قصيدة شعر بعنوان فى السراديب للشاعر :أشرف عزمى

[أشرف عزمى]

فى السراديب


( 1 )


لما لقيت الدمع ملانى

شفت عروقى بتنزف حزن

طارت روحى هناك لبعيد

لمحت عينى الدم لقيته

حول كل كراته حجارة

تفتك ترعب كل جبان

عامل سبع بس عشان

كل كراته دروع حمياه

وإن سال فينا الدم بحور

هيفضل جوه عروقنا حجارة

ترعب كل خسيس ولعين

سارق خيرنا..

عمال يوئد كل طموح بيقدم فينا

لاهى عقولنا بكل وسيلة

وبيتحكم كده فى مصيرنا

وبحركنا بضغطة زر

إتحولنا خلاص يا خساره

للعبة جيمز

يلعبوا بينا عبر شاشاتهم

كل ما تحلى اللعبة ف عينهم


زى ريبوت مسلوب عقله


تملا ذاكرته ..

يجرى ينفذ كل أوامرك

مش مسموح له إنه يفكر أو يتغير

بس يدور غاميه عينيه

فى مدار ساقية صانعها آبالسة

وبإحكام


( 2 )

تعب العقل من دى الفكرة

قلت أطير وألحق بالروح

أدخل فيها وأمشى شويه

فى السراديب

خرجت عينى شايفه هناك

مصباح نور " لعلاء الدين "

راكن نفسه ..

جنب فانوس سحرى صغير

داب فى مرايته صوره لسمكه

شايله فى جوفها خاتم سيدنا

قلت دا يومك قوم وأتحضر

قوم هترجع عقلك .. حقك

دعكت الخاتم والمصباح

ويا فانوسى السحرى كمان


خرجوا تلاتة عمالقة جان

بعد الرهبه ما دبت فيا

طلبوا أوامرى

قلت ونشوة نصر فى دمى

نفسى أتحول جان زيكوا

نفسى مفيش ولا إنسى يشوفنى

لجل ما أرجع حقى وأرضى

علشان يرجع دمى فى لحمى

بصوا لبعض . كإنى طلبت

يخلقوا كون من تانى جديد

سكتوا شويه وردوا عليا

طلبك ده مش بإيدينا

ولا يوم نقدر إن نغير

حاجه خالقها المولى تعالى

( 3 )

خيبه وحسره وكسرة نفس

قادت فيا

صعبت عليهم . قالوا يا إنسى

قوم وإسمعنا

عمر الحق يا إنسى ما يرجع بالإحساس

و لا حيرة ودعوه ولا بتمنى

يرجع حق لصاحب حق

وانتم كنتم أعظم أمه

فى الكون كله

إيه غيركم

إيه نساكم كل تاريخكم

إيه حولكم مسخ

لقيت الدمع إتسرسب منى

نازل عمال يكوى فى روحى

قالوا .. يا إنسى بطل تحلم

غير نفسك قوم وإتحرك

وإرجع تانى دوب فى عقيدتك

واوعى تقوقع نفسك تانى

بطل تدخل فى السراديب

خرج حسك بره بعيد

بعيد عن روحك

يغزل نفسه فى حس العالم

من حواليك

ينسج نور ..

نور بيسود العالم كله

يرجع حقك يملا عينيك
إيه طلباتك تانى يا إنسى