي كبيرة جدا أتعرفت علي ناس وأصدقاء بيمثلوا لي أغلي شيء في حياتي علي الإنترنت علي الأقل
لكن مقدما يعني بعد كمان قول 6 شهور إن شاء الله هبدأ في المحاولة للإستفاده منه ماديا علشان أقدر أحافظ علي الأصدقاء من خلال وجود هذا المنتدي

4) "الناس معادن"(الأعضاء) أوليس كذلك! كيف تحتفظ و تحمي النفيس منهم و الغالي من عبث العابثين و لهو اللاهون وكيف تعامل و تتعامل مع الخارجين
من الأعضاء و الزوار؟ سواء خارجين عن النص او الياقة او خارجين عن الأدب

بص هو في الحقيقة أنا مبحاولش أحتفظ بالنفيس أو الوحش
انا أهم حاجه عندي صورته بالمنتدي أنت رئيس دولة لكن سوري يعني مبتحترمش وبتجرح في الأعضاء يبقه عندي العضو المحترم أحسن كتير من اللي بيجرح فيه مهما كان
كمان بحافظ علي المحترم بمعاقبة غير المحترم مهما كان الغير محترم قدره في الدنيا ومستواه الإجتماعي في المجتمع :D


( والنبي بلاش أربع أسئلة كفايا تلاته لحسن أنما بجد والله معنجيش وقت :( )

[ابن البلد]

محيي ابراهيم

1- تخيل نفسك احد هؤلاء ... ماذا تفعل؟
ياسر عرفات
مش هعمل أكتر من اللي بيعمله

صدام حسين
هحاول ألم الشمل مرة أخري مع العرب لكن في الآخر ما باليد حيلة
بس أنا عملت أنتخابات وفوزت فيها 105 % بس علشان قانونا مبيسمحوش غير لحد 100 % و بيرفوضوا المستوي الرفيع فنجحت بنسبة 100 % فقط

شعبان عبد الرحيم
لأ محبش أكون شعبان
ولو أني أحب أكون اهبل كتير بس محبش أستخدم هبلي أني أكون مشهور او أني أتاجر واتباها بهبلي :(

2- يوسف احمد صلاح اصر على السفر لفلسطين ليصاحب اطفال الحجارة هناك ضد العدو المحتل .... ماهو رد فعلك؟
مع السلامة يا حبيبي ربنا معاك بس متنساش تقول لماما لحسن تزعل منك و متنساش تعلق السلسة دي اللي فيها أسمك منقوش وعنوانك في مصر علشان أحجز لك مكان مع الشهداء وأستطيع أن أحصل علي جسدك الطاهر
:5:

3- نعاني كثيرا من اضطهادات وسلطويات اصحاب الاعمال ... ماذا ستفعل للعمال والموظفين المظلومين لو قمت من النوم الصبح لاقيت نفسك رئيس مجلس ادارة شركة موتورولا؟ كدة خبط لزق

اولا يعني وقبل كل شيء هشيل أحدث جهاز محمول في العالم لشركة نوكيا :eek: بجد أصل يعني جهاز موتورولا ده ليه معزه خاصه عندي موت
و بعدين أبدأ أفكر أزاي احل مشكلة الشركة وارفعه إنتاجها وميهمنيش اي عامل في الشركة بس مش هضطهد حد لكن كل واحد مسئول قدامي بشغله وبس
و اللي عاجبه علي الكحل يتكحل :3: بيتهيألي مفهومة :D

[mogah]

يتهيألي ان مافيش سؤال ما تسألش لكن بما انك راجل متزوج و عندك أطفال عايزه اسألك اي رأيك في اللي و لامؤاخذه يعني
بيقولوا ان الستات بعد الجواز بتبقى نكديه و شرسه و كل اهتمامها موجه لاطفالها و بس و جوزها بيكون في آخر الصف ؟؟؟
( راعي ان فيه بنات كتير عايزه تتجوز ) مع العلم اني زوجه من 14 سنه و لسه ما جتليش نقطه و لا حاجه بس
شيلت المراره من سنتين :p

[عبدالحكيم]

بسم اللة الرحمن الرحيم: شكراً عى هذة الفكره الجميله
اما اخي ابن البلدمرحباً كيف الصحه:
1---مانوع المواضيع التي تحب ان تشاهدها في المنتدى
2---هل يأخذ ألأنترنيت منك الوقت الذي يجعل الزوجه تضجر منه
3---لو كنت مكان الشيخ احمد ياسين هل كنت ستقبل وقف العمليات الفدائيه
والسلام عليكم ورحمة الله وبركاته:عبدالحكيم

[ابن البلد]

mogah
بيقولوا ان الستات بعد الجواز بتبقى نكديه و شرسه و كل اهتمامها موجه لاطفالها و بس و جوزها بيكون في آخر الصف ؟؟؟

و الله يا موجه أنا لسه متجوز بقالي سنتين لكن الجواز كويس وكل شيء والست تمام لكن طبعا الجواز خنقه يعني مش حرية لكن رابطة يعني مش حرية جامدة كمان حاجه هي بتهتم بطفلي ماشي لكن كون أنها تهتم بي ولا لأ يعني تقدري تقولي هو الإهتمام قل شوية لكن مقلش نهائيا وأنا منتظر النهاية السعيدة :D

[ابن البلد]

عبدالحكيم
1---مانوع المواضيع التي تحب ان تشاهدها في المنتدى
مواضيع القصصيه
المواضيع اللي في قاعة النقاش
مواضيع الكمبيوتر
و المواضيع اللي بيرشحهالي و يقولولي لازم تقرأ ده للنهايه أ/ ابن مصر
وأ/ بنت مصر
و أ/ واد كول
2---هل يأخذ ألأنترنيت منك الوقت الذي يجعل الزوجه تضجر منه
هو بيأخد وقت أكبر مما تتخيل يعني تخيل و الله الهارد بتاعي في البيت أتحرق
نزلت أستلفت الكاسه CPU بتاعت ابن عمي و دخلت علي النت علشانكوا

3---لو كنت مكان الشيخ احمد ياسين هل كنت ستقبل وقف العمليات الفدائيه
لأا أنا مش هوقف أي عمليه حتى ولو السكينة علي رقابتي
أصل بصراحه مفيش غير الحل ده بس لو فيه حل تاني ممكن طبعا :D

[إسلام شمس الدين]

الغالي اين البلد

بصراحة انا عارف انك مشغول جدا الأيام دي ، و ماكنتش عايز اشارك عشان ما أرهققش بالاسئلة ، لكن قلت مش معقول يبقى ابن البلد في ضيافة الكوكبة الجميلة دي من الأعضاء من غير ما أشاركهم . .

عشان كده انا مش حاسألك . . لكن حاسيبك انت تقول كلمة أو طلب أو أمنية بتتمنى ان الأعضاء في المنتدى يحققوها ليك .

و قبل ما تتكلم بس ( اصبر يا عم حاديك الميكرفون و الله ) عايز اشكر محي و مستر على الفكرة الجميلة و على مجهودهم الرائع في هذه القاعة الشابة .

اتفضل يا عم الميكرفون . . قول بقى كلمتك للأعضاء

[ابن البلد]

هي كلمة واحده بس

ممنوع الغيرة من بعضينا :) ;)

[ابن البلد]

أ/ ابن مصر الغالي

1- أيه هو أول شيء فرحك في المنتدي ؟؟؟


2- أيه هو أول شيء أحزنك في المنتدي ولم تنساه حتى الآن ؟

3- رساله توجهه للمديرين والإداريين العرب ؟؟

[محمد على محمد]

سؤالى لاابن مصر
ما هى القاعة المفضلة لديك ؟
و ما هى توقعاتك للمنتدى
بمنتهى الصراحة
:D

[محيي ابراهيم]

ابن مصر الغالي عماد
1- بحكم انك مغترب مالذي تتمناه ليكون المغتربين العرب اصحاب قدرة في التأثير داخل المجتمع الغربي
2- كيف بدأت علاقتك مع دراسة الكومبيوتر وهل انت مع اختراق المواقع وهدمها؟
3- ماذا تفعل لو كنت مكان ( بوش )
وشكرا ياصديقي العزيز
محيي الدين ابراهيم

[ابن مصر]

الرحمة حلوة برضة وانا اخوكم وكلنا حانقف الوقفة دي !!!دة انا غلبان !!



ردا علي اسئلة ابن البلد حبيبي[/COLOR


[COLOR=blue]س-- أيه هو أول شيء فرحك في المنتدي ؟؟؟

ج-في الحقيقة أول شيء افرحني في
المنتدي هو اسمة الغالي عندي جدااا
وتزيد اعضاء بشكل رائع جدااا وعندما ارها روح
الحب والتعاون بينا جمعيا


س -2 --أيه هو أول شيء أحزنك في المنتدي ولم تنساه حتى الآن ؟
ج-في الحقيقة هو فراق الدكتورة حورية البدراي عنا
وكنت ومازالت مندهش !!!لخروجها عن اسرة المنتدي المصري الرائع



[COLOR=blue]3- رساله توجهه للمديرين والإداريين العرب ؟؟[/COLOR

رسالتي اوجها الي مديرين والإداريين العرب --هي انتبهوا ايها السادة
لان في بعض من الموظفين بيلعبوا ويرغو بالمسنجر ويضيعوا الوقت ولا يعملوا !!وشكراااهاها

ارجواكم العفوا --وتحياتي --!!!

[ابن مصر]

سؤال محمد علي محمد
ما هى القاعة المفضلة لديك ؟

ردي علي السؤال الاول --هو --
:: القاعات الإليكترونيه الحديثة :: بكل ما فيها


و ما هى توقعاتك للمنتدىبمنتهى الصراحة


2توقعتي للمنتدي بصرحة هي ان يكون من
انجح وافضل المنتديات العربية علي
مستوي الانترنت العالم العربي باذن اللة
تحياتي

[ابن مصر]

سؤال محيي الدين ابرهيم

1- بحكم انك مغترب مالذي تتمناه ليكون المغتربين العرب اصحاب قدرة في التأثير داخل المجتمع الغربي

بان نبدا باانفسنا ونحسابها وان نحاول بان نكون مثالا وسفراء عرب مسلمين
نجاحين -يد واحدة متمساكين ومتفقين علي راي وان نكونا علي ثقة من انفسنا
وعمل لوبي عربي مسلم موحد

2- كيف بدأت علاقتك مع دراسة الكومبيوتر وهل انت مع اختراق المواقع وهدمها؟


-علاقتي بالكمبيوتر بدات بسبب عملي بالتصوير القيديو-ولقد بدات احسي
بصعبة تعملي بالكمبيوتر المعقد في ذلك الوقت --وكنت علي وشك تغير عملي
بسبب هذا--حتي ساعدني اللة في التفكير فياخذ كؤرس في مجالات الجرافيك
والحاسب والبرمجة الخ--ومازالت في الكؤرس وهو لمدة ثلاث اعوام
وانا باكيد ضد الارهاب والتخريب والظلم والتجريحوالشر--اظن واضح!1:D

3- ماذا تفعل لو كنت مكان ( بوش )


-لو كنت مكان بوش-:(-ما كنت فعلت ابدا افعالة المجنونة ولا كنت
ولاكنت عملت عدوة مع الدول العربية -
بل كنت حاولت التركيز وفهم ودراسة اساس المشكلة ومحاولة معلجتها من جذورها


تحياتي

[بنت مصر]

يا جماعة خفوا عن ابن مصر الاسئلة لانه حبيب الكل
وكله الا ابن مصر أخويا وشقيقي الغالي


اسألك انا ياابن مصر

1- نصيحه تهديها لكل الناس؟

2- شخصيه أثرت في ابن مصر .. وكيف كان التأثير ؟

3- ما رأيك في المنتدى (سلبيات وايجابيات)


بسنت

[Proud_Muslimah]

السلام عليكم
,,,عذرا...
عندي مداخلة لو تكرمتم:)انا جديدة بينكم ولا اعرفكم شخصيا فاليس من الافضل قبل البدء بطرح الاسئلة ان تعطونا نبذة مختصرة عن الشخص لكي نعرف نمط الاسئلة التي سنسئلها ونستفيد من خبرته

اخ ابن مصر سؤالي لك...
1-ماذا سيكون تصرفك مع اخيك المراهق لو علمت انه يتعاطى المخدرات??كيف ستساعده...
2-ماهو تعريف الخلود بالنسبة لكم??
3-مارايك بالزواج والتعارف عن طريق الانترنت???

[ابن مصر]

ردي علي اسئلة بنت مصر


1- نصيحه تهديها لكل الناس؟
لكل الناس وبالذات اهل المنتدي الغالي وانا اولهم
لانسي الظن حتي يثبت العكس
الصبرعلي غضب بعض الرواد المريضة--ودول حانشوف منهم كتير
الحب في اللة والوطن واللغة والمنتدي --حب العضو لااخي

2- شخصيه أثرت في ابن مصر .. وكيف كان التأثير ؟

شخصة عمر بن الخطاب ---في قلبة الرقيق وشجاعتة وقوتة وحكمتةفي اخذ اهم القرات--وحبة الكبير للناس --اشياء اخي جميلة جداا




3- ما رأيك في المنتدى (سلبيات وايجابيات)

المنتدىبسلبيات وايجابيات
بالناسبة لي كمنزلي الرائع--بكل مافيي
من عيب وميزات--واهلة الطيبين جدا اولاد الناس الرائعة
خلاصة مصر الطيبة --احبة كدة علي بعضة ---هههههه


اتمني ان تكون اجابتي نالت راضاكم
ابن مصر

[ابن مصر]

رداي علي اختي Proud_Muslimah




1-ماذا سيكون تصرفك مع اخيك المراهق لو علمت انه يتعاطى المخدرات??كيف ستساعده...

في الحقيقة سؤال صعب جدااا-في تنفيذة
وسهل الكلام عنة --ولكنني سوف احاول ان ارد
رد عاقل واقعي
سن المراهقة هذا --سن خطير جداا في معظم الحالات
وسوف احاول اكسب ثقتة في واحترمة لي --والصدق في
كلامي بعد ذلك مهمتي بتكون شوية اسهل في اقناعة
بكلامات تسطيع عاقلة ان يفهموا ويصدقة ويقتنع بي
اعمل كل ما في واسعي واستعمل كل سي ممكن كالدين والراسات والخبرة الخ

2-ماهو تعريف الخلود بالنسبة لكم??

الخلود للة وحدة

مع تحياتي واعجابي جدا بهذة الفكرة---اوف فففففففففف!!
تعبت
ابن مصر

[وادكول مش معقول]

تعبت ده ايه عم ...............

ده انا جاي من الاجازة ورايق ... وانت بالذات واحشني ...

تعالالي بقه ...................... ههههههههههههه متخفش قوي كده يا عم ...

انا هديلك اربعة اسئلة لازم علي الاقل تجاوب علي خمسة منهم هههههههههههه

السؤال الاول ( خمس درجات )

ماذا تفعل لجعل اطفالك في بلاد الغربة وعاداتها يرتبطون ب مصر وعاداتها وتقاليدها؟؟؟؟؟؟؟

السؤال الثاني ( خمس درجات )

ايهما اقوي رابطة عندك ( رابطة الدم - رابطة الحب - رابطة الصداقة ) ولماذا ؟

السؤال الثالث ( خمس درجات )

ماذا تفعل لو لم تكن مصريا غير ان تود ان تكون مصريا ؟؟؟؟؟

السؤال الرابع ( خمس درجات )

من اثر فيك ولماذا في كل من :

1 - الساحة السياسية ( حتي الاموات )
2 - الساحة الاجتماعية ( حتي وان كان من الاقارب)
3 - الساحة الادبية ( في اي المجالات )
4 - الساحة الفنية ( في اي المجالات )
5 - منتدانا الرائع

[master_of_hell]

ابن مصر
ما هو تقيمك للمنتدى الآن ؟ وماذا تنتظر ان يكون فى المستقبل ؟
وكيف نستطيع الوصول به الا ما نتمناه؟


ما هو اهم مبدأ لك فى الحياة ؟ وهل فعلا تستطيع تطبيقة فى حياتك؟

[ابن مصر]

ردي علي سؤال واد كول معقول --ههه

ماذا تفعل لجعل اطفالك في بلاد الغربة وعاداتها يرتبطون ب مصر وعاداتها وتقاليدها؟؟؟؟؟؟؟
بتعليمهم الدين الاسلامي واللغة العربية وتعرفهم حكايات عن الاجداد والاهل
السؤال الثاني ( خمس درجات )ايهما اقوي رابطة عندك ( رابطة الدم - رابطة الحب - رابطة الصداقة ) ولماذا ؟
رابطة الدم--هي الاهم والاساس
السؤال الثالث ( خمس درجات )

ماذا تفعل لو لم تكن مصريا غير ان تود ان تكون مصريا ؟؟؟؟؟
بجد مش عارف--لما احصل ابقي اقولك --ههههههه
السؤال الرابع ( خمس درجات )

من اثر فيك ولماذا في كل من :

1 - الساحة السياسية ( حتي الاموات )
2 - الساحة الاجتماعية ( حتي وان كان من الاقارب)
3 - الساحة الادبية ( في اي المجالات )
4 - الساحة الفنية ( في اي المجالات )
5 - منتدانا الرائع

هم الخمسة
وتحياتي

[ابن مصر]

ردي علي سؤال master_of_hell



ما هو تقيمك للمنتدى الآن ؟ وماذا تنتظر ان يكون فى المستقبل ؟
وكيف نستطيع الوصول به الا ما نتمناه؟
تقيمي هو ممتاز --منتظران يكون مناهم وانجاح واهم المنتديات في الانترنت
[COLOR=darkred]اسطيع الوصول الي ابعد الحدود باناس مثلك وامثال ناس موجودة كتير في المنتدي
وبالحب والتعاون والاخلاص --نقدر نعمل المستحيل

ما هو اهم مبدأ لك فى الحياة ؟ وهل فعلا تستطيع تطبيقة فى حياتك؟
ما بنياة علي البطال فهو باطل

بكل تاكيد
مع تحياتي

[UNKNOWN]

إلي إبن مصر الغالي:

1) لو أتيحت لك الفرصة للإستقرار في مصر، هل ستعود؟
ملحوظة: هناك كثيرين ممن سافروا للخارج لم يستطيعوا التكيف مع الناس في ذلك الوقت
2) من في رأيك شخصية عام 2002؟
3) أيهما أهم بصراحة من وجهه نظرك: المال أم النفوذ أم الشهرة :confused:؟

[ابن مصر]

ردي علي اخيUNKNOWN



1) لو أتيحت لك الفرصة للإستقرار في مصر، هل ستعود؟؟؟
بالتاكيدو1000في المية--اذا لي امنية في حياتي واحدة بس فهي ان
اعيش البقي من عمري في حبيبتي مصر الطيبة الغالية --


2) من في رأيك شخصية عام 2002؟
حقيقي مش شايف غير الشباب الفلسطيني والشعب الواحد --اللهم انصرهم يارب الجبناء يارب

3) أيهما أهم بصراحة من وجهه نظرك: المال أم النفوذ أم الشهرة ؟

[COLOR=red]أيهما أهم--النفوذبالتاكيد---انت شايف امريكا بتعمل اية فينا ؟[/COLOوتحياتي
ابن مصرR]

[heba]

بسم الله الرجمن الرحيم
كما انا دائما اتأخر ابن مصر العزيز
1-كيف تواجه التناقض بين مجتمعنا الشرقى و المجتمع الغربى فى تربية الأولاد؟
2-ماذا لو طلب منك ابنك ان شاء الله ان يتزوج من احنبيه؟
3-ماذا تمثل الصداقه لك؟
كفايه عليك كده و كفايه عليك اسئلة كول
تحياتى لك يا ابن مصر

[Proud_Muslimah]

بسم الله الرجمن الرحيم
معلش ابن مصر ممكن بس لفهم ليه مردتشي على كل اسئلتي?:confused::confused:
واشمعنا اوووففف وانتا بترد على اسئلتي مش عارف انا حشاشة!!!:3::3:
عموما اسفة اننا تعبناك:rolleyes::rolleyes:

[عبدالحكيم]

مرحبا اخي العزيز اب مصر الغالي
1 --هل تقوم بزياره الى مصر من مكان اقامتك
2--هل قمت بزيارة سوريه
3-- هل تقضي وقت طويل مع ألأنترنيت
عبدالحكيم

[ابن مصر]

اختي العزيزة Proud_Muslimah
حقيقي انا في غاية الاسف ومش عارف ازي دي حصلت مني
حقيقي قلت ذوق مني وانا بعدز وارجو ان تقبلي اعتذراي اختي في اللة
واللة مش عارف ازاي حصلت ---سمحني ولكي الحق


ردي علي اسئالة اخي Proud_Muslimah

..
1-ماذا سيكون تصرفك مع اخيك المراهق لو علمت انه يتعاطى المخدرات??كيف ستساعده...
سوف احاول ان اعرف مدي ادمانة والي اي درجة ومحالتي انا اذاا امكن بكل الطرق الممكنة او جهة مختصة
2-ماهو تعريف الخلود بالنسبة لكم??
الخلود للة 3-مارايك بالزواج والتعارف عن طريق الانترنت???
ما بناية علي البطال فهو باطل
تحياتي لك اختي العزيزة
ابن مصر

[ابن مصر]

ردي علي اسئال اختي هبة اللة[/COLOR


-كيف تواجه التناقض بين مجتمعنا الشرقى و المجتمع الغربى فى تربية الأولاد؟

[COLOR=blue]بصرحة الفرق كبيرجدا وفي غاية الخطورة --وشي متعب جداا للااهلي المسلمين 2-ماذا لو طلب منك ابنك ان شاء الله ان يتزوج من احنبيه؟
من رابع المستحيل --بالعربي كدة --علي رقبتي --هاهاها3-ماذا تمثل الصداقه لك؟
تقريبا كل شي--فهي عندي شي هام جدااا ولها في قلبي مكانا كبير وغالي
تحياتي لك اختي العزيزة
ابن مصر

[ابن مصر]

ردي علي اخي عبد الحكيم[/COLOR

..
1 --هل تقوم بزياره الى مصر من مكان اقامتك

[COLOR=red]انافقط قمت بزيارة واحد فقط لمصر بعد غياب دام 23 عاما و هي كانت عام 96--زيارة قادمة --اللة اعلم!!
2--هل قمت بزيارة سوريه
نعم لقد قمت بزيارة الي سورية الشقيق في عام71 وكانت الاذقية هي الاساس لان عمي لية يعيش هناك طول عمرة
وفي نفس الزيارة ذهبت الي لبنان بيورت
3-- هل تقضي وقت طويل مع ألأنترنيت
نعم طويل جداا--لان شغالي و طالبت دراسية لااولادي كتير من خلال الانترنت وطبعا المنتدي والاهل والاصدقاء -هاها -تخيل انت بقي !!

تحياتي
ابن مصر

[Proud_Muslimah]

السلام عليكم
اخي ابن مصر متؤلشي كده على نفسك عفوا ...
بتحصل ان الواحد يفوتوا حاجة,,بارك الله فيك

[Proud_Muslimah]

السلام عليكم:)
اختي الغالية بنت مصر خليني اول من يبدا الاسئلة وانتي فايئه
1-ماهي اصعب الدروس الي اتعلمتيها من الحياة...
2-لو كان شئ واحد ممكن يتغير في حياتك كنت حتغيري ايه

كفاية سؤالين لحسن اكون تعبتك:o

[ابن مصر]

:5:سؤالي الي بنت مصرهو

1---ماهو مثالك الاعلي في الدينا؟؟؟


2---ماهو اللي كان نفسك تحقيقي ولم توفيقي؟؟؟؟؟؟



مع تحياتي لك--ابن مصر

[خالد بن الوليد]

السلام عليكم جميعاً :)
أولاً انا بعتذر عن انشغالي الفترة اللى فاتت قوى و لسة لحد دلوقتى .. معلش قلتو منى ابن البلد و ابن مصر حبايبي ..
بس قدركك يا بسنت اني فضيت شوية على دورك :3:
الاسئلة :
1 - ازيك ؟ :D
2- رأيك في العلاقات الالكترونية ؟ بصفة عامة .. و الحب بصفة خاصة .. ؟
3 - أكمل : احب ....... جداً ، لأنه(ا) ...... .

شكراً لكم على تحملي :confused:
:)

ملحوظة .. أقترح يا اخوانى عمل موضوع جديد مثلاً تحت دائرة الضوء 2 .. علشان كدة هيبقى طويل قوى الموضوع ..:rolleyes:

[ابن البلد]

و الله يا أ/ خالد أنت ممكن تعرض الفكرة دي علي منتجين البرنامج والمخرجين الأستاذ محيى ابراهيم ومستر اوف هيل :)

أسألتي لبنت مصر

1- ما تعليقكك علي هذا المثل ( لا تؤمن للنخلة ولو ظلت ولا تؤمن للمراة ولو صلت ) ؟

2- طاعة الزوج من طاعة الرب لو زوجكك فرض عليكي عدم إستخدام النت ما هو رد فعلك ؟؟؟


3- توقعاتك أيه للمنتدي ؟؟؟

[عبدالحكيم]

مرحبا اختي الغاليه بنت مصر ارجو ان لا اكون ثقيل بأسئلتي
1---> مانوع المواضيع التي تلفت انتباهك
2--->ماهي المدينه المحببه لديك
وتقبلي تحياتي :عبدالحكيم

[master_of_hell]

بنت مصر

1_ اثبتى وجودك بجدارة داخل المنتدى وحفظتى على التوازن بينك وبين الاعضاء وبينهم وبين بعض كمان؟
لكن بتقدرى تعملى ده فى حياتك الخاصة

[روامي]

العزيزه بنت مصر

تحياتي وربنا يساعدك وتقدري تردي

سؤالي خفيف وصغير

ماذا تعني لك الكلمه الحره؟؟ وهل لها حدود؟؟

مذا يستهويك في المنتدى الكلمه الرومانسيه ........... القصه الهادفه

ام السياسه اللي ما بتجيبش ولا بتودي؟؟



واستحملينا معلش


تحياتي


روامــــــــــــــــــــي

[محيي ابراهيم]

بسنت اخت الجميع وصاحبة الاخلاص لكل اسرتها داخل المنتدى
واضح كده ان الاعضاء الكرام مستحلفينلك والاسئلة ورا بعضة عشان كدة انا هأجل اسئلتي الى ان تجاوبي على ماطرحة الاعضاء سابقا.
اما بخصوص اقتراح الاخ الفاضل خالد بن الوليد فأطمئنه باننا جميعا ابن البلد وابن مصر ومشرفي القاعة في اتجاهنا لاختيار شخص من الثقات ومن اعضاء المنتدى المؤسسسين ليدير امر هذه المشاركة بشكل صحفي ومنظم وبمجرد استقرار المشرف العام ونائب المشرف العام على العضو الذي سيدير المشاركة سنرسل له باقتراحكم ليرى امكانية عمله وتفعيله وشكرا لك على اهتمامك
اما بنت مصر فربنا معاكي في الرد على الاسئلة دي كلها
محيي

[بنت مصر]

يا نهار مش فايت :eek:

امتا حصل دا كله الرحمة يا اخوانا ربنا ما يرميكوش في زنقة:(




بسم الله وبه استعين

ارد الاول على سؤال حبيبتي براود مصرية واللي يشرفني اني استفتح اجاباتي باسئلتها :

1- ماهي اصعب الدروس الي اتعلمتيها من الحياة...
هو مش اصعب ولكن خليني اسميه درس تعلمته من الحياة وهو ان مش كل اللي يظهر لي الحب اكيد بيكون صديق واني لازم اتأني في اختيار الاصدقاء

2- لو كان شئ واحد ممكن يتغير في حياتك كنت حتغيري ايه
التسرع

[بنت مصر]

اجاباتي على اخي وشقيقي الروحي ابن مصر


1---ماهو مثالك الاعلي في الدينا؟؟؟
أبي حفظه الله فهو مثال الاب الديمقراطي (الا في جلوسي على النت) :D


2---ماهو اللي كان نفسك تحقيقيه ولم توفقي؟؟؟؟؟؟ الشيء اللي نفسي احققه وما وفقتش بعد هو اني ازور بيت الله الحرام
اسأل الله ان يكتب لي زيارة بيته قبل ما يعدي عام 2003

[بنت مصر]

1- ما تعليقكك علي هذا المثل ( لا تؤمن للنخلة ولو ظلت ولا تؤمن للمراة ولو صلت ) ؟
يا مآمنة للرجال يا مآمنة للمية في الغربال


2- طاعة الزوج من طاعة الرب لو زوجكك فرض عليكي عدم إستخدام النت ما هو رد فعلك ؟؟؟
انت بصراحة يا احمد نبهتني لشيء مهم جدااا وهو اني اكتب شرط السماح بدخول الانترنت مع القايمة في عقد الزواج عشان ما نزعلوش من بعض في المستقبل واللي يخل بالاتفاق يلم شنطه هدومه وعلى بيت اهله :D


3- توقعاتك أيه للمنتدي ؟؟؟
ممكن اسميها امنيات ولكنها في الوقت نفسه اهداف اضعها نصب عيني لتصبح حقيقة ،، فأنا اتمنى ان يصبح منتدانا نموذجا مميزا بين المنتديات العربية ،،، اتمنى ايضا ان تصبح صفحة منتدانا هي (الهوم بيج) لكل عربي يجد فيها الفائدة أدبيا وعلميا وخلقيا ،، واتوقع ان يحدث هذا قريبا بتواصلنا الرائع كمصريين وعرب من كل الاقطار .. ذلك التواصل المغلف بمشاعر الحب بين الاعضاء والذي لم اشهده في اي موقع عربي اخر على الانترنت..

[بنت مصر]

اسئلتك حلوة اخي عبد الحكيم الغالي والاجمل هو وجودك بيينا


1- مانوع المواضيع التي تلفت انتباهك
المواضيع اللي بتلفت نظري وبحبها جدا كتيرة ولكن اهمها
- المواضيع الادبية اللي من ابداع اصاحبها ومش منقوله
- بستمتع جدا لما بلاقي كاتب الموضوع متمكن من اللغة العربية
لغوية واملائيا بحس فعلا ان لغتنا الجميلة لغة القرآن لسة بخير

2- ماهي المدينه المحببه لديك
انا عاشقة للاسكندرية بلدي الحبيب حتى النخاع

[بنت مصر]

ماستر اوف هيل اشكرك جدا على تنتبيهي بانكم ملمومين عليا وعاملين رباطية
ولا كأنها رباطية حوالين حرامي جزم في جامع ... يا مفتريين :D


1_ اثبتى وجودك بجدارة داخل المنتدى وحفظتى على التوازن بينك وبين الاعضاء وبينهم وبين بعض كمان .. لكن بتقدرى تعملى ده فى حياتك الخاصة؟
والله يا ماستر انا مقتنعة ان الحب باخلاص لأي شيء كفيل بتحقيق اجمل العلاقات .. الحمد لله وبفضل الله علاقاتي خارج الانترنت ممتازة ولكن مقدرش انكر انها اتأثرت حبة بسبب ادماني للانترنت اللي ترتب عليه تقصيري في واجبات كتيرة ولكن لان فيه حب مع اصدقائي واقاربي اللي برا النت فهم بيلمسوا لي العذر وما بيزعلوش مني ..

[اسامة يس]

الاخت الغالية بنت مصر ........
:7:
سؤال على طريقة البرامج التليفزيونية ..... اذا كنتي ماشية في الشارع وفجأة واحد طلع واعد يحلف انك مراته ولم عليكي الناس ؟؟؟؟؟؟ :confused:
تعملي ايه ...............

[بنت مصر]

واخيرا وصلنا الي سؤال الحبوبة المبدعة روامي الغالية

ماذا تعني لك الكلمه الحره؟؟ وهل لها حدود؟؟
ماذا يستهويك في المنتدى الكلمه الرومانسيه ..القصه الهادفه ام السياسه اللي ما بتجيبش ولا بتودي؟؟

الكلمة الحرة هي اننا نترك العنان لاقلامنا لتخط ما بداخلنا ولكن بدون تجربح للاخرين ،، أما ما يستهويني من موضوعات فكل المواضيع بلا استثناء رومانسسية أو قصة هادفة او حتى سياسية لا بتجيب ولا بتودي ... بشرط ان تكون صادقة ومقنعة ..



ألف شكر للجميع وفي انتظار اسئلتك اخي محيي وربنا يستر:o


بسنت

[داود]

السلام عليكم ورحمة الله وبركاته.
...تحياتى للجميع..أختى الكريمة بنت مصر..أجيبى
...
...ماهو أول موقع على الأنترنات فتحته وهل مازلت تزورينه.؟

.....كما تعلمين يتكون النسيج العالمى حاليا من أكثر من8مليار صفحة ومنها 2.5فى مئة
مواقع إباحية..كيف ستحمين أبنائك فى المستقبل؟؟؟؟


...أنا ممن يحب إسرائيل وأظن أن معظم رواد المنتدى مثلى هل أنت كذلك؟
........



...باى

[heba]

بسم الله الرحمن الرحيم

اختى و حبيتى الست بسنت الغاليه انا محتاره اسألك ايه
1-لو اختلف اثنان فى قاعتك ماذا تفعلين ؟:confused:
2-هل تؤمنين بمبدأ المساواه بين المرأه و الرجل؟
3- موقف محرج تعرضتى له ؟
كفايه عليكى كده يا بنت مصر
و على فكره يا ابن البلد انا لم يصلنى رسالة اعلام بابن مصر و بسنت انا شوفتهم بالصدفه و الله0

[بنت مصر]

اخي الفاضل داود ،، وبمشاكرتك ووجودك معانا ولو اني عاتبة عليك قلة مشاركاتك معانا ،، انت بالظبط عامل زي الفاكهة النادرة اللي قليل ما بتزور بيوتنا ،، انا سعيدة جدا بأسئلتك واتمنى دايما اشوف مشاركاتك الرائعة معنا



1- ماهو أول موقع على الأنترنات فتحته وهل مازلت تزورينه.؟
انا معرفتي للمواقع على الانترنت كان عجيب جدا فكل اللي كنت اعرفه هو الايميل والياهو والسي ان ان وبعض المواقع الاجنبية وعمري ما خطر على بالي ان في مواقع معربة وان اللغة العربية ليها تواجد على النت الي ان تعرفت من خلال البحث على موقع الساحة العربيه وهو موقع جيد جداااااومازلت اقرأ فيه يوميا لان فيه اقلام بحق مبدعة ولو ان عيبها التعصب الشديد وخاصة في ساحة السياسة والدين


كما تعلمين يتكون النسيج العالمى حاليا من أكثر من8مليار صفحة ومنها 2.5فى مئة مواقع إباحية..كيف ستحمين أبنائك فى المستقبل؟؟؟؟
انا مش رافضة اني اخلي ابنائي يتعلموا كمبيوتر ولكن بعترض تماما انه جهاز الكمبيوتر بتاعهم يبقى فيه موديم او اي شكل من اشكال الاتصال بالانترنت قبل انتهاء مرحلة الثانوي ،، لان الاستقرار النفسي بيكون بعد مرحلة الثانوي بالاضافه لان الرقابة من قبل الوالدين بترفع نوعا ما وبيكون الشاب والفتاة مدريكين تماما للخير والشر ..


أنا ممن يحب إسرائيل وأظن أن معظم رواد المنتدى مثلى هل أنت كذلك؟
انا بكره اسرائيل واقولها لو اتسأل ان شاله اموت قتيل او اخش المعتقل :3:


الهي وانت جاهي تجي لكم مصيبة تحل على نافخوكم يا يهود فلاتذر منكم احدا

[بنت مصر]

اهلا هبهوبة حبيبة قلبي وتوأم روحي الغالية
وعلى فكرة يا هبهوبة انا كمان ما جاليش اعلام بريدي باني تحت دائرة الضوء
لولا ان ماستر اوف هيل يستره ويقعدهوله في عياله بعت لي على الرسائل الخاصة يصحصحني :D




1-لو اختلف اثنان فى قاعتك ماذا تفعلين ؟
حشوف مين الغلطان واحاول اتفاهم معاه بهدوء ،، وأحاول ادخل والطف الجو يا هبة ،، انا عارفة انك بتسألي السؤال دا لان اكيد عندك مشكلة في قاعتك،، ما انا عارف السياسة واللي نايبنا من وراها كلها شد شعور ،، تعالي لما نقر على اشجان في قاعة الشعر ،، كلها حب وغرام وأخر روقان بالصلا عالنبي :D


2-هل تؤمنين بمبدأ المساواه بين المرأه و الرجل؟
لا طبعا ما أؤمنش ابدا لاني لو أمنت بهذا المبدأ يبقى مين اللي حيروح يشتري لي الجبنة الرحماني ومين اللي حسيب شغله عشان يغير لي الانبوبة لما تفضي :D
ربنا تبارك وتعالى قال (ليس الذكر كالانثي) وقال ايضا (للذكر مثل حظ الانثيين) ومادام دا كلام الهي فهل انا حاعترض واتحدى الله؟؟ (أعوذ بالله أن أكون من الجاهلين)

3- موقف محرج تعرضتى له ؟
كنت مرة مع بنت خالتي في زهران مول وكانت معاها بنتها وانا ماسكة ايدها المهم اشترينا طلباتنا وسيبتها تحاسب اخدت بنتها في ايدي وخرجت برا المحل ففوجئت بواحدة بتبص لي وبتضحك وبتقول لي انتي واخدة البنت على فين .. بصيت على البنت لقيتها اتغيرت ومش هي اتاري البنت في ايد ما متها وانا لاطشة بنت ناس تانيين :rolleyes::3:


و ............. دمتم

[Proud_Muslimah]

okhty bent masr:)barak alah feky we rabena yedelek elsa7a wel 2ewa we terody 3al kol:D
bas afteker enek nesety elrad 3ala as2elet el akh khalid:) walaho a3lam
fa motashaweqa asma3 elrad 3ala as2elto:)

[محيي ابراهيم]

بسنت بنت مصر
هناك بعض الاسئلة في صفحة 3 يبدو انه لم يتسنى لك رؤيتها برجاء مراجعتها والاجابة عليها وبرجاء تفريغ صندوق الرسائل الخاصة بك حتى نتمكن من اشعارك بدل الفضايح دي:D
اما اسئلتي فهي
1- ماذا سيكون شعورك لو قمتي من النوم الصبح لاقيتي الوطن العربي بقي دوله واحدة اسمها " الولايات العربية المتحدة"؟
2- ماشية في الشارع لاقيتي طفل يهودي عمرة 3 سنين واقع في بلاعة وهيغرق ويموت هتنقذيه والا تسبيه يموت ؟
انت مع الحاكم العربي الفاسد وقت الزنقة والحرب ام تفضلى التخلص منه اولا ثم تتفرغي للزنقة والحرب بعدين؟
محيي

[وادكول مش معقول]

اهلا وسهلا ... اهلا وسهلا ...

تعالي ........... كرسي الاعتراف جاهز ......................

جاوبي ............. سهلة الاسئلة مش كده ...؟ ههههههههه

لا خلاص جاوبي :

1 - جملتان امامك ...... بايهما تؤمنين ؟ وبأيهما تعملين ؟
الجملة الاولي ...... الباب اللي يجيلك منه الريح سده واستريح
الجملة الثانية ...... الساكت عن الحق شيطان اخرس ..............

2 - ماذا تفعلين لو كنتي ...........؟
اولا : رئيسة وزراء انجلترا
ثانيا : عضوة في مجلس الشعب
ثالثا : عضوة في الهلال الاحمر
رابعا : مطربة من بتاعت اليومين دول
خامسا: المشرفة العامة علي المنتدي


الرجاء الاجابة علي السؤال التاني بصراحة دون تهريج ولو هرجتي ... تكتبي بعدها الصراحة وانا بقه ابقي اختار هههههههههههه )

[بنت مصر]

خالد بن الوليد اخي الغالي انا مش عارفة اودي وشي منك فين

بس والله ما شفت الاسئلة اصل انا وقت الامتحانات متعودة انسى نص الاسئلة
زي ما تقول كده بتجي لي حالة عمى ما بشوفش ايه اللي قدامي



1 - ازيك ؟
الله يسلمك ويخليك يارب ... وكل من عندنا يهديكم السلام :)

2- رأيك في العلاقات الالكترونية ؟ بصفة عامة .. و الحب بصفة خاصة .. ؟
ممكن العلاقات الالكترونية تكون في اروع صورها لو التعارف تم بالطريقة الصحيحة مثل علاقتنا ببعضنا من خلال المنتدى فأنا والله العظيم أحب كل من في المنتدى فردا فردا ،،، العلاقات اللي عن طريق الشات أرفضها تماما بل اساسا الشات هو مشروع تعارف فاشل جدا وكله تفاهات وحوارات يندي لها الجبين .. الحب عاطفة جميلة لكن مش عن طريق الشات ايضا .. ولا أحبذ انها تكون عن طريق الانترنت لان القلب والعين لازم يجتمعوا.



3 - أكمل : احب ...... جداً ، لأنه(ا) ...... .
احب خطيبي جداً ، لأنه(ا) زوج المستقبل



------------------------

أقترح يا خالد بعمل موضوع جديد لكل عضو انا اؤيده جدااااااااااااااا

[بنت مصر]

اهلا اخي الغالي محيي ،، انا اسفة جدا على صندوق البريد دا وانا فضيته أهو وقاعدة مستنية الشغل :3:

1- ماذا سيكون شعورك لو قمتي من النوم الصبح لاقيتي الوطن العربي بقي دوله واحدة اسمها " الولايات العربية المتحدة"؟
حكون في منتهى السعادة لاني متشاءمة جدا من كلمة الوحدة العربية لان من ساعة ما أخدت اسم (الوحدة) دا وكل دولة عربية عايشة في وحدة عن الدولة التانية ،، لو احنا حنبقى الولايات المتحدة العربية يحكمنا حاكم قوي شديد البأس ليس له مصالح ولا أغراض شخصية يطبق الشريعة الاسلامية ويحكم بالعدل بينا يبقى مرحبا بالمسمى الجديد...



2- ماشية في الشارع لاقيتي طفل يهودي عمرة 3 سنين واقع في بلاعة وهيغرق ويموت هتنقذيه والا تسبيه يموت ؟
حنقذه أكيد لان دا طفل بريء وكمان احنا ديننا بيقول لنا (عامل الناس بما تحب أن يعاملوك به) وكمان ممكن الطفل دا يكبر ويقول لا اله الا الله

3- هل انت مع الحاكم العربي الفاسد وقت الزنقة والحرب .. ام تفضلى التخلص منه اولا ثم تتفرغي للزنقة والحرب بعدين؟
أعتقد ان الفساد بيكون اكبر اسباب تأخير النصر .. لازم نصلح ذات البين أولا ثم نتفرغ للاعداء،، وكل الامبراطوريات والدول التي درسناها في التاريخ كان سبب انهيارها هو فساد حكامها .. ومستحيل يتحقق النصر بحاكم فاسد ابدااااااااااا

[بنت مصر]

واد كول أخي الغالي

قبل ما أقعد على الكرسي لازم تأكد لي انه كرسي الاعتراف مش الكرسي الكهربائي والا مش لاعبه :D


1 - جملتان امامك ...... بايهما تؤمنين ؟ وبأيهما تعملين ؟
الجملة الاولي ...... الباب اللي يجيلك منه الريح سده واستريح
الجملة الثانية ...... الساكت عن الحق شيطان اخرس ..............
والله أحيانا المبدأين بينفعوا بس طبعا وبلا تردد حختار التاني لان الرسول الكريم أمرنا بذلك حين قال (من رأى منكرا فليغيره بيده أو بلسانه أو بقلبه وهذا اضعف الايمان) يعني ما ينفعش نشوف خطأ ونسكت عنه والا حنكون مشاركين في هذا الخطأ.. اما المبدأ الاول فبرضه حستعمله بس مش في حالات الخطأ وانما للدفع بالتي هي أحسن ..


2 - ماذا تفعلين لو كنتي ...........؟
اشوف فيك يوم يا واد كول

اولا : رئيسة وزراء انجلترا
ححرق فورا كل معاهدات وعد بلفور اللي سمح باستيطان اليهود في فلسطين وانشاءوطن قومى لهم

ثانيا : عضوة في مجلس الشعب
حطالب بتوزيع حبوب منبهه على كل اعضاء المجلس عشان ما يناموش في الاجتماعت

حطالب بتغيير نظام التعليم الغبي

حعمل طلب حضور لوزيري الصحة والاعلام وأسأل وزير الصحة ازاي حيعالج كارثة تهريب الـ 90 طن من اللحوم الفاسدة داخل البلاد وايه مصير الشعب الغلبان من أكل هذه اللحوم وأسأل وزير الاعلام ليه مفيش توعيه اعلامية للتنبه على المصريين الغلابة بمقاطعة كل منتجات المصنعة والمستوردة حتى يتم المسح الشامل على كل جهات التصنيع والبيع!

ثالثا : عضوة في الهلال الاحمر
ححاول اطالب بالخدمة الصحية المجانية وبفتح باب التبرعات والزكاة بصورة اكبر من أجل توفير الادوية اللازمة للفقراء ،، لان بالفعل هناك كثيرون لايجدون ثمن الدواء ويموتون مرضا

رابعا : مطربة من بتاعت اليومين دول
حستمر مطربة لان للاسف انا وكل اللي زيي لو سيبنا الكار دا مش حننفع في شيء تاني الا اننا نبيع فجل :D

خامسا: المشرفة العامة علي المنتدي
مش حعمل اكتر من اللي بيعمله كل من الاخين الغاليين ابن البلد وابن مصر ،، لان بصراحة المنتدى بيسير بخطاً ثابته ومطمئنة جدا بما يحويه من اقلام رائعة افخر بوجودي بينها


و.................... دمتم

[Proud_Muslimah]

اختي الغالية الحببيبة
حتموتني من الضحك بتجيبي الكلام ده منين بس....:)
والله كلامك 100% وفي الانتخابات الجاية حنتخبك,,والله من غير مجاملة كلامك اكثر من رائع الله يزيدك من نعمته ويكتر من امثالك شبان وشابات بهذه الافكار اااامين....:rolleyes:

[بنت مصر]

حبيبتي براود مسلمة
ربنا ما يحرمنيش منك يارب ولا من دعائك الطيب لي
ويديم علينا الحب والاخوة والرباط الجميل اللي بينا في المنتدى



وأخيرا اشكر كل من شرفني بالسؤال وللجميع كل التقدير والاحترام


خلوني اروح اشوف مين اللي متدبس تحت الضوء :3:

بسنت

[tannjour]

الطيوبة بنت مصر :
اسمحي لي بأن أعتذر لك عن وصولي متأخراً لعدم علمي بالمقابلة ربما لأن
لم أكن في النت أثناء أجراء المقابلة

أما ألآن فهل تسمحين لي بأن أسأل :

السؤال الأول :
الهوية الشخصة يعني أسمك الحقيقي ومش عاوز عمرك كم بس عاوز كمان درساتك يعني بتدرسي أيه


السؤال الثاني :
من خلال متابعتي الخجولة لبعض كتاباتك وجدت فيك روح الإنسانية وحبك للأطفال فماذا تعني الطفولة لك بالضبط وماذا يعني لك هذا القول المآثور :
أرى العالم بعيون طفل وأفكر به بعقل عالم وأحيا به .........؟؟؟؟ لقد نسيت آخر القول المآثور


السؤال الثالث:
ماذا يعني لك الربيع
فرح وزهور وورود أم
دموع كقطر الندى أم
شروق للشمس والضياء يتبعه تفتح الزهور والورد





في الختام أتمنى لك كل الخير والصحة والعافية وأن شاء بيكون عرسك من خطيبك عن قريب ...... ابقي اعزمينا عالشان ناكل الحلوان


التوقيع :
رمضان

[بنت مصر]

انا دلوقتي داخلة عشان اعمل شيئن متضادين تماما
الاول خناقة والتاني اعتذار


الخناقة طبعا معاك يا طنجور على جايبانك ليا على ملا وشي
من اول صفحة في قاعة المقال الصحفي بعد ما صدقت اخدت ديلي
في سناني وهربت من الاسئلة ولكن على العموم ياطنجور
انا اهوه وانت اهوه والزمان اهو بينا اهو ..ان ماخليتك تلالي وتشتكيني لدا وداهوه :D



أما عن الاعتذار فحقوله بس بعد ما أرد على اسئلتك

الأول :
الهوية الشخصة يعني أسمك الحقيقي ومش عاوز عمرك كم بس عاوز كمان درساتك يعني بتدرسي أيه

الاسم: بسنت جاد الحق البوجدي سليط :D
اسمي الحقيقي بسنت (انا عارفة انه مش مالي عينك ولا بيعجب حد عربي لانه اسم غريب على غير المصريين الا ان البسنت هو نوع من انواع الزهور


السن: خمسة وعشرون عاما في وش العدو :D

الدراسة: متخرجة من كلية الاداب قسم انجليزي جامعة الاسكندرية وبشتغل حاليا وبسترزق والآشية معدن :D



من خلال متابعتي الخجولة لبعض كتاباتك وجدت فيك روح الإنسانية وحبك للأطفال فماذا تعني الطفولة لك بالضبط وماذا يعني لك هذا القول المآثور :
أرى العالم بعيون طفل وأفكر به بعقل عالم وأحيا به .........؟؟؟؟ لقد نسيت آخر القول المآثور


انا بحب الاطفال جدااااااااا بس بموت في البنات اكتر بحس فيهم بالرقة من وهم صغيرين ومش حكدب عليك لو قلت لك اني اوقات بتعجبني اكسسوارت للشعر
خاصة بالاطفال وممكن اشتريها واشيلها لبنتي القادمة ،،

اما صاحب المقولة اللي بيشوف العالم بعيون طفل فدا طبعا محظوظ جدا
لانه دايما بريء في نظرته للدنيا ومش شايل للدنيا هموم

ولكنه وقت الجد وعندما تحتاج الامور للتفكير بيكون صاحب قرار صائب

انا عن نفسي اتمنى ارى وأفكر زي الاطفال



السؤال الثالث:
ماذا يعني لك الربيع
فرح وزهور وورود أم
دموع كقطر الندى أم
شروق للشمس والضياء يتبعه تفتح الزهور والورد


الربيع بالنسبة شروق الشمس والضياء يتبعه تفتح الزهور والورود
وكمان انا بيحصل لي اكتئاب جدا مع نهاية الصيف ودخول الخريف
عشان كده ما بصدق اخرج من سجن الشتا الي انطلاق الربيع



والف شكر يا طنجور على استضافتك لي واسئلتك الخفيفة اخي الغالي


بسنت

[بنت مصر]

أما اعتذاري فهو لاخي الغالي اسامة يس
لاني دلوقتي وانا براجع الاسئلة فوجئت بسؤاله

أنا اسفة يا اسامة والله لسة شايفة دلوقتي


سؤال على طريقة البرامج التليفزيونية ..... اذا كنتي ماشية في الشارع وفجأة واحد طلع واعد يحلف انك مراته ولم عليكي الناس ؟؟؟؟؟؟
تعملي ايه ...............


سؤالك زي العسل يا اسامة بصراحة وموتني من الضحك عليه

تعرف لو قابلته الاول اتأكد انه بيتكلم بجد ومش بيهزر وبعدين
اتأكد انه عنده شقة من غرفتين وعفشة مية وبعدين اخده جري
عالمأذون قبل ما يرجع في كلامه هو في اليومين دول عريس بشقة ياحسرة :D




ألف شكر للجميع ويلا ركزوا مع شريف بقا وسيبوني في حالي

عشان اخد نفس عميق من الهواء النقي :o



بسنت

[tannjour]

شكراً بنت مصر على الرد الجميل على اسئلتي والحمد المقلب اللي عملتوا
معك مشي حالوا


أنا من يومين فكرت أنو أعمل معك مقلب بعد ماأمسعت انك من تعدين إجراء المقابلات في قاعة المقال الصحفي فقررت أنو أطلب من الإستاذ محي الدين
يعمل معك مقابلة

وأنا في قرارة نفسي عم أقول :
أنو المقابلة بدا تكون أحلى مقلب بعملوا مع بنت مصر بمناسبة عيد الأضحى
[ بالمناسبة الإستاذ محي لايعلم أي شيئ عن المقلب ]
وإذا بي أفاجئ بأن الأستاذ محي يقول بأن المقابلة جرت معك بالفعل وأعطاني الرابط للمقابلة

فكتبت أسئلتي وانتظرت نصف ساعة وكنت انت متواجدة في المنتدى لكنك لم تنتبهي لأخر رد في الموضوع الذي يظهر في أعلى الصفحة في شريط المتحرك
فوق

فقررت أن أكتب رسالة خاصة لك أقول لك فيها أنني سألتك في المقابلة فجاوبي على أسئلتي فرحت إلى مكان الموضوع وظننت أن أسئلتي كانت من وقت إجراء المقابلة ولم تنبهي لها فبدأتي بقراءة الموضوع من أول صحفة لأخر صفحة كما ذكرت لي وكان مقلباً مني لكنه مقلباً دون قصد يعني باللهجة السورية مقلب عفوي ربما غضبت منه لكن هذا المقلب جعلك تراجعي أسئلة باقي
الأعضاء ونتتبهي إلى سؤال الأخ أسامة ياسين وفي الإعادة إفادة
يعني في المختصر المفيد :
تعيش ورمضان يعمل معاك مقالب كمان وكمان


استاذ محي لاتعصب انا هرولت لأسأل أبن البلد :
استاذ احمد صلاح :

السؤال الأول :

الهوية الشخصية


السؤال الثاني :
ماالصلة بين مهنة المحاسبة وتصميم صحفات الإنترنيت [ حسب علمي بأنك من يصمم موقع لؤلؤة المشرق العربي ]



السؤال الثالث والأخير :
طموحاتك في الحياة وأمنتاتك التي لم تتحقق بعد


وشكراً لأجابتك سلفاً






يالله باي


التوقيع :
رمضان

[maistro]

الأخ العزيز / ابن البلد
تحية طيبة
كانت مشاركتى هنا لك ستختلف لولا ردك الغريب العجيب الذى سطرته فى موضوعى ( ببساطة هذا ما يحدث فى الكويت ) وللأسف ما أحزننى أكتر هو أن الرد جاء بعد أن تم اغلاق الموضوع !!!
ولا أعرف ما الذى دفعك الى هذا الرد الذى أسشتغرب منه ؟!!!
-------
هل لكى تجنى على شخصى من أجل عيون الكوايتة فى المنتدى ؟!!!
أم أن الكوايتة فى المنتدى لهم ثقل لا أعلمها وبالتالى فضلتهم على ؟!!
حقيقة لن أنسى هذا الرد أبدا فلقد تناسيت ما كتبته للأخت / بنت مصر من أنه تم اغلاقه قبل أن أرد على بعض الردود وقبل أن يعلمنى أحد باغلاقه ، وتمت تسوية الموضوع بينى وبين العزيزة بنت مصر .
لا أعلم لماذا يسمح للقائمين على المنتدى باضافة أرائهم رغم اغلاق الموضوع !!
اذا كان هناك تمييز للمشرفين فيجب ألا يكون بهذه الطريقة !!
واذا كان ردك لم أستطيع أن أعقب عليه لأنه تم اغلاقه بعد ردك حيث فتح خصيصا لرأيك واضافة ردك الا أننى انتهزت هذه المساحة لأقول لك وأوجه لك ما أريد الاستفسار عنه !!!
علما باننى حزين للغاية من ردك المستفز لى ولشخصى !!
المايستـرو
:mad:
:mad:
:mad: