إحك لي عن أصلك وفصلك.. (زيارة إلى الماضي)

[Abdou Basha]

في حياة كل أسرة وعائلة.. قصة، تَروي عن جذورها.. عن أصولها.

قد تتعدد أصول العائلة إلى بقاع مختلفة داخل الوطن أو خارجه..قد تمتد جذورنا إلى أقليم خارج مدينتنا، بل إلى بلد مجاور.. أو بعيد عن وطننا.. قد تــُروي الحكايات عن جد فر أو اضطر للمجيء من بلده ليكـوِّن نواة العائلة، وقد تكون الأمور أبسط من هذا.. إما لإستقرار العائلة وبساطة تكوينها، أو لعدم توافر معلومات لدينا عن هذا الأمر.

لما لا تحك عن أصلك.. عن جذورك.. عن مبدأ تكون أسرتك.

سأبدأ بنفسي..

أنا مصري قاهري 100% .. أبواي وأجدادي من مواليد القاهرة.

- من ناحية الأب.. أبي من مواليد شبرا.. ولد في نفس المنزل الذي ولدت أنا فيه بعده بــ 33 سنة ...
على حد علمي.. فجدي من مواليد حي الجمالية، ولد في أول عام من القرن الماضي.. توفي قبل أن أراه.
أما جدتي فتصغره بعشر سنين من حي باب الشعرية المجاور للجمالية.. توفت قبل أن أراها أيضا.

تـَـروي الحكايات العائلية أنهما تنقلا كثيرا بين أحياء القاهرة حتى أستقرا بشبرا.. وتروي نفس الحكايات عن جذور جنوبية لجدي .. وثأر قديم أجبر جدته على الفرار بولدها إلى أخوانها بالقاهرة.. تحكي الحكايات عن جذور تركية لجدتي التي كان لعائلتها العديد من الأوقاف الخيرية.. وهي حكايات ليس لدي ما يؤكدها.

من ناحية الأم.. فأمي من مواليد نفس الحي الذي ولد فيه أبويها .. شبرا أيضا.

جدي لوالدتي - على حد قول العائلة- ينتمي لأشراف الجعافرة الذي ينتهي نسبهم إلى جعفر الصادق من أحفاد الحسين رضي الله عنه.. ووالده كان أحد الزعامات الشعبية التي ناضلت ضد الاحتلال الإنجليزي.. ولا زال لدي من القصاصات الصحفية ما يؤكد هذا الأمر.

جدتي لأمي قاهرية من شبرا أيضا و كانت جارة لجدي.. لها جذور من ريف مصر الشمالي لا أعلمها تحديدا.

تلك بعض كلمات عن أصلي وفصلي.. ليست شيقة بما فيه الكفاية، لكني أتمنى أن أجد لديكم ما هو أفضل .

[أنفـــــال]

انا هاعدي عشان احكي.. :)
استناني.. راجعة..
أنفال

[عصفور الشعر]

في حياة كل أسرة وعائلة.. قصة، تروي عن جذورها.. أصولها.


قد تتعدد أصول العائلة إلى بقاع مختلفة داخل الوطن أو خارجه..قد تمتد جذورنا إلى أقليم خارج مدينتنا، بل إلى بلد مجاور لوطننا.. قد تروي الحكايات العائلية عن جد فر من بلده لظروف معينة، وقد تكون الأمور أبسط من هذا.. إما لإستقرار العائلة وبساطة تكوينها، أو لعدم توافر معلومات عن هذا الأمر.

لما لا تحك عن أصلك.. عن جذورك.. عن مبدأ تكون أسرتك.

ل .

drawFrame()


يسعدنى أن أكون أول المشاركين على موضوعك الشيق والغير مسبوق يا عبد الرحمن


بالنسبه لأصولى بالنسبه لأبى فهى نوبيه....فجدى لأبى رحمه الله كان من عائله كبيره بالأقصر تسمى ((البصيليه)) ولنا هناك ألاف الافدنه المزروعه..وقد عمل جدى بالتجاره.. واختار بورسعيد التى كانت وقتها مدينه وليده بعد حفر قناة السويس..كمقر لتجارته...وفى بورسعيد تزوج جدى عدة مرات.. وكان لكل زوجه وأولادها عمارتها الخاصه بها..وجدتى كانت أخر زوجاته وهى تنحدر من اصول تركيه من عائله تسمى ((مشكاك))...وفى بورسعيد 1915 ولد أبى رحمة الله عليه..وعمل أيضا بمجال التجاره حتى وافته المنيه..لهذا فمن يرانى يلاحظ جيدا وجهى ذو الملامح الفرعونيه الاصيله...


أما بالنسبه لامى ..فهى ذات أصول مغربيه...فقد كان أحد جدودها رحمه الله من المغرب ..وحدث أن قام هو وزوجته بالحج... وكان وقتها عن طريق السويس... وعند عودتهم من الحج ..أحبوا مدينة السويس..وقرروا ان يعيشوا بها..ومن السويس هاجر الاولاد الى بعض البلدان المصريه...وأختار جدى بورسعيد... وهناك تزوج من جدتى وهى مصريه..وبعد ذلك جاءت أمى ...ولعبكم تلاحظون أن عائلات ((المغربى )) تنتشر فى محافظات مصر


يعنى أنا فيا عرق نوبى...مع عرق مغربى....وفعلا انا كتير هنا فى انجلترا بيفتكرونى مغربى سبحان الله ..يمكن عشان تركيبة جسدى النحيله..وكذلك وجهى


شكرا يا عبده باشا ياللى فعلا بتثبت انك باشا*3*

[R17E]

عبد الرحمن :

لك الشكر أن أتحت لنا واحة نستريح فيها قليلاً من عناء التفاهات المحيطة , و بالمناسبة فمثل هذا الموضوع عائق أمام السطحيين قلباً و قالباً .

سوف أعود

ريثما أجمع دفاتر و شتات العائلة

و بالمناسبة أيضاً ما حكاية الاتراك معاكم

؟؟؟

[Abdou Basha]

انا هاعدي عشان احكي.. :)
استناني.. راجعة..
أنفال

من فضلك لا تتأخري .. ولا تتعجلي. :)

يعني من الآخر (تريثيييي و لا تتسرعي :d = على رأي عادل إمام)

في انتظار كلماتك المتميزة.. *3*

[Abdou Basha]

محمود.. عصفور الشعر..

اقتربت منك أكثر بهذه المشاركة الجميلة.. لقد حققت لي ما أتمناه من خلال مشاركتك، فليست كل العائلات بسيطة التكوين، خصوصا أبناء المدن أمثالنا.. بل حتى أبناء الريف.. أسمع منهم حكايات شبيهة عن جذورهم العائلية.

في النهاية لقد استطاعت مصر أن تجعل كل أبناءها ومن وفد عليها منذ أيام حكم الفراعنة حتى اليوم ..(مصريين).

ولا يوجد من يستطيع أن يحتكر مصر لحسابه ..

شكرا يا محمود (عصفور الشعر)..

[Abdou Basha]

عبد الرحمن :

لك الشكر أن أتحت لنا واحة نستريح فيها قليلاً من عناء التفاهات المحيطة , و بالمناسبة فمثل هذا الموضوع عائق أمام السطحيين قلباً و قالباً .

سوف أعود

ريثما أجمع دفاتر و شتات العائلة

و بالمناسبة أيضاً ما حكاية الاتراك معاكم

؟؟؟

عزيزي محمد..

أرجوك .. لقد وعدتني في موضوع سابق بعودة، وأخلفتني ما وعدتني *12* .. سأنتظرك هذه المرة ومعك مشاركة خاصة بأسلوبك المتميز. *6*

والموضوع مفتوح لجميع الأعضاء .. وأتمنى ألا يكون صعبا لأحد من الأعضاء.. :)

فقط (احك عن أصلك وفصلك .. :) )

[أنفـــــال]

وعدت بالعودة .. و هأنذا أعود ..
نبتدي منين الحكاية؟؟؟ *14*
تبدأ من جدي لوالدي..
قال لي جدي الحبيب رحمه الله ..
إن أصولنا تمتد إلى شبه الجزيرة العربية.. و قال أننا ننتمي لبني قحطان .. سمع ذلك من أجداده و انا سمعته منه.. :)
و قد نزح أجدادنا القدماء ( مش هي نزح برضه؟؟ :d ) من هناك إلى مصر العليا .. فاستقروا في سوهاج ..
و تحديداً البلدة الصغيرة .. جرجا..
و أسس بعضهم أسرة كبيرة كقبيلة .. تسمى بالمحاسنة .. و هذه هي التي أنتمي إليها بقلبي و روحي أيضا *3*
و اسس الآخرين اسرة البراهمة.. و قيل أن المحاسنة و البراهمة أبناء عمومة في الواقع ..
اشتغل المحاسنة بالتجارة و العطارة .. و لهم فروع في القاهرة و السويس و الاسكندرية و الاقصر و مناطق اخرى و لكن هذا ما عرفته..ولا زال الأصل ثابتاً في جرجا ..
و جدتي لأبي من المحاسنة ايضاً.. و للمحاسنة عميد في كل مكان تجمعوا فيه.. و لهم جمعيات خيرية و مستوصفات ..
و لنا صلات نسب بالأشراف و العفايفة ..
و الجميل روح التماسك تلك الموجودة بين أبناء هذه القبيلة الكبيرة.. و في جرجا لازال هناك البيت الكبير.. و كل هذه الاشياء الدافئة ..التي تحمل رائحة الماضي.. الذي تمنيت أن أكون فيه.. :)
هذا ما اعرفه تحديداً..:)
آدي اصلي و فصلي يا عبده باشا..
و أشكرك على موضوعك المتميز.. الذي أعادني إلى زياراتي القديمة.. للأصل الكبير.. الذي أفخر بشدة.. بالانتماء إليه..
أنفال

[Abdou Basha]

إن أصولنا تمتد إلى شبه الجزيرة العربية.. و قال أننا ننتمي لبني قحطان .. سمع ذلك من أجداده و انا سمعته منه.. :)
و قد نزح أجدادنا القدماء ( مش هي نزح برضه؟؟ :d ) من هناك إلى مصر العليا .. فاستقروا في سوهاج ..
و تحديداً البلدة الصغيرة .. جرجا..
أنفال

جرجا ..!

لقد أجبرتني على العودة إلى ما كتبته في مشاركتي الأولى .. :)

أتذكرين يا أنفال تلك العبارة المقتضبة في حكايتي عن جذوري (التي أسمع عنها فقط)..

وتروي نفس الحكايات عن جذور جنوبية لجدي .. وثأر قديم أجبر جدته على الفرار بولدها إلى أخوانها بالقاهرة..

لتلك العبارة المقتضبة قصة.. بل أسطورة في سفر تكوين العائلة .. أحيانا أصدقها .. أكذبها .. لا يهم .
لكن هذا ماقيل.

وبما أنك قد ذكرت جرجا.. فعلي أن أعود مرة أخرى لأتحدث عن قصة.. بدأت الآن تختفي من على ألسن أفراد عائلتنا، وأضحت كأسطورة قديمة غريبة.. سأحكي عنها رغم أني كنت قد اكتفيت بعبارة مقتضبة . :)

لا أريد أن أبدو ثقيلا .. لكنك لم تحدثينا عن عائلة الأم .. لن أطلب منك هذا .. فهذه مساحتك، وليست مساحتى أنا .

عموما لي عودة بإذن الله . *3*

[حنفي]

على ذكر القبائل هل صحيح ان يوجد في مصر من القبيلة العريقه عندنا في السعوديه وهي قبيلة عنزه

[Abdou Basha]

إزيك يا حنفي ..؟

على فكرة .. إسمي عبدالرحمن للأعضاء الجدد..

شوف يا حنفي .. فيه قبائل عربية كتير هاجرت مصر.. وانتقل البعض منها، إلى بقاع أخرى .. وإن كان قد استقر أغلبها في مصر..

أشهر القبائل دي .. قبيلة بني هلال أصحاب السيرة المشهورة واللي انتشروا في كتير من أنحاء مصر .. كمان فيه بني سليم .. وللقبيلتين دور مهم في تعريب المغرب العربي .. أثناء التغريبة الهلالية ، وحروب تونس ، وانتشارهم في شمال أفريقيا.

ياريت يشارك إخواني العرب، اللي حيكون عندهم قصص وحكايات كتير عن ماضي عائلاتهم ممكن يذكروه لينا .

عن قبيلة عنزة .. أتذكر كان لي صديق في الكويت ينتمي أصله لتلك القبيلة .. وهي على حد علمي هي موجود منها ناحية الأردن أيضا..

في النهاية .. شكرا على مرورك يا حنفي ..

[7oodaa]

بانسبة لأصلي فأنا مش اصلي أنا تقليد وبانسبة لفصلي فأنا رايح اول ثانوي ...........هههههههههه
راجع احكي والله بس اجهز الكلام الأول

[حنفي]

اهلا اخ عبد الرحمن
لكن حسب علمي ان قبيلة عنزه موجوده في سينا

طبعا هي موجوده في جميع دول الخليج والعراق وسوريا والاردن

[الأموره سوزى]

جد بابا من أصل انجليزى و كان له شغل فى مصر وعاش فيها لانه حبها واتجوز بنت راجل فرنسى كان عايش فى مصر
جد ماما من اصل يونانى كان بيزور مصر كتير وعاش فيها واتجوز من مصر ية من اصل تركى
بس بابا مصرى وماما كمان

ميرسى ياعبده باشا على الفكرة الحلوة

[zizo_ya_zizo]

بسم الله الرحمن الرجيم
انا بقى اصلى ( مصرى اصيل تقريبا كده لسابع جد ) محدش فى عيلتنا من برا مصر خالص وكمان لو فكرت انى اتجوز *9* بردو لازم تكون مصريه متربيه على القيم والعادات المصريه يعنى بردو مش هدخل فى العيله حد غريب من بره :d والحمد لله دى نعمه بحمد ربنا عليها على طول انى متربى فى البلد دى اما بقى فصلى انا احمد فى كليه هندسة يعنى مهندس ( اشاء الله )*119* ربنا يعديها على خير

[R17E]

عموما لي عودة بإذن الله . *3*

أجبرتني علي الانتظار

لما نشوف حكاية دردا "جرجا" معاكم إيه

علي العموم

جاي *9*

[حسام عمر]

انا نصى اسيوطى تبع الوالد


ونصى التانى شرقاوى تبع الوالده

[Abdou Basha]

شكرا لكم جميعا على مروركم الجميل... *6*

___

* حودة في انتظار كلماتك..

* حنفي العزيز.. أغلب سكان سيناء من بطون وقبائل عربية.. وفي الغالب أن معلوماتك صحيحة بالفعل.

* سوزي.. مش معقول :) ..ده انتي طلعتي خواجاية خالص .. *3* .. أسعدني مرورك على الموضوع.

*زيزو .. ربنا يوفقك وتدخل فصلك في (كلية الهندسة).. بس انت يعني مصري بس كده ..مفيش جذور بعيدة من محافظة خارج مدينتك.. *14* .. عموما مشاركتك جميلة .. ربنا يوفقك . *3*

* باشمهندس محمد (يراع).. تحملني قليلا حتى أعود إليك بالسر.. :d

* حسام.. تكوين عائلتك رائع.. وواضح عليك جدعنة الصعايدة وكرم الشراقوة في كل مشاركاتك .. ربنا يوفقك دايما ، وسعيد بتعريفك بنفسك من خلال موضوعي المتواضع . *6*

في انتظار المزيد من مشاركاتكم.. *15*

[mshmsh73]

انا بقى جدتى لماما من اصل تركى وجدى لماما من اصل صعيدى وجدى وجدتى لبابا من المنصورة يعنى خلطة سريه انا بقى من مواليد اسكندريه واتربيت فيها لحد دلوقتى

[Abdou Basha]

انا بقى جدتى لماما من اصل تركى وجدى لماما من اصل صعيدى وجدى وجدتى لبابا من المنصورة يعنى خلطة سريه انا بقى من مواليد اسكندريه واتربيت فيها لحد دلوقتى

وأنا تشرفت بيكي يا مشمش.. وسعيد جدا بتسجيلك مشاركة في الموضوع.. بس فعلا خلطة سرية.. :d

مختلفة عن الخلطة بتاعتي شوية.. خصوصا إن كمان المعيشة في الإسكندرية، بتخلي للسكندري شخصية متميزة .. وإحساس بالتفرد. *15*

أهلا بيكي يا مشمش دايما . *3*

[R17E]

سلام عليكم .

.....

و كل هذه الوجوه ليست أكثر من شخوص في حلم , منها ما أذكره كطيف و منها ما سمعت عنه فكأني رأيته .



قالوا .... و أنا أصدقهم بأن جدي الخامس لأبي قدم صغيراً إلي مصر من الشام التي ولد فيها بصحبة والده القاضي الشرعي أما جدي السادس فكان تركياً بِلأساس .

و يقولون أيضاً بأن عيوني العسلية , و شعري المائل للصفرة يرجع لهذا الاصل التركي ..!!



جدي الخامس إسمه محمود أما أبوه فلا طاقة لكم بمعرفة إسمه ...!!!



المهم بقي جدي محمود بمصر و تزوج منها ـ أي مصر ـ أما أبوه فواصل الترحال عبر أنحاء السلطنة العثمانية .



فكون فروعاً للعائلة في السعودية .... الكويت .... اليمن .... و لي إبن عم أخبرني بأنه كان علي علاقة بفرع لنا في سوريا ... إلي أن أبيد عن بكرة أبيه في حماة علي يد الاخ المناضل .....



كثيرأً ما أسئل أبي إن كان لنا قصوراً في تركيا أو بقايا كنوز و هلم رخامه فيجيبني بتؤدة ...

روح العب ياله ...!!!!*14*



تأسست عائلتنا في مصر و عملت بالصناعة إلي أن سطت الحكومة علي ممتلكاتهم بعد الثورة



و لعائلتنا فروع في المحلة الكبري , المنوفية , أسيوط



و لعائلتي شقين مختلفين تمام الاختلاف ما بين أئمة الهدي *3* و شياطين الضلال *13* لا يربطهم سوي صلة القرابة و الرحم



أذكر أحد أفراد عائلتي الشيوعيين حينما هاجم فضيلة الشيخ متولي الشعراوي علي صفحات الجرائد , فما كان من الشيخ رحمة الله عليه إلا أن مسح به أسفلت مصر علي صفحات اللواء الاسلامي



رحم الله الثاني ,,,, و تجاوز عن الاول .

[sea_wolf]

لو حكينا يا عبدو باشا نبتدى من فيين الحكاية
ممممممممممممممممممم
بص اسمعى بقى على رائ اصاله
انا والدى من اصل صعيدى جدا - قنا - قوص - حجازة - وذكرت العنوان لانها لوحدها قصة ( حجازة هى قرية باحدا مراكز قنا وهى مجموعه من القبائل التى نزحت من الحجاز الى مصر ايام ابو زيد الهلالى يعنى وهم منقسمين الى جهينة وحرب ) والدى انا من جهينة كما سمعت وكما يحكى لى
ولكن سافر الوالد لكى يدرس بالازهر وهناك تعرف على والدتى التى كانت تسكن فى السويس حيث كان يزور احد اصدقائه هناك
اما والدتى فهى من اصل زقازيقى --يعنى من الزقازيق
ووعندما بدات الحرب وتم تهجير كل من فى السويس نزلنا الى قنا مرة تانيه
وبعد ان استقر الوضع رجعنا الى السويس --- وعندما تم ترقيه والدى الى مدير المعاهد الازهرية فى البحر الاحمر انتقلنا الى محافظة البحر الاحمر بالغردقة
وهذا هو اصلى وفصلى وكل حاجة عنى وعن علتى

[daria]

بجد بجد

اجمل تحية لكل الاعضاء اللي شاركوا في الموضوع دة

فعلا مشاركاتكم عجبتيني جداااااااااااااااااااااااااااااا*15*



انت بقى يا عبدو باشا

تسلم ايدك

وافكارك الهايلة دي

اتحفنا بيها على طول كدة*6*





انا بقى

انا مش زيكم عندي الافلام دي خالص



يادوبك ماما من المنوفية

وبابا من الشرقية

والاتنين عائلاتهم نوعا ما معروفة هناك

بس انا عمرى مازرت هناك

بالتالي مش حاسة بالانتماء اوي بصراحة



جدتي لبابا بتقول ان اصلها تركي

وبابا بيأكد كلامها





بس كدة

بس اوعدكم احاول اتجوز واحد مثلا من البرازيل ولا حاجة:d

وبعدها اخلى ابني ييجي يحكيلكم :d

هههههههههههههههه



إيمان*3*

[العربى الأول]

ايه الحكايه دى

الأخوان كلهم طلعوا صعايده ما شاء الله
طيب مش تقولوا من زمان يا أخوانا علشان نعمل حسابنا أو تكلموا أداره المنتدى يغيروا اسمه الى الصعايده جروب
أو الصعايده وصلوا .:d

وبما أنني أسيوطي الجذور والهوي ولا فخر ..*15* .....فيسعدني مشاركتي معكم

أنا من قبيله من قبائل هواره المنتشره فى قنا وبعضها فى سوهاج ولكننا الفرع الوحيد المقيم فى أسيوط وللأسف أن صلتنا مع العائلات المقيمه فى قنا ضعفت أو بالأحرى ماتت وأنتهز الفرصه للبحث عن بعض الأقارب فى قنا .

وقبائل هواره معروفه فى مصر بتقاليدها التى اشتهرت بها ويمكنكم معرفة المزيد من خلال هذا الرابط
http://dishna.hala.cc/root.htm#قبيلة_الهواره (http://dishna.hala.cc/root.htm#قبيلة_الهواره)

[أنفـــــال]

لا أريد أن أبدو ثقيلا .. لكنك لم تحدثينا عن عائلة الأم .. لن أطلب منك هذا .. فهذه مساحتك، وليست مساحتى أنا .
مرحباً بالطيب الغالي.. والدتي لا تعرف الكثير .. :) و لكن جدي كان شديد الفخر بأصوله الصعيدية ..
هذا فقط ..*3*
بوركت يا قائد تلك الرحلة .. :)
و بوركت.. آلة الزمن..
أنفال

[Abdou Basha]

سلام عليكم .

قالوا .... و أنا أصدقهم بأن جدي الخامس لأبي قدم صغيراً إلي مصر من الشام التي ولد فيها بصحبة والده القاضي الشرعي أما جدي السادس فكان تركياً بِلأساس .

و يقولون أيضاً بأن عيوني العسلية , و شعري المائل للصفرة يرجع لهذا الاصل التركي ..!!





باشمهندس محمد.. حكاية جميلة، وأصول عريقة. *3*
فعلا.. زي ما قلت

لم اكن أتصور أن يكون للأتراك هذا الأثر فينا. *15*
أتعلم..؟
لي عم وعمة (رحمها الله) ملامحهما تؤكد أثر الدماء التركية في عائلتنا (من ناحية جدتي).

إحمد ربنا إنك ورثت الملامح التركية دي :y: ..

أنا إذا كان عمي وعمتي اللي بقولك عنهم دول بيثبتوا العرق التركي في العيلة، فملامحي أنا بتثبيت العرق الصعيدي في العيلة :d .. مع إن مفيش أي حاجة تثبت أصولنا الصعيدية غير الحكايات.


انا والدى من اصل صعيدى جدا - قنا - قوص - حجازة -
....

اما والدتى فهى من اصل زقازيقى --يعنى من الزقازيق
........

وعندما تم ترقيه والدى الى مدير المعاهد الازهرية فى البحر الاحمر انتقلنا الى محافظة البحر الاحمر بالغردقة

وهذا هو اصلى وفصلى وكل حاجة عنى وعن علتى




سي وولف .. :)

مزيج جميل ..جمعت طيبة قلب الصعايدة وكرم الشراقوة.. ازددت قربا مني بحكايتك الجميلة عن جذورك..

جهينة من أشهر القبائل العربية في التاريخ العربي، وواضح إنك من بيت كريم وأسرة ملتزمة دينيا .. ربنا يوفقك.





يادوبك ماما من المنوفية

وبابا من الشرقية

والاتنين عائلاتهم نوعا ما معروفة هناك

بس انا عمرى مازرت هناك

.......

جدتي لبابا بتقول ان اصلها تركي


.............

بس اوعدكم احاول اتجوز واحد مثلا من البرازيل ولا حاجة:d

وبعدها اخلى ابني ييجي يحكيلكم :d

هههههههههههههههه




إيمان..

أنا سعيد جدا جدا بمرورك هنا..

تعرفي إنتي وأخوكي محمد من الناس اللي كنت عايز أعرف عنهم، وأشوف مشاركتهم في الموضوع.. شكرا جدا ومرحبا بيكي دايما



وبما أنني أسيوطي الجذور والهوي ولا فخر ..*15* .....فيسعدني مشاركتي معكم

أنا من قبيله من قبائل هواره المنتشره فى قنا وبعضها فى سوهاج ولكننا الفرع الوحيد المقيم فى أسيوط وللأسف أن صلتنا مع العائلات المقيمه فى قنا ضعفت أو بالأحرى ماتت وأنتهز الفرصه للبحث عن بعض الأقارب فى قنا .
[/url]


عزيزي العربي ..

أتعلم..؟

لو لم تضع هذا الرابط في مشاركتك، لكنت قدمت بنفسي بعض المعلومات عن هوارة التي وصلت في وقت من الأوقات إلى أن تمارس ما يشبه الحكم الذاتي في الصعيد.

ذكرني الاسم "هوارة" بما كنت قد طالعته في كتب التاريخ عن أصول المغرب قبل دخول الإسلام.. قد كان المغرب -برقة حتى موريتانيا- يبرز فيه شعبان.. البتر (الصحراوي)، والبرانس (الأكثر استقرارا) .

البتر توجد فيها بعض قبائل عديدة مثل "زناتة"، ومن البرانس توجد قبائل عديدة أخرى مثل "صنهاجة" و "هوارة" .

تلك القبائل لعبت دورا هاما في تاريخ المغرب والأندلس أكثر من دورها في مصر، نظرا لطبيعة المغرب القبلية.. و بعض القبائل المغربية الأخرى قد هاجرت إلى مصر في فترات معينة، ولا زلنا نستطيع أن نتلمس أثار تلك القبائل بين أحياء القاهرة الفاطمية.. باب زويلة " نسبة لقبيلة زويلة" .. وحارة كتامة الموجود في الدرب الأحمر ، وتنسب لقبيلة "كتامة المغربية" .

أما هوارة فكانت الأكثر عددا، والأشهر، والأكثر اندماجا في أقاليم مصر.

مرحبا بك أخي العربي دائما، وبكل ذوي الأصول الصعيدية.


مرحباً بالطيب الغالي.. والدتي لا تعرف الكثير .. :) و لكن جدي كان شديد الفخر بأصوله الصعيدية ..
هذا فقط ..*3*
بوركت يا قائد تلك الرحلة .. :)
و بوركت.. آلة الزمن..
أنفال

أنفال..

عودة مباركة.. وأشكرك بشدة على اهتمامك بشغفي وسعيي لإكمال الصورة .

شكرا لك.. ولي عودة قريبة من أجل الحديث عن "جرجا" وحكايات عائلتي.

[حسام عمر]

ايه الحكايه دى

الأخوان كلهم طلعوا صعايده ما شاء الله
طيب مش تقولوا من زمان يا أخوانا علشان نعمل حسابنا أو تكلموا أداره المنتدى يغيروا اسمه الى الصعايده جروب
أو الصعايده وصلوا .:d

وبما أنني أسيوطي الجذور والهوي ولا فخر ..*15* .....فيسعدني مشاركتي معكم

أنا من قبيله من قبائل هواره المنتشره فى قنا وبعضها فى سوهاج ولكننا الفرع الوحيد المقيم فى أسيوط وللأسف أن صلتنا مع العائلات المقيمه فى قنا ضعفت أو بالأحرى ماتت وأنتهز الفرصه للبحث عن بعض الأقارب فى قنا .

وقبائل هواره معروفه فى مصر بتقاليدها التى اشتهرت بها ويمكنكم معرفة المزيد من خلال هذا الرابط
http://dishna.hala.cc/root.htm#قبيلة_الهواره (http://dishna.hala.cc/root.htm#قبيلة_الهواره)


اسيوطى اخر معنا

على فكره انا اعرف كتير عن هواره بحكم صاحب القهوه اللى بقعد عليها يعتبر من كبارتهم

[مظلوووم]

ههههههههههههههههههههههههههه
دا المنتدى طلع نصه شراقوه والنص التانى صعايده هههههههههه
يعنى مننا وعلينا يا رجاااااااله ههههههههه
انا بقى قصتى طوووووووووويله جدا بس نحاول نختصر شويه
انا بابا وماما من الشرقيه من مواليد الشرقيه وانا كمان زيهم هههههههههههه
اما جدتى لابى فهى قاهريه ابوها كان تاجر اقطان كبير ويقال انه كان يحمل البهويه وطبعا من اب مصرى وام تركيه
اما جدى لابى فهو مصرى وقد كان يعمل بالتربيه والتعليم وفى احدى البعثات التعليميه فى المغرب اكتشف بالمصادفه بان هناك فرع للعائله ولكن مسيحيون ولكن يحملون نفس الاسم الشترى ويعلمون بوجود فرع للعائله بمصر والسعوديه ورحبوا بجدى رحمه الله ترحيب شديد جدا ووتعاونوا معه تعاون كبير جدا
اما فرع السعوديه دا بقى فهما اللى اتصلوا بابى بالفعل وكان المتصل احد افراد العائله ويعمل رئيس تحرير لمجله الحرس الوطنى السعودى وبالفعل اتوا الى مصر للتعرف على باقى افراد العائله وكان اللقاء والاستضافه عندنا فى البيت بس انا كنت صغير ساعتها وكل اللى فاكره الزى الرسمى بتاع السعوديه الجلباب الابيض والعقال ههههههههههههههههههههههههه
وتوزيع العائله فى مصر ما بين الشرقيه والدلتا والقاهره لكن القاسم الاكبر بالشرقيه
يعنى من الاخر طلعنا عائله جااامده هههههههههههههه
موضوع لذيذ يا عبدووو وبجد انا باشكرك عليه ويمكن يطلع اتنين هنا فى المنتدى اقارب وهما ما يعرفوش
ويجعلوا عاااااااامر بيكم دائما
انوووووووووبيس

[osha]

موضوع جميل يا عبده
ولكنه محير
اصلك عارف طبعا ان كل ابناء الشعب المصري فيهم دماء المحتلين


عامة انا جدي الأكبر لأبي نزح من الجزيرة العربية واستقر في القاهرة وهذا كل ما أعرفه عنه - ولكن العائلة دخل فيها الأتراك طبعا زي معظم عائلات مصر مع عرق صعيدي متين
جدي لأمي كان صائغا ولحد وقت قريب كان محله مازال قائما قبل مشاحنات الورثة الأزلية التي تذهب بكل ما هو ثمين وقيم
والشئ الوحيد اللي وصلني سليما معافا من جدي - هي اللغة التي يستخدما الصياغ في الحديث مع بعض أمام الزبون بدون أن يفهم شيئا منها
وقد كنا حتى وقت ليس بعيد نستخدم اللغة دي على خفيف لما يكون فيه ضيوف وتريد أمي ان تقول لنا شئ لا تريد الضيف أن يعرفه
جدتي لأمي تركية تماما - وما زلت أتذكرها - رحمها الله - بكل هذا الكبر والصلف المعروف عن الأتراك ومعاملتها القاسية للشغالات باعتبارهن أقل شأنا ومش عارفة هم جابوا الفكرة دي منين أنهم أحسن من غيرهم

[الدكتورة نسيبة]

ما شاء الله على كل الردود الحلوة والاصل الطيب الكريم

موضوعك اعجبنى كثيييييييييييييييييييييييرا يا عبدو باشا ولفت نظرى واخذت استرجع اصلى فى ذاكرتى فلم تسعفنى حيث انى لم ارى جدى وجدتى لابى وجدى لامى سوى فى الصور وتصور لم اسال ابى او امى عن وظيفتهم او اصلهم (يلا ربنا يرحمهم كلهم واوعدك اسال ماما وبابا)فبكدة الوحيدة اللى شفتها كانت جدتى لامى (ربنا يرحمها يارب)وانا بس عارفة انها من اصل سكندرى واننا لينا اقارب هناك
وبس ماما وبابا من بورسعيد شافوا بعض فى الشغل فالقى كيوبيد بسهام الحب عليهم وجئنا نحن للحياة وكنت انا احد اخوتى التى اشتركت فى المنتدى

وتسلم ايدك على الفكرة والموضوع الجميل خلتنى اعرف الاعضاء عن قرب

وتحياتى

[حنـــــان]

لااا انا بقى شكلي وحش وانا مش عارفه حاجة كده
انا حاروح اجمع معلومات واعرف الحكاية هنا ايه بالظبط واجي اقول بس استنوا ماحدش يمشي!

[Abdou Basha]

انا بابا وماما من الشرقيه من مواليد الشرقيه وانا كمان زيهم هههههههههههه
اما جدتى لابى فهى قاهريه ابوها كان تاجر اقطان كبير ويقال انه كان يحمل البهويه وطبعا من اب مصرى وام تركيه
اما جدى لابى فهو مصرى وقد كان يعمل بالتربيه والتعليم وفى احدى البعثات التعليميه فى المغرب اكتشف بالمصادفه بان هناك فرع للعائله ولكن مسيحيون ولكن يحملون نفس الاسم الشترى ويعلمون بوجود فرع للعائله بمصر والسعوديه ورحبوا بجدى رحمه الله ترحيب شديد جدا ووتعاونوا معه تعاون كبير جدا

______

وتوزيع العائله فى مصر ما بين الشرقيه والدلتا والقاهره لكن القاسم الاكبر بالشرقيه
يعنى من الاخر طلعنا عائله جااامده هههههههههههههه


عارف يا محمد..؟

أنا كنت ناوي أبعتلك إنت وكتير ناس عشان نتعرف أكتر على بعض من خلال الموضوع ده .. وكنت متأكد إنك ليك أصول عربية .. أصل أهل الشرقية طول عمرهم ليهم صلات مع الجزيرة العربية من زمان.. على فكرة وليهم اختلاط (آسيوية = فلسطين والشام) من أيام الفراعنة.. كمان إسم الشتري ده كنت حاسس إن وراه حكاية .. :)

حكايتك شيقة جدا .. *15*

وشرفت الموضوع .. *3*

________

موضوع جميل يا عبده

عامة انا جدي الأكبر لأبي نزح من الجزيرة العربية واستقر في القاهرة وهذا كل ما أعرفه عنه - ولكن العائلة دخل فيها الأتراك طبعا زي معظم عائلات مصر مع عرق صعيدي متين
جدي لأمي كان صائغا ولحد وقت قريب كان محله مازال قائما قبل مشاحنات الورثة الأزلية التي تذهب بكل ما هو ثمين وقيم
والشئ الوحيد اللي وصلني سليما معافا من جدي - هي اللغة التي يستخدما الصياغ في الحديث مع بعض أمام الزبون بدون أن يفهم شيئا منها
وقد كنا حتى وقت ليس بعيد نستخدم اللغة دي على خفيف لما يكون فيه ضيوف وتريد أمي ان تقول لنا شئ لا تريد الضيف أن يعرفه
جدتي لأمي تركية تماما - وما زلت أتذكرها - رحمها الله - بكل هذا الكبر والصلف المعروف عن الأتراك ومعاملتها القاسية للشغالات باعتبارهن أقل شأنا ومش عارفة هم جابوا الفكرة دي منين أنهم أحسن من غيرهم

الغالية .. مدام/ رشا " أم محمد "

حكايتك جميلة .. وواضح إنكم من عيلة مستريحة .. *9* تجار دهب .. *5* ..!!

شوفتي القر المظبوط.. :d

إنتي من الناس اللي كنت عايز أعرف عنهم.. وأكيد إنتي كمان عايزة تعرفي عن ناس تانيين..

شكرا يا رشا.. قصتك متميزة زي تواجدك بالمنتدى .

____________


(يلا ربنا يرحمهم كلهم واوعدك اسال ماما وبابا)
فبكدة الوحيدة اللى شفتها كانت جدتى لامى (ربنا يرحمها يارب)وانا بس عارفة انها من اصل سكندرى واننا لينا اقارب هناك
وبس ماما وبابا من بورسعيد شافوا بعض فى الشغل فالقى كيوبيد بسهام الحب عليهم وجئنا نحن للحياة وكنت انا احد اخوتى التى اشتركت فى المنتدى

د.نسيبة..
شرفتي الموضوع .. أكيد ليكي أصول أبعد من بورسعيد .. لإنها مدينة حديثة .. ممكن يكون ليكي قصة زي بتاعت أخونا محمود (عصفور الشعر).. هو برضه من بورسعيد العظيمة.. لو عنك المزيد لا تتردي في طرحه علينا هنا . *6*

شكرا على إطرائك على موضوعي.. *3*

_________

لااا انا بقى شكلي وحش وانا مش عارفه حاجة كده
انا حاروح اجمع معلومات واعرف الحكاية هنا ايه بالظبط واجي اقول بس استنوا ماحدش يمشي!

نونا.. :)

أنا بقالي مدة مش بشوفك كتير في الموقع.. رحتى فيييييييين..؟؟ :)

على فكرة أنا حاسس إن عندك حكاية كبيرة .. عمال أسمعك تقولي الإسكندرية وطنطا ..والقاهرة كمان .. *11*

لأ .. هاتي المعلومات وأنا مستنيكي مع الأعضاء هنا .. :)

في انتظارك . *3*

______________

أمنيتنا التعرف على المزيد من الأعضاء .. مصريين أو غير مصريين .. *6*

في انتظاركم *8*

[نانيس]

السلام عليكم ورحمة الله وبركاته

تحية طيبة للأخ الفاضل عبد الرحمن على هذه الفكرة الجميلة والموضوع الرائع.
ــــــــــــ
وندخل في الموضوع
أبدأ بعائلة أمي الحبيبة ، فهي عائلتي التي أحبها وأحب أصولها ، وأتسنم عبيرها ؛ جدي وجدتي لأمي ( حفظهما الله ) أقارب ، عائلتيهما ذات أصل مغربي ، فقد نزح أخوان تاجران من المغرب الشقيقة إلى مكة المكرمة ، فأقام أحدهما بها ورحل الآخر إلى مصر ، فالذي أقام بمكة كون هناك فرع للعائلة المعروفة باسم ( بَدرة ) أو ( بادرة ) ولهم هناك مصانع حلويات . والذي رحل إلى مصر هو مؤسس فرع العائلة بمصر ، وقد كان اسمه ( محمد ) فلُقُب بـ ( المكّاوي ) نسبة إلى مكة إذ أتي منها ، تمييزا له عن غيره نظرا لانتشار الإسم ( الجزئية دي أنا سمعاها من جدو لما سألته عن معنى اسم المكاوي ) ، وقد تزوج بمصرية من محافظة الغربية فكانت العائلة ( عائلة المَكَّاوي ).
أما بالنسبة لعائلة أبي فهي عائلة منوفية الأصل ، تحديدا من شطانوف ، ولهم أراضٍ هناك ، ولا أعلم عنهم الكثير.
لكنني وُلدت بالقاهرة ، ولم أذهب إلى المنوفية من قبل ولا إلى الغربية ولا إلى المغرب.
وإذا أردتم معلومات أخرى عن التفاصيل ( اللي لمت الشامي على المغربي كما يقولون ) أو نقدر نقول لمت المنوفي على المغربي فلا مانع.
مع خالص التحية والتقدير والاحترام

[sea_wolf]

نفسى واحد يقول انا من اصل مصرى جدى احمس وجدتى كليوبترا وعمتى نفرتيتى وخالى خفرع
بس الظاهر ان كلنا من اصول نصف مصراوية

[R17E]

نفسى واحد يقول انا من اصل مصرى جدى احمس وجدتى كليوبترا وعمتى نفرتيتى وخالى خفرع
بس الظاهر ان كلنا من اصول نصف مصراوية

في الحالة دي

ريح نفسك و روح اسأل في المتحف المصري في ميدان التحرير*9*

[نانيس]

نفسى واحد يقول انا من اصل مصرى جدى احمس وجدتى كليوبترا وعمتى نفرتيتى وخالى خفرع
بس الظاهر ان كلنا من اصول نصف مصراوية
لا قدر الله يا أخ سي _ وولف ، في حديث للرسول صلى الله عليه وسلم ما معناه ( من افتخر بستة من أجداده الكفار كان هو سابعهم في النار)
حتي ولو ، لا نفخر .
وشكرا لرحابة صدركم في تقبل الكلام.

[مظلوووم]

انا اول مره اسمع الحديث دا يا نانيس يا ريت تجيبيلى المتن بتاعه
وثانيا الرسول صلى الله عليه وسلم قال خيركم فى الجاهليه خيركم فى الاسلام
وثالثا مش كل المصريين القدماء كانوا كفره
في منهم اللى عرف الله معرفه حقه وكتير وان شاء الله احاول اجيبلك الروابط
وانا عن نفسى افخر انى من سلاله المصريين القدماء ومش كل المصريون القدماء فراعنه
اللفظ نفسه خاطىء لان فرعون اسم شخص مش لقب ملكى
وحتى انتى تلاحظى انى باوقع باسم انوبيس
وانا اسف عن الخروج عن الموضوع الرئيسى
ويجعلوا عاااااااااااامر
انووووووووووبيس

[Abdou Basha]

مرحبا بك يا نانيس :) .. وأشكرك جدا على إضافة قصتك الجميلة عن عائلتك الكريمة معنا هنا ... *8*

سيوولف..

أنا عارف احساسك ده .. *67*

عموما هي المسألة مش محتاجة نروح المتحف المصري زي ما محمد عايزك تعمل :d .. لإننا كلنا غالبا فينا دماء مصرية .. ومصر مش بتدي نسب وعرق قد ما بتدي شخصية *17* .. حتى إنك ممكن تلاقي المغربي والتركي والأندلسي والبلقاني.. والآسيوى والأفريقى والأوروبي ... إلخ ..كل دول وفدوا على مصر .. واللي وحَّـد بينهم حاجة واحدة الشخصية المصرية . *6*

والكلام اللي أثير ده .. خلاني أفتكر حاجات قريتها وحابب أعرضها عليكم ..

في الأول ..عايز أحط مثال يوضحلكم إن مفيش حاجة إسمها إن الفراعنة هما الأصل أو إن البعض ينسب نفسه للفراعنة :2: .(الفراعنة أقصد بيهم المصريين القدماء)

فكرة النقاء العرقي دي مستحيلة .. :nono:

مثلا ..
مصر في الأسرة 20 كان فيه حوالي 10% (في بعض التقديرات) من سكان مصر.. مش مصريين ووافدين على مصر من الشام وفلسطين وغيرها من أرجاء الإمبراطورية المصرية ووصل البعض منهم لمراكز عليا في الدولة :eek: ... يعنى ممكن بعد ما نرجع للفترة قبل الإسلام والمسيحية نلاقي نسبنا راجع للشام أو فلسطين .. ده غير إن مصر شهدت هجرة يونانية في عهد الأسرات 23- 24.. على حسب ما انا فاكر . وفي الأسرتين دول كان بيحكم مصر حكام من أصول غربية (صحراء غربية وليبيا).. لكنهم كانوا عاشوا قبل كده في مصر مدة طويلة وتمصروا ...

أقولكم حاجة .. كان فيه جغرافي ورحالة يوناني بيشتغل مع الرومان كان قبل الميلاد بعشرات السنين .. الرجل ده (إسمه استرابون).. بيوصف مدينة مصرية إسمها ( قفط ) -هي في قنا تقريبا دلوقت- بإنها مدينة نصف عربية .. لإن أغلب سكانها كانوا عرب .. الكلام ده قبل الإسلام وقبل دخول المسيحية مصر وانتشارها.. يعنى مصر طول عمرها كده . :notme:

على فكرة يا جماعة إحنا مش حنختلف...

لإن (محمد) سييولف مش بيبحث عن جذور مصرية قديمة عشان يفتخر بيها على حد.. لكن هو أكيد زيينا كلنا.. بيبحث عن صلة بينا وبين ناس عاشوا على نفس الأرض واستفادوا منها وكانوا أعظم أمة في وقتهم ..! :y1:

مظلوم ..

على فكرة إنت واضح إنك بتحب التاريخ ..

مشاركتك خليتني عايز أقدم فكرة عايز أقولها .. إن من الظلم إننا نربط بين قصة فرعون موسى وكل الفراعنة .. لإن فيه أراء بتقول إن الحادثة دي كانت في عهد الهكسوس..!
ومفيش أي حاجة أثرية تؤكد مين هو فرعون الخروج .. والكلام ده أنا مهتم بيه وكان مجال بحث مني .. ومتخدوش في بالكوا القصص المنتشرة على النت دي.

كمان كنت عايز أقول إن فرعون كلمة تدل على الحاكم .. ود.عبدالعزيز صالح العميد السابق لكلية الآثار كان بيشبهها بكلمة الباب العالي اللي بتدل على الخليفة أو الحاكم العثماني .

عموما .. لا زلنا في انتظار المزيد من قصصكم الشيقة .. سواء من عرب أو مصريين .. وحرجع تاني إن شاء الله عشان أحكي حكاية عائلية لسة محكيتهاش ... *221*

[عبد الرزاق]

الأخ الكريم عبده باشا ـ تحية وبعد ؛ الموضوع شيق وطريف ؛


ولاريب أن الحديث عن الأصل والفصل شيء طريف وممتع ؛ رغم أن القلة القليلة هي التي تعرف بصورة مؤكدة الأصول التي انحدرت منها ، مما يجعل الحديث عنها أقرب الى الذكريات ؛ وهذا يذكرني بقول القائل :

لا تقل أصلي وفصلي أبداً * * * إنما أصل الفتى ما قد حصل ْ

وفي قول لشاعر آخر :

ليس الفتى من يقول كان أبي * * * بل الفتى مـن يقـول هـا أنـذا


والذي يمكن قوله في هذا المجال أن الأنساب اختلطت نتيجة التداخل والانتقال السريع والمستمر بين الناس في مختلف الأمصار وسابقاً كانت بسبب الحروب والغزوات مما تسبب بضياع الأنساب وتشتتها ، والذي أعرفه أن عدداً من العائلات التي تعتز بنسبها وأصالتها تحتفظ لديها بـ « شجرة للعائلة » يدرج فيها على التوالي من ينتسب اليها وهذه الأسر يمكنها اثبات أصلها بشكل صحيح من خلال شجرة العائلة تلك .
ـ هذا للتنويه فقط أخي الكريم ـ

[bmoot mn el 7ob]

اوكى انا هحكى عن كل اللى انا اعرفه عن عيلتى ...

بابا مصرى من اصول جنوبية يعنى الصعيد تقريبا بس انا معرفش ليا قرايب هناك يعنى انا مولودة فى القاهرة وعمرى ما روحت لقرايب ليا فى حتة من برا القاهرة
جدتى ام والدى هى من اصول تركية وانا ورثت منها الشكل التركى بس انا بعتز دايما انى مصرية
اما والدتى فهى مصرية 100 %
اما عن فصلى فأنا رايحة تانية ثانوى ( ثانوية عامة بعيد عنكوا السنة اللللى جاية ) وبسس

[Abdou Basha]

مشاركة جميلة أخي عبدالرزاق...

إنما هو حديث عن الماضي الغامض.. والغامض دائما يثير العقل والتفكير .. أشكرك على مداخلتك وانتظر عودة منك.

____

bmoot mn el 7ob

شرفتي الموضوع ... ومرحبا بك معنا نتعرف على بعض أكثر ونبحث في ماضينا أكثر .
وربنا يوفقك في دراستك.

[lost]

بسم الله الرحمن الرحيم

انا مصرية صافى مفيش ولا عرق اجنبى فى عائلتى أبى وامى قرايب ولكن عن طريق الأم

والعائلتين من قرية واحدة فى محافظة القليوبية


عائلة جدى من ناحية امى يقولون انهم من الأشراف يعنى من سلالة النبى وقبر جد جدى (يعنى جدى الأكبر ) مكتوب عليه شجرة العائلة بالضبط .

وعائلة ابى عائلة كبيرة جدا تزيد على ال3000 شخص الآن كلهم يهتمون بالعلم أكثر من اى شئ فى

الدنيا ولكن معظمهم فى البلد ماعدا الاحفاد جزء كبير منهم انتقل الى القاهرة نظرا لظروف العمل

والتعليم وطبعا نتيجة لعدد الأحفاد الكبير لا أعرفهم فرد فرد ولكن اعرف جزء كبير منهم .

[أحمد المليجي]

بسم الله الرحمن الرحيم
و الله هي الفكرة حلوة اوي يا عبده وانا شفت الموضوع من الاول خالص
بس انا بحب اكون مجهول دائما
عشان كدة
انا من ......... و من مواليد ........... والدي من ............ و ليه عدد وافر من الاخوات يقدر عددهم ب ..............
ههههههههههه طبعا كل الكلام واضح مافيش حاجة محتاجة تفسير ههههه

[نانيس]

انا اول مره اسمع الحديث دا يا نانيس يا ريت تجيبيلى المتن بتاعه

أنا لم أنسَ الأمر
جاري البحث عن الحديث.

[حنـــــان]

مافيش فايدة
حاولت بشتى الطرق اني أعرف من أهلي ايه الحكاية
كل اللي طلعت بيه
جدود بابايا من مكان في وسط الدلتا بيقول اسمه... بهوت؟ وبعدين انتقولوا لمكان في الغربية اسمه اشناواي وعايشين هناك من ساعتها... طول عمرهم فلاحين وجدتي كانت بنت عم جدي
ماما بقى اسكندرانية مأصله ووالدها كان تاجر حبوب وجدها كمان... جدتي بقى ماتعرفش عن أهلها حاجة

جاري البحث في الموضوع ده! مافيش حاجة اكسايتنج خالص في العيلة دي!! ولا حد مشهور وثورجي ولا قائد... ان شا الله حتى قتال قتلة... مافيش! :)

اما حكاية سفري الكتير دي يا عبد الرحمن فعشان ليا أهل في طنطا واسكندرية... وليا مصالح في الوزارة والنقابة في مصر! :)

[Abdou Basha]

بسم الله الرحمن الرحيم

انا مصرية صافى مفيش ولا عرق اجنبى فى عائلتى أبى وامى قرايب ولكن عن طريق الأم

والعائلتين من قرية واحدة فى محافظة القليوبية


عائلة جدى من ناحية امى يقولون انهم من الأشراف يعنى من سلالة النبى وقبر جد جدى (يعنى جدى الأكبر ) مكتوب عليه شجرة العائلة بالضبط .

وعائلة ابى عائلة كبيرة جدا تزيد على ال3000 شخص الآن .


شكرا يا لوست على تلبية الدعوة.. كنت أطمع في زيارة .. فجئت بمشاركة رائعة *3* ... أتعلمين .. رغم ان جدي لوالدتي -كما ذكرت سابقا- ذكر لي هو وكل أفراد العائلة أنهم ينتمون إلى الأشراف.. إلا أني لا أعلم لما أشعر بالقلق من تلك التسمية .. وأخشى من أن تكون تمييزا على المسلمين ممن هم أفضل وأشرف.. عموما لو كان ما قالوه صدقا فنحن أقارب... :d

أشكرك بشدة .. *8*

[Abdou Basha]

بسم الله الرحمن الرحيم
و الله هي الفكرة حلوة اوي يا عبده وانا شفت الموضوع من الاول خالص
بس انا بحب اكون مجهول دائما
عشان كدة
انا من ......... و من مواليد ........... والدي من ............ و ليه عدد وافر من الاخوات يقدر عددهم ب ..............
ههههههههههه طبعا كل الكلام واضح مافيش حاجة محتاجة تفسير ههههه

لا واضح جدا ... :d

[Abdou Basha]

مافيش فايدة
حاولت بشتى الطرق اني أعرف من أهلي ايه الحكاية
كل اللي طلعت بيه
جدود بابايا من مكان في وسط الدلتا بيقول اسمه... بهوت؟ وبعدين انتقولوا لمكان في الغربية اسمه اشناواي وعايشين هناك من ساعتها... طول عمرهم فلاحين وجدتي كانت بنت عم جدي
ماما بقى اسكندرانية مأصله ووالدها كان تاجر حبوب وجدها كمان... جدتي بقى ماتعرفش عن أهلها حاجة

اما حكاية سفري الكتير دي يا عبد الرحمن فعشان ليا أهل في طنطا واسكندرية... وليا مصالح في الوزارة والنقابة في مصر! :)

نونا... إنتي بجد شرفتي الموضوع .. :)
وأنا سعيد بحرصك على مشاركتنا هنا في الموضوع ده *3*

جاري البحث في الموضوع ده! مافيش حاجة اكسايتنج خالص في العيلة دي!! ولا حد مشهور وثورجي ولا قائد... ان شا الله حتى قتال قتلة... مافيش! :)

قصدك... عليا أنا .. *12*
الله يرحمه.. كان إرهابي .. بيدافع عن وطنه. :d
بس مفيش حد من أحفاده (أخوالي) طلع إرهابي زيه..

ربنا يرحم أجدادنا جميعا. :)

[حنـــــان]

قصدك... عليا أنا .. *12*
الله يرحمه.. كان إرهابي .. بيدافع عن وطنه. :d
بس مفيش حد من أحفاده (أخوالي) طلع إرهابي زيه..

ربنا يرحم أجدادنا جميعا. :)

*4*
لا أنا مش فاهمه حاجة... أنا مش قصدي عليك
ومين هوه اللي كان ارهابي بيدافع عن وطنة. انت كتبت كلام في الموضوع أنا ماقريتوش ولا ايه؟؟ *4*

[Abdou Basha]

*4*
لا أنا مش فاهمه حاجة... أنا مش قصدي عليك
ومين هوه اللي كان ارهابي بيدافع عن وطنة. انت كتبت كلام في الموضوع أنا ماقريتوش ولا ايه؟؟ *4*

الظاهر المسألة جت صدفة ... *7*

أنا بكلم عن الراجل الجميل ده .. :)

جدي لوالدتي - على حد قول العائلة- ينتمي لأشراف الجعافرة الذي ينتهي نسبهم إلى جعفر الصادق من أحفاد الحسين رضي الله عنه.. ووالده كان أحد الزعامات الشعبية التي ناضلت ضد الاحتلال الإنجليزي.. ولا زال لدي من القصاصات الصحفية ما يؤكد هذا الأمر.


جد أمي الله يرحمهم جميعا... كنت بسمع عنه حكايات مقتضبة.. لحد ماكتشفت إنه كان راجل مناضل.. زي كتير من الناس اللي محدش يعرف عنهم حاجة .. مجرد حطب لحركة النضال الوطني.. مكانش حد مشهور في التاريخ.. لكنه كان بيحاول يناهض الإنجليز.. في وقت كانت المفاوضات هي الحل.

بشكرك جدا يا نونا إنك إدتيني فرصة إني أتكلم عن الراجل ده.. اللي كتير زيه كانوا موجودين .. وزيهم كتير دلوقت محدش بيتكلم عنهم .. وكإن مكانش ليهم دور في التاريخ.

[osha]

أنا لم أنسَ الأمر
جاري البحث عن الحديث.

الأخت نانيس
ارجو انك ماتكونيش نسيتي الموضوع دا - بس الأفضل ان ترسلي لى الأسانيد في رسالة خاصة حتى لا نفسد موضوع اخينا عبده باشا بحوار جانبي خارج عن اطار الموضوع
وانا على يقين من أنك تريدين الصالح لنا ولك بإذن الله
ولك الأجر والثواب

[Abdou Basha]

تم الإتفاق مع الاخت نانيس إنها ستضع أسانيد الحديث في موضوع خاص .. وسأنوه عنه هنا من خلال الموضوع .. وذلك حتى لانخرج بالموضوع إلى موضوعات فرعية كان الأفضل أن تثار عبر الرسائل الخاصة أو موضوعات مختصة بها سواء في العامة أو لقاءات في حب الله .

وسيتم حذف المشاركات التي ستخرج عن هذا الموضوع أو أي موضوع آخر ..

ولي رجاء شخصي أن نتعامل في الموضوعات الجانبية عبر الرسائل الخاصة حتى لاتضيع الفكرة الأصلية للموضوعات.. خصوصا مع ازدياد عدد صفحات الموضوع... وأنا وكل من شارك في هذا الموضوع في انتظار مزيد من مشاركات الأعضاء حول الفكرة الأصلية.. لمزيد من التعارف ولمزيد من الحوارات الثرية حول بلدنا مصر وأصولنا.

أشكر كل من ساهم بمشاركة .. وفي انتظار المزيد.

ولازال لدي حكاية عائلية.. أريد أن أرويها لكم.

لكن دائما ما أنساها.. ولا أجد الوقت.

بإذن الله سأعود...

[محمد فاروق]

بجد بجد

يادوبك ماما من المنوفية

وبابا من الشرقية

والاتنين عائلاتهم نوعا ما معروفة هناك





اهو ده الفشر بعينه ... عيلة ماما بس هيه اللى معروفة انما عيلة بابا ولاحد يعرف عنها حاجة ف الشرقية ولا حتى احنا .. :d



جدتي لبابا بتقول ان اصلها تركي

وبابا بيأكد كلامها




الكلام ده اول مرة اسمعه ...بس ممكن يكون حقيقى .. الله اعلم



انا برضه ماكنتش عارف هاقولك ايه ... عشان كده ماكنتش ناوى ارد

بس اهى الهانم ردت والحمد لله

عرفت بقى ياسيدى اصلنا وفصلنا ؟؟؟؟

بس على فكرة بلدنا مافيهاش بنات للجواز ... هههههههههه

شكرا ياعبده على الروح الطيبة *8*

محمد فاروق

[Abdou Basha]

شكرا يا محمد على المرور.... نفتقدك في المنتدى . *3*

وكويس إنك مريت عشان تصحح المعلومات .. :d
ربنا يوفقك دايما..

[جوليا]

موضوع جميل جدا ياعبدالرحمن بشكرك علية

وانا اصلي وفصلى مصري من اول جد لسابع جد والدى واوالدتي من المنصورة

وتحياتي لك

[مراد]

انا مصرى فرعونى من الجلد للنخاع
دمى.. من نيلك يا امى
طين ارضك لون عيونى
لا نسيت اصلى وفصلى
ولا داريته بحجاب او قناع

زهوى وفخرى بأصولى
بشموخ وعظمة جدودى
ونفسى محمد وبطرس
يحطوا ايدهم فى ايدى
يفوقوا من وهم زايف
ويعاهدو معايا مصر
نحميها من الضياع

[Abdou Basha]

جوليا... إزيك..؟ بقالك مدة مفتقدين مشاركاتك ..؟!
أنا سعيد جدا بمرورك.. ومشاركتك معانا في الموضوع ده..

شكرا ليكي
_________

مراد..

خدها كلمة من واحد درس تاريخ .. مفيش حاجة إسمها فرعوني.. يمكن الأصح اننا نقول المصري القديم.. وكمان صعبة جدا مسألة النقاء العرقي .. كإن المصريين جنس لوحدهم..
إحنا اتكلمنا في الموضوع ده داخل الموضوع في المشاركة دي.. ياريتك تمر عليها..
http://www.egyptsons.com/misr/showpost.php?p=330538&postcount=38

وبشكرك جدا على المشاركة في الموضوع .

[جوليا]

شكرا عبد الرحمن انا اسعد بمواضيعك المميزة وانا كنت مسافرة وكنت بجد مفتقدة المنتدى

[daria]

[QUOTE=محمد فاروق]اهو ده الفشر بعينه ... عيلة ماما بس هيه اللى معروفة انما عيلة بابا ولاحد يعرف عنها حاجة ف الشرقية ولا حتى احنا .. :d [/QUOTE
اوكي بيني وبينه بابا حاخليه يشترك وييجي يقولك بنفسه :d
او ممكن اخلي بابا يقوله بنفسه يا عبدو *9* ، ايه رأيك ؟ :)

وكمان بيغلط في تيتة
كدة كملت
على فكرة محمد مش اخويا شقيقي :d
ههههههههههه
منشق عن العيلة ولا ايه يا محمد ؟؟

معلش يا عبدو باشا كان لازم ارجع وارد عليه وارجع شرف العيلة :d :d
وخلاص مش حاجيي تاني
واسفة لو كنت خرجت عن الموضوع *7*

[مظلوووم]

ههههههههههههههههههههههههههههه
والله دا ايمان طلعت بلدياتنا بقى ههههههههههههههه
طيب قولى العيله كدا يا ايمان يمكن نطلع قرايب هههههههه
مرحب بيكى يا بنت العم
واسفين يا عبدو على المقاطعه
بس حبيت ادخل اشجع الشرقيه بس ههههههههههههههه
ويجعلوا عااااااااامر
انوووووووووووبيس

[Abdou Basha]

حمدالله ع السلامة يا جوليا :) .. وشكرا ليكي جدا ع الكلام ده *3*

________

إيمان :) .. الظاهر إني عملت مشكلة عائلية *15* ..

الحق استخبى بقى.. *12*

________

مظلووووم... إنت شرفت الموضوع *3* ..

وتحية مني لكل أهل الشرقية .. خصوصا آل الشتري. *6*