بين كل طلعة شمس وليلة

[madawi]

بين كل طلعة شمس وليلة
حدوتة صابحة وضحكة وميلة
هنا فى الغيطان...هانم وفضيلة
بيعدوا أحلى بنات العيلة
اللي فى دارها...واللي بعيالها
واللي حبيبها فاتها وهجرها

وعلى المصاطب...أيوب وغالب
بيحكوا عاللي فى الغربة غايب
لا همه أمه ولا بنت عمه
ولا فى الحكاوي بقى له نايب
سافر وغاب...باع الحبايب
نسي جيرانه وابوه الشايب

وسنين تعدي وراها سنين
والضحكة م القلب... بتصغر
لا سمعنا كلمة من الغايبين
ولا اللي حاضر جيه شقر

بس احنا لسه بخير عايشين
مادام بنقدر نتصبر
ومادام طريقنا طريق واحد
مهما الخطى فينا تأخر
حيرجع الغايب لينا
وبدمعه...يصفا ويتطهر

مهما الفراق طول يابلد
راجعين ولاد النيل الاسمر
حالفين لايبنوا على ترابك
جنة...الزمان بيها يستعبر!
---------------------------
مضاوي

[بنت مصر]

جميلة يا بنت النيل الروحية
رغم بعد المسافة واختلاف الهوية
الا اني أكاد اجزم من شدة عشقك لمصر
وكتابتك فيها انك احب لها ولنا من ألف مصري



اشكرك اختي مضاوي وتقبلي كل الحب والتقدير يا غلية

[د. جمال مرسي]

كتاباتك العامية يا مضاوي توحي بانك مصرية صرف
فاللغة و الاحاسيس و الشعر كلها امور اجتمعت لتشكل لنا لوحة جميلة
دمت بخير اختي الكريمة
و اهلا بك
د. جمال

[وحي الشباب]

مقطع من فلكلور مصري جميل
سيناريو تصويري غاية في الروعة

تحياتي
وحي الشباب