قصيدة "كراكيب الروح " للشاعر أشرف عزمى

[أشرف عزمى]

كــراكيـب الـــروح



نايم ..

وبفتش جوه الروح

على كراكيب متشاله

فوق رف مكسر

جوه دولاب مقفول

ضايع مفتاحه

وحروف عماله بتلعب

جوه فى قلبى

بتلف تدور فى ضياع

ولقيتنى قايم

أشطف كل الزهقان

وألملم ..

طراطيف كلام إتبعتر منى

فعصت ف عينى

طوحت الراس

كسرت الأفكار الملعونه

وبلعت حروفى

ورجعت أدوب فى الفرشه

............

.......

وبفتش جوه الروح

وألاقى هناك ..

أحزان مركونه

وجروح عماله بتنزف

واليوم بيعدى

وفكر مدوب نفسه

جوه مواقع مليانه أباحه

وكيف بيعلى دماغ

بتشعشع ضلمه

تطفى كل ضمير بيحاول يصحى


وبلاقى عتامه هناك تخنق


وبتسرق كل الأفكار

شطيت !

وحريقة تقوم فى الفرشه

.............

.........

وبفتش جوه الروح

وبلاقى ضياع زحام جوايا

زحام على لقمة عيش

طوابير

وأنا واقف مستنى الدور

والعمر بيهرب

ولا مرة نصفنى أى طابور

وإدانى الفرصة

أكون إنسان موجود

ولقيت الروح

وخدانى وشده إيديه

لبحر غوييييييييييط

مرعووووووب

مرعوب م الخوف على بكره

مرعوب من نظره

يرقص جواها عفار

وألاقى سواد فوق راسى

وألاقى الأرض تدب نيران

ماتت كام وردة

وطارت روح هتصحى أروحنا

................

.........

وبفتش جوه الروح

عن أنفاس مكسوره

والدم يسيب أصحابه

ويسقى فى الجدران

ودموع فحرلها قنايه

جوه خدود ممصوصه

وتل هموم

ما تشيله جبال

بس الروح ..

.. شيلاه

[أمير المصرى]

خير يا عم أشرف
ايه السوداوية اللى بتنشع من كلامك دى
انا مش ناقد فنى علشان اقيم اللى انت كتبته
انا باقول رأيى فى معانى كلامك
بلاش تشاؤم
كبر دماغك علشان ماتتعبش
وأنا آسف لو كلامى زعلك بس ده رأيى

[محمد الدسوقي]

" أشرف عزمي "



مش لاقي كلام



ولافى الأحلام



علشان الخوف من بكره



ينام ......



وتعيش أيامك مع حلم جديد



بدون موعيد



سعدت بمروري



وتجرعت من تلك الألام ما يكفي



كن بخير





وبفتش جوه الروح

وبلاقى ضياع زحام جوايا

زحام على لقمة عيش

طوابير

وأنا واقف مستنى الدور

والعمر بيهرب

ولا مرة نصفنى أى طابور

وإدانى الفرصة

أكون إنسان موجود

ولقيت الروح

وخدانى وشده إيديه

لبحر غوييييييييييط