روائع أحمد فؤاد نجم

[الصاعق]

إخواني الأحباء
رغم ان هذه ليست قاعة الشعر إلا اني رأيت أن اطرح هذا الموضوع هنا . سأقوم بإذن الله تعالي بطرح قصائد الشاعر الكبير احمد فؤاد نجم كمادة لنقاش هنا وشأطرحها واحدة بواحدة حتى تتاح لنا الفرصة إبداء ارائنا حولها

والبداية هي القصيدة التي كتبها عند هزيمة 67 بعنوان (( الحمد لله ))

الحمد لله

الحمد لله خبطنا
تحت بطاطنا
يا محلا رجعه ظباطنا
من خط النار
يا اهل مصر المحميه بالحراميه
الفول كتير والطعميه
والبر عمار
والعيشه معدن واهي ماشيه اخر اشيا
مادام جنابه والحاشيه
بكروش وكتار

ح تقول لى سينا وما سينا شي ما تدوشناشي
ما ستميت اوتوبيس ماشى
شاحنين انفار
ايه يعني لما يموت مليون او كل الكون
العمر اصلا مش مضمون
والناس اعمار

الحمدلله وأهي ظاطت والبيه حاطط
في كل حته مدير ظابط
وإن شالله حمار

ايه يعني فى العقبه جرينا ولا ف سينا
هى الهزيمه تنسينا
اننا احرار
ايه يعني شعب ف ليل ذلة ضايع كله
دا كفاية بس اما تقول له
احنا الثوار

الحمد الله ولا حولا مصر الدوله
غرقانة فى الكدب علاوله
والشعب احتار
وكفايه اسيادنا البعدا عايشين سعدا
بفضل ناس تملا المعده وتقول اشعار
اشعار تمجد وتماين حتى الخاين
وان شا الله يخربها مداين
عبد الجبار

[الصعيدي]

الحمدلله وأهي ظاطت والبيه حاطط
في كل حته مدير ظابط
وإن شالله حمار


الله ينور يا بوحميد .. جامدة أوي .. بس معقول اتنشرت أيامها دي ؟؟.. وللا تلاقيهم كانوا بيتعاطوها تحت الكوبري زي الماكس .. هههههههههههه .. :d :d

[أحمد ناصر]

أخى الحبيب أحمد
الله على جمال القصيدة
والله فعلا أحسست بالألم
فى إنتظار إدارتك لدفة الحوار يا أخى الحبيب

[الصاعق]

الحقيقة يا أخواني فيه اجزاء في القصيدة دي تصلح لعصرنا .. مثلاً

يا اهل مصر المحميه بالحراميه
الفول كتير والطعميه
والبر عمار
والعيشه معدن واهي ماشيه اخر اشيا
مادام جنابه والحاشيه
بكروش وكتار

شوفت حتة يا محمية بالحرامية دي

ولا دي
ايه يعني شعب ف ليل ذلة ضايع كله
دا كفاية بس اما تقول له
احنا الثوار

هو فيه ذل اكتر من اللي احنا فيه دلوقتي؟

الحمد الله ولا حولا مصر الدوله
غرقانة فى الكدب علاولهوالشعب احتار

القصيدة دي بتمثل واقع شعبنا الغلبان مع حكامه منذ الثورة . الكدب على الشعب اصبح افيونة الحكام وإدمان غير قابل للشفاء

[الصعيدي]

الحقيقة يا أخواني فيه اجزاء في القصيدة دي تصلح لعصرنا

أتفق معاك يا أستاذ احمد .. مع تعديل بسيط .. هنخليها :

الحقيقة يا أخواني القصيدة دي تصلح لعصرنا

*14* *14* *14*

إيه رأياااااااااااااااااااااااك

[أحمد ناصر]

لو واجهت أى مسئول بالسؤال لماذا تكذب الحكومة على الشعب
فسيقول لك على الفور ..إن كذب الحكومات على الشعوب ظاهرة تحدث فى كل بلاد العالم وليس عندنا فقط
ونحن من أكثر الدول التى تحرص على الشفافية فى التعامل
والتصريحات التى تصدر من المسئولين ليست كذبا ولكنها تصريحات من باب التفاؤل ورفع الروح المعنوية للمواطنين حتى وإن كانت وهما وسراب
زمان كنا بنقول على أى كلام لا نصدقه (يا عم ده كلام جرائد)
الآن يمكننا أن نغير هذا المصطلح إلى (يا عم دى تصريحات مسئولين)

[الصاعق]

والله معكم حق يا جماعة
شوفوا إزاي الحكومات من زمان لا يهمها شعبها

" ايه يعني لما يموت مليون أو كل الكون ...... العمر اصلاً مش مضمون والناس اعمار "

الله يرحم شهداء الشرطة الثلاثة الذين قتلتهم إسرائيل

"ايه يعني شعب في ليل ذله ضايع كله "

يلا نخبط دماغنا في الحيط
ايه رايكم

[الصاعق]

اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عيالك
عرقك مرقك
ولا يهنا لك
اصحى يا عا مل
غير حالك
صون المصنع
واصنع مصر
اصحى وكونى وعيشي يا مصر

اصحى يا زارع مصر الخضره
قدره وخضره
ونور وجمال
ابدر غيطك
واحمى البدره
ضد الافه
والاستغلال
ارضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر

واصحى يا جندى
يا تار الشهدا
عمى وخالك
اختى واخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت املنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر