قصيدة " لو فى عروقك حبة دم " للشاعر أشرف عزمى

[أشرف عزمى]

لو فى عروقك حبة دم



صحيت م النوم ..

لقيت الروح

عامله سدود جوه عروقى

مانعه مرور الدم لقلبى

لقيت القلب الساكن فيا

أصبح بور

نشفت كل قناية بتسقى فى أرضى

شايل جوه القلب سراب

كل ما بااجى أروى فى عطشى

ألقى فى قلبى صحرا كبيرة

قلت أعاتب روحى

لجل ما تفتح سكه لدمى

قالت روحى

لو تستاهل إنى أرويك

كنت رويتك

نفسى أحول كل حجارة قلبك

خضرة

نفسى أشوفك روح بتحس الكون

حواليك

كل سنين عمرك فاتت وأنا بداديك

لساك برضه جوه فى نفسك

عايش وحدك

قلت أحاول أخنق فيك

أمنع دمى اللى بصحيك

علشان قلبك عود نفسه

يبقى حجارة

مالها علاقه بالإحساس

رد عليا وقولى بربك

ليه هتعيش

أو بتحاول تفضل عايش


ما تشوفنيش


ليه مستحمل تفضل عايش

لاغى كرامتك

ذالل نفسك للأوباش

زيك زى العبد لسيده

طايع أمره

واما بيزهق منه يبيعه

دا احنا بقينا بيعه وشروه

زى بضاعة رخيصة فى سوق

بكرة هسيبك واخرج منك

وارجع تانى للى خالقنى

بكرة هسيبك تبقى تراب

قبل ما أسيبك

نفسى تبحلق من شبابيكى

شوف إخواتك . حس بناسك

هتشوف أرضك والصياد





ما بيصطادشى غير عصافير


وأقرى حروف الدم تقولك

إن " محمد " ويا " براء "

ماتوا فطييييس

وإن الرضع

رضعوا فنابل ويا بارود

راحوا ملايكه عند خالقهم

وإن سجون أراضينا . بيوتنا

والسجان . حيوان شاذ

مارس كل شذوذه الفاجر ويا جتتنا

والمفضوح

بعرض كل فضايحه ومكره

جوه شاشاتنا

أصله شيطان . مصاص دم

هوه دا حال الأمة معاك

لو حسيت

إن الحال ده منغص عشتك

لو يوم فارت

جوه عروقك حبة دم

أو يوم فقت

وإنتا مصمم تاخد تارك

هاجى أكسر

كل سدود جوه عروقك

لجل ما نروى الأرض الصحرا

تطرح خضره ونبقى كيان

يرعب كل شيطان بيفكر

يلغى وجودنا

والا يحاول

إنه يعيش من دم أهاتنا

لو فى عروقك حبة دم