سافر إلي أمريكا ! _._._ تجربة لدعم المنتدى _._._ الديك الرومي ؟؟ القصة الكاملة ليوم الشكر _._._ هل ترغب بالسفر إلي تركيا
إسلاميات - معرض الصور - عيلة النجعاويه - سفر وسياحة - إنفلونزا الطيور - مدونات - الموبايل - المجلة - هريدي اورج - المصدر التعليمي - بريد مجاني - ألعاب فلاشية - قس سرعة النت - أركيد الألعاب - بحث


المساعد الشخصي الرقمي

مشاهدة النسخة كاملة : حمارتي العارجة ... وحاجات تانية

وادكول مش معقول
15-10-2002, 01:50 PM
دي بعض الاشعار بالعامية ... لشعراء لسه جنب الحيط مرمية


الكاتب : إمام الليثي- 35 عاما- مصر


أكتب

يتوه الكلام مني

وأحكي لك

يا ريت عني

حمارتي العارجة تعبانه وسكتها بعيدة سنين..

وفيه محاذير..

طرق ممنوعة بامشيها وأنا راكب بلف وأدور

علشان أوصل

ما بوصلشي

أكتب

وقف قلمي ومات الحبر..

وتاه الحرف في الكلمة

وحِرنت كلمتي ع السطر

جرتني حمارتي ع الحانة

سكرت وتهت

دخلت غريب.. خرجت غريب

خلعت عباية المجاذيب

وفي المولد بقيت محسوب من المحاسيب
وادكول مش معقول
15-10-2002, 01:51 PM
خالد علي حسين – 23 عاما – مصر


الفه فؤاد انكسر والدمع صار سكة

اللام كلام اتسطر وفتحنا بيه عكا

السين سلام كالمطر أصبح كما البركة

والطين على الروس يغني: الوداع مكة

يا أم اليتامى بكيت والضحك كان صوتي

ومن عذابك شكيت والرد كان موتي

ما تطلبيش مؤنتي ده عدونا واحد

قتلك زرع محنتي خلانا نتباعد

بيني وبينك يا حبيبتي سنين

لو ترجعيها أعيدك

بس فين ترجع

بيني وبينك يا حبيبتي، حزين

ده كل شيء في الحياة

للقلب صار يوجع

أنا جيت في مره أكرهك وقالولي عيب يا ابني

قولت لهم رجعوها قالو لي عيب يا ابني

طول عمرنا حبنا بيهد ما بيبني

ابنك يا أمي وادينا في مهب الريح

سألوني فين سكتك رديت وصوتي صريح

طالع على صخرتي قلبي عليل وجريح

بصيت ورا لسكتي والدم ما ليها

راحت خلاص قصتي والدم ده ليها

سهم المحبة سرح جوه الفؤاد ليها
وادكول مش معقول
15-10-2002, 01:53 PM
سامي عبد المنصف - مصر


أنا حبيتك من غير ما أعرف إني بحبك

من غير حتي ما افكر فيكي

وانتي بعيدة

زي النجمة . . زي البدر

نورك يملا الدنيا عليا لكن بيني وبينك دهر

* * *

لما بااشوف الفرحة في عينك

يرقص كل الكون في عينية

واسمع صوتك لو مش ليا

قلبي يزلزل كل كياني

وكل الدنيا تبقي في ثانية ملك إيديه

وآه لو شفت دموع في عيونك

نازلة بتروي ورد خدودك

باشعر إن الدنيا ما تسوي

غير منديل السعد نصيبه

راح يتهني ويلمس خدك

أنا وصيته يقول لعيونك

إني بحبك

من غير ما أعرف إني بحبك

من غير حتى ما افكر فيكي

وانتي بعيدة

زي النجمة . . زي البدر

نورك يملا الدنيا عليا لكن بيني وبينك دهر

* * *

مش باتمني أكون لك عاشق

ولا باتمني تكوني حبيبة

ولا باتمني أكون لك فكرة تخطر حتي في بالك مرة

ولا باتمني في قلبك ذرة أسكن فيها ان شالله ثواني

واعاود تاني

أمني عينية بسحر عينيكي وادور حواليكي

كوكب حاير وانتي الشمس

بيهمس همس

أنا حبيتك من غير ما أعرف إني بحبك

من غير حتي ما افكر فيكي

وانتي بعيدة

زي النجمة . . زي البدر

نورك يملا الدنيا عليا لكن بيني وبينك دهر

* * *

كل مناي إني أحبك ليل ونهار

حبك يملا عليه الدار

لحن الكلمة في صوتك آية

يكون إلهامي لألف حكاية

وألف قصيدة ف ألف ديوان

عن سنيورة ساكنة ف قلب راجل غلبان
وادكول مش معقول
15-10-2002, 01:55 PM
عبد الله محمد مصطفى (10 سنوات) - مصر

الحيزبونة والحيزبون

ناحلين وبرنا

والهم طالنا

بيشحتونا من بيت أبونا

جاهل وناوي على دمارنا

غراب وغاوي ينشد غناوي

لما شجرنا صبح خراب

دخل وخلّى البيوت تراب

يضحك علينا

يخطف النور من عنينا

ينشر سراب

ويقول دا سيدنا

يادي العذاب

بعد الشباب

الظهر محني

وكلام هباب

صبحنا نشحن من الكلاب

إيه اللي باقي

هيوروثونا

ويخرجونا من التراب

يادي العذاب

***

إزاي نفرح

أحمد محمد مصطفي (13 سنة) - مصر


يوم العيد

يوم نفرح له

لأنه جديد

آخر مرة أنا ما فرحتش

صاحبي سألني

إنت حزين

والكل سعيد

قلتلو حاسب

هي الفرحة

بلبس جديد

جوه بيوتنا أحزان ياما

أب بعيد

ابن شريد

أم تنام على خدها دمعه

ولا فيه حد يبص لحد

إلا بحالة شك وكيد

وعشان خاطري

قول لى يا صاحبي

إزاي نفرح

مين العيد
وادكول مش معقول
15-10-2002, 01:56 PM
أحمد الطحاوي - 24 عامًا - مصر

جايين نفتح قلوبنا، ونخلي النبض صوت

إزاي نحلم بجنة واخواتنا هناك تموت

تحرم علينا جنة.. طول مانتي بعيدة عنا

هانشيل نارنا وعذابنا وكفاية خلاص سكوت

يا قدس هاترجعي

****

كاتبين عهد بدمانا ان انتي تعيشي بينا

يا ليل فارق سمانا، يا نور الصبح جيلنا

يا عنينا دمعي.. يا إدينا اتشجعي.. يا رياحنا سمعي.. وأخرج يا وعد منا

تحرم علينا جنة.. طول مانتي بعيدة عنا

هانشيل نارنا وعذابنا وكفاية خلاص سكوت

يا قدس هاترجعي

****

عمرك ماهتبقي ذكرى، هاتكوني زمان وبكرة

وراجعة يا قدس حـرة، يا مهد لكل دين

مافيش ف الحق خوف، يا عالم كله شوف، مهما تكون الظروف

فداها ألف درة نصارى ومسلمين

يا طير وصل ندانا، يا رياحنا سمعي، واخرج يا وعد منا

تحرم علينا جنة.. طول مانتي بعيدة عنا

هانشيل نارنا وعذابنا وكفاية خلاص سكوت

يا قدس هاترجعي
وادكول مش معقول
15-10-2002, 01:56 PM
قالوا زمان العولمة

والكل فيه واحد

أمريكا أفريقي

يباني أسباني

لا دولة أولى

ولا دولة ثانية

ولا دولة ثالثة متأزمة

جعانة متشردة

متحاصرة مذلولة

مغلوبة على أمرها

تخدم مصالح دولة

عايزة السيادة لنفسها

ايه ذنبها

ثروتها منهوبة

وحدودها داخل أرضها تاهت

لا سيادة ولا عزة

قالوا زمان العولمة

والكل فيه واحد

والدنيا قرية صغيرة

أمريكي أفريقي

إخوان

الكل سيان

وما فيش جعان

لبس ودوا

وبيوت أمان

لا في جريمة

ولا جبان

ولا فساد

ولا حتى نهب

قوت العباد

ما نجبش جات

تخرب بلاد

علشان بلاد

وفي النهاية

ما فيش جديد

سادة وعبيد

تمثال هدية.. لقيَّة

حرية وللا للعبودية

والشعلة دبة منارة

ولا تضليل

آدي النظام شاهد

قالوا زمان العولمة

والكل فيها واحد
وادكول مش معقول
15-10-2002, 01:57 PM
محمد الصغير – 28 عامًا - مصر

مش هقول العشق كان يوم ما شوفتك

عشقي ليكي من زمان وفي قلبي صورتك

والخيال رسم لي صورتك ..

و البراءة اللي ف ملامحك

حتى ضحكة العيون..

نظرتك ليا..

ابتسامتك

وصدقيني..

حبي ليكي

مش هيبقي ف يوم جنون

ضمتك لي بحنان..

قلبك اللي يخاف علي

تجعليني ف آه وكان..

واملك الدنيا ف إيديا

واشعر إني ف دنيا تانية…

في السما فرحان بطير
وادكول مش معقول
15-10-2002, 01:58 PM
أحمد محمد مصطفى - 13 عاما - مصر

حلم السلام

ده لدولة مسكة مصيرها بإديها

وهم السلام

فساد وتشريد

أصحاب أرض بيطردوا زي العبيد

وما فيش غير حجر في الإيد

دبابة وبجنزيرها

تدهس طفل وليد

طيارة وبتنسف

أبراج الحمام

وحمام السلام محبوس

فين السلام

كله كلام

وشيطان بيوعد بالأمان

فين الأمان وحلم السلام

كله كلام

نفسي ترجع فلسطين أرض عربية

مش مقر لعصابة يهودية

الأرض اللي مات فيها الدرة وإيمان

وغيرهم كتير

لو كانت الإيد اللي بتبني وتعمر

بدل الإيد اللي بتهد وتدمر

كان الوطن يبقى للكل بستان

بيقولوا دي معاهدات سلام

وهي مؤامرات اللئام

وشارون بيشرب دمنا

وبيروي أرضنا الحرمان

نفسي أشوف القدس حرة وأبيه

مش مستوطنة يهودية

ودايمًا نلاقي نفسنا بنقول

إمته الزمان يرجع يا زمان

آه لو نسيب زمان الجشع

آه يا زمن الوصول إمته وبكام

دي دولة ولا بيعة بتنجان
وادكول مش معقول
15-10-2002, 01:59 PM
موسى محمد إبراهيم - 21 عامًا - تشاد



القلب ملسـوع والنفس لـم تطـب
**
والعين تبكي من شدة الخطر

أمريكة ترنو للعالم العربي والإسلامي
**
بمنظـار الحقـد والغـدر

هــدم وظلـم غـاشـم لـجـب
**
قذف ورعب في أواسط البشر

نـار تأجـج في السـودان مقصـدة
**
قتل الشعوب بتطاير الشرر

وكـذا أفغـانستـان بالظلـم صابـرة
**
صبر أيوب ليس كمثله صبر

فيـا مجلسـا للخـوف اجـتمعـوا
**
وحددوا الإرهاب بالعلم والعبر

إن الدفـاع عـن الدين والوطـن
**
يدعيه الغرب إرهابا فمعتصر

إن السـلام في الإسـلام يشـمله
**
ليس لمجلس الأمن فيه من نظر

فـلا مجلسـا بعـد اليـوم ينفحنـا
**
بقرارات يخطها على الأوراق بالحبر

وكيف لا ومجلـس الأمـن منحصـر
**
في ظل أمريكا والظلم منتشر

فلنقف مع السـودان وقفـة صابـر
**
ولنمطر العدوان بالرصاص منهمر

وتـلك مقالـة أقولهـا خالصـة
**
إن مجلس الأمن للأمن يفتقر

فيا قوم كفي بكفكم للعدوان نردعه
**
ظلما بظلم ثم الضرب بالضبر
وادكول مش معقول
15-10-2002, 02:00 PM
هانى حسني- مصري - 26 سنة



جوه الازازه
قاعد بفكر

راح أقدر أخرج
ولا مش هقدر

لازم هحاول
يمكن أنازل

وأنشا الله أوصل
حتى بجوازه

جوه الازازه
ريحة كريهة

وناس سفيهة
وعيوب كتيرة

صعب نداريها
وجوه عتمة

والدنيا كتمة
وليلاتي تسمع

ميت ألف مرة
ف ألفين جنازة

برة الازازه
آخر لذاذة

العيشة عيشة
واللحمة ريشة

والخير كتير
وكله طازة

يبقي يا صاحبي
أكل الفتاته

وشغل اللتاتة
مالوش لازمة

ومالوهوش عازه
ده كتف صاحبي

هاطلع عليه
صاحبي وحبيبي

هايقولي إيه
ده مين دا راخر

جاي يغالبني
ما أنا أصلي ناقصه

يا عم سيبني
قربت أوصل

فاضلي تكه
يا عنيه طلي

على جو بره
شاهدي الحلاوة

شوفي المسرة
ياألف حسرة

يا عيشة مرة
جوة الازازه

قعدت أخطط
قعدت أدبر

وخرجت منها
لازازه أكبر
وادكول مش معقول
15-10-2002, 02:01 PM
أحمد عبيد- 23 عامًا -مصر



يا ام محمد ســـامحيني
واقبلى تعازيا ف إبـــنك

موت إبنك كان على عيني
ما املكشي غير اني اكتب لك

مش سهل علىّ شــعوري
إنك محتاجه لإيـــــدي

وانا قُوتي معُدتش مــالكه
محتاج انا مين يحـــميني


يا ام محمد سامحيني

يا ام محمد أنا عـــارف
إني بأجدّد أحـــــزانك

واني بكلماتي باقــــلّب
جوة دفاتر نســـــيانك

آسف.. وازاى راح تنسي؟!
ودا شئ يطويه نســيان؟!

سامحيني بجهلي وضـعفي
أنا واللي يدينوا بـــديني


يا ام محمد سامحيني

يا ام محمد ســـامحيني
أنا ناسي إنك مجــروحة

والجرح ف قلبك ضـارب
من غزة لحد أريــــحا

لكن زى انتي ما قـــلتي
صار إبني شعار لجــهادنا

باركولي لى شهادة إبــني
مش عايزة اللي يــعزّيني


يا ام محمد سامحيني

يا ام محمـــــد واللهِ
جرحك من جرحي تــمام

لكن.. أنا جرحي مسـمّع
من مصر لحد الشــــام

أنا برضك زيك لســـّه
بحلم بالفجر الطالــــع

بحلم واتمني أشـــوفه
قبل ما تتقضّي ســـنيني


يا ام محمد سامحيني

ما انا واحد مسلم عربـي
ما أفرقش عن المــلايين

بانده لصلاح يرجع لـي
واتباهي بيوم حـــطين

وباشوف الحلم العربــي
واتاثر بيه وبـــــعيّط

واسمع فيروز بتغنـــّي
وف صوتها بلاقي حنيني


يا أم محمد سامحيني

يا ام محمد كان نفســي
آجي بنفسي أعزّيـــكي

وامسح دمعة ما نـزلتشي
رفضت تدمعها عينــكي

لكن وازاى ح اوصـلك؟!
واحنا اللي ما بيننا حدود

وسلوك شايكة بتــمنعنا
مين راح ليكي يـعدّيني؟!


يا ام محمد سامحيني

يا ام الشهداء أنا عارفـك
صامدة كما الأقصي تمام

زي محمد كان صــامد
هو و"رامي" و" بسّـام "

زى المقلاع والطــوبة
اللي ف إيـــد الأولاد

زي الكُره اللي ف قلبـي
والنار اللي بـــتكويني


يا ام محمد سامحيني

لكن خدي عهد علـــىّ
دم ابنك مش ح يــروح

وبإيدي ح أبرّد نــارك
وح أطيّب أى جــروح

وبإيدي ح أطلّع فجــرك
بعدما طالت لـــياليكي

ولحد ما اوفّي بوعــدي
باتراجاكي تســـامحيني


يا ام محمد سامحيني

إسلاميات - معرض الصور - عيلة النجعاويه - سفر وسياحة - إنفلونزا الطيور - مدونات - الموبايل - المجلة - هريدي اورج - المصدر التعليمي - بريد مجاني - ألعاب فلاشية - قس سرعة النت - أركيد الألعاب - بحث