الشاعر أحمد فؤاد نجم

[حسام عمر]

الشاعر أحمد فؤاد نجم


http://elfagome.itgo.com/ngmnew.jpg
" أنا الفاجومي ... مواطن غلبان .. شايل في قلبه ... وطن الاسم ... أحمد فؤاد نجم .. المهنة ... شاعر النوعية ذكر ... وفوق دا كله باتمتع بجنسية مصر العربية .. ولا تتعجب يا أخي .... إنها إرادة الله ...!!! اللي شفته حاقوله ,,, من طقطق لسلامو عليكو ... عجبك كلامي ... اشتري ، وأهل زمان يقولوا الشاري كسبان والبايع خسران . ما عجبكش ... بين الشاري والبايع .. يفتح الله . وربك رازق البعض من البعض .. وغاني البعض عن البعض .... الله يرحمك يا أمه ..."


حالة فريدة في بساطتها لا تتكرر بين المبدعين فهو على حسه المرهف صورة من رجل الشارع بكل تفاصيله اليومية وبحياته الساذجة الذي أكسبته الطبيعة تلقائيتها وبوعيه الكامل للحياة القاسية التي غلفته والذي عبر بالعامية عن كل أوجه الحياة .

ولد الفاجومى أحمد فؤاد نجم صاحب العينين الخضراوين في "عزبة نجم" بالزقازيق يوم 22/5/1929 توفى والده وهو في السادسة من عمره ، وعاش نجم مع أفقر فقراء مصر من الريف إلى العاصمة في "حوض آدم" بجوار الأزهر الشريف في حي الغورية وهو حي قديم تهدم تماما بفعل الزلزال وقد أعطته الحكومة شقة في منازل الإيواء التي تم توزيعها على المتضررين من الزلزال ، وقد عرف الحياة القاسية منذ صغره ولازمه الفقر حتى الآن بالرغم من شهرته .

وبدا حياته العملية كعاملاً في سكك الحديد في ( 1951-1956) ثم عمل طوافاً بريدياً واكتشف في طوافه حجم القهر الواقع على الفلاحين"، وفي عام 1959 انتقل من البريد إلى النقل الميكانيكي في حي العباسية .


وبدا حياته العملية كعاملاً في سكك الحديد في ( 1951-1956) ثم عمل طوافاً بريدياً واكتشف في طوافه حجم القهر الواقع على الفلاحين"، وفي عام 1959 انتقل من البريد إلى النقل الميكانيكي في حي العباسية .

وفى1962 خرج أحمد فؤاد نجم من سجنه ليلتقي بالشيخ أمام عيسى الملحن الفقير الضرير رفيق الطريق وقد عبرا سويا عن كل قوى التغيير في المجتمع في الشوارع في المصانع وبين الطلاب في الجامعات ، وتعاقد الثنائي نجم - إمام على أن يكتب أحدهما وأن يغني ثانيهما وهكذا كانا متلازمين في كل شئ وحتى في السجن اللذان كانا يدخلاه سويا ويخرجان معاً أو منفردين ليعاودا النضال ، وبدأت حياتهما معا في حوش آدم وقد نجحا في إثارة الشعب وحفز هممه قديما ضد الاستعمار ثم ضد الديكتاتورية الحاكمة ثم ضد غيبة الوعي الشعبي، ويقول نجم عن رفيق حياته انه(أول موسيقي تم حبسه في المعتقلات من أجل موسيقاه وإذا كان الشعر يمكن فهم معناه فهل اكتشف هؤلاء أن موسيقى إمام تسبهم وتفضحهم) وقد انفصل هذا الثنائي بعد فترة واتهم الشيخ إمام قرينه أحمد فؤاد بأنه كان يحب الزعامة وفرض الراى وانه حصد الشهرة بفضله ولولاه ما كان نجم ولكن هذا هو القدر أراد أن يحرمنا من ثنائية جميلة أمتعت الجمهور العربي استمرت طوال 35 عاماً قبل وفاة الشيخ إمام .

ويقول احمد فؤاد نجم عن نفسه أنا فلاح مصري مواطن عربي منتهك الأرض والعرض مكبل ومطارد ، أنا حفيد الفلاح الفصيح فلاح مصري فاهم كل حاجة ولا أستطيع أن أبلع لساني ، واحمد فؤاد نجم لا تسطيع فصله عن العالم المحيط وعن المجتمع البسيط وان تدرك مدى حب الناس له من أصدقاءه المحيطين به .

وأحمد فؤاد نجم الشاعر المنطلق المندفع كثيرا والذي لا يخشى القوانين ولا القيود في سبيل قول ما يراه ويعتقد فيه والذي تظاهر للمرة الأولى سنة (1946) وكان لا زال في السابعة عشر من عمره مع (90) ألف عامل مصري ، وقد سجن تقريبا طوال فترة رئاسة الرئيس السابق محمد أنور السادات يقول إن صحراء الوطن العربي انتقلت من الأرض إلى عقولنا فالإنسان العربي متصحر ولا يمكن الإبداع تحت كل هذه الضغوط وترسانة القوانين المقيدة للحريات في الوطن العربي وأنظمة الحكم الفاسدة ويقول عن نفسه انه مجنون لذلك أبدع ولكن ليس كل الناس مجانين و كل إنسان موهوب في اتجاه لكن الخوف والرعب قاتل الناس.
ويرى أحمد فؤاد نجم أن العامية أهم شعر عند المصريين لأنهم شعب متكلم فصيح وأن العامية المصرية أكبر من أن تكون لهجة وأكبر من أن تكون لغة فالعامية المصرية روح وهى من وجهة نظره أنها أهم إنجاز حضاري للشعب المصري واحمد فؤاد نجم شاعر متدفق الموهبة فقد ألف العيد من الاغانى والتي تعبر جميعها عن رفضه للظلم وحبه الفياض لمصر واستيعابه الكامل للواقع الأليم .

ويرى الفاجومى إن الثقافة الحقيقية تكون من الشارع والناس وليس من الكتب وبالرغم من ذلك كانت للشاعر المبدع قراءاته العديدة والتي بدأها بقراءة القران الكريم وحفظه وقرأ كتاب "الأمل لمكسيم غوركي" وقرأ معظم كتب المسرح العالمي وعشق المتنبى وببرم التونسي و ابن إياس والجبرتي كما قرأ العديد من الروايات المترجمة لديستوفسكى وتشيكوف ومبدعينا الكبار طه حسين وتوفيق الحكيم وغيرهم. وقال عن فؤاد حداد "لو أنه هناك أكاديمية لشعر العامية المصرية هيكون حداد عميد الأكاديمية" أما عن صلاح جاهين فيقول "أنا أسميه الطفل الإلهي هو مجمع عبقريات وبسيط بساطة الفلاح المصري ومجروح وطفل مثل أي مصري حقيقي وقال عن الابنودى انه يعرف طريقه جيدا وهو طريق السلطة .

وأحمد فؤاد نجم له خمس زيجات وقد سبق له الزواج من صافيناز كاظم وعزة بلبع وسونيا مكويو الجزائرية ويقول عن تعدد زواجاته أنا لم اندم على شئ كل منهن تجربة استفدت منها ، وقد بدأ في كتابة مذكراته والتي تحمل عنوان فاجومى الأول والثاني .

وقد تردد عن الفاجومى انه يكتب قصائده وهو تحت تأثير المخدر ولم ينفى ذلك بل قال ليست شائعة لكن بالطبع ليس شرطا للكتابة فشرط الكتابة الوحيد أن أكون على قيد الحياة.

وفى العام الماضي 2001جمعت تجربة جديدة الشاعر المصري الشعبي احمد فؤاد نجم في قصيدته الجديدة "عودة إلى الماضي" والملحن يحيى غنام وفرقته الموسيقية التي تحاول تقديم موسيقى مغايرة ، وتعتبر هذه التجربة الأولى من نوعها لنجم في تقديم قصيدته غنائيا على أنغام موسيقى حديثة تجمع بين الجاز و الروك والمقامات الشرقية التي تتميز بها التجربة الموسيقية ليحيى غنام.


وقد فازت أول أعماله الشعرية والتي تحمل عنوان "صور من الحياة والسجن"بالجائزة الأولى في مسابقة نظمها العقاد وقد كتب فؤاد مسرحيات عجايب - شلتوت العظيم - لولي وغيرها ، وقد عشق فاجومى مصر كما عشقته وعشقه أهلها وقصيدته (يا مصر) التي كتبها من المعتقل في 1970 يظهر فيها هذا الحب والذي يقول فيها :

فلاحينك هما هما
فلاحين رمسيس وخوفو
جيش
لا عيش ولا زمزميه
في الهجيره تبل جوفه
المرض للموت يجرة
وهو ماشي
يجر خوفه
أعمي
سالك سكه عتمه
خطوته
على قد شوفه
فينك خواطر ؟
بعدت عنكم في زحام مصر القديمة اقابل ناس تانيين ؟
علي مسئوليتي؟

[حسام عمر]

http://www.omeldonia.com/../../adminupload/articls/image/f797_4.jpg






حوار مع نجم



هواء بارد فى صيف مكدس بالعرق.. يشبه صدمة فى هذا المكان.. تدخل، غرفة فقيرة ومتسعة على »سطوح« إحدى مساكن الايواء بجبل »المقطم«، يجلس هو وحوله جمع من الأصدقاء، لا تستطيع أن تميز ملامحه وسط كثافة دخان السجائر »والشيشة« وصوت الكلام والغناء والهمهمة. قلعة دافئة من المشاعر الإنسانية يحتمي بها وتحتمي به، لذا يمكنك أن تعتبر الشاعر أحمد فؤاد نجم حالة فريدة فى بساطتها.. لا تتكرر تقريبا بين المبدعين فهو على حسه المرهف إلا أنه صورة طبق الأصل من رجل الشارع بكل تفاصيله اليومية.

* من هو »نجم«؟ ـــ فلاح مصرى، مواطن عربى منتهك الأرض والعرض مكبل ومطارد ومضطهد مثل مئات الملايين العرب، وهم كثرة لكن مع »قلة بركة« على رأي أمي. شوف طريقة حكمنا وسكوتنا العجيب. أنا واحد من هؤلاء. * كلامك عن »نجم« المواطن، فماذا عن ذاتك الخاصة بعد تخليصها من المجتمع والسياسة وصراعهما؟ ـــ لا يمكن أن أنفصل عن الواقع. بإختصار أنا حفيد الفلاح الفصيح. فلاح مصرى فاهم كل حاجة ولا أستطيع أن أبلع لساني مثلما قالت أمي وهي دي الحدوتة.
* ماهي المشاعر التى تسيطر عليك الآن؟ ـــ أكره الظلم، أخاف أن أظلم. أحب العدل والناس والأرض الخضراء. أكره الصحراء جدا. * لكن أرض العرب كلها صحراء؟ ـــ لذلك أكره مافيها، أكره كونها صحراء غير قابلة للتغير: أنا زرت أغلب الوطن العربي المغرب - ليبيا - عدن - سوريا - لبنان وفي مرة سألت العقيد القذافى: تفتكر ربنا أعطانا وطن لا نستحقه؟ قال حتى الآن نعم.. وأنا أعجبت بكلامه. لكن عموما يظل لدي الأمل لأنه لا يمكن المصادرة على المستقبل أو نسحب خيبة جيل على جيل آخر.

* هل انتقلت الصحراء من الأرض إلى عقولنا؟ ـــ الصحراء داخل القلوب.. الإنسان العربي متصحر ولا يمكن الإبداع تحت كل هذه الضغوط وترسانة القوانين المقيدة للحريات فى الوطن العربي وأنظمة الحكم الفاسدة، كيف نبدع إذن؟
* لكنك أبدعت تحت نفس الظروف؟ ـــ مجنون.. وليس كل الناس مجانين، إنما لو المناخ العام حرية سيكون الجميع مبدعين - كل إنسان موهوب فى إتجاه لكن الخوف والرعب قاتل الناس. هو المخترع مش مبدع.. هل لابد أن يكون المبدع كاتبا أو شاعرا، العامل و »الصنايعى« كلاهما مبدع، لو نظرت إلى مستوى الصنايعية المصريين من 50 عاما وقارنته باليوم ستجد تدهورا شديدا.. لأن أى واحد يشتغل فى أي حاجة لا يوجد حب للعمل، وأنا في وجهة نظري أن الفنان لو متوسط الموهبة ويحب عمله سيكون فنانا عظيما، لا يوجد لدينا تخصص لأن مناخ العرب جميعا سيئ وضد الحرية والإبداع. ونحن فقط نسبح بحمد الحاكم ومجرد مايحدث ذلك سيختفي سحر الفن والإبداع تماما.

* بعيدا عن قضاياك العامة، من هؤلاء المحيطين بك والمقيمين بشكل متكرر فى غرفتك الخاصة؟ ـــ هؤلاء جيراني وأصحابي من »حوش قدم« قدمنا معا نسكن مساكن الزلزال. لأن »حوش قدم« كان حيا عجوزا وتهدم تماما.. وأنا سعيد بذلك لأن بيتى هناك كان على وشك الانهيار. وبعد الزلزال نقلونى إلى هذه الشقة.. كنت (هانام) في الشارع.
* مادمت ذكرت »حوش قدم« إذن لابد من الكلام عن الشيخ »إمام عيسى«.. لماذا انفصلتما بعد هذه التجربة الفريدة؟ ـــ الإجابة على هذا السؤال صعبة جدا ولا أقدر عليها. * لماذا؟ ـــ لأنها تجربة انتهت، إنما يظل الشيخ »إمام« فنانا عظيما خدم أمته وخدم الموسيقى وإنحاز للفقراء حتى موته.. »إمام« أول موسيقي تم حبسه فى المعتقلات من أجل موسيقاه.. وإذا كان الشعر يمكن فهم معناه. فهل اكتشف هؤلاء أن موسيقى إمام تسبهم وتفضحهم.. تجربتي مع إمام هامة جدا والآن هي ملك للناس.

* ما رأيك فيما يقال بأنك حصدت الشهرة بفضل الشيخ إمام ولولاه ما كان »نجم«؟ ـــ أنا لا أقول إلا أننى وإمام خدمنا الفن الشريف معا وعملنا بداية مرحلة للغناء المختلف، صحيح أنهم الآن يحاصرونها بالتجاهل والصمت. لكني على ثقة أنها ستفرض نفسها وتكون السائدة فى يوم من الأيام. لأن الفن لا يموت.. وهناك بشائر على ذلك.. هناك مجموعات من الشباب والفرق الخاصة تقوم بغناء ماقدمناه أنا و »إمام« وليسوا فى القاهرة وحدها.. أنا من يومين كان عندي شباب من فلسطين وقالوا ان هناك فرقا كثيرة تغني للشيخ إمام.. اللي عند الناس لا يضيع.. ولا تستطيع كل الأنظمة أن تفتش عنه فى القلوب.

* لكن هل صادفتك تجارب مشابهة لما فعلته أنت و »إمام«؟ ـــ هناك تجربة »جمال بخيت« وفاروق الشرنوبى. لكنها لم تنجح، لا يمكن أن يكون هناك وهنا فى نفس الوقت.. هما لعبا على شغل السياسة وفى نفس الوقت سوق الشرائط الكاسيت.. ففشلا.. لكننى والشيخ إمام كنا متفرغين تماما ولم نكن نأخذ مقابل.. صاحب بالين كداب.. إما أن تكون مع الناس أو تكون مع الاعلام هذه معادلة محسومة.

* قلت ان التجربة أصبحت ملك الناس. فمن حقهم إذن أن يعرفوا لماذا انتهت بانفصالك عن »إمام عيسى«؟ ـــ يعني، سفر باريس لخبط الدنيا.. وأنا كنت عارف وأشعر بذلك، وقلت لإمام بعدم رغبتي فى السفر. * يقال ان الخلاف كان بسبب الأجر المادي؟ ـــ لا أستطيع أن أقول ذلك حتى لا أهين صديقي الشيخ إمام لكنه وقع ضحية مؤامرة وضحكوا عليه. * من الذى ضحك عليه؟ ـــ كثيرون، منهم الأخ ياسر عرفات والمخابرات الجزائرية والمكتب الفرنسي عن طريق مندوب تونسي اسمه الصادق بوزين وتقريبا أقنعوه بالإنفصال. * ما الذى حدث تحديدا، هل تهرب من الاجابة الواضحة؟ ـــ قلت اننى لا أريد أن أسيئ لإمام لكن ماحدث أنه فجأة قال لي كفاية كده وقرر عدم العمل معي مرة أخرى ولا أعلم السبب حتى الآن.. وهو مات وسره معه. لكن عموما هذا من حقه وأى تجربة تنتهي والموظف يخرج على المعاش.

* لكن الفنان ليس موظفا ولا يحتاج للخروج على المعاش؟ ـــ هذا كان رأيه.

* بعد »إمام« هل وجدت من تكمل الطريق معه؟ ـــ لم يكن هذا الطريق مطلوبا وقتها.. كان المطلوب الابداع فى طرق ومجالات أخرى.. لذلك كتبت مسرحيات عجايب - شلتوت العظيم - لولي.. وغيرها.. وبدأت فى كتابة مذكراتي فاجومى.. الأول والثاني، يعني نفترض ان الشيخ إمام أو أنا انتقلنا إلى الرفيق الأعلى قبل أن ننفصل كانت التجربة ستنتهي وهذا طبيعي وعلى من يبقى أن يستمر فى طرق أخرى المهم أن نتواصل مع الناس بأي شكل من أشكال الإبداع.


* جلساتك الغنائية مع »إمام« كان يحتشد بها المثقفون، أين ذهبوا الآن؟ ـــ عقبالك هاجروا لـ »يجيبوا فلوس«، عموما »كويس مش وحش«. * هل تلوم عليهم؟ أنت أيضا اقتربت جدا من الرأسمالية الجديدة فى مصر؟ ـــ ياريت لم أكن لأعيش فوق السطوح.

* وماذا عن علاقتك بنجيب ساويريوس وحفلته الخاصة بك؟ ـــ كل ماحدث أن أصدقائى أرادوا أن يحتفلوا بعيد ميلادى الـ 70 وهم عمار الشريعى، وفردوس عبدالحميد ومحمود حميدة وعزة بلبع وحاولنا أن نؤجر مسرح الأوبرا لكنهم رفضوا والدكتور مصطفى ناجى قال لابد من موافقة الأمن لا أعرف لماذا.. بعدها تطوع ساويريوس وقال خدوا السينما بتاعتى.. شكرا طبعا.


* ومارأيك في هذه الطبقة من رجال الأعمال ساويريوس وغيره؟ ـــ هؤلاء مصريون ويشتغلوا فى البلد »كويس«.. أنا زرت مدينة العاشر من رمضان ووجدت انجازات. »يلا نحط« إيد فى إيد و »نزق« البلد إلى الأمام. * كل جماعة الاشتراكية القديمة أصبحوا عمالقة الرأسمالية الجديدة.. مارأيك؟ ـــ جميل.. ياريت يكون فى البلد مليون رأسمالي يفتحوا مليون مصنع.. ياريت.. كل الذي يهمنى أنا أرى 50 طلعت حرب فى البلد.

* فى فترة من الفترات كنت داخل المؤسسة، صحيح؟ ـــ لا طبعا، عمري ما كنت فى إطار المؤسسة. * لكنك كنت موظف وتعمل مع يوسف السباعى. ـــ لا. منظمة التضامن مش تبع الحكومة المصرية.. لكني عموما كمواطن غصب عني تابع للسلطة وليس بإختياري وإنما كفنان عمري ما كنت داخل السلطة ولا تابع لحزب من الأحزاب. * بإختصار مارأيك في السادات وعبدالناصر؟ ـــ عبدالناصر مختلف تماما عن السادات. »وناصر« كان صاحب حلم وطموح ووطنية مشرفة.. السادات سجننى طوال فترة حكمه. كل ما أخرج من المعتقل أرجع مرة أخرى. السادات لم يكن بطل الحرب والسلام.. بطلها الحقيقي هو عبدالعاطي صائد الدبابات وزملاؤه الجنود.. الأرض لم ترجع بكلام السادات لكن بدماء الشهداء الذين لا يذكرهم أحد.

* والآن؟ ـــ الآن نحن في مرحلة هلامية غير مفهومة.. عبث.. تماما مثل مسرح العبث اللي طلع فى أوروبا بعد الحرب العالمية الثانية نعيش الآن مرحلة العبث.. كل يوم نسمع عن مسئول يسرق وينهب ولا أحد يحاسبه.. زمان كان المجرم يتم تجريسه أي يركب على حمار بالمقلوب ويتم إعلان فضيحته في الشارع.. الآن نسمع عن السرقة ولا نعرف جزاءها - من يوم ما السادات قال اللي يكسب يكسب بس يدينى حقى والمجتمع فلت.. السمك الكبير يأكل الصغير، وأنا أعرف صديقة فرنسية سألتني: يانجم بلغة الكمبيوتر والحسابات والأرقام مافيش دولة عندكم أو عند العرب كيف تعيشون. قلت لها: إنتوا عندكم حاجة اسمها بركة دعاء الوالدين.. لم تفهم.. فقلت لها عندنا حاجة اسمها بركة دعاء الوالدين وبها فقط نعيش. * نبتعد عن السياسة وهمومها، هل لك علاقة مباشرة بأجيال الشعر الجديدة؟ ـــ طبعا. وأنا حريص على الكلام معهم أسمعهم كثيرا لأنهم فى حالة كبت وقرف.. فالذي يجلس على الكرسي لا يريد أن يتركه حتى فى الشعر.. والشباب لا يجد من يسمعه.. وبعد فترة أطلب منهم أن يسمعوني لأنقل لهم خبرتي. لأننى لن أعطيها أبدا للإعلام الرسمي أو المؤسسة. * ما رأيك في شعر »العامية« الآن؟ ـــ صراحة أنا مقصر فى متابعة أعمال هذا الجيل بشكل كاف لكنى واثق أنه سيكون هناك جيل بديل مليء بالمبدعين والشعراء. لأن العامية أهم شعر عند المصريين لأنهم شعب متكلم.. احنا شعب غناء. وإلا حاول أن تتصور مدة 20 عاما تكلفها بناء الهرم هل كانت فى صمت. بالطبع لا الهرم بني بالغناء.. نحن شعب متكلم فصيح.. والعامية المصرية أكبر من أن تكون لهجة وأكبر من أن تكون لغة.. العامية المصرية روح.. وأنا من وجهة نظري أنها أهم انجاز حضاري للشعب المصري.. والشاب يقول لي عن حاجة اسمها الشعر الحر بالعامية أو قصيدة النثر العامية أنا لا أعرفها.. لكن أرفض مهاجمتها.. نهاجمها ليه.. دعونا نترك التجربة ربما تنجح.. ألا يكفي الموانع والقيود التي يعانيها الشباب.. كمان هنكتم نفسهم بالمقولات الباردة يجب ألا ننسى أننا سلمناهم الوطن وهو مهلهل ومدمر تماما.. المفروض أن نخجل من أنفسنا.. ولا نكون أوصياء عليهم.
* ثقافتك الحقيقية من الشارع والناس أم الكتب؟ ـــ طبعا من الناس والشارع والحمد لله تكفيني لكي أرى بوضوح وأعرف عدوي وصديقي وأنا ابن مين وأنتمي لمن وضد من. * وثقافة الكتب؟ ـــ طبعا الكتاب غير محرم علي.. وعموما أول كتاب قرأته وحفظته هو القرآن الكريم.. والكتب الأخرى أولها رواية الأم لجوركي ولم أفهمها أول مرة بعدها قرأت تقريبا أغلب كتب المسرح العالمي. وفي الأدب العربى عشقت المتنبى وعم بيرم التونسي و ابن اياس والجبرتى.. وروايات مترجمة كثيرة ديستوفسكى وتشيكوف ومبدعينا الكبار طه حسين وتوفيق الحكيم وغيرهم. * لم تذكر فؤاد حداد وصلاح جاهين؟ ـــ قرأت لهما فى وقت متأخر.. وكل منهما يحتاج لكلام طويل لا ينتهى. فؤاد حداد أستاذ الأساتذة.. يعني لو أنه هناك أكاديمية لشعر العامية المصرية هيكون »حداد« عميد الأكاديمية.. وفى رأيي أنه لا يقل شاعرية عن عبقرية الفصحى والمتنبي وأبوتمام وغيرهما.. وهو صاحب اختراعات وأشهر كشاف لمعانى الكلمات والتراكيب وشعره عظيم لكنه ليس بسيطا.. هو غابة ومتاهة. * حداد قال أنا والد الشعراء فؤاد حداد مارأيك؟ ـــ بالطبع كما قلت هو شاعر عظيم وله تلاميذه لكننى لست واحدا منهم. أنا تلميذ الناس وتلميذ أمي ولم أتتلمذ على يد أحد من الشعراء.

* وماذا عن »جاهين«؟ ـــ كان أقرب للشارع. أنا أسميه الطفل الإلهى هو مجمع عبقريات وبسيط بساطة الفلاح المصري ومجروح وطفل مثل أي مصري حقيقي.. يكفي أن أذكر له إحدى الرباعيات: أنا قلبي مزيكا بمفاتيح من لمسة يغنيلك تفاريح مع إني مافطرتش وجعان ومعذب ومتيم وجريح * جاهين مات بعد وبسبب الهزيمة، وعلى العكس ظهرت أنت وبدأت إبداعك. لماذا؟. ـــ جاهين سقط مشروعه بالكامل ورهانه، والذي يقول أن جاهين كان يكتب أشعاره العظيمة خوفا أو تملقا لعبدالناصر فهو هذا الكلام العاشق لا يخرج إلا بحب وإيمان وجاهين كان مؤمن بما يقول. * وهل تعتبر الأبنودي إمتدادا لهما؟ ـــ لا، الابنودى طريقه مختلف تماما، ده راجل كويس جدا وعارف طريقه بالضبط من يوم ماجاء القاهرة وترك قريته بالصعيد.

* طريق أيه؟ ـــ طريق السلطة طبعا. * ماهي الأصوات الغنائية المقربة لك الآن؟ ـــ فيروز وأم كلثوم وعبدالوهاب وفي تلاوة القرآن الكريم الشيخ »مصطفى إسماعيل«. * وبمناسبة الغناء، أنت عشت طفولتك فى الزقازيق وقابلت عبدالحليم فى الملجأ. لماذا لم يغن لك عندما أصبح مشهورا؟ ـــ الظروف لم تسمح.. وعندما كنت أكتب الاغاني كنت أتمنى أن يغني لي عبدالحليم لكنه تباطأ.. ولما أصبحت شاعرا سياسيا رفضت أن يغني لي لأنه أصبح جزءا من المؤسسة أصبح فنان سلطة مثل أم كلثوم وعبدالوهاب.. استطاعت السلطة أن تقربهم لها وأصبحوا هم أنفسهم سلطة، تحول دون الأصوات الأخرى ليس فى مصر وحدها بل في العالم العربي كله.. * وإذا تكلمنا عن حياتك الشخصية، معروف أنك كثير الزواج؟ ـــ الموجودة معي الآن هي زوجتي الخامسة.. والسابقات منهن صافيناز كاظم وعزة بلبع وسونيا مكويو الجزائرية وكل منهن تجربة استفدت منها.. وأنا لا أعرف شيئا أسمه الندم.. يكفي أنني أكتسبت خبرة جديدة.

* مارأيك فى شائعة أنك لا تكتب إلا تحت تأثير »الكيف« أو المخدر؟ ـــ ليست شائعة.. لكن ليس ضروريا للكتابة. فمثلا كتبت أفضل قصائدي فى المعتقلات ولم أكن في حالة »كيف، لكنه بالطبع ليس شرطا للكتابة. شرط الكتابة الوحيد أن أكون على قيد الحياة.

[حسام عمر]

قصيدة "استغماية"

تقديم للقصيدة من الشاعر:

أنا برضه لاسع وأوقات باعمل حركات عيال . وبصراحه كده ، ربنا ما بيظلمش.
يعني اللي عملوه معايا ، هوا حياقي ويمكن لغاية وقتنا هذا ما خدوش حقهم مني .

يعني مثلا أنا كنت هربان من تنفيذ عقوبة السجن لمدة سنه بتهمة إهانة السيد / رئيس الجمهورية المرحوم محمد الأنور . هو صحيح كان مقدمني لمحكمه عسكريه ، ودا مش من حقه وكان حاططني في دماغه ودا نوع من التفاهه والهبل .. لكن ما انا كمان كان لازم أكن واهمد شوية وانا هربان .
أبدا .. إن كنت انت في غيبتك كنيت أبقي انا كنيت .. يومي على الله كانوا زملائي المتهمين في انتفاضة 18 و 19 يناير سنه 1977 ينزلوا المحكمه ولما الحاجب يده علي اسمي ، يردوا العيال من القفص ، وفي نفس واحد : في السجن . والصحافه القوميه تنشر يوميا ومن غير مناسبه إن المتهم أحمد فؤاد نجم أحضروه من السجن لحضور المحاكمه ! كده يبقوا مأكلين الراجل الكبير الأونطه ومفهمينه إني مسجون .. مش أتنيل واسكت من باب على شمعتك تقيد ؟ أبدا .. كل يوم أكتب جواب _ أقل ما يوصف بيه إنه بذيء _ وأقول فيه : أنا في القاهرة ، ولو عندك جهاز أمن هاتني . واحط الجواب في مظروف عليه عنوان واسم السيد الرئيس وأبعته بالبريد المستعجل على أمل إنه يغضب على وزير داخليته ويطرده ، لإني كنت باكره الوزير ده بشكل شخصي ، ولسبب شخصي ، إنه كان شكله غبي وانا ما بطيقش الغبي ! ولما ما لقيتش فايده في نظام الجوابات .. كتبت القصيده دي . وبرضه ما جابتش نتيجه .
احمد فؤاد نجم



مع القصيدة:


استغماية




غمي عيونك
سد ودانك
إفتح بقك
قول انا فين

الشاطر فيكو
يحزر فزر
في دقيقتين
والإشطر منه
اللي يحزرها
في غمضة عين
والإشطر خالص ما يحزرش
يقول انا فين
والإشطر أشطر
اللي يبص يشوف بالعين
انا فين ؟
فيه ناس
اختلف في الموضوع
وحكاوي اتقالت
عن مواضيع
والناس لا مؤاخذة
في زمن الجوع
يتعشوا كلام
يفطروا تشنيع !

فيه واحد شافني
بلبده ولاسه
في باب اللوق
والتاني
لمحني بقفصين موز
علي باب السوق
والتالت شافني
في كاديلاك
راكب مع بنتين
والرابع
شافني ف طنطا
بابيع
بلابيع ونشوق !
وصحافه الصاوي
والورداوي
والجمال
وأباظه ولاظه
وباقي الدلاديل
والأندال
بتأكد جدا
جدا جدا بالتدقيق
إن انا محبوس
وباروح يوميا
للتحقيق!

طب اصدق مين
وأكدب مين ؟!
ماهي حاجه تمخول أيها عاقل
وانا مجنون
وباكلم نفسي
وعقلي صراحه
ماهوش مضمون
لو كنت بلبده ولاسه
وماشي ف باب اللوق
طب إيه مشاني
مفلس جدا
جنب السوق ؟!
لوكنت بدأت
كتاجر فاكهه
وبقفصين ؟
مش كنت زماني
معلم طمبه
وجوز اتنين؟

لوكنت ف كاديلاك
زي ما قال
التالت بيه
ومعايا بنات
زي الشربات
طب ح انزل ليه ؟!

لوكنت يا طنطا
بابيع بلابيع
وسطل وبخور
مش كنت زماني
مدير على جامع
أو مأمور ؟

وصحيح الصاوي
والورداوي
والجمال
حابسين أفكار الناس
في بلدنا
وعال العال
إياك قاصدين
إن انا مسجون
زي الملايين ؟
كده يبقي تمام
ولأول مره
ح اقول " صادقين "
بس انا لا مؤاخذه
وبالتدقيق
ماحصلشي معايا
ولا تحقيق !
مش حاجه تحير
طب أنا فين ؟
حزرتوا خلاص
فزرتوا خلاص ؟
عارفين
أنا فين
أنا ساكن قلبي ومتونس
بالناس
والناس الونسه كتير
ماليين القلب
وشاغلينه
سارحين في الدم
وفي التفكير
وجناين قلبي العمرانه
بالناس
الأزهار
العصافير
سايعاني
وسايعه اللي باحبه
وتساعي معايا
رفاقه كتير
شايفين انا فين ؟
الشاطر فيكو
يحزر فزر
في دقيقتين
والأشطر طبعا
حيحزرها
في غمضة عين
أنا ...... فين ؟

[حسام عمر]

قصيدة "الإضراب"

تقديم للقصيدة من الشاعر:

قضيت سنه 1977 في سجن أبو زعبل بتهمة التحريض على انتفاضة 18 و 19 يناير 1977
تصور سياديك ! انتفاضة 18 و19 يناير سنه 1977 اللي شارك فيها أكتر من عشرين مليون مواطن مصري من اسكندريه لأسوان ، أنا المحرض الرئيسي بتاعها !!
طب بذمة النبي ، فيه مجد أكتر من كده ؟ مش دي اللي بيقولوا عليها تهمه لاأنفيها وشرف لا أدعيه ؟ أي والله تهمه لا أنفيها وشرف لا أدعيه . أنا يطلع من إيدي أحرض مليون بني آدم ؟
علي الطلاق بالتلاته ميري وملكي وأبو حنيفه ، دنا كنت عملتها دندره . المهم ما علينا .. خرجت من أبو زعبل سنه 1978 ولسه ما خدتش نفسي ، جوني العيال بتوع هندسة عين شمس وقالولي عاوزينك انت والشيخ إمام في حفل نهايه العام الدراسي .. قلت أيواااه . حفله في الجامعه يعني الشيخ إمام يروح على حوش آدم والعبد الفقير ع السجن لزم ! وقد كان

رحلونا على سجن طره ومعايا خمس أشبال من هندسة عين شمس . ويشاء السميع العليم إن يوم القبض علينا يكون هوا يوم الزياره الميمونه للرئيس السادات للقدس الشريف !! شوف حكمة ربنا يا مؤمن ؟ أتاري السيد اللواء رئيس منطقه سجون طره كان من الحراميه التقال ونازل غب ومرستق أموره في المنطقه ومش عايز يمشي ف متعرفيش مباحث أمن الدولة وصوه علينا ولا هوا اللي اتطوع يقرفنا من باب إعلان الولاء وإرضاء أسياده ؟ الله أعلم .. قلت له بلاش ، مفهمش .. يا ابن الحلال احنا أمانه في رقبتك وعاملنا كمسجونين احتياطيين طبقا للايحة السجون ودا أبدا راكب دماغه ، ومن مصلحته طبعا عند أسياده إن احنا نشتكي من سوء المعامله .. بس احنا بقي ما نولناهوش مرامه جهزنا مجموعه من البيانات هربناها للخارج وبدأنا إضراب عن الطعام استمر 12 يوم واتنشرت أخباره في الصحافه العربيه والعالميه وده كان مقتل السيد اللوا الحرامي لأنهم اتهموه بالغفله ونقلوه من تكية منطقة سجون طره اللي كان بالعها في كرشه .
وأثناء الإضراب كتبت القصيدة دي .
احمد فؤاد نجم



مع القصيدة:



الإضراب





باسم الإله الشعب
رب المضربين
الصايم
المحروم على مر السنين
يا منشدين الحي
حيوا حينا
واحنا هنا
ع العهد دايما مخلصين
محلا القصايد
في الشدايد .. والغنا
محلا الكلام الحب
أوقات الشقا
احنا اللي تهنا ع الطريق
من بغضنا
متفرقين
والسجن هوا الملتقي !
آه يا رفاقه
من متاهات الطريق
لما الليالي
بيتخنق فيها القمر
يمشي الصديق
في الضلمه
يخبط في الصديق
والسكه بنت الخطوتين
تاخد سنه !

إحنا النهارده فين
وكام
وبكره كام
وبعده فين ؟
في كل يوم بنزور مكان
وكل يوم
بنزيد عدد
وكل يوم
نفتح بيبان
وكل يوم
بنزيل سدد
وكل يوم
يطلع بنا
وكل يوم
ينزل هدد
وكل يوم
نحبل غنا
وكل يوم
نولد مدد
احنا كده لازم نكون
جوا السجون
برا السجون
محلا القصايد
في الشدايد والغنا
محلا العيدان الخضر
في الربع الخراب
احنا اللي تهنا ع الطريق
من بعضنا
متجمعين
بنخط صفحه في الكتاب
ملعونه قامه تنحني بالقهر
من حاكم .. وخان
ملعونه كلمه تنتني في الحلق
تهرب م اللسان
ملعونه ساعه تنحسب م العمر
يطويها الخنوع
ملعونه لقمه مغمسه بالذل
ملعونه الجبان
آه يا رفاقه
ياللي عملتوا الصلابه للحجر
بانده لكم
وسط الكآبه
والرتابه .. والضجر

يا مقربين الفجر
نوره ومطلعه
مدوا المسامع
في المجامع
واسمعوا
صرخة مغني الحي من جوف العدم
اتجمعوا
اتجمعوا
اتجمعوا

[حسام عمر]

أبو العلا 90"

تقديم من الشاعر:

شرفني الفنان الكبير أسامة أنور عكاشه بإشراكي في العمل في هذا المسلسل التليفزيوني الجميل . وضاعف من سعادتي كون الموسيقار الكبير والعريق الحبيب عمار الشريعي هو الذي قام بتلحين الغناء وحتى كتابة هذه السطور يرفض تليفزيون السيد صفوت الشريف والست لطيفة التونسيه إذاعة هذا المسلسل بحجة أنه يسيئ لمصر !!

ومن باب الفلفصه قررت نشر أغاني هذا المسلسل في هذا الديوان ولا حوجه لتليفزيون لطيفة .
ويغور اللبن من وش القرد .
احمد فؤاد نجم



مع القصيدة أو الأغنية:



مقدمة أبو العلا 90





سافر غريب الدار
مشوار ورا مشوار
بلد الحبايب .. فين ؟
تاه السؤال واحتار
ومشيت كتير ورأيت
ناس ع الطريق ضايعين
ورجعت تاني لقيت
ناس ع الطريق راجعين
وعملت قلبي سبيل
يهدي الحيارى
دليل
وعشقت
عشق النيل
للخضره والنوار
سافر غريب الدار
مشوار ورا مشوار
بلد الحبايب .. فين ؟
تاه السؤال واحتار يا سكه الأحلام
يا مغربه روحي
اشكيكي للأيام
ولا أشتكي روحي
علمتي قلبي يميل
للحب
والمواويل
وحلمت حلم جميل
بالجنه
ونا في النار

[حسام عمر]

شقع بقع





انا الأديب و لا تعرفنيش
تقرالي لكن ما تشوفنيش
كلامي لا هو مادهون ورنيش
و لا المعاني عليها غبار
شقع بقع يا ديل الفار

***
يا شعب مصر يا خم النوم
ما تفوق بقى و تشوف لك يوم
الثورة قامت في الخرطوم
و انت اللي نايم بالمندار
شقع بقع يا ديل الفار
***
يا شعب ثور داهية تسمك
و شيل اصول اسباب همك
عصابه
بتمص في دمك
و الاسم قال ضباط احرار
شقع بقع يا ديل الفار
***
اخدوا اليهود غزة و سينا
و بكرة يبقوا وسطينا
و الراديوهات بتغدينا
خطب و نتعشى اشعار
شقع بقع يا ديل الفار
***
الشيخ امام قال كلمة حق
و الست ثومة قالت لأ
و ابو النجوم على ودنة اندق
في المعتقل و الدنيا نهار
شقع بقع يا ديل الفار


1969م

[حسام عمر]

قصيدة "عطشان يا صبايا "

تقديم للقصيدة من الشاعر:

احنا كشعب بنميل حبتين للحزن والقواق .. يعني بنتلكك عشان نقلبها غم على أتفه الأسباب .. انت مثلا مشفتش الست الوالده وهي ميته على روحها من الضحك وفجأة بلعت ضحكتها .

فيه إيه ؟ هوا الضحك حرم لكن طبيعه بقي .. احنا كده .. جايبين ده منين ؟ الله أعلم
احنا كنا في عز عز النشوه أثناء الملحمه المدهشه اللي أبدعوها ولاد مصر العتر بعد ما عبروا قناة السويس وكنسوا أرض سينا من وساخات التاريخ البشري المسماه بجيش الدفاع الإسرائيلي ، وفجأه رجعت ريما لعادتها القديمه .. حن الرئيس السادات لكاميرات التليفزيون والصحافه فقرر بدون مناسبه إنه يلقي خطاب . خير ‍
طيب .. اتفضل يا عم إلقي .
راح متفضل ، وكعادته ، قعد يقول كلام فصيح جدا لكن مش مفهوم . كل اللي فهمناه إنه أعلن قبول مصر لوقف إطلاق النار .

ونزل الكلام على دماغنا زي الدش البارد ، وزي ما بيقول شوقي بك :


وتعطلت لغة الكلام
لاكن صافيناز قطعت الصمت وقالت:
_ مش هاين عليهم ينتصروا ‍
دخلت حجرة النوم وقفلت على نفسي ولقيتني باكتب .
احمد فؤاد نجم



مع القصيدة:


عطشان يا صبايا




عطشان يا صبايا
وانا عاشق .. ع السبيل
عطشان
والميه ف بلدي
على عكس ما يجري النيل
والنخل العالي مطاطي
والجذع الواطي
ذليل
والريح العاكس
كابس
والريح العاطي
بخيل
والنسمه اتعكر لونها
من هم الناس
يا خليل
عطشان والنيل في بلدي
والزرع اخضر
وجميل
وانا كنت امبارح خالي
واليوم دا
صبحت عليل
عطشان ودوايا حبيبي
يسقيني العشق دليل
ودليل الحب .. عمايل
وكلام الحب جميل

وانا كل ما أقول التوبه
تغويني .. المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع
نهر النيل
وان لاموا علينا
يلوموا
ما لهمش علينا سبيل
ما هو شوك العشق
ملامه
والشوك
في الورد أصيل
ودوني ع السبيل
ودوني ع السبيل

[حسام عمر]

قصيدة "بابلو .. نيرودا

"

تقديم للقصيدة من الشاعر:

كان لازم يحصل موقف م الراجل الكبير ذات نفسه وموقف مش أي كلام .. لأ موقف موقف .. واوعى تقول لي : حرام عليك دا برضه أب والقاتل يبقي ابنه . طب مهو المقتول برضه يبقي ابنه . وبعدين أنا لاسمح الله ما باقلش إنه يقتله راس في راس . بس على الأقل ما كانش سابه يهرب بالغنيمه وياخد مكافأه على قتل أخوه هوا القاتل قتل ليه ؟
قابيل قتل أخوه هابيل علشان مرا .. ازاي انت يا عم آدم سبته يتجوز مرات القتيل !!

آديك زرعت بإديك شجره خبيثه ونزعت فتيل الأمان من حياة الناس ، وبقي القتل أسلوب للتعامل بين البشر . وكان الكسبان فيه _ على طول الخط _ القوي ، مش صاحب الحق ، وبقينا في غابه كويس كده ؟

وبعدين أنا مش ضد إن السياسيين _ في صراعهم علي السلطه _ يقتلوا بعض من باب ( النار تأكل بعضها إن لم تجد ما تأكله ) لاكن يقتلوا العصافير ليه ؟ ويحرقوا الشجر والزهور ليه ؟ هما كانوا زرعوها عشان يقلعوها !

بابلو نيرودا أعظم شاعر أنجبته شيلي على الإطلاق ، وواحد من أعظم الشعراء اللي أنجبتهم البشريه على طول تاريخها .. كل جريمته في نظر اللي قتلوه إنه سخر عبقريته لخدمه الناس الغلابه .. وعلى نوله فضل يغزل الأحلام البمبي .. مدارس للأطفال ، ومستشفيات للمرضي ، ومصانع للعمال ، ومزارع للفلاحين ، ومسرح ، وسينما ، وجناين لكل الناس . يعني بالمختصر كده ، كان عايز يجيب الجنه من مطرح ماهي ويحطها على أرض وطنه .. دي جريمه ؟
وجريمه تستاهل القتل !
دخلوا عليه العسكر بالرشاشات والجزم الضبيشي قتلوه وحطموا أقفاص العصافير اللي كان بيحط لها الحب والميه

وحرقوا المكتبه النادره ، وحطموا أي شئ قابلوه في عش العصافير اللي هوا منزل الشاعر العظيم .

وبعد عشرات السنين ، الناس نسيت القتله ، لكن القتيل حيفضل في ذاكرة الأنسانيه للأبد لأنه انتظم فعلا في العقد الغالي .. عقد الشهدا الأبرار ، اللي قدموا حياتهم تمن للدفاع عن شرف الأنسانيه وكرامة الأنسان .
.
احمد فؤاد نجم



مع القصيدة:


بابلو .. نيرودا






شيلي البارود
حطي الوعود
والتعليلات
في المهملات

سفحوا الورود
من ع الخدود
والخضره
من قلب البنات

فين الأمان
جنب الغيلان
يا ملفقين
عصر التبات ؟

لا الجرح بات
ولا إتنسي
ولا التاريخ
والذكريات
سيدنا الحسين
اسبارتاكوس
الليندي
لوركا
عب رحيم
فلاح بلدنا اللي انشوى
قبل القيامه
في جحيم
سينا الطعينه المزمنه
ارنستو
جيفارا العظيم
خميس وبقري
والشفيع
أدهم
ومواله القديم
قطب الرجال اللي ابتلي
لما تلا الذكر الحكيم
عقد العقيق اللي اتبدر
من عهد سقراط الحكيم
زاد النهارده
وانتظم
بالدره والفص اليتيم
نيرودا
زمار الصباح
نيرودا
مزمار النسيم

صابحه الصبيه
" سانتياجو "
تشرب لبنها من غناك
اتروعوا العصافير
وهاجوا
لما نعيت البوم
نعاك
وانت الشهيد
ملو البراح
جراح تعود المجروحين
ساعتين تشاور
ع الجراح
ينشد ضهر المطعونين
تتمدد إيدهم ع السلاح
وبعزم ما في الموجوعين
تطعن في شريان الطاعون
تجهز
على الداء الدفين
الشمس تطلع بالصباح
ترمي الصباح
على كل الإبد
حاضنه البنادق والجراح
بإيد وعافقه الناي
بإيد
والشمس تطلع في النهار
فوق كل قصر
وكل بيد
والشمس تسقط
في الغروب
عن بابلوا نيرودا .. الشهيد

دواره بتعدي السنين
يا أرضنا
يا ام البنين
دواره بتعدي اللي فات
يا أرضنا يا ام البنات
كروب
حروب
محن شعوب
كلاب
عذاب
ضباب
غروب
بروق
رعود
شروق
صعود
نضال
سجال حرام
حلال
والعدل .. كان
في كل آن
هو القضية
والرهان
والارض عاشت من زمان مسرح لفرسان الميدان
سيدنا الحسين
اسبارتاكوس
جيفارا
لوركا
عب رحيم
نيرودا زمار الصباح
نيرودا
مزمار النسيم

[حسام عمر]

الشاعر الأكره






أنا الأديب لما أتكلم ما باخليشى
لأني جاهل
وفاجومي
ومخ مفيشي
وأي تغيير في حياتي
ميتعبنيشي
وأنا اللي قولي على نويى
مش من بره
وأبدأ كلامي عن الأشعار
واللي زانوها
بيرم وخيرى
وكل الناس اللي صانوها
أما الكلاب عند الجواسيس
واللي خانوها
فدول كلاب
وما مبنذكروش هنا بالمره
الله الله يابدوي
هنا بالمره
***
ياعم بيرم وحياتك
واللي أماتك
وخلا الناس مآبين
عايشيين على مقالاتك
وواد مباحث يتطاول
على مقاماتك
لاجعل الشعرا الأندال
مسخه وعبره
الله الله يابدوى
هنا بالمرة
***
فى كل مولد ياشويعر
لفلفت حزام
ورقصت تبع المزيكة
وكنست مقام
وصاحبت كل الألاتية
ومشيت خدام
لكل عالمة وشبشبها
حسب الأجرة
***
حرباية يابن الحرامية
مية المية
على كل لون جاهز تركب
ع التسقية
أما انت مالح ومزبط
وابن غبية
وحصانك اللي راهنت عليه
يخسر بكره
الله الله يابدوى
يخسر بكره
***
الطبل غير الشعر يا واد
ماتهبلشي
وأى شخص يكون شاعر
مايطبلشي
ياتقول كلامك جواك
يا متقبلشي
ملعون ابوك طالع نازل
شاعر أكره

[حسام عمر]

الانتخابات




شوف عندك يا سلاملم
واتفرج يا سلام
ع المدعو دومه عيسوي
وزير الإمن عام
فى الفصل الانتخابي
من مرسح السلام
سارح بالبلطجية
والهجامه القدام
عشان ضمان عبوره
من دايرة لانتقام
واتفرج يا سلاملم
على عيسوي يا سلام

- العيسوي بيه
- العيسوي بيه
- صاحب البوكسات
- العيسوي بيه
- والحبسخناتات
-العيسوي بيه
- ملك اللومانات
- العيسوي بيه
- والمعتقلات
- العيسوي بيه

- بشرى لجميع الهباشه
العيسوي
رمز الطفاشه
سبحان الله
من أومباشه
حكم المأمور يا ماشالله عليه
- العيسوي بيه
- العيسوي بيه

بشرى لجميع الحشاشه
العيسوي بيه
رمز الماشه
سبحان الله من أومباشه
بقي كل الإمن العام فى إديه
- العيسوي بيه
- العيسوي بيه

من أجل ضمان الحرية
لجميع تجار الباطنية
العيسوي بيه ميه الميه
حيخلي القرش
بربع جنيه
- العيسوي بيه
-العيسوي بيه

-خليكوا فاكرين
- العيسوي بيه
-تنتخبوا مين
- العيسوي بيه
- فليحيا أمين
- العيسوي بيه
- ابن أم أمين
-العيسوي بيه
- العيسوي بيه
- العيسوي بيه

[حسام عمر]

بقرة حاحا




ناح النواح والنواحه
على بقرة حاحا النطاحه
والبقره حلوب
حاحا
تحلب قنطار
حاحا
لكن مسلوب
حاحا
من أهل الدار
حاحا
والدار بصحاب
حاحا
وحداشر باب
حاحا
غير السراديب
حاحا
وجحور الديب
حاحا
وبيبان الدار
حاحا
واقفين زنهار
حاحا

وف يوم معلوم
حاحا
عملوها الروم
حاحا
زقوا الترباس
حاحا
هربوا الحراس
حاحا
دخلوا الخواجات
حاحا
شفطوا اللبنات
حاحا
والبقرة تنادي
حاحا
وتقول يا ولادي
حاحا
وولاد الشوم
حاحا
رايحين فى النوم
حاحا
البقرة إنقهرت
حاحا
فى القهر إنصهرت
حاحا
وقعت فى البير
حاحا
سألوا النواطير
حاحا
طب وقعت ليه
حاحا
وقعت م الخوف
حاحا
والخوف ييجي ليه
حاحا
من عدم الشوف
حاحا
وقعت م الجوع ومن الراحه
البقرة السمرا النطاحه
ناحت مواويل النواحه
على حاحا
وعلى بقرة حاحا

[حسام عمر]

كلمتين لمصر






كل عين تعشق حليوة
وإنتي حلوه ف كل عين
يا حبيبتي
قلبي عاشق
واسمحي لي
بكلمتين
كلمتين يا مصر يمكن
هما آخر كلمتين
حد ضامن
يمشي آمن
أو مآمن يمشي فين ؟
شابه يا أم الشعر ليلي
والجبين شق النهار
والعيون
بحرين أماني
والخدود
عسل ونار
واللوايي فى إبتسامتك
يحكوا أسرار المحار
يا للي ساكنه القصر عالي
إمتى يهنا لي المزار
كلمتين يا صبيه

طال على الانتظار
كلمتين يا مصر يمكن
هما آخر كلمتين
حد ضامن
يمشي آمن
أو مآمن يمشي فين
قصرك المسحور غيلانه
أغبي من دود الغيطان
بعد مص الغصن لاخضر
ينحتوا عضم العيدان
وإللى خلا الارض خضرا
وإللى خلا الدار أمان
عاش بجوعه ملو جوفه
مات بخوفه م الغيلان
روح الغلبان ما قالشي
عن شقا العمر إللى كان
كلمتين لمصر يبقوا
هما آخر كلمتين
حد ضامن يمشي آمن
أو مآمن يمشي فين
آدي كلمه من عذابي قلتها لك
باقي كلمه

من حنيني صنتها لك
فى الضلوع من دنيا ظالمه
كنت خايف يلمحوها
يقتلوها ف سكه ضلمه
شقشقت والنور بشاير
زهرة الصبار يا سلمى
يا نسيم الشوق يا طاير
خد لمصر الصبح كلمه
طول ما يبقي الركب ساير
بالبصاير والعنين
يبقي ضامن
يمشي آمن
يبقي شايف
يمشي فين



سجن شبين القناطر / 1973

[حسام عمر]

نيكسون جاء




أب ت ث جح
ألف باء
جونسون روح
نيكسون جاء
قولوا هأوأو
أو قولوا هاء
على صحافتنا
الغير غراء

ذات صباح
يا فتاح
بالجرانين على ريق النوم
جم على سهوه
كبسوا القهوه
وابتدأوا ف تضييع اليوم
إللي يقول النصر نميس
ينفع تاكسي
ويمشي رميس
وإللي يقول الفورد يا بيه
أجعص من أجعصها جعيص
وإللي يقول جونسون دا حمار
راجل
عقله عقل صغار
راجل تيس
من غير حيث
ينصب ألف جنازه بطار
بس اهو ارح
وحنرتاح
وحنتبحبح بقي ونقول
يخرب بيته
ويدلق زيته
ويعيش نيكسون لنا
على طول

نيكسون عال
ومش بطال
وإللي يقول غير كده
مقفول
شفت كلامه
إلا كلامه
صح كلام راجل مسئول
ولا عنيه
يا ختي عليه
فيهم سكس ماهوش معقول
وإللي يقول يا بقر يا شراكسه
نيكسون ماله ومال النكسه
وإللي يقول بلوتنا كبيره
وإللي يقول فضوها سيره
وإللي يقول مين مسئول
وإللي يقول
وإللي يقول
شوفوا بقي يعني
ما تفلقونيش
آدى صحافتنا
وغيرها ما فيش
مش عاجباكو ما تلومونيش
قولوا هأو أو
أو قولوا هاء
على صحافتنا
الغير غراء

[حسام عمر]

رجعوا التلامذة





رجعوا التلامذة
ياعم حمزة
للجد تانى
يامصر انتي
اللى باقية وانتى
قطف الاماني
لا كوره نفعت
ولا اونطه
ولا المناقشة وجدل بيزنطه
ولا الصحافة
والصحفجية
شاغلين شبابنا
عن القضية
قيمولنا صهبة
يا صهبجية
ودوقونا طعم االاغانى
رجعوا التلاميذه
للجد تاني
طلعوا التلاميذه
ورد الجناين
اسمع يا ميلص
وشوف وعاين
ملعون ابوك ابن كلب خاين
يا صوت اميركا
يا امريكاني

[حسام عمر]

السيما




شوف عندك يا سلاملم
واتفرج يا سلام
أفلام القرع كوسه
حتقدم فيلم خام
من مخرج الروايح
ومسبب الزكام
عن قصه واقعية
من تشخيص المدام
والفيلم لجل خاطرك
واخد مليون وسام
واتفرج يا سلاملم
ع السيما يا سلام

الناس ملهية وساكتة
والصاله بتشغى عيون
والفيلم مطلع ريحه
والناس مش لاقيه لمون

عيل فرحان بشبابه
ومغرق شعره صابون
مشكلته .. ما بيخلفشى
ومراته كمان بتخون
ودلال بتحب عطيه
وعطيه جدع مجنون
لازق ف زبيده التشه
أخت الأستاذ مأمون
اللي مراته ام قداره
أخت محمد سعدون
جوز تانت ماريكا الهبله
اللي مرافقه المأذون
واللي معلق نبويه
بنت الأستاذ مأمون

[أبو منار]

إيه الحلاوة دي يا حسام
انت طلعت شاعر وأنا مش شاعر

[حسام عمر]

جائزة نوبل






شوف عندك يا سلاملم
واتفرج يا سلام
مواطن
شخص عادي
مالوش أي اهتمام
ومبارك الخيانه
ومسميها السلام
وف يوم قرا الجرايد
تاريخ ما اعرفش كام
من يومها يا ضنايا
بيشقلب فى الكلام
واتفرج يا سلاملم
على شقلب يا سلام

لما محانم جيبن يا دخ
زايجة لوبن
يعنى مناحم بيجن
ياخد جايزة نوبل
تبقى النوديا
يعنى الدنيا
ماشيه بتحدف بالمندار
يبقى الشهر اتناشر ساعه
يبقي اليوم
ليلتين ونهار
يبقى القاتل
شخص ضحية
والمقتول مجرم جبار
شفتوا إزاى ؟
أما صحيح الطب اتقدم
وحنا ما وصلتناش أخبار
أيوه يالجنة لوبن بيه
قاعدة ازاى بتلجنى إيه
أنا مش فاهم حاجه صراحه
لما القاتل يا خد جايزه
كده من دون تلبيخ وأباحه
يبقي
يا إما اللجنه دى بايظه
أو لا مؤاخذه
رئيسها حمار
يبقي يا لجنه يا عره يا كوسه
جتنا وجتكو ستين حوسه
يبقي ف هذا الزمن المايل
ياما حتجري علينا هوايل
تبقي اللكلمه بدل الكلمة
والكاتب يمسك منشار
يبقي الراعش
يعنى الشاعر
يسكن شقه ف بيت
فى قصيده
يكتب فول
ياكل أشعار

[حسام عمر]

يعيش أهل بلدي




يعيش أهل بلدي
وبينهم ما فيش
تعارف
يخلي التحالف يعيش
تعيش كل طايفه
من التانيه خايفه
وتنزل ستاير بداير وشيش
لكن فى الموالد
يا شعبي يا خالد
بنتلم صحبه
ونهتف .. يعيش
يعيش أهل بلدي

يعيش المثقف على مقهى ريش
يعيش يعيش يعيش
محفلط مزفلط كتير كلام
عديم الممارسه
عدو الزحام
بكام كلمة فاضيه
وكام اصطلاح
يفبرك حلول المشاكل قوام
يعيش المثقف
يعيش يعيش يعيش
يعيش أهل بلدي

يعيش التنابله
فى حي الزمالك
وحى الزمالك
مسالك مسالك
تحاول تفكر تهوب هنالك
تودر حياتك
بلاش المهالك
لذلك إذا عزت توصف حياتهم
تقول الحياة عندنا
مش كذلك
وممكن تشوفهم فى وسط المدينه
اذا مر جنبك
أتومبيل سفينه
قفاهم عجينه
كروشهم سمينه
جلودهم بتضوي
دماغهم تخينه
سنانهم مبادر تفوت فى الجليد
ما فيش سخن بارد
بياكلوا الحديد
ما دام نهر وارد
وجاي م الصعيد
تزيد الموارد
كروشهم تزيد
وتسمع وتسلم
بأن التنابله
أو الأكالين
حيسمح كبيرهم
ويعمل مقابله
مع الفلاحين
ويحصل تحالف
ما بين الجميع
ونملا المصارف
بدم القطيع

أطيع الخليفه
أطيع والديك
أطيع التنابله
دا مفروض عليك
وتزرع وتبعت لحي الزمالك
وحي الزمالك
مسالك مسالك
تحاول تفكر تهوب هنالك
تودر حياتك بلاش المهالك
لذلك
إذا حد جاب لك سيرتهم
تبسمل تكبر
وتهتف كذلك
يعيش التنابله
يعيش يعيش يعيش
يعيش أهل بلدي

يعيش الغلابه
فى طي النجوع
نهارهم سحابه
وليلهم دموع
سواعد هزيله
لكن فيها حيله
تبدر تخضر جفاف الربوع
مكن شغل كايرو
ما يتعبش دايره
لا ياكل
ولا حتى يقدر يجوع
يا غلبان بلدنا
يا فلاح يا صانع
يا شحم السواقي
يا فحم المصانع
يا منتج
يا مبهج
يا آخر حلاوه
يا هادي
يا راضي
يا عاقل
يا قانع
ما تتعبش عقلك
فى شغل السياسه
وشوف انت شغلك
بهمه وحماسه
وعود عيالك فضيله الرضا
لأن إحنا طبعا
عبيد القضا
ورزقك ورزقي ورزق الكلاب
دا موضوع مؤجل ليوم الحساب
كمان الصحافه
حتكتب فى حالتك
وتنشر مناظر لخالك وخالتك
وتتطلع يا مسعد عليك الغناوي
وتسمع باسمك
فى قلب القهاوي
تحبك مشيره وبنات الجزيره
وقصه غرامك
تشيع فى الرداوي
يعيش عم مسعد
يعيش يعيش يعيش
يعيش أهل بلدي


القاهرة / 1967

[حسام عمر]

حارتنا





- حارتنا
- مجاري وناموس
- مرايه وفانوس
- حجاره وكراسي
- شباب ع النواصي
- دقون ع الكروش
- عرق ع القروش
- شقوق فى البيوت
- بيوت فى الشقوق
- مساءً تموت
- صباحا تفوق
-قديمه وغبيه
- لبيبه وصبيه
- فى ضيق خرم إبره
- فى غوط المحيط
- على الذل صابرة
-دا صبر الغويط
- أسانس البلاده
- معسكر ولاده
- خسيسه وجبانه
- جريحه ومهانه
-ما تسمعش ندهه
- رنين الدفوف
- بتاكل ولادها
- حتولد ألوف
- ما دام ضعنا فيها
- ضروري نلاقيها

حارتنا فى الحواري
علم على الصواري
لو قال فوقها
الكناري
تتهز المشربيه
يا حوش آدم
يا دارنا
يا ساكن حضن جارنا
سيدنا الحسين تبارك
شهيد الإنسانيه
مدد سيدنا وشهيدنا
يا قايل ومواعدنا
يكون عيدك
وعيدنا
يوم طلعة شمس جا يه
يا حاره جوا حاره
يا مجمع السهارى
من كل حي
حاره
فى الحضره الآدميه
مدد أنس الحبايب
مدد حاضر وغايب
مدد زين الصحايب
يا ساده يا موجيه
فيك العيدان هزيله
شايله الحمول تقيله
ولا باليد حيله
ولا الأيام هنيه
سيدنا الدردير يا بابا
مدد يابو الغلابه
فوق الحواري غابه
بتمص الأدميه
صبحك صبايا صاحيه
هاللين من كل ناحيه
مدد يا سيدى يحيى
توعدنا باللي هي
يا حارتنا
يام شيله
هزي الهلال
وهيلا
قدامك يوم وليله
ع الفرحه
والعيديه

[حسام عمر]

الجدع جدع






الجدع جدع
و الجبان جبان
بينا يا جدع
ننزل الميدان

و الميدان بعيد
عن جوف المدينة
يا تار الشهيد
دير ياسين و سينا

بحري و الصعيد
إحنا أهه ادينا
اصلب م الحديد
في الشدة تلاقينا
بالنار و السلاح
نعلن الكفاح
فوق كل العواصف
و هبوب الرياح
يسبق الليالي
و يجيب الصباح
و يهزم الهزيمة
و يداوي الجراح

عاوزين اللي راح
قدامكو الميدان
و الجدع جدع
و الجبان جبان

[حسام عمر]

يا فلسطينية





يا فلسطينية
والبندقاني رماكو
بالصهيونية
تقتل حمامكو في حداكو
يا فلسطينية وأنا بدي اسافر حداكو
ناري في أيديه
وإيديه تنزل معاكو
على راس الحيه
وتموت شريعة هولاكو


يا فلسطينية
والغربة طالت كفاية
والصحرا أّنت م اللاجئين والضحايا
وألارض حنّت للفلاحين والسقايه
والثورة غاية
والنصر أول خطاكو
يا فلسطينية
والثورة هي الاكيدة
بالبندقية نفرض حياتنا الجديدة
والسكه مهما طالت وبانت بعيدة
مدّ الخطاوي
هوه اللي يسعف معاكو

يا فلسطينية
فيتنام عليكو البشارة
بلنصرة طالعة
من تحت ميت ألف غارة
والشمعة والعه
والامريكان بالخسارة
راجعين حيارى
عقبال ما يحصل معاكو

[حسام عمر]

ع المحطه




ع المحطه
واللى شفته ع المحطه
طلعت الخفه ام شنطه
سلم الاوتوبيس
بنطة
حته ملعب
والاكاده
فى القوام والحسن
بطه
هى خشت درجه اولي
والكراسي بقت منطه
سابوا تاتيه
وغلب تانيه
والقطيع على اولى خطي
اللى يعلا
واللى يوطي
بص واحد م اللى هما
دمهم فلفل وشطه
شاف صنايعي
فى البريمو
قال لة خش هنا يا اسطي
تانيه انسب للى زيك
دى الحقيقة بلاش مغالطه
لاسطى قال له ياعم روق
دى الحياة تحب المباسطه
وانت شايف
مش مغمض
حاجه ملبن
حاجه قشطة
ولايعنى الكون ح يخرب
لو فقير
يلهط له لهطه

[حسام عمر]

الفول واللحمة





عن موضوع الفول واللحمة
صرح مصدر ال مسئول
ان الطب اتقدم جدا
والدكتور محسن بيقول
ان الشعب المصري عموما
من مصلحته يقرقش فول
حيث الفول المصري عموما
يجعل من بني ادم غول
تاكل فخدة في ربع زكيبة
تسمن جدا تبقي مهول

ثم اضاف الدكتور محسن
ان اللحم دي سم اكيد
بتزود اوجاع المعدة
وتعود على طولة الايد
وتنيم بنى ادم اكتر
وتفرقع منه المواعيد
واللي بياكلوا اللحمة عموما
حيخشوا جهنم ده اكيد

يا دكتور محسن يا مزقلط
يا مصدر يا غير مسئول
حيث ان انتوا عقول العالم
والعالم محتاج لعقول
ما راي جنابك وجنابهم
في واحد مجنون بيقول
انتوا سيبونا نموت باللحمة
وانتوا تعيشوا وتاكلوا الفول

ما راي جنابك وجنابهم
مش بالذمة كلام معقول !!

[حسام عمر]

الأوله بلدي



الآوله بلدي
والتانيه بلدي
والتالته بلدي
الآوله بلدي بسلطن جو موالي
والتانيه بلدي بقول الكلمه بالعالي
والتالته بلدي يا كنزي وعزوتي ومالي
الآوله بلدي

بسلطن جو موايى ودا الموصوف
والتانيه بلدي

بقول الكلمه بالعايى وع المكشوف
والتالته بلدي
والتالته بلدي يا كنزي وعزوتي ومالي
الآوله بلدي بسلطن جو موالي
ودا الموصوف دوا العيان
بقول الكلمه بالعالى وع المكشوف
وع المكشوف وفى المليان
والتالته بلدي يا كنزي وعزوتي ومالي
وملو الشوف أونك آن
تحدي الحد يا بلدي
ما بين الحق والبهتان
ورايتك تعلا يا بلدي
دليل عن صحه البنيان
ودا الموصوف

والأوله بلدي
والتانيه بلدي
والتالته بلدي

[حسام عمر]

صبر أيوب






عليل وصف علته
قال له الحكيم هوه
داء الغرور فى البشر
خلا النفوس هوه
طبيب وجاي يسعفه
صابه الغرور هوه
ترك أصول حرفته
وإنساق ورا القوة
كاد العليل ينتقل
قام قال له إيه هوه
يا مسأسأ الصبر فوق الجرح من بره
الجرح يا عم
جايب دم من جوه
فين آخر الصبر يا شيخ أيوب
لآمتي الحر يبات مغلوب
إلجو ضباب
الوقت غروب
ألديب ع ألباب
ألباب موروب
الحرب الحرب الحرب
ولا غير الحرب سبيل
والضرب الضرب الضرب
على ناصيه كل ذليل
النار والعار
لعدو الدار
والموت للخاين والغدار
كان جدي كبير السن
وكان بيقوللي كلام
زى القرآن
الحق عجوز وقديم ويغر
لكن ما يموتش وله طلاب
والتار قنطار
فوق كتف الحر
والصبر فى وقت البلوى
عذاب
والعزم صديق فى الوقت المر
ولا غير العزم تلاقى صحاب
والآرض براح
وأن داسها الذل تضيق بالناس
وألخضرة تموت
ويعربد فيها البوم أجناس
ولاتبقي حياه
ولا يبقي نظام
ولا خطوه تسير بالناس قدام
ولا تعرف بكره حييجي بايه
ولاتفهم معنى لآى كلام
ونلف نلف وبرضه نقول
الحرب سجال داير على طول
والسكه أمل
وألنيه عمل
والجهد حياه
والراحه شلل
يا زنود الناس الشغاله
ملعونه الراحه ف خط النار
النصر عروسه يا رجاله
لكن ممهوره بالآصرار
التار يا عروبتنا
التار
التار فوق رقبتنا
قنطار
وخلاص الشعب الحر اختار
الحرب الحرب الحرب
وليحيا كفاح الشعب

[حسام عمر]

باحبك





باحبك با حبك
با حبك با حبك
با حبك با حبك با حبك
يا مصر
مسايا وصباحي
أسبح بحبك
وحبك شفايا
وجراحى يا مصر
واسافر بحبك
واميل زي ميلك
وتحلا الخطاوي
فى حبك يا مصر
واحب اغترانى
فى صبحك وليلك
واحب الونس بالرفاقه
يا مصر
تنام الدموع فى العيون الهواجع
وتسهر دموعي
فى حبك يا مصر
تهون السجون
والشجون
والمواجع
ويغلا مع القهر حبك
يا مصر
ولو يحبسونى
ولو يشنقوني
ولوا فكروا بالعذاب
يبعدونى
ح اقرب واقرب
مش ممكن اهرب
وتنزل دموعي على خدودي
تشرب
تلاقى الرموش والخدود والمباسم
مراسم
وصورتك عليهم يا مصر
باحبك با حبك
با حبك يا مصر

[حسام عمر]

سلام للأرض




سلام يا ارضنا
يا غيطان الفلاحين
يا ورشه الصنايعي
يا بحور الصيادين
يا مدرسه يا جامعه
سلام والدنيا سامعه
يا دشمه يا خنادق
يا مدفع يا بنادق
واقفين والعزم صادق
تردوا المعتدين
ع الحق والسلام
سلام سلام سلام
سلام يا إدين قويه
خشنين وعرقانين
يناموا المغربيه
ويقوموا مبدرين
ويخضروا الجناين
ويطيروا الحمام
ويعمروا المداين
ويضيعوا فى الزحام
سلام يحمي الحياه
وصناع الحياه
ويزيد الانتباه
فى الناس الطيبن
للحق والسلام
سلام سلام سلام
سلام يا ارضينا
يا جنات الزيتون
يا اغلى عندنا
من حبات العيون
سلام نحميه بروحنا
ونصونه فى القلوب
ونداوي بيه جروحنا
احنا
وكل الشعوب
سلام يطرح امانى
ويزوق الاغانى
ويروق الانانى
ويسقى العطشانين
للعدل والسلام
سلام سلام سلام

[حسام عمر]

عـَــــــــزه


*

عَزه
الغرام في الدم سارح
والهوى
طارح معزه
والحنين للقرب بارح
والنوى جارح
ياعزه
ياابتسامة فجر هلت
بددت ليلي الحزين
ياندى الصبح الللي سأسأ
فوق خدودي الدبلانين
بل شوقهم
صحى لون الورد فوقهم
كل خد
وشم ورده
مين يدوقهم
غيرك انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
...
الليلادي جم خدوني ياملاكي
جوز تنابله
ونص دسته
من التيران
كنت باحلم ياحبيبتي
كنت باحلم
بيكي انتي
كنا قال
انا وانتي قال
ف جنينه خضرا
ومحاوطها البرتقان
والسيسبان
وانتي جوا قرنفلايه
بالعبير بتستحمي
اجري يمك ياهوايا
تسبقيني وتجري يمي
أحضنك
واشرب عبيرك
من شفايفك
والغصون
واقفه وشايفه
بتراعينا
بس خايفه م العيون
والعيون بتقول كلام
والكلام
طاير حمام
بينادينا بالاغاني
ويهادينا بالسلام
كنت بحلم ياحبيبتي
كنت باحلم
بيكي انتي
ايوه انتي
ومين سواكي
ياحياتي
ياملاكي
يانسيم الحب لما هب
هز القلب هزه
ياهوى الاحلام ياعزه
وانطلق في الجو فجأه
ياحبيبتي
صوت مفاجأه
صوت يخلي الدم يجمد
اصحى يا احمد
اصحى يااحمد
وانتهى الحلم الجميل
وابتدا الهم التقيل
_ فين امام
_ انتوا مين
_ احنا ناس مكلفين
تيجي سالك مش ح تتعب
واحنا طبعا معذورين
_ انتو دود الارض
واللآفه المخيفه
انتو ذرة رمل
في عيون الخليفه
انتو كرباج المظالم
والمآسي
انتو عله ف جسم بلدي
انتو جيفه
_ سكتوه ابن الكلاب
سففوه من التراب
فتشوا كل الاماكن
طلعوا رفوف الدولاب
...
كمموني يا حبيبتي
كتفوني يا حبيبتي
قوموني..قعدوني
كل شعره في جسمي
بالعين فتشوها
المخده من جنانهم
شرحوها
وانتهى التفتيش
مافيش
صدقيني
ماتخافيش
هو فيه ياعزه عندي ممنوعات
غير باحب الناس
وباكره السكات؟
...
بص واحد من التنابله
جوا عيني
وانتي عارفه
عنيه صافيه وطيبين
زي كل عيون بلدنا يا حبيبتي
شباكين
ع القلب دوغري موصلين
كان مناه يلمح علامة خوف بسيطه
طب حييجي الخوف منين ابن
العبيطه
هو مين فينا الجبان
ولامين فينا الللي خان
اللي قلبه بالمحبه و بالاماني
وبالربيع لاخضر مزهر
والاغاني
ولاكلب الصيد
واسياده الاباطره
أكالين لحم البشر
فوق الصواني؟
هو مين فينا الجبان
ولامين فينا اللي خان
هو بص في عيني بصه
ارتجف وف حلقه غصه
واتعوج ومال وقال
جملتين مش مفهومين
أصله شاف صورتين جمال
في العيون الطيبين
مصر في العين الشمال
وانتي في العين اليمين

[أبو منار]

ايه الحلاوة دي كلها يا باشا

[حسام عمر]

منقول من دكتور ايمن مزجنجى

[أبو منار]

انت حاجة بجد زي اللوز

[حسام عمر]

عذرا اخى محمد محمود لم ارى ردودك لانى كنت مشغول بالنقل



شكرا لردودك


وليك حجرين على حسابى

[حسام عمر]

كلب الست

*

في الزمالك من سنين، وف حمى النيل القديم، قصرمن عصر اليمين،

ملك وحده م الحريم، صيتها اعلى م الآذان، يسمعوه المسلمين

والتتر والتركمان ،والهنود والمنبوذين .

ست فاقت ع الرجال في المقام والاحترام

صيت وشهره وتل مال، يعني في غايه التمام،

قصره يعني هيه كلمه، ليها كلمه في الحكومه

بس ربك لجل حكمه قام حرمها م الامومه

والامومه طبع ثابت جوا حواء من زمان

تعمل ايه الست، جابت فوكس رومي وله ودان

فوكس ده عبقال املتك عنده دسته خدامين

يعني مش موجود في عيلتك شخص زيه ياسماعين

واسماعين دا يبقى واحد م الجماعه التعبانين

اللي داخو في المعاهد والمدارس من سنين

حب يعمل واد فكاكه ويمشي حبه في الزمالك

والقيامه والفتاكه يرموا طبعا ع المهالك

عم سمعه من قيامته حب يعمل فيها فله

بعد ما الوظ بيجامته اشترى حته مجله

قول مشي يقرا ف حكايه من حكايات الغرام

واندماجه في القرايه خلا مشيه مش تمام

ع اليمين يحدف بعيد خطوتين ويروح شمال

لمحه فوكس من الحديد قال دا صيد سهل وحلال

هوب نط ف كرشه دوغري جاب بجامته لحد ديلها

اسماعيل بدال مايجري قال يارجلي رجلي مالها

بص شاف الدم سايح من عاليها ومن واطيها

وياللي جاي وياللي رايح المجله مش لاقيها

حبه واتلموا الظنايا اللي هما البوابين

والهكايه والروايه قال لهم دا كلب مين

كلب مين ماكلب ماكلب مينشي سمعه لبخ حبتين

قال له واحد منهم امشي الي جابك عنده مين

قال دا شارع يامواشي للجميع بيمر منه

اللي راكب واللي ماشي مستحيل نستغنى عنه

كلمه من دا وكلمه من دا زاطو واترسمت فضيحه

قول نهايته والقصد من ده اسماعين شرب الطريحه

راحوا قسم الشرطه طبعا والنيابه كفيله بيهم

واترموا في الحجز جمعا لما ييجي الدور عليهم

حبه والشاويش امين قال سعيد النقشبندي

قام غريم عم اسماعين قاله محسوبك يافندي

قام سي سمعه يروح معاه الشاويش قال غور بدمك

وفوق قفاه كف طرقع ... داهيه ف امك

تفتكر يفضل سي سمعه قد ايه في القسم نايم

استضافه الحجز جمعه يابلاش آدي العزايم

شاف بلاوي ماتتحكيش والجماعة المسجونين

قال ياعالم ياشاويش يانيابه يامسؤوليين

خلصوه بعد المناهده جثه من جحر الديابه

هيه يمكن ساعه واحده كان في مكتب النيابه

قال له مالك ياسماعين.. قال له زي البمب مالي

قال له عضك فوكس فين قال له سيبني اروح لحالي

انت شوف سي فوكس يمكن خد تسمم غصب عني

الوكيل قال برضه ممكن والشاويش قعد يغني

هيص يا كلب الست هيص، لك مقامك في البوليص

بكرة تتولى فوزارة، للكلاب ياخدوك رئيس

عض خلق الله وقطع لحمهم واجري وبرطع

اسماعين وزفت مين، أنت عند الدولة أنفع

انت تسوى في النيابة نص ألف من الغلابه

طب يا ريت يا فكس كنا، ولا تربطنا القرابه

انت فين والكلب فين انت قده يااسماعين

طب دا كلب الست يابني وانت تطلع ابن مين

بشرى لصحاب الديول واللي له اربع رجول

بشرى لا سيادنا البهايم من جمايس او عجول

اللي صاحبه ياجماعه له أغاني في الاذاعه

راح يدوس فوق الغلابه والنيابه بالتباعه

[سيد سليم العربي]

بارك الله فيك أخي الحبيب حسام على هذا الموضوع الرائع عن شاعر المتاعب
وصلى الله على سيدنا محمد وعلى آله وصحبه وسلم

[حسام عمر]

شكرا لك اخى الجليل استاذ سيد


عندى معظم اشعاره منطوقه بس حجم الواحده مبين 2 الى5 ميجا

[حسام عمر]

بيرم

*
ياعيون الشعر الصافي

يابحور هايجين مايجين

ماشيين في طريقك دايما

وح نفضل كده ماشيين

ع الدرب اللي انت سلكته

بالليل والناس نايمين

وان كنا نقول ونزود

ونجود في المضامين

بيكون الفضل لبيرم

أسس واحنا الطالعين

وح نرجع تاني نغني

ونقول ويا الملايين

يا بهيه وخبرينا .. ع اللي جتل ياسين

[حسام عمر]

بيان هام

*
هنا شقلبان محطة اذاعة حلاوة زمان

من القاهره ومن كردفان

وسائر بلاد العرب

واليابان

ومن فنزويلا

وايضا ايران

ومن اي دار

أو بلد مستباحه

بفعل السياحه

مع الأمريكان

هنا شقلبان

محطة اذاعة حلاوة زمان

نقدم اليكم بكل الللغات

مراسح وسيما وجميع الفنون

صحافه ومنابر

وتليفزيونات

وخطبا ف جوامع

وجبنه و زيتون

ونقزح ونركب جميع الموجات

ونبحث ونفهم

في كل الشئون

ودايما نلعلع في كل الحالات

ولاحد سامع

ولايحزنون

وتسمع ماتسمع

دا ما يهمناش

لأن احنا أصلا

بناكل بلاش

فخليك في نفسك

وماتخليناش

نسلط عليك القلم

واللسان

*

هنا شقلبان محطة اذاعه حلاوة زمان

يسر الاذاعه

ومايسركوش

بهذي المناسبه

وما بندعيكوش

نقدم اليكم

ولاتقرفوش

شحاته المعسل

بدون الرتوش

شبندر سماسرة بلاد العمار

معمر جراسن للعب القمار

وخارب مزارع

وتاجر خضار

وعقبال أملتك

أمير الجيوش

ماتقدرش تنكر

تقول ما اعرفوش

ما تقدرش ايضا

تقول ما اسمعوش

شحاته العسل

حبيب القلوب

يزيل البقع

والهموم والكروب

يأنفس

يأفين

يبلبع حبوب

ويفضل يهلفط

ولاتفهموش

وتفهم ما تفهم

دا ما يهمناش

لأن انت فاهم

وعامل طناش

ح تنكر وتحلف

ح أقول لك بلاش

ح تلعب دماغنا

وتتعب كمان

*
هنا شقلبان

محطة اذاعه حلاوة زمان

لأن المخبي ظهر واستبان

وكل المسائل

بدت للعيان

وطلعت حكاوي

ونزلت كمان

عن التهريبه

وعن كيت وكان

وعن محسوبيه

وعن ألعبان

ظهر في المدينه

كأنه طوفان

وغرق مراكب

وسوح غيطان

وبعض المراكب

ح تغرق كمان

وأزمة مساكن

وأزمة أمان

وعالم بياكل

في عالم جعان

وريحة مؤامره

في جو المكان

مخطط خيانه

مع الامريكان

لدبح العشيره

وحرق الجيران

وفيه ناس بترغي

ولازم بيان

كما أبلغونا

جميع الودان

لهذا وذاكا.. وتلكم كمان

نقدم اليكم

عروسة وحصان

شحاته المعسل

وهذا البيان

*

هنا شقلبان

محطة اذاعة حلاوة زمان

بسم الله

سلام عليكم

وسلمون وموز

وأما المسائل

فهنجف ولوز

فيا اخوتي

ويا اخوات

اليكم بياني

كما هو آت

*
جميع المسائل

تمام التمام

وكل الكلام دا

مجرد كلام

فصبرا جميلا

ولاتقلقوش

وشغل الضغاين

أنا ما اقبلوش

مافيش أي حاجه

على الطلاق والعتاق بالتلاته

مافيه اي حاجه

وقدر كمان ان فيه أي حاجه

مافيش اي حاجه

ما لوش أي لازمه الكلام

واللجاجه

وعيب ان عيل يسوق السماجه

ويعمل لي باللو

ويعمل ديباجه

أنا بطبعي ضد السماسره الكبار

بحكم المنافسه

وحكم الجوار

لكن مش ف طبعي

اني أعمل فضيحه

لواحد زميلي

هبش كام صفيحه

ما كل الزمايل

بتهبش صفايح

وكل اللي جاي

ماشي زي اللي رايح

فيا ايها الشعب

صهين تفلعص

مسا التنفس

مساء الروايح

*

أخويا الامير بزرميط الايراني

بعت لي السنه دي

عزمني ودعاني

أنا قبلت طبعا

ورحنا العزومه

وكانت وليمه

ماتحصلش تاني

دا ايه المحمر

وايه المكمر

وايه المشمر

وايه الصواني

وأنا دماغي تعبت

ولفت صراحه

من الفخفخه

والهنا الأصفهاني

هناك يعني مثلا

اذا شربت طافيه

تمز بكوارع

وبسطرمه ضاني

ماشفتش هناك

ناس بتحقد عليهم

ولاناس بتشتم

فلان الفلاني

لأنه اشترى عزبتين

من شطارته

وحكمة ارادته

وطلع مباني

وبعد الوليمه استلمنا الهدايا

مفضض

ومدهب

وقز وقيشاني

وطبعا أخويا الأمير

قال لي حاجه

ح اقولهالكو طبعا

اذا الوقت ناسب

ح يطلع لي عيل

بدون اي حاجه

ويعمل لي فلحس

ويقعد يحاسب

دا حقد اشتراكي أنا مااقبلوش

ولو هو ابني انا ما اعتقوش

*

كلام عن سماسره

كلام عن دعاره

حاجات مش صحيحه

جمل مستعارة

وعايزين يخلوا البلد

أردغانه

وعايزيني اسيب البلد

من زمان

وانا مش ح اسلم

واسيب الامان

ولا بالبوليس والنيابه كمان

فيا ايها الشعب

كمل جميلك

وصبرا

والزم حتيجي المصاري

وتأكل وتشرب

تبع ما يآتيلك

وتغرق في بحر العبيد والجواري

وترسم حياتك

حسب مايرائيلك

وتملا الحواري

فساقي وقصاري

تسبح بحمدك

وتشكر جميلك

وفضل الزباله

وطفح المجاري

ختاما سلاما

وآخر كلاما

ضرورا

يسود الهدوء والوئاما

فماذا والا

ح طربقها واللا

اهرب فلوسي

واسافر قواما

سلام عليكم

وسلمون وموز

بصفتي رئيسا

وأبا

وجوز

[بنت مصر]

مجهود جبار واختيار مميز جدا
ألف شكر يا حسام

بسنت

[حسام عمر]

شكرا لكى اختى بسنت

[حسام عمر]

البتاع

يا للي فتحت
البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه
كان مسطول !


وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له
مش معقول

وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول

[daria]

ماحدش يقدر ينكر ان الفاجومي شاعر مميز

وتجربة فريدة

وان كان ظهوره المتزايد في دريم وحديثه فيما يعنيه ولا يعنيه

او بمعنى اصح فيما يفهمه او لا .....

لا استسيغه .



كان متزوجا من صافيناز كاظم الكاتبة المعروفة ..... !!

ان كانت هي فهذه معلومة جديدة وغريبة بالنسبة لي



كل الشكر يا حسام على مجهودك

قصائد الفاجومي ممتعة *3*

والحوار معه ومقدمات القصائد جديدة ايضا بالنسبة لي :)

دمت بخير

إيمان

[Abdou Basha]

البتاع

وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب
لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول


شكرا يا حسام على الموضوع ... فعلا يستحق تقييم .... *6*

بالذات البتاع الأخير ده ... :d

على فكرة القصيدة دي سمعتها قبل كده .... وعجبتني جدا ... :)

شكرا ليك.. *8*

[حسام عمر]

العفو اخى الحبيب عبد الرحمن

[drent67]

احمد فؤاد نجم يجعلنى اشعر بانه لافائده فمن قهر الى قهر ومن عداب الى عداب ومن قائد ركن مهاب الى اخر لن يجود الزمان بمثله والنتيجه من فقر وبطاله الى مزيد ومزيدولازلنا ننظر بعيون الموتى الى ما سوف تجود به قريحة البطل المغوار

[حسام عمر]

شكرا لكى اختى الفاضله ايمان


انا متوقع فيكى حبك للشعر والقرأه

[حسام عمر]

كلامك يقول انك قرأت كثيرا له


اهلا وسهلا بك اخى drent67 فى منتدى ابناء مصر

[سيد جعيتم]

الغالى / حسام
انا الحقيقة مش عارف أزتى ما مريتشى على الموضوع ده قبل كده . احمد فؤاد نجم الفاجومى شاعر جرىء وجميل وقريب من القلب . واحمل له زكريات جميلة . كان هو والشيخ امام رحمه الله يدخلون لجامعة القاهرة خلسة ووسط الطلاب يرتجل احمد فؤاد ويلحن الشيخ امام ونردد نحن الحضور ورائهم ثم نقفز من فوق الأسوار هرباً من حرس الجامعة عندما يداهمنا . ويا سلام على الندوات التى كانت تعقد فى حوش ادم او حوش قدم . ليه يا ترى بطل يكتب .. عايزين انتاج جديد يا عم احمد .. بلاش شغلانة المذيع . الشعر احسن ارجع وشوف حال الشعب وقول ..
الليل الليل الليل .. وعجين الفلاحة بالحيل
الويل الويل الويل .. لو هزيت الديل
لو قلت بديلى لأ . اندق .. بعصايا على راسى
أو بالرق .. والليل الليل الليل

[حسام عمر]

والدى الفاضل كلاماتك اسعدتنى

بارك الله فيك